Kardozo

Merkato në dalje te Partizani, klubi i vendos kushte sulmuesit

Sport Ekspres — Mon, 22 Jul 2019 08:38:28 +0000

Merkato e Partizanit është fokusuar në repartin e sulmit. Transferimet e lojtarëve si Solomon dhe Braun kanë bërë që te “demat” të krijohet një ngjeshje e madhe dhe logjikisht dikush duhet të largohet.

Një ndër lojtarët e përfolur më së shumti për një ndarje me kryeqytetasit është Lukas Kardozo. 25-vjeçari ka qenë i pafat gjatë qëndrimit të tij me kryeqytetasit. Një dëmtim i rëndë në gju gjatë vitit të kaluar bëri që braziliani të qëndronte për më shumë se 8 muaj larg fushave të blerta.

Një largim nga Shqipëria preferohet nga sulmuesi, por fjala e fundit i takon klubit kryeqytetas. Braziliani ka një ofertë konkrete, gjithsesi largimi nga “demat” s’do të jetë aq i thjeshtë. Partizani nuk pranon ta lëshojë futbollistin pa u kompensuar nga ana financiare.

Kardozo iu bashkua të kuqve në janar të vitit 2018 nga maqedonasit e Pelister. Për kartonin e 25-vjeçarit u pagua një shumë te përafërsisht 30 mijë euro, shumë kjo që Partizani kërkon ta marrë mbrapsht në rast largimi të futbollistit.

“Blerja” e parë e Partizanit: Duhet të ngremë kokën, e tillë është jeta

Sport Ekspres — Sat, 15 Dec 2018 09:30:58 +0000

Më në fund dritë në fund të tunelit për Lukas Kardozon. Sulmuesi i Partizanit u rikthye në fushën e blertë pas një periudhe shumë të gjatë larg fushave të lojës, teksa kishte dëmtuar gurin dhe faza e rikuperimit ka zgjatur plot 7 muaj. Braziliani mund të konsiderohet si një “blerje” e janarit, pasi edhe trajneri gega u shpreh pas ndeshjes se pas fazës përgatitore lojtari në fjalë do të jetë plotësisht gati për ekipin dhe do të jetë një ndihmë e madhe.

Vetë Kardozo ka reaguar përmes një postimi në profilin e tij në Instagram, ku është shprehur se ndihet i lumtur që më në fund është rikthyer pas shumë pengesash dhe një periudhe mjaft të vështirë për të.

“Shtatë muaj pas dëmtimit në gju, arrita që të luaj ndeshjen e time të parë për këtë edicion. Pas shumë pyetjesh dhe vështirësish që kam kaluar nga ana psikologjike, kam punuar shumë që të kthehem sa më parë në fushën e blertë dhe jam i lumtur që ia dola të luaj në këtë ndeshje. Duke u përballur me shumë probleme, dështime dhe gabime, kam mësuar shumë, pasi jeta e tillë është dhe duhet të ngremë kokën të lumtur sepse pas stuhisë gjithçka nis nga fillimi. Do të punoj çdo ditë që të përmirësohem dhe dua të falënderoj Zotin për gjithçka, mbi të gjitha që kemi shëndet. Asnjë problem nuk është i madh, nëse dëshira për të fituar është akoma dhe më e madhe”.

Shtohet konkurrenca në sulmin e Partizanit, braziliani pret minutat e tij

Sport Ekspres — Sun, 18 Nov 2018 10:39:35 +0000

Partizani ka bërë thuajse gjithçka mirë në 13 javët e para të kampionatit, pasi e sheh veten në krye të klasifikimit. “Demat” kanë ndryshuar shumë nga edicionet e fundit, pasi këtë sezon nuk bërtasin me të madhe që kërkojnë titullin. Trajneri Gega ka sjellë një tjetër frymë dhe ambienti ka qetësi, çka është një faktor i rëndësishëm në një skuadër.

Edhe pse gjërat një në rrugën e duhur, shihet se në sulm kryeqytetasit kanë paksa mangësi, kjo për faktin se pjesa më e madhe e ndeshjeve janë zgjidhur nga mesfushorët, të cilët duhen përgëzuar që kanë plotësuar dhe repartin e avancuar. Gjithsesi, lajme të mira bëjnë për Partizani, pasi duke nisur që nga takimi me Flamurtarin do të rritet numri i alternativave për sulmin.

Lukas Kardozo e ka lënë pas dëmtimin që ka pësuar dhe në dy takimet e fundit ka qenë ën stol, por pa u aktivizuar. Braziliani nuk ka zbritur ende në fushë për këtë edicion, por ky pushim duket se i ka shërbyer shumë 24-vjeçarit, pasi duke nisur që nga ndeshje me vlonjatët ai mund të zbresë në fushë, në varësi të situatave.

Partizani, ndaj Teutës me moralin lart dhe me… Kardozon

Sport Ekspres — Mon, 01 Oct 2018 09:01:45 +0000

Derbi i 150-të i kryeqyteti shkoi në favorin e Partizanit, që ruan një ecuri fantastike prej 14 ndeshjes pa u mundur në takimet direkt me Tiranën. Suksesi jo vetëm që ishte në një ndeshje speciale, por “demat” tani e shohin veten në vendin e parë me Kukësin.

Java e shtatë rezervon një ndeshje mjaft të vështirë për të besuarit e Skënder Gegës, që do të sfidojnë Teutën, e cila mundi korçarët pak ditë më parë.

Sigurisht që pas ndeshjes me Tiranën morali është lart dhe ka entuziazëm në kampin e kuq, megjithatë një tjetër lajm i mirë vjen për stafin teknik. Në seancën e djeshme stërvitore pjesë e grupit ka qenë dhe Lukas Kardozo. Sulmuesi ka pasur një dëmtim që e ka penguar që të japë kontribut në javët e para. Braziliani duket se është gati dhe mund të ketë minuta që në sfidën e radhës.