Kjo fitore e ngjit Dortmundin në kuotën e 39 pikëve, ndërsa nuk e kanë provuar akoma shijen e humbjes pas 15-të javëve. Diferenca me Gladbahun dhe Bajernin e Mynihut është 9 pikë, ndërsa miqtë mbeten në vendin e nëntë me 21 pikë. Milot Rashica ishte pjesë e formacionit të Verderit dhe lojtari i përfaqësueses së Kosovës, i cili i la vendin japonezit Osako në minutën e 73-të.

Vendasit e gjeten shumë shpejt golin e avantazhit, por Pako Alkaser ishte në pozicion të parregullt. Spanjolli nuk u ndal dhe shënoi me kokë në minutën e 20-të, duke përfituar nga një krosim i portugezit Guerreiro. Goli i 11-të në kampionat për 25-vjeçarin, i cili kryeson renditjen e golashënuesve më të mirë të Bundesligës me një gol më shumë se shoku i tij Rojs, Levandovski i Bajernit dhe Joviç i Ajntrahtit.

Furia verdhezi nuk u ndal dhe Rojs dyfishoi shifrat shtatë minuta më vonë. Kapiteni shfrytëzoi një pasim të Sanços dhe nga brenda zonës shënoi duke kaluar në festë të pranishmit në “Signal Iduna Park”.

Verderi nuk u dorëzua dhe reagoi me anë të kapitenit. Maks Kruze hapi takimin në minutën e 35-të, duke shënuar një gol fantastik. Aq për pjesën e parë, ndërsa e dyta nuk prodhoi më gola. Gëce gjeti rrjetën në minutat shtesë, por goli i tij u anulua. Në fund 2-1 për Dortmundin, që vazhdon të marshojë drejt titullit kampion.

Borusia Dortmund-Verder Bremen 2-1
(Alkaser 20’, Rojs 27’ / Kruze 35’)

Xhoshua Kimish hapi serinë e golave që në minutën e dytë, me anë të një goditje të bukur nga jashtë zonës. Dyfishimi ishte akoma më i bukur. Alaba vulosi fitoren në minutën e 29-të me një predhë nga jashtë zone. Eurogol i austriakut dhe 0-2 për Bajernin.

Djemtë e Kovaç nuk u ndalën as në pjesën e dytë. Gnabri trefishoi rezultatin pas një veprimi të bukur në zonë, ndërsa Levandovski i dërgoi shifrat në katër në minutën e 62-të. Polaku shfrytëzoi një krosim të Kimish dhe shënoi golin e “pokerit” me kokë.

Kjo fitore e dërgon Bajernin në kuotën e 30 pikëve, duke ndarë vendin e dytë me Gladbahun, ndërsa vendasit renditen të fundit me 10 pikë. Në minutën e 62-të u fut në fushë dhe Florent Muslija për Hanoverin, por 20-vjeçari nga Kosova nuk mund të bënte asgjë, pasi takimi kishte marrë fund.

Në ndeshjet e tjera kishte festë vendasish në Shtutgart dhe Dyseldorf, ndërsa takimet Augsburg-Shalke dhe Hofenhajm-Gladbah u ndanë në barazim.

Augsburg – Shalke 1-1
(Gregorish 13’ / Kaliguri 52’)

Duseldorf – Fraiburg 2-0
(Aihan 55’, 79’)

Hanover – Bajern Mynih 0-4
(Kimish 2’, Alaba 29’, Gnabri 53’, Levandovski 62’)

Hofenhajm – Gladbah 0-0

Shtutgart – Herta Berlin 2-1
(Gomez 64’, 76’ / Mitellstad 38’)