Shqipëria e Edi Rejës, Cana: Trajneri i duhur, por më shqetëson diçka

Sport Ekspres — Fri, 31 May 2019 19:28:50 +0000

Ish-kapiteni i Shqipërisë, Lorik Cana, vazhdon punën e tij intensive me fondacionin “Lorik Cana 5”, ku në fokusin e tij është promovimi i sportit te moshat e reja. Cana, për emisionin “Ora e Tiranës”, foli për kombëtaren kuqezi, shanset që kanë për kualifikim dhe trajnerin e ri, Edi Reja:

KOMBËTARJA – “Sinqerisht, kjo kombëtare mund të japë edhe më shumë. Pjesa më e rëndësishme, që është shtylla e skuadrës, është ende aty. Pas disa vitesh, mund të çalojë disi Shqipëria, kur të largohen ata lojtarë që kanë qenë pjesë e Europianit, por tani mund të japin edhe më shumë. Ka eksperiencë dhe shpresoj që në të ardhmen të jetë prapë një kombëtare e suksesshme”.

EDI REJA – “Një nga trajnerët më me shumë eksperiencë, jo vetëm në Itali, por në të gjithë botën. Një problem të vogël ka, pasi nuk ka eksperiencë jashtë Italisë, përveç Hajdukut të Splitit besoj, por nëse kjo gjë anashkalohet dhe lidhet menjëherë me lojtarët, besoj do të bëjë mirë. Ai ka eksperiencën e duhur që t’ia marrë më të mirën këtij grupi”.

KUALIFIKIMI – “Nuk e di, besoj se nuk e kemi filluar në mënyrën më të mirë. Humbja me Turqinë na lë disi mbrapa për vendin e dytë, pasi Franca nuk duhet llogaritur. Me Turqinë dhe Islandën, nuk jemi shumë larg, por humbja këtu me Turqinë, na ka prishur shumë punë. Me Andorrën, e kryem punën tonë, por transferta në Islandë do të jetë e vështirë. Reja tha që me Islandën dhe Moldavinë firmos për katër pikë, për aq firmos dhe unë”.

Hallaçi ndryshon ekip, Kukësi reagon dhe shfajësohet

Sport Ekspres — Fri, 24 May 2019 19:10:08 +0000

Rrahman Hallaci, ish-kapiteni i Kukësit, qëndroi për disa sezone si zv. trajner te skuadra verilindore, por ditën e djeshme, ai u largua nga skuadra blu. Edhe pse “divorci” mes dy palëve ka ndodhur dje, klubi i Kukësit njoftoi sot për largimin e Hallaçit nga pankina. Në një njoftim në faqen e tyre në “Facebook”, klubi i Kukësit shkroi:

Zëvendës trajneri i skuadrës së Futboll Klub Kukësit, Rraman Hallaçi nuk do të jetë më pjesë e stafit teknik. Pas një takimi mes ish-Kapitenit dhe Presidentit Safet Gjici, Hallaçi ka kërkuar të drejtojë një skuadër futbolli të moshave.

Numri një i Klubit, i ka ofruar ekipin e dytë, pra FK Kukësin B, pasi presidenti Gjici synon, vitin tjetër, ngjitjen e kësaj skuadre në Kategorinë e Parë dhe kjo do ishte një hap i mirë për karrierën e tij të re si trajner.

Pasi kishin rënë fillimisht dakord për çdo gjë me Presidentin, për një fillim me Kukësin B, Rrahman Hallaçi ka ndryshuar mendjen dhe ka vendosur të largohet nga klubi. Ai u shfaq në një tjetër ekip, duke trajnuar skuadrën e Internacional U-19.

Futboll Klub Kukësi falenderon zëvendës trajnerin Rraman Hallaçi, për kontributin e dhënë si futbollist dhe si numri dy i pankinës së skuadrës sonë dhe i dëshiron shumë suksese në karrierë!