Java e 12-të

Dritëhije dhe rivalitet në të dy grupet, ja si mbyllet gjysma e sezonit

Sport Ekspres — Tue, 18 Dec 2018 08:38:06 +0000

Të dielën, Kategoria e Dytë e mbylli gjysmën e parë të sezonit 2018-2019 dhe renditjet pas këtyre sfidave duken sa interesante, aq edhe të veçanta për dyndjen që kanë krijuar skuadrat, kryesisht në kreun e të dy grupeve. Për skuadrën e fundit, në Grupin A është zgjidhur me Kevitanin e larguar, ndërsa në Grupin B, Naftëtari po “përpëlitet” për t’iu afruar Gramozit, Përmetit e Termit.

Kryesimin në Grupin A e ka arritur Tërbuni i Pukës, i cili me 25 pikë ka lënë pas dy skuadra me nga 23 pikë, Gramshin dhe Luzi 2008. Në vallen e kreut duken edhe Sopoti, Partizani B dhe Spartaku, edhe pse diferenca është vetëm 4 pikë. Nëse Kevitani renditet i fundit pas tërheqies nga gara, Internacionali me 4 pikë e Tirana B me 1 pikë nuk po e justifikojnë pjesëmarrjen, ndoshta për tu përmirësuar në gjysmën tjetër të sezonit.

Shkumbini në Grupin B është në krye me 32 pikë, por i janë vënë në ndjekje Devolli me Maliqin me nga 31 pikë, tregues ky që gjysmën tjetër të sezonit do ta bëjë edhe më interesante me këtë treshe. Albpetroli e Këlcyra me nga 25 pikë renditen në vendet 4 dhe 5, në pritje për ti dhënë më shumë bukuri e rivalitet garës për kreun e këtij grupi. Përmeti, Gramozi e Naftëtari, me situatën në fundin e renditjes janë larg historisë së tyre, jo vetëm në këtë kategori.

Deri më 17 shkurt 2019, të gjitha skuadrat e kanë një hapësirë dy mujore për tu korrigjuar, secila në interes të synimeve të sezonit.

Kamza dhe Teuta në kahe të kundërta, rezultati diferencon objektivat

Sport Ekspres — Wed, 07 Nov 2018 09:39:23 +0000

Teuta është një nga skuadrat që ka surprizuar jo pak këtë sezon, kjo për faktin se pas 11 javësh e skuadra e Shkëmbit ka marrë 18 pikë, vetëm 2 me pak se Kukësi i vendit të tretë. Në 7 ndeshjet e fundit durrsakët kanë pësuar vetëm 1 humbje.

Në Kamzë, “djemtë e detit” do të ndeshen me Kamzën e Klodian Duros. Skuadra nga periferia e kryeqytetit nuk po kalon një moment aspak të mirë, pasi në 10 ndeshjet e fundit në kampionat ka marrë vetëm 1 fitore, me Kastriotin.

Në fazën e parë, Teuta u mjaftua me një gol të Latif, por sot pritet një tjetër betejë e fortë. kamza sheh t’i rikthehet Plaku, ndërsa problemet janë në mbrojtje, pasi së fundmi u dëmtua dhe Beqiri. Shkëmbi pritet t’i besojë të njëjtëve lojtarë që luajtën në takimin me Tiranën.

KATEGORIA SUPERIORE – JAVA 12
E mërkurë, më 7 nëntor, ora 14:00
Stadiumi i Kamzës

Kamza –Teuta

Kamza: Avdyli, Idrizaj, Frashëri, Arrabal, Bonan, Malaj, Mehmeti, Zisi, Plaku, Fukui. Roloviç. Trajner: Klodian Duro.

Teuta: Hidi, Gjorgievski, Bicaj, Shkalla, Beqja, Osmani, Progni, Sidibe, Kallaku, Avdyli, Latif. Trajner: Bledi Shkëmbi.

Gjyqtarë: Emirion Sino, Ilir Tartari, Orgest Grabova, Kridens Meta.

Delegat: Marjus Sulejmani; Vëzhgues: Fiqiri Haxhiraj.

Ndeshje “zjarri” në “Selman Stërmasi”, Tirana dhe Kukësi përplasin “brirët”

Sport Ekspres — Tue, 06 Nov 2018 10:21:56 +0000

Tirana dhe Kukësi do të ndeshen sot në mbrëmje në një takim “zjarri”, pasi pozitat ku ndodhen skuadrat bëjnë që të dyja ekipet të kërkojnë medoemos fitoren. Tirana është në një krizë të thellë, pasi me vetëm 9 pikë pas 11 javësh e sheh veten shumë pranë zonës së rënies. Kukësi në krahun tjetër është klubi i vetme që e ka deklaruar se i vetmi objektiv është titulli kampion. Por ndodhet jo pak pikë larg kreut.

Tirana u mund në ndeshjen e fundit nga Teuta me përmbysje, duke treguar të tjera probleme. Kukësi gjithashtu u thye nga Flamurtari, duke regjistruar humbjen e tretë në 5 ndeshjet e fundit. Mema kërkon fitoren e parë në krye të stolit bardheblu, por nuk do ta ketë të lehtë me një kundërshtar që në fazën e parë i mundi me shumë lehtësi në “Loro Boriçi” me rezultatin 3-1.

Suksesin më të thellë këtë edicion Kukësi e ka regjistruar pikërisht ndaj kryeqytetasve dhe synon që të bëjë kthesën sërish ndaj tyre. Kukësi e di se një tjetër hap i gabuar do ta bënte diferencën me kreun akoma dhe më të madhe, çka do e vështirësonte arritjen e objektivit, edhe pse jemi vetëm në fazën e dytë. Duket një takim shumë interesant dhe mjaft delikat, pasi humbja do i kushtonte shtrenjtë cilësdo skuadre.

Sa i përket skuadrave, si Mema ashtu dhe Cungu kanë pasur jo pak probleme me dëmtimet. Në diskutim në kampin e bardhebluve është portieri Ilion Lika, i cili mund ta nisë nga stoli këtë sfidë dhe vendin e tij mund ta zërë Abibi. Mungojnë sërish Blazhevski, Kërçiku, Oduamadi e Turtulli të dëmtuar, por dhe Ngo i pezulluar.

Në anën tjetër Musolli dhe Rrumbullaku janë mungesa me peshë, por dhe Shkodra ka pasur probleme fizike të vogla, ashtu si dhe Maliqi. Megjithatë këto dy të fundit pritet që të jenë në fushë në këtë përballje. Shqetësimi madhor është Shameti, i cili nuk do të luajë dhe në vend të tij do të aktivizohet Harallamb Qaqi.

Kategoria Superiore – Java 12
E martë, më 6 nëntor, ora 18:00
Stadiumi “Selman Stërmasi”, Tiranë

Tirana – Kukësi

Tirana: Lika, Doka, Atinga, Hoxhallari, Imami, Daja, Karabeci, Hasani, Kobinah, Greca, Sentamu. Trajner: Ardian Mema.

Kukësi: Frashëri, Maliki, Qaqi, Cuculi, Uilliam, Ethemi, Dzaria, Shkodra, Shafik, Kalaja, Rexhinaldo. Trajner: Armando Cungu.

Gjyqtarë: Enea Jorgji, Ermal Barushi, Ridiger Çokaj, Laver Alla, Indrit Myrtja
Delegat: Besnik Çela; Vëzhgues: Prek Pjetrushi