Isli Hidi

Hidi: Na vrasin pikët e lëna me Skënderbeun, Teutës i ka munguar diçka

Sport Ekspres — Wed, 06 Mar 2019 16:32:33 +0000

Isli Hidi, portieri i Teutës, pranon momentin jo të durrsakëve, që në dy ndeshjet e fundit kanë marrë vetëm një pikë. Barazimi me Skënderbeun u ka mbetur peng “Djemve të Detit” dhe diçka të tillë e shpreh edhe vetë portieri.

“Ekipi pa kalon një ngërç të vogël. Futbolli ndaj është i bukur, që merr rezultate atëherë kur nuk e pret, sikurse edhe i le. Dy pikët i lëna me Skënderbeun na vrasin disi, pasi ishim në avantazh të dy golave. Kemi edhe në përgjegjësitë tona për atë ndeshje”, deklaron Hidi.

Ndeshja e së premtes kundër Partizanit është në fokusin e “gardianit”, i cili deklaron: “Partizani është me meritë i pari, ka bërë kampionat të mirë. Nuk ka diferenca mes ekipeve. Është ndeshje e vështirë për ne. Besoj se edhe këtë ndeshje shkojmë për të marrë maksimumin, pavarësisht pozicionit që ka kundërshtari”.

Hidi më tej thekson se Teutës vetëm fati i ka munguar, pasi pjesa tjetër po shkon mjaft mirë. “Prurjet duan kohë, por nga java në javë ekipi po konsolidohet. Nuk kemi çaluar aty, na ka munguar fati. Uroj ta kemi në ndeshjet e radhës”.

“Titulli? Tifozët duan më shumë, ne si lojtarë e kemi thënë që duam kupat e Europës. Jemi në rrugën e duhur, drejt objektivave tona. Besoj se deri në fund të kampionatit do ia arrijmë qëllimit”, përfundoi Hidi deklaratën e tij në “Supersport”.

Hidi: Mosha nuk është problem, kam shumë për të dhënë!

Sport Ekspres — Thu, 10 Jan 2019 18:17:15 +0000

Teuta ka zhvilluar një gjysmë sezoni në kufijtë e perfektes, teksa ndodhet plotësisht në garë për titullin kampion, kur një vit më parë në të njëjtën kohë, luftonte për mbijetesë. Një nga lojtarët më të rëndësishëm dhe më të spikatur në kampin durrsak, ka qenë pikërisht Isli Hidi. Portieri ka folur për “RTSH Sport”, ku ka treguar objektivat e Teutës dhe ato personal.

“Me temperaturat jemi mësuar, sepse kështu do të luajmë. Jemi gati për të filluar minifazën përgatitore për të qenë në formën e duhur për gjysmën e dytë të sezonit. Problemi nuk është se ne do fshehim gjëra, e kemi diskutuar me presidencën dhe objektivi ynë është Kupat e Europës.

Nga ndeshja në ndeshja ne do të synojmë të marrim maksimumin dhe pse jo, mund të shohim edhe titullin kampion Mosha? Më e bukura e çdo futbollisti është ta mbyllë karrierën me një titull. Por aktualisht, nuk e mendoj dorëheqjen, dua të jap ende maksimumin për futbollin shqiptar”,- u shpreh Hidi.

Titulli dhe sulmuesi më i mirë, Hidi flet “pa doreza”

Sport Ekspres — Mon, 24 Dec 2018 14:35:20 +0000

Teuta e ka mbyllur pjesën e parë të sezonit në vendin e tretë në klasifikim dhe në kampin durrsak janë të kënaqur për atë që kanë arritur deri më tani. Vetë presidenti Edmond Hasanbelliu para pak kohësh deklaroi se objektivi janë Kupat e Europës.

Ndryshe nga një vit më parë, po kërkohet që ekipi të mbahet më këmbë në tokë. Kjo është shumë e rëndësishme, nisur edhe nga diferencat e vogla mes ekipeve në Superiore. I ftuar në emisionin “Fair Play” të gazetares Enkelejda Zeko në “Ora News”, ka qenë portieri Isli Hidi.

Në lidhje me objektivat ai ka qenë i qartë:“Stafi dhe presidenti kanë vendosur si objektiv Kupat e Evropës dhe titulli mund të vij ndeshje pas ndeshjeje. Them se po bëjmë një kampionat të mirë”, ka deklaruar portieri i Teutës.

I pyetur në lidhje me sulmuesin më të rrezikshëm të Superiores, Hidi ka veçuar goleadorin e Kukësit. “Sulmuesi më i mirë dhe ai që na ka krijuar probleme është Rexhinaldo i Kukësit, meqë kemi dhe Gjicin përballë”, është shprehur Hidi.

Më i miri i nëntorit, Hidi: Skënderbeu, më i vështirë se Partizani

Sport Ekspres — Wed, 05 Dec 2018 16:17:22 +0000

Isli Hidi është përzgjedhur lojtari i muajit nëntor, ndërkohë që durrsakët po përgatiten për ndeshjen e radhës me Partizanin në shtëpi. “Është një ndeshje e veçantë për ne, pasi luajmë me kryesuesit. Do jetë takim i luftuar dhe shpresoj të japim më të mirën. Mbështetja e publikut? Tifozët durrsakë duhet të vijnë, janë një mbështetje e madhe për ne. Besoj se në këtë takim do të jenë në stadium”, është shprehur portieri i Teutës për “RTSH Sport”.

I pyetur mbi ekipin që i ka hapur më shumë punë durrsakëve, “gardiani” ka shtuar: “Skënderbeu na ka vënë në vështirësi më shumë, edhe pse Partizani na mundi me rezultat më të thellë prej gabimeve tona. Shpresoj të mos bëjmë ato gabime”.

“Çmimi i dhënë? Është kënaqësi, jam i kënaqur për këtë vlerësim. Po më shumë jam i kënaqur me rezultatet e skuadrës. Shpresoj të vazhdojmë kështu”, përfundon Hidi deklaratën e tij.

BILETAT – Teuta do bëjë çmos të mposhtë Partizanin të dielën dhe t’i afrohet të kuqve me tre pikë. Në Durrës kanë nisur të ëndërrojnë për titullin kampion dhe thirrjet ndaj tifozëve për mbështetje kanë qenë të shumta. Së fundmi kompania Blinibileta.com ka publikuar çmimet e biletave për takimin Teuta-Partizani dhe ato variojnë nga 200 lekë, në 500 lekë.

ÇMIMET E BILETAVE, TEUTA-PARTIZANI
(E diel, më 8 dhjetor, ora 17:00)
Tribuna A&B – 500 Lekë
Tribuna A1 & B1 – 300 Lekë
Tribunat C, E – 200 Lekë
Tribuna D (Miqtë) – 300 Lekë
SHITJA: Biletat në shitje nga nesër pranë biletarisë së stadiumit në Durrës

https://www.facebook.com/blinibilet/photos/a.574123219624422/728732074163535/?type=3&theater

Hidi i paralajmëron të gjithë: Teuta, “kockë e fortë”

Sport Ekspres — Fri, 17 Aug 2018 16:33:05 +0000

Isli Hidi është ai që do të mbrojë katërkëndëshin e Teutës këtë sezon. Elhan Kastrati dhe Shpëtim Moçka janë larguar, ndërkohë që durrsakët gjetën zgjidhjet duke afruar ish-portierin e Kombëtares, që prej vitesh ishte i angazhuar në Qipro.

Hidi ka folur në “Supersport” për gjendjen e skuadrës së tij: “Besoj se kemi bërë një fazë të mirë në Maqedoni. Miqësoret në trofeun Paccucci i bëmë të mira, po konsolidohemi, pasi kemi lojtarë të rinj dhe me eksperiencë. Kemi ardhur në formën më të mirë dhe shpresojmë të bëjmë maksimumin në Vlorë”.

Teuta e nis kampionatin në shtëpi kundër Flamurtari dhe portieri Hidi është i qartë në lidhje me objektivin. “Jemi të gatshëm të futemi në fushë për të fituar. Nuk ka asnjë sportist që mendon ndryshe. Do futemi në çdo ndeshje për të fituar”, ka shtuar portieri.

Rikthimi në Shqipëri pas disa viteve e bën Hidin emocional. “Pas gati tetë vitesh rikthehem. Kam emocione, pasi është një ndjesi e veçantë. Do tregojmë se Teuta do të jetë kockë e fortë e këtij kampionati”, përfundoi “gardiani”.