Nemanja Janiçiç dhe Xhekson Ferrera janë lojtarët që rrezikojnë të mos jenë të gatshëm për takimin kundër kurbinasve. Alternativat për stafin teknik të Luftëtarit nuk mungojnë për të ndërtuar formacionin, por gjatë ndeshjes do të ishin të kushtëzuar në zëvendësime.

Me rikthimin e Liçajt, në qendër krah Rustem Hoxhës mund të luajë Oltion Rapa. Për krahun e majtë Demo është alternativë, por edhe Donald Rapo. Trajneri Mezani do të mendohet mirë për formacionin, ndërkohë që i gatshëm për ndeshjen me Laçin është edhe Albano Aleksi.

Mesfushori është rikuperuar pas ndërhyrjes në gju që pat bërë, por me shumë mundësi këtë javë nuk do ta nisë nga minuta e parë. Synimi i bluzinjve është që ta kalojnë me sukses përballjen me kurbinasit dhe vlerësimi për këtë takim është maksimal, pasi kundërshtari jo më kot renditet në vendin e katërt në klasifikim.

I pari që ka dalë hapur është mbrojtësi brazilian Xhekson, i cili nuk ka udhëtuar fare me skuadrën për në Elbasan, për ndeshjen e kthimit sot në mbrëmje.

I afruar në janar të këtij viti nga futbolli grek, mbrojtësi i majtë 27-vjeçar luajti 90 minuta në Letoni dhe tashmë e ka ndarë mendjen që të largohet, aq sa ka postuar edhe një mesazh lamtumire në rrjetet sociale: “Falënderoj klubin, shokët e ekipit dhe tifozët që na kanë mbështetur gjithmonë. Falënderoj të gjithë në qytet, që më kanë mirëpritur. Kam dhënë maksimumin për klubin dhe jam i lumtur që kam hyrë në historinë e klubit, duke arritur objektivin e madh të sezonit të shkuar”.

Megjithatë, Xhekson ka kontratë deri në fund të këtij viti, ndaj Luftëtari do ta gjobitë, ose edhe do ta dënojë, ndërkohë që largimi i tij do të realizohet vetëm nëse paguhet shifra që kërkon Luftëtari, nga 50 deri në 100.000 euro.