Joshua Kimich

Barcelona shqetëson Bajernin, gati oferta për yllin gjerman

Sport Ekspres — Thu, 06 Jun 2019 13:23:49 +0000

Dështimet në sezonet e fundit në Champions Ligë e kanë lodhur Barcelonën. Trofeu prestigjioz mungon në Katalunjë prej vitit 2015, aty ku Mesi me shokë mposhtën Juventusin 3-1 në finalen e Berlinit.

Rikthimi te triumfi në Europë është objektivi i madh për sezonin e ardhshëm dhe drejtuesit nuk po kursehen për përforcimin e skuadrës. Emri i fundit që ka dalë në skenë është i bujshëm.

Portugezi Semedo është drejt largimit dhe Barcelona ka piketuar pasardhësin e mbrojtësit të djathtë. Sipas raportimeve të katalanases “Sport”, kampionët e Spanjës pëlqejnë shumë Xhoshua Kimish.

24-vjeçari ka një kontratë deri në vitin 2023 me Bajernin e Mynihut, që vështirë të heqë dorë nga një prej lojtarëve më të rëndësishëm të saj. Megjithatë, Barcelona po monitoron situatën dhe po përgatit një ofertë tunduese për klubin bavarez dhe vetë lojtarin.

Barcelona këmbëngul, Bajerni i Mynihut i bën bllokadë

Sport Ekspres — Thu, 28 Mar 2019 21:59:47 +0000

Barcelona hedh sytë nga Gjermania dhe është fiksuar me një nga titullarët kryesorë të Bajernit të Mynihut. Xhoshua Kimish është një nga ata futbollistë që po spikat me bavarezët dhe vlerësohet shumë për faktin që mund të luajë në disa pozicione.

Sipas asaj që raporton “Mundo Deportivo”, Barcelona është vënë në ndjekje të 24-vjeçarit. Gjithsesi raportohet se Bajerni i Mynihut nuk ka ndërmend të heqë dorë nga Kimish, i cili vlerësohet maksimalisht prej tyre dhe shihet si një element i rëndësishëm për të ardhmen.

Bavarezët duan të përforcohen dhe largimi i një elementi cilësor të formacionit do të ishte një hap pas. Ata madje po projektojnë që gjatë kësaj vere të bëjnë disa afrime “big”, pasi duan të jenë konkurrues edhe në Europë.

Këshilla e veçantë e presidentit: Kimish mos vish më këpucë “Nike”

Sport Ekspres — Mon, 04 Mar 2019 14:38:01 +0000

Xhoshua Kimish është një nga lojtarët më të mirë në qarkullim në pozicionin e tij. 24-vjecari bavarez ka vërtetuar se është një talent “bio”, ku me paraqitjet e tij me kampionët e Gjermanisë ka bërë që mungesa e një legjende si Filip Lahm të ndihet shumë pak, për të mos thënë fare. Lojtari i “Pancerave” njihet edhe për pozicionet e shumta që arrin të mbulojë si në mbrojtje edhe në mesfushë duke e bërë atë një lojtar shumë dimensional. Gjithsesi një episod jo i zakonshëm i ndodhi atij në ndeshjen e fundit.

Mbrojtësi i Bayern është parë të rrëshqasë disa herë në fushën ”Borussia-Park” gjatë ndeshjes që kampionët e Bundesligës e fituan 1-5. Ky fragment është pikasur edhe nga kreu i klubit nga Mynihu, Uli Hënes, i cili sipas gazetës Bild e ka ndalur para dhomës së zhveshjes lojtarin dhe mësohet t’i ketë thënë të mos veshë më këpucë “Nike”, por “Adidas”. “Duhet të veshësh këpucë ‘Adidas’ që të mos rrëshqasësh kaq shpesh”, është shprehur presidenti I klubit ndaj lojtarit.

Kujtojmë që “Adidas” është firmë gjermane dhe përveçse vesh klubin bavarez, është edhe aksionere. Veshja e këpucëce të markës amerikane nga Kimish nuk ka sesi t’i pëlqejë Hënesit. Kujtojmë që mbrojtësi ka një kontratë me “Nike”. Dy firmat sportive dominojnë tregun e veshjeve sportive dhe duelojnë dhëmb për dhëmb me njëra tjetrën që prej shumë vitesh.

Habit Kimish, kritika të shumta ndaj… vetes

Sport Ekspres — Mon, 04 Feb 2019 20:50:46 +0000

Bajerni i Mynihut mori një humbje të rëndë në transfertë fundjavën që lamë pas, teksa humbi 3-1 ndaj Bajer Leverkuzen. Forma e ekipit bavarez ka lënë për të dëshiruar në pjesën e parë të sezonit, teksa kanë një diferencë nga Dortmundi i vendit të parë plot 7 pikë.

Në sfidën ndaj Leverkuzen, ekipi nga “Allianz Arena”, shfaqi shumë pasiguri, teksa një ndër lojtarët me performancën më të dobët ishte Xhoshua Kimish. “Xholi” i Bajernit, ka folur për mediat dhe ka kritikuar veten për paraqitjen e tij në ndeshjen e fundit.

“Në fillim të ndeshjes, humba dy apo tre topa, që në një situatë normale nuk do të kishte ndodhur. Gjithashtu, nuk isha i aftë t’i jepja skuadrës atë që jap gjithmonë. Do të shkoj në shtrat i mërzitur dhe jo vetëm prej humbjes, por edhe prej performancës time”.