“Më frymëzoi suksesi i vëllait”, Jozef Ekuban flet si ‘dem i kuq’

Sport Ekspres — Sat, 06 Jul 2019 16:55:14 +0000

Mbiemri Ekuban ngjall kujtime të bukura për tifozët e Partizanit. Jozef Ekuban, vëllai i vogël i ish-sulmuesit të “demave”, Kaleb Ekuban, ka ardhur në Shqipëri për të ndjekur të njëjtën rrugë që rezultoi e suksesshme vëllait të tij.

Në një intervistë për “RTSH SPORT”, lojtari i Partizanit foli mbi ditët e para me kampionët e Shqipërisë dhe ngjashmëritë midis tij dhe vëllait të tij.

Ekuban: Te Partizani jam mirëpritur nga klubi, stafi dhe shokët e skuadrës. Tani për tani po ndihem shumë mirë. U binda të jem pjesë e Partizanit, sepse para së gjithash më dhanë mundësinë të luaj në një kampionat të rëndësishëm dhe jam i motivuar për të dhënë maksimumin tim dhe të zhvilloj një sezon të mirë.

Ka ndikuar eksperienca e vëllait Kaleb në transferimin tuaj te Partizani?

Ekuban: Të them të drejtë po. Kur Kaleb erdhi këtu bëri shumë mirë dhe këtë shpresoj edhe unë. Të bëj mirë dhe në fund të vitit të shohim si do shkojnë gjërat.

Ngjashmëri mes teje dhe Kaleb?

Ekuban: Sipas meje jemi të ngjashëm në fizik dhe në mënyrën si sulmojmë hapësirat. Pastaj si të gjithë personat çdo kush ka karakteristikat e tij. Mua më pëlqen më shumë të luaj fizikisht dhe të gjej hapësira. Më pëlqen ndeshja kur ka hapësira dhe mund të përdor shpejtësinë, e të sulmoj në thellësi. Vihem në dispozicion të skuadrës kur duhet mbrojtur dhe ruajtur topi.

Jeni gati për skuadrën?

Ekuban: Prej 3 ditësh jam bashkuar me skuadrën dhe po stërvitem rregullisht me ekipin.Kam vetëm pak ditë, nuk jam në 100% të formës time, nëse aktivizohem premtoj se do të jap maksimumin.

Përballja me Karabag?

Ekuban: Jemi një grup lojtarësh shumë të mirë. Të gjithë punojmë së bashku dhe bëjmë atë që thotë trajneri në mënyrë që ta vëmë në zbatim. Do të jenë dy ndeshje interesante. Qarabag është një skuadër e vështirë, por ne do të bëjmë të pamundurën dhe të shohim në fund se çfarë do të ndodhë.

Ekuban zyrtarisht i Partizanit, ganezët bëjnë lëmsh edhe serbët

Sport Ekspres — Thu, 04 Jul 2019 10:34:39 +0000

Jozef Ekuban ka mbërritur në kryeqytet për të vijuar karrierën te Partizani, pas një sezoni te Mantova ne Serie D. Sulmuesi 19-vjeçar do të ndjekë hapat e të vëllait të tij, Kalebit, duke u aktivizuar në Superiore. “Demat e kuq” kanë arritur marrëveshjen e huazimit me të drejtë blerje me Veronën, klub që zotëron kartonin e sulmuesit.

EXCLUSIVE: Joseph Ekuban joins Serbian giants Partizan Belgrade https://t.co/7YKl1fMAq6 pic.twitter.com/cNYhNcoiy3

— Ghanasoccernet.com (@Ghanasoccernet) July 4, 2019

Ndërkohë nga Gana informacionet nuk i kanë marrë dhe raportojnë se Ekuban është huazuar te Partizani i Beogradit në Serbi. Kjo nuk ka kaluar pa u vënë re dhe nga mediat serbe, të cilat gjithashtu e raportojnë një lajm të tillë. Gjithsesi Ekuban është zyrtarizuar te Partizani i Tiranës.

Faksimile e lajmit të botuar nga alo.rs

ZYRTARIZIMI – “Klubi i Futbollit Partizani zyrtarizon transferimin e Josef Ekuban. Sulmuesi ganez i cili është në pronësi të klubit Hellas Verona i bashkohet kampionëve të Shqipërisë me formulën e huazimit për një vit, me të drejtë blerje nga Partizani. 19-vjeçari, i cili është prezantuar sot në ambientet e klubit, do të mbajë në fanellë numrin 66. Ekuban menjëherë i është bashkuar skuadrës, për të qenë në dispozicion të trajnerit Franko Lerda”, njofton klubi i kuq.