“Çështja Çinari”, vjen reagimi nga pala spanjolle

Sport Ekspres — Sat, 18 Aug 2018 13:17:32 +0000

Transferimi i Erald Çinarit te Deportivo Alavesh, është bërë një çështje problematike në Shkodër. Vllaznia pretendon se kalimi i mëngjarashit te klubi spanjoll është kryer pa dijeninë e tyre dhe me anë të dokumenteve të falsifikuara. Skandali thellohet akoma më shumë, pasi shkodranët thonë dhe se paratë që Alavesh pretendon se ia ka depozituar palës shqiptare, nuk kanë përfunduar në llogarinë bankare të tyre, por në Itali, tek një llogari që tani nuk ekziston më dhe s’ka kurrfarë lidhje me klubin.

Dje ka ardhur dhe reagimi i klubit spanjoll. Në një prononcim për medien spanjolle “Gasteiz Hoy”, pala spanjolle është mbrojtur duke thënë: Transfertën e Çinarit e mbyllëm me bordin e mëparshëm të Vllaznisë. I gjithë dokumentacioni jonë është tërësisht i rregullt, nuk është bërë asnjë shkelje ligji, ndërsa paratë i depozituam në llogarinë që na u dha nga kontaktet zyrtare me bordin e vjetër të Vllaznisë”.

Nga deklarata e spanjollëve, nënkuptohet qartë që ata ia hedhin fajin për “lëmshin” e krijuar në këtë transferim, punonjësve të mëparshëm të skuadrës shkodrane. Në prononcimin e tyre, përfaqësuesi i Alavesh thotë se është i bindur se dhoma e zgjidhjes së konflikteve në FIFA do t’i japë të drejtë klubit të tij.

Çinari në “kundërsulm”: Ndryshimet e mëdha të futbollit kroat me Shqipërinë

Sport Ekspres — Sun, 01 Jul 2018 11:39:56 +0000

Erald Çinari bëri një debutim ëndrrash me Istran. Ai realizoi një gol dhe dhuroi një asist në fitoren e skuadrës së tij kundër Rudasit me rezultatin 4-2. Shkodrani e nisi si titullar takimin dhe shpalosi menjëherë vlerat e tij në këtë sfidë. Pas ndeshjes, 21-vjeçari tregon emocionet e tij në një rrëfim për “Sport Ekspres”.

Erald, një debutim ëndrrash. Duket se jeni ambientuar shumë shpejt, çfarë ndryshon nga Vllaznia te Istra?
Të them të drejtën ishte një ndeshje e mirë nga ana ime. Shënova dhe dhurova një asist, më vjen mirë pasi tregova se mund t’i dhuroj diçka këtij ekipi. Më pyetet se çfarë ndryshon, por do më duhej të zgjatem shumë, prandaj po mjaftohem me diçka fare të thjeshtë: klima.
Diçka më konkrete…
Te Vllaznia ishte një klimë e keqe, mosbesim. Të gjithë të shihnin me dyshime që nga qytetarët e Shkodrës, por dhe vetë ekipi. Te Istra më kanë dhënë direkt besim dhe po luaj më lirshëm.
A ka ndryshime në cilësinë e stërvitjes?
Ka disa ndryshime, pasi dhe kushtet janë më të mira. Futbollisti mendon vetëm për futboll dhe jo për probleme të tjera. Shoh lojtarë që vijnë në stërvitje me qejf dhe gjithçka është e fokusuar brenda fushës së blertë. Nuk ka probleme të tjera.
Te Vllaznia nuk ishte kjo gjë?
Nuk mendoj se është në ndonjë klub në Shqipëri, jo vetëm te Vllaznia. Ne kemi shokë në të gjitha ekipet dhe i dimë si funksionojnë gjërat.
Mendoni se Istra është një trampolinë e mirë për ju?
Besoj se po, pasi gjërat duhet të shkojnë shkallë-shkallë. Do të stërvitem fort, të jap maksimumin, shpresoj të mos dëmtohen dhe të përgatisë veten për hapin tjetër.
A kishit oferta të tjera në Shqipëri?
Po, kisha kontakte. Partizani më ka kërkuar me ngulm prej disa merkatosh, por në fund diçka ndalonte transferimin.
Vllaznia sërish në ajër. Mendoni se do të ringrihet?
Uroj me zemër, pasi më dhemb shpirti se është ekipi im, shtëpia ime, por nuk është aq e thjeshtë. Ekipi duhet të privatizohet 1 orë e më parë. Nuk mund të funksionojë ashtu me Bashki, si han pa porta.