“Afrimi” i radhës te Laçi, vjen nga infermieria

Sport Ekspres — Mon, 24 Jun 2019 08:49:46 +0000

Laçi po vijon përgatitjet për ndeshjen e Europa League kundër Hapoel Ber Sheva. Kurbinasit kanë bërë disa afrime deri më tani, teksa kanë nënshkruar Kirian Nuabueze (Drita), Aleksandar Ignjatoviç (Sloboda Tuzla), Rudolf Turkaj (Iliria). Në vazhdim pritet të ketë edhe të tjera lëvizje.

Një ditë më parë bardhezinjtë zhvilluan një miqësore me Kukësin, që e fituan 2-0, ndërkohë që në stadiumin e Librazhdit u pa edhe mbrojtësi Irlan Ceka. Ish-lojtari i Shqipërisë U21 po stërvitej veçmas dhe së shpejti pritet të bashkohet me grupin.

Shanset që të luajë në Europë janë të vogla, pasi Ceka ka kaluar një dëmtim të rëndë. Në janar, kur iu bashkua kurbinasve, ai këputi ligamentin dhe iu desh të kryente një operim. Tanimë ai po punon për të rifituar formën dhe për të qenë një opsion për kurbinasit në sezonin e ardhshëm.

Firma e parë, Laçi transferon mbrojtësin e Shqipërisë U21

Sport Ekspres — Tue, 01 Jan 2019 19:40:39 +0000

Laçi po kërkon të përforcohet dhe nga sot është pjesë e kurbinasit edhe një mbrojtës, i cili ka luajtur në Itali me grupmoshat dhe tanimë kërkon të hyjë në futbollin e rëndësishëm përmes Superiores dhe konkretisht me bardhezinjtë e drejtuar nga Besnik Prenga.

Flasim për mbrojtësin Irlian Ceka, titullar me Shqipërinë U21. Prej disa kohësh ai po stërvitej me Laçin dhe me hapjen e merkatos ka ardhur edhe firma. Futbollisti 20-vjecar ka nënshkruar për dy vite e gjysmë bëjnë me dije burime të Sportekspres.com pranë klubit të Laçit.

Në të shkuarën Ceka ka qenë pjesë e moshave të Romës, për të kaluar tek Askoli dhe Lacio. Nga lacialët kaloi te Sambenedetese. Lojtari i linjës së majtë të mbrojtjes kompleton repartin e prapavijës te Laçi.

Kurbinasit shtojnë edhe numrin e të rinjve kuqezi, teksa Selmani është edhe kapiten i Shqipërisë U21. Gjithashtu edhe Fangaj ka qenë pjesë e Shpresave, ndërsa një vend në skuadrën e Bushit e ka marrë edhe mbrojtësi Jon Mersinaj së fundmi.