Ndeshja pati intensitet, ritëm dhe raste nga të dy krahët, me “The Reds”, që gjeten golin e avantazhit në pjesën e parë me Sadio Mane, por arbitri u anuloi për pozicion jashtë loje të sulmuesit senegalez. Megjithatë, Liverpuli gjeti avantazhin me anë të Milner në minutën e 61. 32-vjeçari shfrytëzoi një grushtim jo të mirë të gjermanit Leno dhe goditi fort me të djathtën, duke kaluar ekipin e Klopit në avantazh.

Arsenali nuk u pajtua me rezultatin dhe arriti të barazonte sfidën me sulmuesin Lakazet. Francezi shfrytëzoi një pasim të bukur të Iuobit dhe arriti të shënonte një gol të bukur, duke barazuar ndeshjen. Gola nuk pati më dhe të dy ekipet ndanë nga një pikë. Liverpuli ngjitet përkohësisht në krye në kuotën e 27 pikëve, një më shumë se Mançester Siti, që luan nesër kundër Southemptonit, ndërsa “topçinjtë” ngjiten në kuotën e 23 pikëve, katër më pak se Liverpuli kryesues.

Arsenal – Liverpul 1-1
(Lakazet 82’ / Milner 61’)

Fitore e rëndësishme për Evertonin, që mposhti Brajtonin në shtëpi me rezultatin 3-1. Braziliani Riçarlison ishte heroi i takimit me një dygolësh, ndërsa kapiteni Koleman ishte autori i golit tjetër. Miqtë barazuan rezultatin përkohësisht me mbrojtësin Dunk, por pa arritur të marrin pikë nga kjo ndeshje.

Më në fund Njukasëlli. “Qymyrxhinjtë” arritën fitoren e parë këtë sezon, duke mposhtur Uotfordin me rezultatin 1-0. Spanjolli Perez ishte heroi i ekipit të Benitez me golin e shënuar në minutën e 65, që i dhuroi tre pikë të arta ekipit vendas.

Emocione dhe gola dhe në ndeshjen mes Uest Hemit dhe Bërnleit. Djemtë e Pelegrinit fituan me rezultatin 4-2 me dygolëshin e Felipe Anderson dhe golat e Arnautoviç dhe Çiçaritos. Miqtë barazuan dy herë rezultatin me anë të islandezit Gudmundson në fundin e pjesës së parë dhe sulmuesit nga Zelanda e Re, Kris Vud. Megjithatë, braziliani Anderson shënoi golin e dytë personal dhe të tretin për ekipin gjashtë minuta përpara fundit të ndeshjes, përpara se meksikani Çiçarito të vuloste fitoren e Uest Hemit me golin e shënuar në minutën e tretë shtesë të takimit.

Kardif – Leister 0-1
(Grei 55’)

Everton – Brajton 3-1
(Riçarlison 26’, 78’, Koleman 50’ / Dunk 34’)

Njukasëll – Uotford 1-0
(Perez 65’)

Uest Hem – Bërnlei 4-2
(Arnautoviç 11’, Anderson 68’, 84’, Çiçarito 93’ / Gudmundson 45’, Vud 77’)