Java e 16 e Premier Ligës

VIDEO | Totenhemi “harron” derbin dhe konfirmohet forcë e tretë

Sport Ekspres — Sat, 08 Dec 2018 21:41:35 +0000

Totenhemi reagoi pas humbjes në derbin kundër Arsenalit, duke fituar përballë Leisterit në transfertë. Ekipi i Poçetinos fitoi 0-2 me golat e Son Heung-Min dhe Dele Ali.

Koreano-jugori kaloi “Spurs” në avantazh në minutat shtesë të pjesës së parë me anë të një eurogol. Dyfishimi erdhi në minutën e 58-të. Son dhuroi një asist të bukur për Dele Alin dhe ky i fundit shënoi me kokë, duke vulosur fitoren e miqve.

Ky trepikësh e ngjit Totenhemin në vendin e tretë me 36 pikë, gjashtë më pak se Liverpuli i vendit të parë, ndërsa Leisteri qëndron në vendin e nëntë me 22 pikë.

Leister-Totenhem 0-2
(Son Heung-Min 45+1’, Dele Ali 58’)

VIDEO | Çelsi i jep fund rekordit të Sitit, buzëqesh Liverpuli

Sport Ekspres — Sat, 08 Dec 2018 19:23:41 +0000

Mauricio Sarri ishte shprehur gjatë ditës së djeshme se nuk e di sesi fitohet kundër Pep Guardiols, ndërsa tashmë italianit do i duhet të tregojë recetën sekrete. Çelsi arriti një fitore të madhe kundër Mançester Sitit, duke i shkaktuar humbjen e parë në kampionat “Qytetarëve”.

Kante dhe David Luiz ishin heronjtë e “Bluve të Londrës”, që ngjiten në vendin e tretë me 34 pikë, po aq sa Arsenali, shtatë më pak se Siti dhe tetë më pak se Liverpuli kryesues.

Për të shijuar golin e parë në “Stamford Bridge” u desh të pritej minuta e fundit e pjesës së parë. Hazard lëvizi bukur në krahun e majtë, tërhoqi disa lojtarë rreth vetës dhe dhuroi një pasim në zonë. Kante ishte në vendin e duhur dhe shënoi, duke kaluar vendasit në avantazh dhe dy ekipet në dhomat e zhveshjes.

Pjesa e dytë nisi me ritëm, por David Luiz i dha fund shpresave të ekipit të Guardiolës për të marrë pikë në këtë takim. Mbrojtësi brazilian shfrytëzoi një goditje këndi të Hazard, i cili regjistroi asistin e dytë, dhe kërceu bukur duke mposhtur patriotin Ederson.

Ndeshja nuk dhuroi më gola dhe tifozët e Çelsit shpërthyen në festë, pasi një fitore kundër kampionëve në fuqi është gjithmonë diçka speciale.

Çelsi-Mançester Siti 2-0
(Kante 45′, David Luiz 78′)

VIDEO | Junajtid tregon dhëmbët, një uruguaian nderon Arsenalin

Sport Ekspres — Sat, 08 Dec 2018 17:03:58 +0000

Mançester Junajtid është rikthyer te fitorja në kampionat, duke mposhtur Fulhemin 4-1. Ekipi i Murinjos kishte marrë vetëm 3 pikë (tre barazime) në katër ndeshjet e fundit në kampionat, ndërsa rikthehet të fitojë në shtëpi pas më shumë se një muaji. Ndeshje për t’u harruar për ekipin e Ranierit, që luajti më një lojtar më pak që nga minuta e 67-të.

“Djajtë e Kuq” e nisën furishëm pjesën e parë, ku realizuan plot 3 herë. Eshli Jang kaloi vendasit në avantazh, me anë të një goli shumë të bukur ndërsa Huan Mata dhe Romeo Lukaku ishin autorët e dy golave të tjerë.

Fulhemi reagoi në pjesën e dytë, duke shkurtuar rezultatin. Kamara u tregua i saktë nga pika e penalltisë, ndërsa një minutë më vonë, ekipi i Ranierit mbeti me 10-të lojtarë. Zambo Andre-Frank u ndëshkua me kartonin e dytë të verdhë, ndërsa Markus Rashford lëshoi një goditje fantastike në minutën e 82-të, duke shënuar golin e katërt për ekipin e tij.

Ky trepikësh e ngjit Junajtid në kuotën e 26 pikëve, shtatë pikë më pak se Totenhemi i vendit të katërt, që ka një ndeshje më shumë për të luajtur.

Arsenalit i ka mjaftuar goli i uruguaianit Lukas Torreira për të marrë tri pikët në përballjen ndaj modestëve të Hadërsfilldit. “Topçinjtë” , tani me 34 pikë të grumbulluar renditen në vendin e tretë të tabelës.

Arsenal-Hadërsfilld 1-0
(Toreira 83’)

Bërnlej-Brajton 1-0
(Tarkovski 40’)

Kardif-Sauthempton 1-0
(Paterson 74’)

Mançester Junajtid-Fulhem 4-1
(Jang 13’, Mata 38’, Lukaku 42’, Rashford 82’ / Kamara (pen) 67’)

Uest Hem-Kristal Palas 3-2
(Snodgras 48’, Çiçarito 63’, Felipe Anderson 66’ / MekArtur 6’, Shlup 76’)