“Është fazë përgatitore dhe si e tillë shoqërohet me shumë oshilacione te futbollistët. Mendoj se parësore është stërvitje, jo rezultatet e ndeshjeve. Kam parë disa shkrime nëpër portale, duket e çuditshme. Faza përgatitore ka për qëllim harmonizimin e veprimeve në të gjithë sektorët e fushës. Gjithashtu vijnë edhe lojtarë të rinj në ekip dhe normalisht duhet të njohin lojën e njëri-tjetrit dhe filozofinë e trajnerit.

Çdo gjë do kohën e vet. Megjithatë ekipi ka luajtur shumë më mirë se sot në miqësoret e zhvilluara në Maqedoni. Gjatë gjithë kohës kemi luajtur me një portë me kundërshtarin dhe nuk e kam kuptuar se di na ndodhi. Gjithsesi kjo është diçka mediatike dhe secili do të bëjë punën e vet. E preka, pasi më është dukur shumë e çuditshme kjo pjesë”, u shpreh Mema pas ndeshjes për mediat.

TIRANA NË RRUGËN E DUHUR – “Edhe unë kam dilemat e mia, pasi jo çdo gjë është perfekte. Nuk ndodh që gjërat të ndryshojnë sapo të fillosh stërvitjen. E thashë edhe më parë, çdo gjë do kohën e vet. Mua më krijohet mundësia të shoh problemet që kemi dhe të marrim masat që të rregullojmë gjithçka që të shkojnë gjërat mbarë në kampionat”, shtoi trajneri i Tiranës, i pyetur nëse skuadra e tij po ecën në drejtimin e duhur.

PËRFORCIMET – Te Tirana do të ketë sërish lëvizje, në hyrje dhe në dalje. Diçka e tillë paralajmërohet edhe nga tekniku Mema: “E kam thënë edhe në fillim të fazës që kjo është një listë paraprake, do kemi një listë përfundimtare. Do ketë prurje të reja në skuadër dhe shpresoj që të plotësojmë të gjitha pozicionet si duhet. Më pas të arrijmë edhe ato rezultate që këtij klubi i duhen, pasi është një klub me histori dhe pritshmëritë janë të mëdha. Pozicionet? Më lejoni t’ua them më vonë, nuk mund të flas tani”.

SULMI – Mema merr në mbrojtje sulmuesin Ismael Dunga, i cili deri më tani ende nuk ka shënuar gol me fanellën bardheblu. “Lojtarët duan kohën e vet. Është një periudhë transitore, pas përfundimit të kampionatit dhe fillimit të stërvitjes. Shpesh herë lojtarët shqiptarë e neglizhojnë këtë pjesë. Është një pjesë që duhet të merren me stërvitje, të paktën tre herë në javë dhe të ruajnë formën e vet”.

Në fund Mema tregon që Majkëll Ngo pritet të bashkohet me Tiranën. Sulmuesi anglez me shumë mundësi do të zbarkojë në Shqipëri nesër ose pasnesër, edhe pse trajneri i bardhebluve thekson se e prisnin shtatlartin që sot, referuar informacioneve që ai kishte. “Me dijeninë time duhet të vinte sot. Nuk e di, duhet të flas me presidentin”, përfundon Mema.

VLADIMIR PRENGA

“Zgjodha Tiranën, pasi Tirana është një klub i madh. Ata kanë shumë histori këtu në Shqipëri dhe në krahasim me klubet e tjera ata m’u dukën si pala më serioze që u interesua për mua. U konsultova dhe me agjentin tim Davidin dhe së bashku vendosëm se ky ishte opsioni më i mirë”, tregon Dunga në një bisedë për SportEkspres.com.

Sulmuesi nuk ka dëshirë ta kthejë kokën prapa, të paktën për momentin: “Për Luftëtarin s’dua të flas tani. Më vonë do flas”. Dunga ka arritur t’i shënojë tre gola Partizanit, skuadër që i është kthyer në makth Tiranës. Bardheblutë kanë pesë vite që nuk ia dalin të fitojnë dot në derbi.

Dëshira e sulmuesit është që t’u shënojë sërish të kuqve, këtë herë me Tiranën. Kjo është detyra e tij, të shënojë gola. “Partizani është një skuadër e madhe dhe është gjithmonë bukur kur shënon kundër skuadrave të mëdha. Kjo është ajo që bëj unë. Një sulmues duhet të shënojë në çdo ndeshje. Kam për detyrë të jap më të mirën e të ndihmoj skuadrën të kapë objektivat”, u shpreh keniani.

Dunga ka shumë besim se do të bëjë një sezon të mirë me bardheblutë, teksa në fund deklaron: “Vij me besim te Tirana dhe në çdo ekip tjetër ku kam shkuar. Kam shumë besim te vetja, prandaj them se do bëj mirë”.

Kështu, trajneri Mema do të ketë në dispozicion një sulmues me vlera, ndërkohë që pritet të konfirmohet bashkëpunimi edhe për një sezon me Majkëll Ngo. Me të dy këta sulmues në grup, bardheblutë kompletojnë repartin e avancuar.

“Ismael Dunga është zyrtarisht bardheblu. Sulmuesi 26-vjeçar ka firmosur kontratën që e bën pjesë të Tiranës për dy vitet e ardhshme. Dunga ka përfunduar kontratën me klubin e Luftëtarit dhe ka zyrtarizuar sot marrëveshjen bardheblu. Futbollisti nga Kenia, autori i 10 golave në sezonin e fundit me Luftëtarin, vjen si një përforcim me vlera për sulmin e Tiranës”, njofton klubi i Tiranës.

Më parë kanë nënshkruar me bardheblutë edhe lojtarë si Elton Kale, Agustin Torasa dhe Idriz Batha. Të tre lanë Flamurtarin me përfundimin e kampionatit dhe tashmë do të nisin një eksperiencë të re me 24 herë kampionët e vendit.

Keniani, autor i shtatë golave me Luftëtarin vjet, është në bisedime prej kohësh me bardheblutë. Kukësi gjithashtu e tentoi, por Tirana është treguar më konkrete dhe pritet që në mesjavë të nënshkruajë. Veç tij, sipas Supersport, raportohet se do të firmosë edhe Majkëll Ngo. Me këta të dy sulmi i bardhebluve mund të konsiderohet i kompletuar.

KONFIRMIMET – Trajneri Ardian Mema, pas paraqitjeve që Ilion Lika bëri në fund të sezonit të shkuar, është i bindur t’ia besojë atij mbrojtjen e katërkëndëshit. Kështu, portieri pritet që të rinovojë kontratën dhe të vazhdojë të mbetet pjesë e bardhebluve.

Asion Daja gjithashtu do të qëndrojë te Tirana. Mesfushori ka kontratë edhe për një vit, ndërkohë që me Erando Karabecin duhet biseduar. Kapitenit i ka përfunduar kontrata, por edhe me të pritet të nënshkruhet marrëveshja e re.

Teksa bisedimet me Majkëll Ngo janë rrugën  e duhur, drejtuesit e klubit po mendojnë për një “armë” më shumë për trajnerin Ardian Mema. Bëhet fjalë për sulmuesin kenian Ismael Dunga. Sipas “Supersport”, palët kanë gjetur akordin financiar dhe firma në kontratë është çështje kohe.

26-vjeçari ishte pjesë e Luftëtarit në sezonin e kaluar. Pas një fillimi të vështirë keniani filloi të spikaste me golat e tij ku në nëntë ndeshjet e fundit në Superiore shënoi shtatë herë.

Te Gjilani nuk janë ndjerë mirë për zërat që po qarkullojnë dhe së fundmi kanë dalë me një deklarët ku hedhin poshtë të kenë biseduar me Orelesin dhe Dungën. Jo vetëm kaq, pasi ka edhe “kërcënimë” për mediat nëse vazhdohet të përdoret emri i Gjilanit.

REAGIMI – “Nisur nga raportimet e fundit në mediat shqiptare dhe ato në Kosovë, Sport Club “Gjilani” demanton zërat e fundit që qarkullojnë për transferime të mundshme në klub. SC Gjilani nuk ka shprehur interesim dhe as nuk ka kontaktuar dy lojtarët e shumëpërfolur: Ismael Dungën dhe Nuredin Orelesin.

Zyra për shtyp e SC Gjilanit dëshiron të informojë gjithë opinionin sportiv se nga klubi janë të autorizuar vetëm dy drejtorët, si dhe trajneri, për të biseduar me futbollistët dhe për të ofertuar në lidhje me interesimet eventuale që ka klubi në të kundërtën do të demantojmë dhe do të përballemi ligjërisht me çdo person që tenton të përfitoj duke përmendur emrin e klubit tonë.

SC Gjilani gjithashtu njofton se drejtuesit e klubit janë në bisedime intensive me disa nga futbollistët të cilët janë në plan për edicionin e ardhshëm dhe shumë shpejtë pritet të ketë zyrtarizime të reja”, shkruhet në deklaratën e klubit të Gjilanit.

Halli më i madh i Kukësit ka qenë mbrojtja. Për krahun e majtë problemi i u zgjidh me afrimin e Emilajno Mustës, ndërkohë që tanimë stafi teknik mund të qetësohen edhe për linjën e djathtë.  Tome Kitanovksi ishte lojtari i “piketuar” nga Kukësi.

Ofertat për mbrojtësin e djathtë ishin të shumta dhe po hezitonte të pranonte ofertën e verilindorëve. Tashmë ëshët gjetur gjuha e përbashkët dhe sikurse bëjnë me dije burime të SportEkspres.com pranë klubit të Kukësit, të hënën pritet që gjithçka të marrë formë zyrtare.

“CV”-ja e tij e Kitanovksit duket bindëse, pasi ka luajtur rregullisht me Slaven Belupo dhe Istra në Kroaci. Kitanovski ka provuar të aktivizohet edhe në Serbi me Mladost Luçani dhe Vozhdovac, me Universitatea Kraiova në Rumani dhe Pelisterin në Maqedoni. Sezonin e fundit ishte pjesë e Sabail në Azerbajxhan.

Thuajse gjithçka është e mbyllur me mbrojtësin Rustem Hoxha, i cili është i lirë pas eksperiencës së fundit me Luftëtarin. Qendërmbrojtësi do të jetë një nga alternativat e Shkëmbit për qendrën e mbrojtjes dhe padyshim një element mjaft i vlefshëm. Vlerat e tij dihen tashmë.

Gjetja e një sulmuesi ka qenë synimi kryesor i Teutës dhe duket se e kanë gjetur edhe goleadorin. Marrëveshja me Ismael Dungën thuajse është mbyllur. Shtatlarti i sulmit spikati te Luftëtari, duke shënuar gjashtë gola. Durrsakët e kanë pëlqyer kenianin dhe i kanë bërë një ofertë.

Në Gjirokastër ai ka pasur probleme me pagesat dhe nuk ka ndërmend të kthehet. Gjithsesi mbetet për t’u parë se si do ta zgjidhë kontratën me bluzinjtë. Ndoshta do i duhet që t’i drejtohet gjyqit për të dalë lojtar i lirë. Shkëmbi e do te Teuta sulmuesin, i cili vë në dyshim edhe të ardhmen e Bushiç te durrsakët.

Deri më dje numëronte vetëm dy gola në Superiore, ndërkohë që ndëshkoi i vetëm Partizanin kryesues dje. Pas ndeshjes, Dunga foli për golat e realizuar: “Është një ndjesi e mirë për mua që t’i shënoj skuadrës që është në kryesim të kampionatit. Mendoj se çdo lojtar duhet të presë që t’i vij shansi i tij dhe mendoj se ky është momenti im më mirë. Në fazën e parë luante Shkurtaj dhe unë po qëndroja në stol, ndërsa tani po marr minuta të mjaftueshme. Ka të bëjë dhe trajneri sigurisht, ai po bën një punë të shkëlqyer”.

“E morët topin e ndeshjes? “Jo nuk e mora e topin, pasi në golin e parë nuk e preka dot topin. Lojtari i Partizanit (Atanda) e preku dhe ishte një autogol. Goli i dytë ishte i imi, pashë që mbrojtësit më lanë shumë hapësirë dhe përdora këtë në avantazhin tim. Goli “alla-Ibrahimoviç”? Thjesht ndodhi, ishte thjesht një instinkt sulmuesi”, deklaroi sulmuesi shtatlartë i Luftëtarit.

Mbijetesa është objektivi kryesor dhe Dunga bën thirrje për durim:  “Mendoj se duhet të tregohemi të duruar. Duhet të luftojmë deri në fund, s’mund ta ndjejmë veten rehat që tani. Duhet të vazhdojmë të fitojmë”.

TRANSFERIMI DHE DEDIKIMI – Sulmuesi normalisht e dëshiron kalimin në një kampionat më të fortë. E thotë hapur këtë, ndërkohë që ka edhe një dedikim për golat e shënuar. “Shpresoj që po. Ëndrra ime është që të luaj për një klub të madh, ashtu si çdo tjetër futbollist. Kjo është ambicia ime. Megjithatë, tani është herët për të folur për këtë gjë.  Dedikim? Golat ia dedikoj familjes time, gruas e fëmijëve të mi”, përfundoi Dunga.