KASTRIOTI – “Ishte një ndeshje e vështirë, pasi vinim pas një fitore me një rival direkt. Kur luan me një kundërshtar që është në fund të tabelës, duket e lehtë në letër, por ndeshjet bëhen mjaft të vështira. Lamë dy lojtarë pushim. Jam i kënaqur me ato dy lojtarë që i zëvendësuan sot”.

VUAJTJA – “Ndoshta më mirë do ishte ta mbyllnim ndeshjen, por i tillë është futbolli. Kishim dy raste, por nuk i realizuam. Ndonjëherë dhe duhet të vuash”.

ROTACIONI – “Menduam që dy lojtarë, të cilët kanë shumë ndeshje t’i linim pushim, duke parë dhe lojtarët që ishin në fushë, sidomos të Kabas. Guexh ndërton më shumë dhe në shtëpi na duhet të ndërtojmë më shumë. Edhe se ruajmë energjitë për ndeshjet e tjera nuk është keq”.

SKEMA – “Jemi në një fazë ku janë të rëndësishme pikët. Kemi shumë lojtarë që luajnë në krah dhe 4-3-3 është e përshtatshme për ne dhe ka rezultuar efikase. Me Oto Xhon na del më shumë për mirë, pasi kundërshtari rri më lart dhe ai është lojtar thellësie. Në të ardhmen mund të luajnë bashkë, Oto Xhon dhe Krasniqi”.

GOLI – “Na bëhet qejfi që Muzaka e zgjidhi ndeshjen. Në të shkuarën kanë shënuar dhe të tjerët dhe më pëlqen kjo shpërndarje. Në të ardhmen uroj që ta zgjidhë ndeshjen ndonjë lojtar tjetër, përveç Muzakës”.

KRASNIQI – “Skuadra mund t’i rrijë më afër Krasniqit, por disa lëvizje duhet t’i tentojë vetë. Ndoshta nuk po i bën dhe duhet të kërkojë më shumë te vetja. Nëse bën ato që i them unë, do të arrijë dhe te goli”.

HUMBJA – “Ishte qëllimi ynë për të marrë pikë, pasi kemi nevojë. Situata është shumë e vështirë, megjithatë unë kam ardhur për ta ndihmuar këtë skuadër dhe shpresojmë që me rritjen e moralit dhe ekuilibrit besoj se do të futemi si pjesë e kampionatit dhe të jemi më agresiv për të marrë pikë”.

ATSINA – “Zëvendësimi i Atsinës ishte për arsye fizike sesa taktike. Do të përshtatet më mirë, nuk kishte shumë besim kur erdha, pasi nuk kishte shumë minuta. Do ta mbështes dhe uroj që ta ndihmojë skuadrën”.

OBJEKTIVI – “Kam ardhur që të jap përvojën time te kjo skuadër, të fus dhe tipin tim, për të bërë një skuadër agresive dhe të jemi të ekuilibruar në lojë. Na duhet besim dhe entuziazëm që të dalim nga kjo situatë. Besoj se do ja arrijmë me këto djem. Kam gjetur një ambient, ku më kanë dhënë fjalën se do punojnë maksimalisht për t’u rritur në lojë dhe për të arritur te rezultatet”.

PUNA – “Me ngritjen fizike, nëse do kemi më shumë intensitet, skuadra do të jetë më mirë fizikisht. Aty them se do të jetë ndryshimi, që të jemi më të fortë dhe më agresiv në veprimet sulmuese. Mesfushorët hezitojnë që të afrohen drejt portës dhe të shënojnë”.

“Gjatë ndeshjes luaj në disa pozicione duke parë dhe kundërshtarin. Me eksperiencë afrohem te porta, por kisha dhe pak fat. Skuadra luajti mirë dhe luftoj. Uroj të vijojmë me këtë ritëm, por mbi të gjitha duhet të rrimë me këmbë në tokë”.

“Kishim pak probleme nga ana psikologjike, pasi kishim humbur dy ndeshje. Ky ekip reagon shumë shpejt, Jemi në pozicion të mirë, por kem ndeshje të vështira para dhe duhet të rrimë me këmbë në tokë”.

“Kur erdhi krosi, kisha besim se do mbeste topi aty. E preka me gjurin tim dhe them se ishte dhe me pak fat”.

“Vuajmë pak me pjesën sulmuese, pasi nuk kemi një sulmues tipik goli, por në futbollin e sotëm nuk luhet vetëm me një sulmues të vetë, dhe të gjithë mundohemi të gjejmë golin”.

Verilindorët nuk mundën që të gëzonin të pranishmit që ishin sot në stadiumin e Kamzës, që duhet përmendur se ishin në një numër të konsiderueshëm, ndryshe nga të gjitha ndeshjet e mëparshme të këtij sezoni. Minuta e para ishin të qeta, edhe pse skuadrat tentuan që të ngacmonin në portat respektive.

Kur duheshin dhe 5 minuta para fundit, kuqezinjtë arritën që të gjenin rrugën e rrjetës, me anë të Franc Veliut. Mbrojtësi vlonjat këmbënguli, duke u shpërblyer në fund, pasi e gjeti rrugën në tentativën e tij të dytë. Ishin makth minuta e fundit të fraksionit të parë për kuksianët, që panë Rexhinaldon të ndalej nga Koliçi.

Pikërisht nga ajo pritje nisi dhe aksioni i golit të dytë të vlonjatëve, të cilët finalizuan me anë të Danilo Alvesh, i cili sërish gjen rrugën e rrjetës në të tretën ndeshje radhazi. Të dëshpëruar i drejtohen dhomave të zhveshjes kuksianët.

Në fraksionin e dytë Cungu bëri menjëherë dy ndryshime, duke hedhur në fushë Kalanë dhe Shpehar. Ishte pikërisht kroati ai, i cili ngushtoi diferencën. Ndeshje e hapur dhe me raste, por Flamurtari mund ta kishte mbyllur ndeshjen, nëse Bushiç do ishte më i saktë. Kukësi normalisht u hodh para në sulm, por pa mundur që ta gjejë rrugën e rrjetës. Shameti krijon një rast të mirë shënimi në minutat e fundit, por kapiteni nuk gjen dot kuadratin.

Në fund, skuadra e Dajës merr një fitore me shumë vlerë dhe vijon t’i afrohet kreut, ndërsa Kukësi pëson humbjen e katërt në këtë kampionat. Vlonjatët pozicionohen në vendin e katërt me 18 pikë, vetëm një më pak se Kukësi.

Kategoria Superiore – Java 11
E premte, më 2 nëntor 2018, ora 14:00
Stadiumi i Kamzës, Kamzë

Kukësi 1–2 Flamurtari
Shënues: Shpehar 50’/ Veliu 39′, Alvesh 45′

Kukësi: Frashëri, Maliki, Shameti, Cuculi, Zguro (Krasniqi 72′), Ethemi (Shpehar 46′), Shkodra, Limaj (Kalaja 46′), Tigruxha, Uilliam, Rexhinaldo. Trajneri: Armando Cungu.  Të gatshëm: Maloku, Qaqi, Selimi, Toure.

Flamurtari: Koliçi, Siljanovski, Pollozhani, Veliu, Kotobelli, Useini, Mustafa (Alla 80′), Ribaj (Beqaj 74′), Torasa, Alvesh (Hyseni 64′), Bushiç. Trajner: Ilir Daja. Të gatshëm: Qirko, Deliaj, Sirgi, Ymeraj.

Kartonë të verdhë: Krasniqi 73′, Tigruxha 87’/ Siljanovski 70′, Mustafa 77′, Useini 87′

Gjyqtarë: Olsi Sokoli, Endrit Veseli, Erind Burgu, Orlando Kuka.
Delegat: Lysien Nurishmi; Vëzhgues: Astrit Dervishi.

DIREKT

83′ – Askush nuk e devijon topin, pas harkimit të Shkodrës.

59’ – Pas harkimit nga e majta, Bushiç gabon edhe pse i pamarkuar dhe shumë pranë portës.

GOOOL 50′ – Shpehar kthen në gol një harkim të Uilliam nga e majta.

Presidenti Gjici ka zbritur në dhomat e zhveshjes  në pushimin e ndeshjes, ndërkoh që Idrizi ka qëndruar në tribunën VIP.

GOOOL 45‘ –  Koliçi bëhet hero me një pritje vendimtare ndaj Rexhinaldo, menjëherë në kundërsulm kuqezinjtë, të cilët finalizojnë me anë të Alvesh, i cili i vetëm me Frashërin nuk e ka të vështirë që të shënojë. Kur nuk shënon e pëson, rregulli i pashkruar i futbollit mori jetë sërish.

GOOOL ! 40’’ – Flamurtari nuk heq dorë, lehtë, pasi Veliu provon me kokë pas një harkimi të Bushicc, megjithatë Shameti e ndal, më pas është Pollozhani që godet, por gjen Frashërin këtë herë, nuk gabon më Veliu, i cili shënon në goditjen e tij të dytë.

37′ – Pas harkimit nga e djathta, ka pretendime të topit me dorë nga anan e kuksianëve, por asgjë për Sokolin.
35’ – Pas një aksioni të gjatë Useini provon nga distanca, por topi është i lehtë dhe kontrollohet nga Frashëri.
13’ – Torasa bëri gjithçka mirë nga e djathta dhe harkoi në mënyrë mjaft të mirë në krahun tjetër, por Maliki në mënyrë heroike devijoi para Bushiç topin, duke e çuar në këndore.
11’ – Ndeshja është ndërprerë për pak sekonda, pasi portieri i Kukësit ka ndryshuar fanellën, për shkak se po luante me uniformën e zezë, e cila ngjasonte me atë të lojtarëve të Flamurtarit. “Gardiani” ka veshur fanellën me ngjyrë të verdhë.

7 ‘ –Alvesh avancon nga e majta deri pranë fundores dhe harkon brenda zone, por harkimi i tij ndalet nga një prej lojtarëve të Kukësit.
2’ – Zguro hedh një top nga e majta, por Koliçi del i sigurt dhe neutralizon rrezikun.
1’ – NIS NDESHJA!

Tifozët kanë mbushur sektorët ku lejohet prania e tyre. Kujtojmë që tribuna e quajtur si karshi është hapur për këtë ndeshje pak minuta par niste sfida.

Presidenti Safet Gjici dhe administratori Sinan Idrizi janë ngjitur së bashku në tribunën e stadiumit të Kamzës, duke treguar se ruajnë raporte mjaft të mira me njëri-tjetrin.