Birja: Korabi synon Superioren, ju tregoj arsyen e rinovimit!

Sport Ekspres — Mon, 24 Jun 2019 19:14:50 +0000

Peqinasi 30-vjeçar i katërkëndorit të Korabit, Kadri Birja, është rinovimi i radhës te skuadra dibrane. Vetë gardiani deklaron për Sportekspres.com se i ka qëndruar besnik skuadrës që ai tashmë e quan si të zemrës. Sa i përket ofertave nga ekipet e tjera, Birja deklaron se ato kanë qenë nga klube të njohura, por pa treguar kategoritë, duke qenë se Korabi këtë sezon po organizohet me synim ngjitjen në Superiore.

KORABI – “Gjatë këtij muaji, dy skuadra më kanë bërë ofertë. Realisht ishin serioze dhe unë i kam respektuar për vlerësimin që treguan për mua. Gjithsesi kam menduar që t’i qëndroj besnik Korabit edhe këtë sezon, sepse më duket vetja si i ‘dashuruar’ me këtë skuadër. Në sezonin e kaluar ne e nisëm shumë mirë, por gabuam kryesisht në fazën e dytë. Mbetëm në zonën Play-off të grupit tonë, që ishte synim i paplotësuar”.

MERKATOJA – “Më duket shumë normale kjo merkato, profesionalisht e zgjuar e cilësore. Kështu mund të pretendojmë synimin tonë për ngjitje në Superiore, e besoj se ditët në vazhdim do të sjellin të tjerë emra cilësorë te Korabi”.

AGRON KAJA

Birja: Premtova se do e prisja penalltinë, në Burrel për maksimumin

Sport Ekspres — Thu, 07 Feb 2019 10:51:59 +0000

Skuadra e Korabit është një nga pretendentet e në pesë skuadrat e para në renditjen e Grupit A të Kategorisë së Parë, jo vetëm se renditet në vendin e 4-t, me 24 pikë të barabarta me Dinamon e vendit të 3-të. Në javën e 15-të Korabi fitoi pastër 3-0 me Veleçikun, në të cilën portieri Kadri Birja u bë protagonist me pritjet e shumta të tij, e mes tyre edhe të një penalltie. Për SportEkspres.com gardiani i skuadrës dibrane deklaron se janë në rrugën e duhur, por synimi është për ngjitje në renditjen e kësaj kategorie.

“Me Veleçikun ishte një ndeshje e vlerësuar maksimalisht nga e gjithë skuadra dhe fitorja u duk më e lehtë edhe nga përkrahja e madhe e tifozerisë, e cila u bë faktor në këtë sfidë të parë për vitin 2019 në kampionat. Ndërsa për penalltinë unë e kisha premtuar në skuadër, por atë ditë dedikimi ka qenë për presidentin e skuadrës sonë Fehmi Mziu, i cili kishte datëlindjen”, kështu theksoi fillimisht në deklarimin e tij portieri i Korabit, Kadri Birja.

Ndërsa për ndeshjen e javës së 16-të të cilën Korabi e luan në transfertë me Burrelin, Birja e quan të vështirë dhe rezultatin mendon që t’ia lerë fushës së lojës. “Të gjitha ndeshjet janë të vështira, sidomos këto të fazës së dytë ku çdo skuadër kërkon të marrë sa më shumë pikë. Edhe për ne në Burrel do të jetë një ndeshje e vështirë, por do të shkojmë për të dhënë maksimumin dhe rezultatin do t’ia lemë fushës së lojës”.

AGRON KAJA