Jorge Mendes

Zbulohet takimi sekret, Gatuzo italiani i radhës drejt Premier Ligës?

Sport Ekspres — Tue, 23 Apr 2019 13:10:10 +0000

E ardhmja e Xhenaro Gatuzos në stolin e Milanit është në dyshim. Drejtuesit e kanë mbështetur gjithmonë, edhe atëherë kur rezultatet kanë munguar. Megjithatë, raporti me Leonardon nuk ka arritur të bëhet kurrë perfekt.

Në mes është kualifikimi në Champions Ligë, por Gatuzo mund të largohet edhe nëse ia del të rikthejë kuqezinjtë në futbollin elitar. Sipas raportimeve të mediave italiane, trajneri kalabrez ka darkuar para dy javësh me Horge Mendez. Gatuzo ka një raport respekti të dyanshëm me agjentin e famshëm portugez.

Ky i fundit po punon për të gjetur një ekip jashtë Italisë për Gatuzon. Në skenë ka dalë Premier Liga, më saktë Njukasëlli. “Qymyrxhinjtë” nuk po arrijnë që të gjejnë gjuhën e përbashkët me Rafa Benitez për të rinovuar kontratën dhe trajneri i Milanit do të ishte zgjidhja ideale për ekipin anglez.

Ronaldo ishte fiksuar prej kohësh për të shkuar te Juventusi!

Sport Ekspres — Mon, 17 Dec 2018 23:23:12 +0000

Kristiano Ronaldo te Juventusi, “martesë” që po ecën për mrekulli dhe dashuria paska lindur që para një viti, shumë kohë më parë se të nisnin bisedimet zyrtare për transferimin e portugezit nga Reali te Juventusi.

Agjenti i yllit portugez, Zhorzh Mendesh, ka zbuluar një prapaskenë interesante, duke folur për mediat italiane gjatë ceremonisë së dhënies së çmimit Golden Boy nga Tuttosport, ku Mendesh është nderuar me çmimin “Agjenti më i mirë europian”.

“Në janar Kristiano më tha se dëshironte të luante te Juventusi. I thashë që ishte shumë e vështirë, por në jetë nuk ka asgjë të pamundur”, tha Mendesh.

“Me rastin e sfidës në Champions League mes Realit e Juves u zhvillua takimi i parë me drejtuesit bardhezinj. Më pas disa biseda në telefon dhe gjithçka u bë e mundur. Meritën e kanë Juventusi dhe presidenti Anjeli, i cili vendosi të besonte totalisht te Ronaldo.

“Florentino Perez? Gjithçka normale, do thosha. Juve donte lojtarin dhe pas 2-3 muajsh bisedime, arriti ta merrte”.

Karta “Mendesh”, plani B i Juventusit për Milinkovic-Saviç

Sport Ekspres — Mon, 23 Jul 2018 10:16:49 +0000

Sergej Milinkoviç-Saviç është një nga lojtarët më të kërkuar, por për serbin Lacio kërkon një shifër të “çmendur” dhe deri më tani asnjë klub nuk i është përgjigjur kërkesave të presidentit Klaudio Lotito. Është folur për shifra që shkojnë në 150 milionë euro, por Juventusi, që e synon mesfushorin, nuk ka ndërmend të paguajë aq.

Bardhezinjtë mund të ofrojnë deri në 100 milionë euro dhe kjo ndodh me shitjen e Miralem Pjaniç, për të cilin po këmbëngul Mançester Siti, por edhe Barcelona. Sigurimi i shumës do të bënte që Juventusi të hidhej në sulm, por gjithçka do të varet edhe nga ajo që do të ofrojnë Real Madrid, PSG dhe Mançester Junajtid për Milinkoviç-Saviç.

“Tuttosport” sjell një prapaskenë të fundit, por saktëson se pista për transferimin e serbit është e zbehtë. Sipas gazetës italiane, menaxheri i famshëm Zhorzh Mendesh mund të luajë një rol të rëndësishëm në transferimin e mesfushorit të Lacios.

Së fundmi ai solli Kristiano Ronaldon në Torino dhe mund të shfrytëzojë marrëdhënien e mirë që ka me familjen e Milinkoviç-Saviç dhe me klubin e Lacios. Përfshirja e Mendesh, i cili nuk është menaxheri i lojtarit, mund të bëjë që palët të bisedojnë shtruar për transferimin e mesfushorit të shumëkërkuar. Gjithsesi me Lotiton nuk është e lehtë të bësh biznes dhe këtë e ka treguar edhe në të shkuarën.