jaiteh

“Autogoli” Xhaiteh, një hall më shumë për Partizanin

Sport Ekspres — Thu, 01 Aug 2019 10:43:23 +0000

Një ndër afrimet e shumta të Partizanit gjatë merkatos së janarit ishte mesfushor nga Gambia, Tixhan Xhaiteh. 30-vjeçari vinte me një “CV” të pasur me eksperienca të ndryshme në Norvegji, Finlandë, Izrael dhe Katar. Megjithatë, eksperienca e parë e futbollistit në Shqipëri rezultoi një zhgënjim total.

Gjendja jo e mirë fizike (nuk luante prej 8 muajsh), bëri që Xhaiteh të aktivizohej në vetëm tre ndeshje nga trajneri i atëhershëm Skënder Gega. Në dy muaj e fundit nga “demat” janë larguar lojtarë të shumtë, por Xhaiteh mbetet ende aty.

Klubi e ka bërë të qartë që 30-vjeçari nuk bën pjesë në planet e së ardhmes. Xhaiteh nuk është përfshirë në listën e të grumbulluarve për kualifikueset Europiane, ndërsa stërvitjet i zhvillon veçmas grupit së bashku me futbollistët e tjerë të padëshiruar.

Në një situatë të ngjashme palët do kishin arritur një marrëveshje për të ndërprerë bashkëpunimin me kohë, por situata nuk është aq e thjeshtë. Pavarësisht minutave të pakta, Xhaiteh është një ndër lojtarët më të paguar te Partizani dhe kontrata i mbaron në fund të sezonit të ardhshëm.

Siç duket mesfushori nuk e ka me nxitim dhe është i gatshëm të qëndrojë te “demat” edhe në rast mosaktivizimi, mjafton që në fund të muajit paga t’i kalojë në llogarinë bankare.

Mbeten jashtë liste, misteret e Partizanit të Olsi Ramës

Sport Ekspres — Fri, 05 Jul 2019 14:40:48 +0000

UEFA ka publikuar listën e lojtarëve të Partizanit, që mund të luajnë në Champions League. Në të bien në sy disa lojtarë që mungojnë dhe njëri prej tyre është mesfushori Tijan Jaiteh. 30-vjeçari nga Gambia u afrua me bujë në janar, por në kampionat luajti vetëm tre ndeshje.

Mesfushori ka kryer edhe fazën përgatitore me të kuqtë, por nuk është përfshirë në listë. Për stafin teknik vlejnë më shumë të rinjtë Kote e Kodra, me Jaiteh që duket se e ka prerë biletën për t’u larguar. Gjithsesi duhet më parë të gjendet një zgjidhje për kontratën.

Ndër misteret e Partizanit janë edhe Kevin Mombilo dhe Alesio Hyseni, edhe këta të afruar në janar. Asnjë minutë me të kuqtë dhe nuk janë dukur më pranë ekipit. Nga ana tjetër as nga ana e klubit nuk ka pasur asnjë komunikatë zyrtare për ndërprerjen e kontratave, sikurse ndodhi një ditë më parë me Ardit Hilën dhe Lum Rexhepin.

Një tjetër mister është edhe Renaldo Kalari, i cili në fund të sezonit të shkuar bëri edhe qendërmbrojtësin. Në Europë të kuqtë shkojnë me vetëm dy të tillë dhe me të vërtetë është e çuditshme, pasi një dëmtim i Belicës ose i Bitrit do i nxirrte krejtësisht zbuluar kryeqytetasit.

Kompletohet Partizani, edhe mesfushori Jaiteh i bashkohet “Demave”

Sport Ekspres — Mon, 04 Feb 2019 18:43:32 +0000

Mesfushori nga Gambia, Tijan Jaiteh është prezantuar sot nga klubi i Partizanit. 30-vjeçari ka mbërritur sot në ambientet e klubit të kuq, ku është prezantuar dhe ka kryer seancën e tij të parë stërvitore. Jaiteh është afrimi i fundit i “Demave” në këtë merkato janari dhe tashmë, Gega do të ketë një kontingjent të plotë.

Prezantimi i klubit: Tijan Jaiteh është prezantuar sot në ambientet e klubit si lojtari më i ri Partizanit. Mesfushori nga Gambia ka mbërritur në kryeqytet dhe menjëherë i është bashkuar skuadrës në stërvitje. Jaiteh regjistron eksperienca të suksesshme në Norvegji, Danimarkë, Slloveni, Finlandë, Izrael, Katar dhe ka nënshkruar me të kuqtë një kontratë për një vit e gjysmë. Mesfushori i cili ka qenë pjesë edhe e përfaqësueses së Gambias është një tjetër përforcim i afruar në merkaton e Janarit.