Lajmi që Serxho Ramos ka rezultuar pozitiv në testin e anti-dopingut pas finales me Juventusin ka bërë shumë bujë, aq më tepër për faktin se vetë UEFA e ka mbajtur të fshehtë, duke mos marrë masa për lojtarin e kampionëve të Europës.

Në Spanjë i kanë kushtuar shumë vëmendje kësaj pjese, duke e akuzuar UEFA-s se po përdor dy standarde. E vërteta është konkrete dhe Jashanica duhet të presë derisa të përfundojë pezullimi 2-vjeçar, ndërsa në anën tjetër është rasti i Ramos që vijon të luaj i pashqetësuar. Një rast që tregon shumë për faktin se si lojtarët e skuadrave që quhen të vogla nuk trajtohen njësoj me ata lojtarë që luajnë në nivele të larta.

Transferimi i radhës i një lojtari të Skënderbeut duket se do të ketë të njëjtin destinacion me atë të fundit, Hungarinë. Mbrojtësi Bajram Jashanica, njëri nga titullarët më të lakuar për largimin nga korçarët, është gati të bashkohet me Liridon Latifin, i cili kaloi në verë tek Akademia Pushkash. Burime pranë “Sport Ekspres” bëjnë të ditur se marrëveshja mes dy klubeve është shumë pranë dhe Jashanica do të jetë shitja e radhës për klubin korçar. Një lajm i mirë dhe i keq njëkohësisht për klubin dhe tifozët bardhekuq. I mirë në aspektin financiar, pasi me këtë lëvizje shtohen të ardhurat në arkën e klubit dhe i keq, sepse Skënderbeu humbet një nga lojtarët më të mirë titullarë, kur dihen vlerat e mbrojtësit kosovar. Kuptohet që lajm shumë i mirë është për vetë lojtarin, i cili përfiton shumë.

Edhe vetë Jashanica e ka pohuar në daljet e tij publike disa herë se do të lërë shumë shpejt kampionatin shqiptar për një skuadër të huaj. Dhe në këtë rast duket se oferta më konkrete është ajo e hungarezëve të Akademisë Pushkash, ashtu si rastin e Latifit. Presidenti Takaj e ka menduar mirë dhe kuptohet që tendenca është për të shitur lojtarë jashtë vendit, edhe pse ekipi mund të dobësohet disi, por jo aq sa mund të vërë në diskutim objektivin e sezonit. Disa herë është thënë se, nëse ikën një lojtar, ai do të zëvendësohet menjëherë me një tjetër. Për momentin, Skënderbeu ka të gatshëm për qendrën e mbrojtjes Radasin, Alitin dhe Osmanin, i cili është aktivizuar më shumë në mesfushë, por klubi mund të ndërhyjë për të afruar një tjetër lojtar për prapavijën, nëse me Jashanicën mbyllet gjithçka me sukses. Trajneri Ilir Daja e ka llogaritur titullar qendërmbrojtësin kosovar për ndeshjen e sotme me Luftëtarin në Gjirokastër. Sigurisht, zërat e merkatos ndikojnë, por Jashanica është një profesionist dhe do të japë maksimumin për Skënderbeun për sa kohë do të ketë veshur fanellën e tij.

Akademia Pushkash është një skuadër mesatare për momentin në elitën e futbollit hungarez. Mban vendin e 8-të në tabelën e renditjes me 23 pikë, por drejtuesit e saj kanë si synim të investojnë për të ardhmen, ndaj dhe po afrojnë lojtarë me kualitet për të pasur një grup sa më të mirë në vazhdim. Skënderbeu ndërkohë vazhdon me politikën e shitjes së lojtarëve dhe Jashanica është e radhës, pas Piter Olajinkës, Bernard Berishës, Agim Zekës dhe Liridon Latifit. Mbetet të mësohen më shumë detaje për rastin e Jashanicës, kryesisht për shumën që do të përfitojë klubi korçar nga shitja e tij.

E ardhmja? “Është e rëndësishme që të luaj ashtu si deri tani, të vazhdoj me këtë ritëm, sepse sapo jam kthyer nga një dëmtim që më ndali pak. Deri në janar të shohim, duhet të flas edhe me menaxherin tim Shkumbin Qormemeti, por ka kohë deri atëherë”.

Dinamo Kiev fitoi: “Nuk e dija, por ne duhet të shohim ndeshjet tona dhe të luftojmë deri në fund për vendin e dytë. Kemi disa vite që tregojmë futboll cilësor dhe ndoshta e meritojmë të kalojmë grupet, sepse po luajmë mjaft mirë”.

Jashanica bashkohet nesër me grupin

Tefik Osmani është mungesa e vetme e sigurt e Skënderbeut në ndeshjen e së shtunës ndaj Partizanit. Për Dajën pritet të ketë një rikthim të rëndësishëm në prapavijë, siç është Bajram Jashanica, që ka pasur probleme dëmtimi, që e detyruan të mungonte ndaj Kamzës. Sipas stafit mjekësor, Jashanica dje punoi në mënyrë të diferencuar dhe kështu do të ndodhë edhe sot. Nesër pritet që mbrojtësi të provojë rikthimin në fushë, por sa do t’ia arrijë qëllimit, mbetet për t’u parë. Gjasat janë të mëdha që Daja të shtunë ta ketë në formacion Jashanicën, që do të jetë një  rikthim me shumë vlera. Këto seanca të fundit do të zbardhin edhe grupin e lojtarëve, që do të zbresë në fushë të shtunën.   

Skënderbeu i transfertës së Kamzës do të ketë disa ndryshime në formacion. Pas ndeshjes me Dinamon e Kievit, edhe vetë trajneri Ilir Daja e pranoi faktin se do të bëjë rotacion, por dihet tashmë që kryeqytetasit nuk i pëlqejnë lëvizjet e shumta. Në fakt, të paktën dy lëvizje janë të detyruara, për shkak të dëmtimeve, kurse lëvizjet e tjera mund të jenë në varësi të strategjisë për të shkuar te fitorja në këtë transfertë.

DËMTIMET – Tre janë lojtarët që shqetësojnë stafin teknik të Skënderbeut, sepse kanë probleme me dëmtimet. Mbrojtësit Tefik Osmani dhe Bajram Jashanica lanë fushën të dëmtuar në Kiev dhe rrezikojnë seriozisht ndeshjen e së hënës, për të mos thënë se e kanë humbur atë. Janë të dy titullarë shumë të rëndësishëm dhe sigurisht që trajneri Daja, duke pasur parasysh edhe kohën e shkurtër në dispozicion, nuk do t’i rrezikonte ata në këtë ndeshje kampionati. Kjo do të thotë se aktivizimi i Fidan Alitit është i sigurt ndaj Kamzës. Ai do të luajë përkrah Radasit në qendër, por një alternativë mund të jetë edhe Lulaj. Lojtari tjetër me probleme dëmtimi është Enis Gavazaj, që luajti në pjesën e dytë të ndeshjes me Dinamon e Kievit, por edhe aty mori disa shkelma. Ndaj Flamurtarit sakrifikoi, por këtë herë vështirë se mund të jetë titullar, për vetë faktin se Skënderbeu ka shumë alternativa për mesfushën.

MESFUSHA – Për ndeshjen e së enjtes nuk ishte në protokoll, pasi ishte i skualifikuar. Mesfushori Nimaga është gati për Kamzën dhe mendohet të jetë në fushë nga minuta e parë. Nga titullarët e Kievit në mesfushë pritet të luajnë Lilaj dhe Dita apo Xhejms. Gati për trajnerin Daja, madje mezi po e presin momentin e tyre, janë lojtarë me kualitet si Shkodra, Taku e Sahiti. Ndonjërin prej tyre me siguri do ta shohim titullar në ndeshjen e radhës.

SULMI – Ndoshta ka ardhur momenti i sulmuesit çek, Martin Nespor, i cili nuk u aktivizua në Kiev. Soue ka qenë sulmuesi i vetëm i korçarëve në këto ndeshje të fundit dhe, duke qenë se ka harxhuar jo pak energji, mendohet të pushojë ndaj Kamzës ose të jetë i gatshëm në stol. Megjithatë, pasi të shohë sot gjendjen e lojtarëve, trajneri Daja do të ketë një ide më të qartë në lidhje me ata që do të zbresin në fushë nga minuta e parë në ndeshjen e së hënës.

Leonard Trebicka

Në fakt, ka tri ditë që ka pasur probleme të vogla dëmtimi për futbollistët e Skënderbeut, por që kanë kaluar prej tyre. Disa ditë më parë ka qenë Kristi Vangjeli, që shqetësoi në një moment, por ia doli dhe tani është me grupin. Dy ditë më parë ishte Enis Gavazaj, që mori një goditje, por edhe ai ia doli pa problem. Dje, në ditën e fundit të përgatitjeve në stadiumin “Skënderbeu”, si për ters, është dëmtuar mbrojtësi i qendrës, Bajram Jashanica, i cili nuk arriti ta mbyllte seancën deri në fund.

Në 10 minutat e fundit të stërvitjes, Jashanica shfaqi probleme dhe u detyrua ta lerë stërvitjen në mes. Menjëherë pranë tij ka qenë stafi mjekësor, që ia ka mbuluar këmbën me akull kosovarit. Ky problem i Jashanicës duket se është i përsëritur, pasi që ndaj Mlladës në Çeki ka qenë momenti i parë i shqetësimit për të. Më pas, Jashanica është parë të futet në dhomat e zhveshjes, ndërkohë që gazeta është interesuar pranë stafit mjekësor të Skënderbeut për të mësuar mbi gjendjen e tij. Ja çfarë tha mbrëmë vonë mjeku i Skënderbeut, Jorgo Pantazi: “Ka probleme për Jashanicën dhe nuk mund të them se do të jetë gati. Do ta shikojmë edhe nesër (sot) në stërvitjen e fundit në “Elbasan Arena”, më pas do të vendosim, nëse do të jetë në fushë apo jo. Gjithçka vendoset pas stërvitjes së fundit.” Kjo do të thotë që Jashanica është në dyshim të fortë për ndeshjen e mbrëmjes së nesërme dhe sigurisht që trajneri Daja dhe stafi i tij janë vënë në “alarm”. Nëse kosovari nuk ia del, do të jetë një humbje e madhe, por fjala e fundit do të thuhet vetëm sot në mbrëmje.

GATI SHKODRA – Bajram Jashanica i ka trembur të gjithë pas dëmtimit që pësoi dje. Ka ndjerë dhimbje në të njëjtën këmbë, që kishte edhe më parë të dëmtuar, ndaj dhe trajneri Ilir Daja ka filluar të lëvizë, pasi duhet të ndryshojë gjithçka, nëse kosovari nuk ia del sot, në seancën e fundit në Elbasan. Në fakt, skema nuk ndryshon. Vendin e tij në qendër të mbrojtjes e zë Tefik Osmani dhe mbrojtja kompletohet. Për vendin e Osmanit në mesfushë gati është Donjet Shkodra ta nisë nga starti. Këto janë ndryshimet e mundshme për ndeshjen e nesërme, por që gjithsesi fjala e fundit do të thuhet sot në mbrëmje, pas stërvitjes së Skënderbeu në Elbasan. Stafi mjekësor po bën të pamundurën, që Jashanica të rikthehet, pasi trajneri Daja ka punuar gjatë gjithë javës me të njëjtin grup lojtarësh. Ndoshta kosovari mund të sakrifikohet për këtë ndeshje kaq të rëndësishme.

Formacioni i Skënderbeut nëse Jashanica nuk ia del:
Shehi – Vangjeli, Radas, Osmani, Mici – Shkodra, Nimaga – Gavazaj, Lilaj, Latifi – Soue

“Nuk duhet të harrojmë që me një gol e kemi kualifikimin në dorë. Por, nuk duhet të harrojmë që edhe kundërshtari ka potencialin e vet. Ne duhet të luftojmë siç bëm në dy ndeshjet me Kairatin. Duhet të japim gjithçka që kemi në fushë. Kemi një grup shumë të mirë dhe besoj që do t’ia dalim. Duhet të bëjmë punën më të mirë dhe të zbatojmë detyrat që na kërkon trajneri për të arritur suksesin dhe të shkojmë më lart.”

Jashanica tregon arsyen e humbjes në Çeki: “Ka qenë pak edhe lodhja e kësaj periudhe tre javore. Edhe kundërshtari kishte ritëm më të lart se ne, por tashmë do të hyjmë më të fortë. Q një pjesë e dobët loje, që duhet ta harrojmë shpejt. Në pjesën e dytë ndryshuam, shënuam edhe gol, por fatkeqësisht pësuam golin e dytë shumë shpejt. E kemi analizuar shumë mirë atë që bëmë pjesën e parë dhe të përmirësojmë të gjitha gabimet.”

Presidenti Takaj dhe mbrojtësi, batuta mes tyre: “Hë Jasha, do ikësh te Kukësi?” “Jo president, ata zgjodhën spanjollin para meje”

Leonard Trebicka

Dje është përhapur me shpejtësi lajmi se Jashanica ka marrë një ofertë nga Kukësi dhe mund të shkojë atje. Më konkretisht, menaxheri i futbollistit ka pasur një bisedë me drejtuesit veriorë, por as që bëhet fjalë dhe gjithçka është një trill mediatik. Jashanica nuk e ka menduar kurrë të largohet nga Skënderbeu për një ekip tjetër shqiptar. Dje, para seancës  radhës stërvitore, Jashanica është shprehur shumë qartë: “Nuk e di nga kanë dalë këto fjalë, pasi në Shqipëri qëndroj vetëm te Skënderbeu dhe tek asnjë ekip tjetër. Nëse bëhet fjalë për një skuadër jashtë, jam gati të flas me presidentin dhe pse jo të mos bëhet realitet.” Para nisjes së stërvitjes ka pasur edhe batuta mes lojtarit dhe presidentit Takaj, teksa ky i fundit sapo kishte mbërritur në Korçë dhe i tha: “Hë Jasha, do të ikësh te Kukësi?” Mbrojtësi iu përgjigj: “Jo president, ata zgjodhën atë spanjollin para meje.” Jashanica ka dhënë edhe një intervistë për “Sport Ekspres”, ku ka folur për ndeshjen me Mladën.

– Jashanica, te Kukësi sezonin e ardhshëm?

– Nuk jam i interesuar dhe nuk kam qenë ndonjëherë në lidhje me këtë që po më thoni. Ma thanë para disa orësh për një lajm të tillë, por nuk është aspak i vërtetë. Kam qenë dhe jam i Skënderbeut.

– Nuk keni pasur asnjë ofertë nga drejtuesit e klubit verior?

– Janë thashetheme, që nuk e di nga kanë dalë. Menaxheri im ishte dhe është Shkumbin Qormemeti. Nëse do të kishte ndonjë lajm, mund të ishte për ndonjë ofertë nga jashtë, pasi në Shqipëri nuk ka skuadër tjetër, veç Skënderbeut.

– Po nëse do të keni ndonjë ofertë konkrete nga jashtë, do të largoheni?

– Këtu ndryshon puna. Nëse do të kisha një ofertë të tillë, do të ulesha me presidentin Ardjan Takaj dhe menaxherin tim e do të bisedonim. Nëse oferta do të ishte e mirë, pse të mos e pranoja me dëshirën më të madhe. Një ofertë të tillë do ta dëshironte gjithkush dhe shpresoj, përse jo, një ditë të jem te një skuadër me emër në Europë. Për në Shqipëri nuk kam për të lëvizur nga Skënderbeu. Nuk dua të diskutohet më diçka e tillë. Flasim më mirë për ndeshjen e radhës, pasi aty jemi përqendruar të gjithë.

– Atëherë, si e parashikoni sfidën e së enjtes në transfertë?

– Sigurisht që është e vështirë, pasi ndeshje pas ndeshjeje çdo gjë vështirësohet më shumë. Të gjithë përpiqen të kalojnë më tej dhe kundërshtarët bëhen më të fortë edhe në letër. Gjithsesi, kemi ditë që kemi filluar të mendojmë për këtë ndeshje dhe deri të enjten do të jemi 100% gati për të zhvilluar një lojë të bukur, për ta nisur që aty kualifikimin.

– Me këtë doni të thoni se do ta kaloni Mladën?

– Përse të mos e bëjmë realitet një gjë të tillë. Kaluam Kairatin dhe Mlada nuk është se ka ndonjë skuadër shumë herë më të fortë se ai. Nuk i trembemi. Kemi vetëm një objektiv, të marrim një rezultat sa më pozitiv në ndeshjen e parë, në mënyrë që në kthim ta kemi edhe më të lehtë. Gjithsesi, Mlada do vlerësim maksimal dhe, siç u përqendruam me Kairatin, do të bëjmë edhe në raundin e tretë.

– Por mungojnë Lilaj dhe Xhejms. Sa ndikojnë këto mungesa?

– Çdo mungesë është e rëndësishme dhe do të ndihen, por kemi një grup të madh lojtarësh. Ata që do të luajnë, mendoj se do t’i zëvendësojnë, do të jenë dinjitozë në fushë dhe do të japin më të mirën. Kam shumë besim se do t’ia dalim.

Leonard Trebicka

Skënderbeu përballet të enjten me Kairatin, kundërshtar që për të gjithë në Korçë është shumë i vështirë, por jo i pakalueshëm. Në fakt, në radhët e Skënderbeut ka optimizëm përpara një ndeshjeje të tillë kaq të vështirë dhe kjo është gjë pozitive. Një pjesë e madhe e ekipit i mëshon fakti se duhet të qëndrohet me “këmbë në tokë”, pasi është edhe ndeshja e kthimit, që vendos kualifikimin. Për “Sport Ekspres” ka folur dje mbrojtësi i qendrës së Skënderbeut, Bajram Jashanica, i cili zhvilloi një ndeshje të mirë në Kazakistan. Ai vlerëson kundërshtarin, por pret kualifikimin e Skënderbeut, madje bën edhe parashikimin e rezultatit.
KAIRATI – Mbrojtësi Jashanica, duke u fokusuar tek ekipi kundërshtar, thekson se Kairati është i fortë dhe thotë e di fort mirë që ndeshja e kthimit do të jetë e vështirë: “Në Kazakistan, një javë më parë, ishte një ndeshje e vështirë dhe këtë e dinim të gjithë. Ia dolëm, por në Korçë do të jetë më e vështirë. Nuk duhet të dorëzohemi në asnjë moment të enjten në mbrëmje, pasi Kairat ka individë shumë të mirë, ka lojtarë që bëjnë diferencën. Ne si mbrojtje do të kemi shumë punë, pasi ata nuk kanë çfarë të humbin dhe do të sulmojnë nga fillimi në fund. E di që do të kemi punë në këtë përballje, por them se, nëse luajmë si në Kazakistan, do t’ia dalim. Duhet të luajmë të bashkuar, të mbrohemi shumë mirë dhe të sulmojmë të gjithë si skuadër, sepse vetëm kështu mund ta çajmë kundërshtarin”.
PËRGATITJET – Për sa u përket përgatitjeve të këtyre ditëve, Jashanica shprehet se gjithçka po shkon mirë: “Që ditën e parë që kemi mbërritur në Korçë, kemi filluar të mendojmë vetëm për ndeshjen e kthimit dhe jemi fokusuar te stërvitja, që të jemi 100% gati të enjten. Të gjithë janë optimistë në skuadër se do t’ia dalim. Dhe ky optimizëm është i kontrolluar, pasi nuk duhet të “fluturojmë” e të mendojmë se gjithçka ka përfunduar pas atij barazimi. Kemi edhe dy ditë kohë dhe do të bëjmë ç’është e mundur që ta përgatisim në mënyrën më të mirë këtë takim. E rëndësishme është që ka optimizëm”, – ka shtuar Jashanica.
SHANSET – Të gjithë në Korçë mendojnë se Skënderbeu ka shanse të mëdha të kalojë më tej. Edhe mbrojtësi kosovar pranon se Skënderbeu ka avantazhe, por gjithçka është e hapur: “Jemi të avantazhuar nga barazimi 1-1 në ndeshjen e parë, por asgjë nuk ka përfunduar. Për këtë jemi të vetëdijshëm. Jemi një grup futbollistësh shumë të fortë, me ego dhe që besojmë se do të ecim më tej. Kairati e ka të vështirë dhe këtë e dinë mirë kazakët. Dua të shtoj diçka, që do të na favorizojë shumë, tifozët. Nëse do të kemi mbështetje të madhe nga tifozët, jam i bindur se do të jemi ekipi, që do të kalojë më tej. Gjej rastin t’u bëj thirrje të gjithë korçarëve, që të enjten të jenë sa më të shumtë në stadium”.
PARASHIKIMI – Pyetjes për mënyrën si mund të shkojë ndeshja e sa enjtes me Kairatin, Jashanica i përgjigjet me optimizëm për fitore, madje edhe me një parashikim për rezultatin: “Sigurisht, është pak e vështirë ta parashikosh një ndeshje të tillë, por kam mendimin se do të ditojmë ne, me rezultatin 1-0, duke kaluar më tej. Nuk mendojmë që tani për raundin e tretë. Nuk jemi duke menduar për asnjë kundërshtar, përveç Kairatit”, – ka përfunduar Jashanica.

Goditja e madhe e Skënderbeut për sulmin mund të jetë Besart Ibrahimi, transferimi i të cilit te korçarët do të kishte në fakt një kosto të lartë. Sulmuesi i Maqedonisë dhe i Shkëndijës së Tetovës është ende nën kontratë me këtë të fundit dhe klubi juglindor duhet të paguajë për prishjen e kontratës dhe më pas duhet t’i afrojë një pagë të kënaqshme sulmuesit. Në fakt, kontaktet kanë ditë që kanë filluar, pasi menaxherët i kanë sugjeruar presidentit Takaj pikërisht Besart Ibraimin për sulmin dhe “bosi” është duke u menduar këtë pistë, që është e komplikuar jo pak.
JASHANICA PËR KARTONIN – Burime pranë klubit korçar bëjnë me dije se për të marrë Ibraimin nga Shkëndija e Tetovës duhet sakrifikuar një nga titullarët e ekipit. Bëhet fjalë për qendërmbrojtësin Bajram Jashanica, të cilin kërkojnë tetovarët për të lënë të lirë sulmuesin e tyre. Ndoshta Skënderbeu do të dilte i fituar me këtë shkëmbim, por bëhet fjalë vetëm për të paguar kartonin e Ibraimit. Mbetet për t’u parë, nëse korçarët do ta sakrifikojnë njërin nga lojtarët më të mirë, siç është Jashanica.
PAGA MUJORE – Kartoni është pjesa e parë e marrëveshjes, sepse më pas Skënderbeu duhet të paguajë një rrogë të konsiderueshme mujore për Ibraimin. Mësohet pretendimet e këtij sulmuesi janë diku te 16-17 mijë euro në muaj, një shifër e lartë për tregun shqiptar. Por, nëse kërkon një sulmues me potencial të madh, sigurisht që duhet të shpenzosh. Drejtuesit e Skënderbeut po tentojnë të arrijë akordin financiar dhe për këtë presidenti Takaj duhet të zgjidhë “qesen”. Pas largimit të Hamdi Salihit, Skënderbeut i duhet një sulmues “race” dhe Ibraimi është një i tillë. Salihi merrte një rrogë prej 15 mijë eurosh në muaj pagesa për të shkonte deri në 180 mijë euro në sezon, kurse për Ibraimin duhen më shumë, plus që duhet lënë i lirë mbrojtësi Jashanica për të shlyer pagesën, që kërkon Shkëndija e Tetovës.
KUSH ËSHTË IBRAIMI – Besar Ibraimi është një qendërsulmues i mirëfilltë. Eshtë shënuesi më i mirë në kampionatin maqedonas, me 20 gola. Sulmuesi 30-vjeçar i Kombëtares së Maqedonisë ka luajtur më parë edhe me Shalken në Gjermani, si dhe me disa ekipe në Ukrainë dhe Qirpo. Në dy sezonet e fundit me Shkëndijën ka realizuar 45 gola dhe është patjetër një nga ata sulmues, që i duhen Skënderbeut. Tani fjala i mbetet presidentit Ardjan Takaj.

Skeda e sulmuesit:
Emri: Besart Ibraimi
Datëlindja: 20 dhjetor 1986
Vendlindja: Kiçevo, Maqedoni
Pozicioni: Sulmues
Gjatësia: 1.82 m
Pesha: 76 kg
Këmba: E djathtë
Karriera
Renova (Maqedoni), Shalke 04 (Gjermani), Sevastopol, Tavria, Metalurg Zaporozhje (Ukrainë), Enosis, Ermis (Qipro), Shkëndija e Tetovës (Maqedoni)