Në intervistën e dhënë për SportEkspres.com, Muça thekson se i duket i çuditshëm vendimi i Panuçit për portierin e Lacios. Në lidhje me kualifikimin në Europian, ai e sheh të vështirë diçka të tillë dhe konsideron si sukses renditjen në vendin e tretë. Gjithsesi ai nuk i konsideron zero shanset.

INTERVISTOI: AGRON KAJA

Si e shikoni situatën në Grupin H eliminator të Euro 2020, ku Kombëtarja është në prag të dy ndeshjeve të para?
-Janë ndeshjet e para dhe Shqipëria në grupin H i ka kundërshtarët shumë të fortë, të fortë e të mesëm. Rëndësi ka që ta nisim me këmbën e mbarë dhe të mos humbasim që në ndeshjen e parë.

Përgatitjet për dy sfidat e para eliminatore me Turqinë e Andorrën kanë nisur, por si i shikoni zgjedhjet e trajnerit?
-Të gjitha zgjedhjet që ka bërë Panuçi për këto dy ndeshje do të shikohen në fushën e lojës, por këta emra janë, nuk ka të tjerë. Rëndësi ka që të gjithë ata që do të luajnë të jenë në formë të mirë dhe të mos zhgënjejnë që në fillim.

A ka edhe futbollistë të tjerë që mund të ishin thirrur nga Panuçi për këto dy sfidat e para?
-Ua përmenda më sipër se këta janë emrat. Lenjani ka bërë zgjedhjen e tij për të mos qenë në Kombëtare me Panuçin trajner. Në këtë situatë duhet që të merremi me ndeshjen, pasi ka shumë rëndësi përgatitja sa më e mirë e skuadrës.

Trajneri Panuçi është treguar i ashpër me portierin Strakosha. A është kjo forma e duhur për të rritur cilësinë në skuadër?
-Mua më duket i çuditshëm vendimi i Panuçit për portierin Strakosha. Pse? Sepse ai ishte në ndeshje dhe normalisht duhej të pushonte një ditë, jo t’i hipte avionit menjëherë. Disiplina është disiplinë për të gjithë, por ky është një rast që duhej të kuptohej nga trajneri.

Sfida e parë luhet në Shkodër më 22 mars me Turqinë. A mund ta kalojmë sikurse në miqësoren e fundit?
-Çdo ndeshje e kaluar ka historinë e vet, ndërsa aktualiteti duhet të përshtatë skuadrën tonë me gjendjen e mundësitë reale që ka. Duke qenë një ndeshje e fortë me Turqinë, skuadra duhet të jetë e përgatitur së pari nga ana psikologjike, sepse është sfida e parë në Euro 2020.

I ka mundësitë kjo Kombëtare që ta përsëritë suksesin e arritur De Biazin si trajner?
-Nuk e mendoj atë sukses si me De Biazin, jam shumë skeptik. Unë mendoj se Kombëtarja jonë duhet të bëjë një paraqitje të mirë dhe vendi i 3-të për të do të jetë sukses. Duhet të jemi realistë për grupin, por edhe shpresat nuk duhet t’i humbasim.

Agustin Kola është një nga Legjendat e futbollit shqiptar, e në veçanti për Tiranën. Në karrierën e tij rreth 20-vjeçare në futbollin e elitës, Kola ka treguar grintë e nivel, duke lënë emër të madh.  Duke dalë nga “fidanishtja” e Shkëndijës së Tiranës, Agustin Kola më pas ka luajtur me 17 Nëntorin në 14 sezone, me Shkëndijën e Egaleos në Greqi, si dhe në 22 prezenca me Kombëtaren. Më pas ka qenë trajner te Shkumbini, Tirana, Kamza në Superiore, por ka drejtuar edhe të rinjtë e Tiranës dhe Mamurrasin në Kategorinë e Parë.

INTERVISTOI: AGRON KAJA

Agustin Kola do të jetë trajner i Kombëtares së femrave U17, sa i vërtetë është ky lajm?
-Po, është e vërtetë. Ka disa ditë që Presidenti i FSHF-së dhe drejtues të tjerë të saj më kanë afruar drejtimin e skuadrës sonë Kombëtare të femrave deri në 17 vjeç. Unë e quaj vlerësim e respekt dhe do të bëj maksimumin tim për të përgatitur një grup që ti shërbejë së ardhmes.

Pse pikërisht në futbollin e femrave, jeni “divorcuar” nga meshkujt?
-Unë nuk divorcohem asnjëherë me futbollin, pa nënvleftësuar nëse është te meshkujt apo te femrat. Këtu e mendoj veten më të lirshëm e të qetë në punë, sepse edhe vetë mosha e vajzave është e çiltër, në kuptimin e përkushtimit të tyre në fushën e lojës.

Çfarë do synoni në krye të kësaj kombëtareje në vazhdimësi?
-Së pari do më duhet që të bëj një përzgjedhje sa më cilësore, me vajza që e duan lojën e futbollit dhe i përkushtohen atij. Gradualisht do shikoj edhe rezultatet, ndërkohë që pasi të njihem me skuadrën mundet që të jap edhe një mendim më të plotë për situatën aktuale.

Cila është veprimtaria e radhës që ju mundëson edhe njohjen më të drejpërdrejtë me skuadrën?
-Në fillimin e muajit mars do të luajmë me Maltën, por më parë besoj se do të kem një grumbullim ku do të shoh përbërjen aktuale. Gjatë javës së ardhshme do të kem edhe një prezantim me drejtuesit e FSHF-së dhe aty do të përcaktojmë emrat që do të kem në dispozicion.

Po me futbollin e Kategorisë Superiore dhe me Tiranën, e vazhdoni ndjekshmërinë?
-Në fakt, nisur nga angazhimet që kam patur nuk e kam ndjekur shumë Kategorinë Superiore. Gjithsesi nuk kam patur interes shumë për ta ndjekur, pasi më duket sa ka hyrë në mes politika dhe ma ka bërë të vështirë të jem pranë këtij futbolli.

Gjithsesi, si e shikoni barazimin e djeshëm të Tiranës me Teutën?
-Një rezultat të mirë, sepse Teuta është një nga skuadrat më të mira të Kategorisë Superiore. Ka një skuadër solide dhe me lojtarë shumë cilësorë, ndaj barazimi për Tiranën është rezultat normal. Tiranës i duhet vazhdimësi me ndeshje të tilla si me Teutën.

Për SportEkspres.com, Begeja deklaron se ndërmjet Bylisit e Besës do të ketë shumë rivalitet për vendin e parë në Grupin B, madje ai e mendon si një kampionat luftën mes tyre. Ndërsa e mendon Vllazninë si të sigurtë për vendin e parë në Grupin A, më të rrezikuara në të dy grupet Genrjan Begeja mendon Vorën në Grupin A dhe Turbinën me Elbasanin në Grupin B.

INTERVISTOI: AGRON KAJA

Kategoria e Parë nesër rinis gjysmën e dytë të sezonit, si e përshkruani garën në tërësi?
-Në tërësi, gjatë 14 ndeshjeve të para që janë luajtur në Kategorinë e Parë, gara ka qenë e fortë. Në këtë kategori janë shumë skuadra që kanë luajtur në Kategorinë Superiore, madje që kanë dalë edhe kampione, por garën më të fortë e mendoj në Grupin B në të dy anët e renditjes së tij.

Skuadrat janë treguar më aktive në përgatje, merkato e ndeshje miqësore, çfarë mundësi teknike krijohen për skuadrat në këtë minifazë?
-Nisur nga deklarimet që kanë bërë skuadrat për përgatitjet e tyre gjatë këtij muaji, të shoqëruara këto edhe me merkato e ndeshje miqësore, mendoj se të gjitha e kanë shfrytëzuar sipas mundësive, gjendjes së skuadrave e buxheteve të tyre. Koha elimituar nuk mundëson më shumë.

Në këtë periudhë pa aktivitet zyrtar, si mendoni se e kanë shfrytëzuar skuadrat me lëvizjet e tyre gjatë muajit janar?
-Të gjitha skuadrat janë treguar aktive gjatë muajit janar, por Bylisi e Besa kanë bërë të veçantën, kryesisht në miqësoret që kanë luajtur dhe me merkaton që kanë zhvilluar. Ndërsa Lushnja do ishte më mirë që buxhetin të cilin e përdori në Malin e Zi, ta kishte për merkaton.

Nisur nga emrat e afruar në merkato, Bylis e Besa në Grupin B kanë bërë shumë përforcime, do të jetë një duel mes tyre për vendin e parë në grup?
-Kështu siç po shohim lëvizjet e tyre gjatë këtij muaji, por nisur edhe nga renditja, do kemi duel për kreun e Grupit B. Kam bindjen se mes Bylisit e Besës do të ketë luftë sportive, e  ndoshta një kampionat mes tyre. Por, unë mendoj se Besa do ta sfidojë Bylisin, dhe i ka të gjitha kapacitetet.

Vllaznia në Grupin A duket pa shqetësime dhe nuk ka lëvizur shumë në merkato, i ka kapacitetet që ta ruajë vendin e parë në grup?
-Me shkëputjen që ka bërë në 14 ndeshjet e luajtura, mendoj se Vllaznia e ka të shtruar rrugën për ngjitje në Kategorinë Superiore. Ajo ka 60% të skuadrës të sezonit të kaluar, por specifika e fazës së tretë duhet t’ia shtojë më shumë kujdesin për menaxhimin e kreut.

Në fazën e tretë luhet me pikë të përgjysmuara, do të ketë tolerime e lëshime nga skuadrat që mund të kenë dalë nga objektivat?
-Nuk mendoj se do të ketë tolerime, ndoshta kjo është pak e tepruar ta themi si paramendim. Vetë formula e fazës së tretë u jep mundësinë të gjitha skuadrave që të kërkojnë si kreun e grupit, ashtu edhe largimin nga zona e mbijetesës. Kështu që nuk mendoj për tolerime apo aleanca.

Në të dy grupet, në krye dhe në fundin e renditjes, si i mendoni verdiketet e këtij kampionati?
-Është e vështirë që të përcaktosh verdiktet e sezonit në mesin e fazës së dytë. Kjo mund të jetë e përafërt me fillimin e fazës së tretë, por besoj se në krye të grupeve do të dalin Vllaznia në Grupin A e Besa në Grupin B. Të rrezikuara janë Vora në Grupin A, Turbina dhe Elbasani në Grupin B.

INTERVISTOI: AGRON KAJA

Jemi një javë para rinisjes së Kampionatit të Kategorisë së Parë, si e përshkruani ritmikën përgatitore të skuadrave?
-Të gjitha skuadrat duken të impenjuara në këtë minifazë përgatiore që po zhvillojnë. Seicila sipas buxheteve e mundësive, por më shumë kanë sfiduar kushtet atmosferike, Ndërsa Lushnja i harxhoi kot ato pare në Ulqin, më mirë të kishte marrë 2-3 lojtarë të rinj.

Në treguesit e përgatitjes, merkatos e miqësoreve, clat skuadra kanë bërë diferencën në këtë periudhë?
-Diferencën e kanë bërë stërvitjet në salla të mbyllura e kalçeto, ndërkohë që Besa dhe Bylisi u treguan shumë aktivë në miqësore, Madje edhe në merkato këto janë skuadrat më aktive. Skuadrat e tjera janë treguar të zakonshme në këtë periudhë.

Si e parashikoni rivalitetin në kreun e renditjes në të dy grupet e Kategorisë së Parë?
-Në të dy grupet do të ketë rivalitet për vendet e kreut, por në Grupin B mendoj se do të jetë më i fortë mes Bylisit e Besës, por ballshiotët duken më afër. Në Grupin A, Vllaznia duket e sigurtë për kreun, ndërsa erzeni me Dinamon nuk përbëjnë ndonjë kërcënim për të.

Po në fundin e renditjes, çfarë ndryshime parashikoni se mund të ndodhin?
-Në të dy grupet skuadrat janë shumë pranë njera-tjetrës dhe rivaliteti besoj se do të jetë i madh. Duhet që të kemi një fazë të tretë serioze mes tyre, jo si ka ndodhur në sezonet e kaluara. Përgjysmimi i pikëve e bën shumë të fortë luftën për mbijetsë për ato skuadra që do të jenë në grupin e pesë skuadrave të fundit në renditje.

Si ish-futbollist e trajner i Vllaznisë, çfarë po tregon kjo skuadër në këtë sezon të Kategorisë së Parë?
-Nuk më vjen mirë ku flas për Vllazninë në Kategorinë e Parë, por deri në fund i duhet që ta respektojë me seriozitet kampionatin. Gjatë kësaj periudhe më shumë do ti duhet ta konsolidojë skuadrën për sezonin e ardhshëm në Kategorinë Superiore.

Një kampionat me tre faza dhe me përgjysmim pikësh, është forma më e mirë për këtë kategori?
-Për deri sa të gjitha skuadrat e kanë pranuar këtë formulë dhe kanë hyrë në garë, kjo duket optimale për të gjitha. Rëndësi ka që të skuadrat të zhvillojnë një garë të bukur, të ndershme dhe më shumë fair-play.

Cili është parashikimi juaj për verdiktet e këtij sezoni në të dy kahjet e renditjeve në Grupet A dhe B?
-Vllaznia duket më e sigurtë në kreun e Grupit A, ndërsa në Grupin B do të ketë shumë rivalitet mes Bylisit e Besës, dhe gjithçka mund të ndodhë. Ndërsa në skuadrat e mbijetesës unë them se të gjitha janë të rezikuara ato që do të luftojnë për qëndrim në kategori.

Mahir Halili ka luajtur për 12 sezone në elitën e futbollit shqiptar, duke e nisur me Kastriotin në sezonin 1994-1995, e më pas me Dinamon, Tiranën e Partizanin, ndërkohë që ka luajtur edhe në Kroaci e Zvicër. Në sezonin 2002-2003 kur luante me fanelën e Tiranës, Halili ka qenë kryegolashënues i kampionatit me 20 gola të shënuar. Njëherësh, Mahir Halili ka luajtur edhe 13 ndeshje me Kombëtaren.

INTERVISTOI: AGRON KAJA

Përgatitje, miqësore dhe merkato, si e përshkruani ritmikën e skuadrave të Superiores në këtë periudhë përgatitore të janarit?
-Mendoj se skuadrat janë futur në këtë periudhë përgatitore me mundësitë që kanë patur. Natyrisht që secila prej tyre i ka nisur këto përgatitje sipas buxheteve që kanë, sepse ato ja kanë kushtëzuar gjithçka në këtë periudhë, njëherësh edhe për lëvizjet në merkato.

Sa mundësi përgatitore afrojnë terrenet në Shqipëri gjatë muajit janar?
-Terrenet shqiptare janë shumë të dobëta, e duke ju referuar motit me reshje shiu e bore, përgatitjet e skuadrave në Shqipëri kanë qenë më shumë në kalçeto, përjashtuar Partizanin me Kukësin që në Antalia që janë përgatitur në kushte shumë të mira stërvitore në këtë periudhë.

Deri më 27 janar që do të nisë faza e tretë e Kategorisë Superiore, çfarë mendoni se duhet të bëjnë skuadrat në këtë hapësirë?
-Kjo periudhë këtë model afron: përgatitje, merkato e ndeshje miqësore dhe besoj deri më 27 janar që do të nisë java e 19-të, të gjitha skuadrat kështu do të veprojnë. Por, gradualisht trajnerët do t’i ulin ngarkesat fizike dhe këto dy javë duhet të jenë më shumë në aspektin tekniko-taktik.

Gjysma e dytë e këtij sezoni nis ndryshe nga të kaluarit, pikërisht me 1/8 e Kupës së Shqipërisë, sa ju shërben ky ndryshim skuadrave të Superiores?
-E mendoj një ndryshim, që ju jep një javë kohë skuadrave që të riformatohen para fillimit të kampionatit. Trajnerët e lexojnë më mirë situatën në skuadër dhe në një javë kohë ata e shfrytëzojnë për ndonjë kolaudim, pse jo, edhe për ndonjë merkato në minutat e fundit.

Nga klubet e skuadrat e Superiores nuk është folur për përmirësimin e marrëdhënieve me tifozët, do të kemi sërish tifozë agresivë në stadiume dhe dënime kolektive të tyre?
-Së pari, unë mendoj se duhet të ketë pak tolerancë në dënimet e tifozëve, sepse ata janë ushqimi kryesor i ekipit në çdo ndeshje. Klubet duhet të punojnë me shoqatat e tifozëve, që të ndërtohen marrëdhënie normale. Dënimi i tifozëve të tyre është dënim edhe për skuadrën.

Nisur nga përgatitjet që po bëjnë skuadrat gjatë këtij muaji, pritet ndonjë surprizë në dy fazat e tjera të kampionatit?
-Që do ketë ndryshime gjatë këtyre dy fazave, kjo është e pritshme, por për ndonjë surprizë e kam me dyshim, sepse deri tani nuk kemi parë ndonjë gjë të veçantë nga skuadrat. Nuk kemi ndonjë lojtar tipik golashënues që të presim prej tij një “bum” në rezultate. Në veçanti mendoj se do mungojnë golat.

Si i parashikoni verdiktet e këtij sezoni në Kategorinë Superiore dhe në Kupën e Shqipërisë?
– Kupën mund ta fitojë edhe ndonjë nga skuadrat që është jashtë luftës për titullin, apo që rrezikon mbijetesën. Por nisur nga aktualiteti, Partizani e Kukësi do të jenë rivalët kryesorë për titullin, ndërsa Kastriotin e mendoj të rrezikuarin e parë për mbijetesë. Më afër tij deri tani duket Luftëtari.

Sa ndikim do të ketë te skuadrat në këtë gjysmë të sezonit, pasi është bërë zyrtare Liga Profesioniste?
-Çdo gjë që i shërben progresit, është në të mirën e futbollit. Dhe Liga këtë mision ka, por unë mendoj se më parë duhet të afrohen njerëz profesionistë në drejtim e menaxhim, duhet logjistikë e infrastrukturë më e mirë nga kjo aktuale. Ndryshe, kjo ligë do jetë formale.

Migen Memelli ka një karrierë të pasur në futboll, të nisur në sezonin 1999-2000 me Skënderbeun dhe e mbyllur në sezonin 2014-2015 me Kastriotin. Në tetë skuadra të Superiores, në Suedi dhe Arabi Saudite, Memelli ka luajtur 18 vite në elitë dhe në sezonet 2008-2009 e 2013-2014 ka dalë kryegolashënues në Kategorinë Superiore, ndërkohë që në këtë karrierë ka qenë edhe pjesë e Kombëtares shqiptare.

INTERVISTOI: AGRON KAJA

Kjo atmosferë me mot të ftohtë dhe reshje shiu, sa shkon pa futboll zyrtar dhe pa Memellin në pankinë?
-Çdo gjë ka kohën e vet dhe dy muaj të tillë janë për përgatitjet që skuadrat bëjnë për pjesën e dytë të sezonit. Ndërsa për pankinën time, unë jam në tregun e trajningut. Gjithsesi është e vështirë, pasi janë rreth 500 të licensuar për 30 skuadra.

Si e shikoni ritmikën e përgatitjeve që skuadrat e Kategorisë Superiore kanë bërë në këtë periudhë?
-Ekipet që kanë ofruar kushtet e një minifaze të vërtetë janë Partizani me Kukësin në Antalia të Turqisë, ndërsa përafrohet edhe Teuta, e cila po përgatitet në Resortin “Tropikal”. Për skuadrat e tjera mendoj se përgatitjet e tyre nuk i përgjigjen nivelit të elitës.

Sa mundësi stërvitore ofrojnë terrenet sportive në Shqipëri, duke patur parasysh kushtet e motit të rënduar nga reshjet e shiut dhe të borës?
-Terrenet sportive në Shqipëri nuk afrojnë stërvitshmëri elite, sepse nuk kanë infrastrukturën e duhur sportive dhe kushte minimale akomodimi. Këto janë kërkesa që bëjnë diferencën për një futboll elitar, të cilat varen shumë edhe nga buxhetet që kanë skuadrat e Kategorisë Superiore.

Nga të gjitha skuadrat e Superiores janë deklaruar largime dhe afrime, ju si e shikoni merkaton e tyre në këtë periudhë?
-Gjithmonë në muajin janar, merkato ka qenë dhe mbetet e vështirë. Sepse mundësitë janë të blesh lojtarë shumë të shtrenjtë, që buxhetet e skuadrave tona e kanë të vështirë ta përballojnë. Ose do të marrësh lojtarë që kanë dalë nga planet e klubeve dhe nuk bëjnë diferencën.

Për dy fazat e para të Superiores, çfarë mangësie konstatoni në ecurinë e garës?
-Thuajse të gjitha skuadrat nuk kanë patur stabilitet në lojën e tyre dhe në rezultatet që kanë arritur, e këtë më mirë e tregon renditja në 18 javë. Me investimet që kanë bërë, të gjitha skuadrat janë afër njera-tjetrës, por duke ju munguar stabiliteti, rezultatet i kanë patur me luhatje.

Mbeten edhe dy javë nga rinisja e sezonit dhe nga klubet ende nuk ka lëvizje për të rregulluar marrëdhëniet me tifozët, do të vazhdohet ende me dënime kolektive të tyre?
-Sa u përket tifozëve, dënimi vjen nga kultura e pamjaftueshme që ekziston në shkallët e stadiumeve. Klubet duhet ta kenë në prioritetet e tyre marrëdhënien me tifozerinë, ndërkohë që boshatisja e stadiumeve vjen edhe nga e drejta televizive me ndeshjet e Superiores.

Gjysma e dytë e këtij sezoni do të nisë me ndeshjet e Kupës së Shqipërisë, është kjo në të mirën e skuadrave për Kampionatin?
-I ndihmon apo jo kjo lëvizje e FSHF-së, kjo do të varet nga puna e klubeve me skuadrat e tyre. Mendoj se kjo duket si një ngjeshje e ndeshjeve e cila duhet menaxhuar në ngarkesat që duhet të marrin futbollistët në këtë periudhë, me qëllim që ajo të mos bjerë në ndeshjet e fundit të sezonit.

E keni një prognozë për verdiktet që mund të sjellë ky sezon te skuadrat e Kategorisë Superiore?
-Për titullin kampion mendoj se rivalë do të jenë vetëm Partizani me Kukësin, ndërsa Teuta, Laçi e Skënderbeu do të jenë në ndjekje të tyre, ndoshta edhe Flamurtari. Për mbijetesë, më të rrezikuar mendoj Kastriotin me Luftëtarin, sepse Tirana me Kamzën kanë ndryshime pozitive.

Por ajo që juristi Artur Çobani sjell më shumë në vëmendje në këtë intervistë për SportEkspres.com, është boshatisja e stadiumeve. Dhe në përmirësim të kësaj dukurie negative të dy fazave të para, ai kërkon ndalimin e dënimeve kolektive të tifozerive në stadiume. Ndeshjet që janë luajtur pa tifozë, për Çobanin janë si t’i shohësh filmat pa zë.

INTERVISTOI: AGRON KAJA

Nga mbyllja e fazës së dytë të Superiores kanë kaluar tre javë, si kanë lëvizur skuadrat në këtë periudhë?
-Pas pushimeve të fundvitit, duket se të gjitha skuadrat e kanë nisur seriozisht punën e tyre përgatitore për të përballuar sa më mirë pjesën e dytë të këtij sezoni. Më mbrapa duken Flamurtari, Skënderbeu e Kastrioti, ndërkohë që te Luftëtari sikur ka një pikëpyetje për rinisjen.

Nisur nga renditja në dy fazat e para, janë shprehur skuadrat tërësisht në vlerat e tyre reale?
-Për mua po. Kko mendoj se është gjendja e skuadrave, sikundër janë renditur në 18 javë. Kukësi ka qenë më lart dhe duhet të kishte më shumë pikë, ndërkohë që Partizani e Teuta janë treguar skuadra më të konsoliduara. Skënderbeun nuk e mendoja të rezistonte kaq gjatë.

Cilët kanë qenë treguesit më negativë të garës së Superiores në 18 javët e luajtura?
-Duke mos harruar gjendjen e dobët të terreneve, mendoj se treguesi më negativ në dy fazat e para ka qenë boshatisja e stadiumeve. Nuk jam dakord me ndëshkimet kolektive, sepse duhet të dallohen individët që dhunojnë. Të luash pa tifozë, është njësoj si të shohësh një film pa zë!

Pjesa më e madhe e skuadrave në Kategorinë Superiore i kanë nisur përgatitjet e minifazës dimërore, sa mundësi u jepet atyre për të ndryshuar në këtë periudhë?
-Gjithçka varet nga buxhetet që kanë skuadrat, njëherësh edhe nga individët që do të përzgjedhin në merkaton e kësaj periudhe. Por problem është se sa cilësorë do të jenë të afruarit për të qenë protagonistë në ndryshimin e skuadrave.

Që duhet nënkuptuar se, gjatë minifazës dimërore ndryshimet do të jenë me pikatore?
-E thënë më qartë, kjo është situata në këtë periudhë dimërore, e kështu që nuk mendohet ndonjë ndryshim i madh. Më shumë rëndësi ka që të ruhet gjendja fizike e futbollistëve, njëherësh të aplikohen elementë taktikë në interes të harmonizimit të lojës. Dy fazat e tjera janë të vështira.

Në fundin e muajit dhjetor 2018 mori udhë Liga Profesioniste, çfarë pritet t’i sjellë më shumë kjo strukturë futbollit shqiptar?
-Ky është lajmi më pozitiv që i shërben profesionizmit në futbollin shqiptar. Është hedhur një hap i tillë dhe duhet përshëndetur, por edhe duhet mbështetur nga të gjitha skuadrat. Dy fazat e Superiores mendoj se do të jenë një “stazh” që Liga të gjejë veten në organizimin e mirë të saj.

Por, Rraklli ndalet edhe në dënimet kolektive të tifozerisë, që aktualisht i kanë zbrazuar stadiumet shqiptare. “Nuk do të ishte korrekte të dënoheshin të gjithë tifozët, nëse gabimin e bëjnë 3-4 prej tyre. Por a ka mundësi që sistemet e stadiumeve të verifikojnë shkaktarët te tifozët? Kjo mbetet dilemë e madhe për kushtet që kanë stadiumet në Shqipëri, prandaj je i detyruar deri diku ta marrësh vendime kolektive”, kështu deklaron Rraklli në këtë intervistë.

INTERVISTOI: AGRON KAJA

Duke qenë mes Shqipërisë e Gjermanisë, e ndiqni ritmikën e futbollit shqiptar?
-Natyrisht që e ndjek dhe më shumë më tërheqin ndeshje specifike ku luajnë skuadra që luftojnë për titullin kampion. Por edhe ndeshjet e tjera janë bërë interesante dhe i ndjek më shumë në TV. Kur ndodhem në Shqipëri shkoj çdo javë në stadium. Kam shumë nostalgji.

Ju jetoni në Gjermani, po në futbollin shqiptar, Kombëtarja apo Superiorja ju tërheq më shumë?
-Ndeshjet e Kombëtares patjetër që tërheqin më shumë logjikisht, sepse është ekipi kombëtar, plus edhe fakti që kam qenë gati një jetë pjesë e kësaj skuadre. Ato më afrojnë më shumë, por profesioni më zgjon nostalgjinë që të dyja t’i ndjek sa herë që të më jepet mundësia.

Besa si skuadra juaj mëmë dhe Tirana ku keni luajtur, si janë aktualisht krahasuar me kohën tuaj?
-Janë shumë më dobët se në kohen time, krahasuar me 10 apo 13 vite më parë. Sepse Besa në atë kohë renditej në 3-4 vendet e para dhe e fitoi dy herë Kupën e Shqipërisë, ndërsa Tirana ishte kampione absolute, sot renditet nga fundi i tabelës së Superiores. Uroj të kthehen sa më shpejt në vendin që u takon.

Kategoria Superiore i ka mbyllur dy fazat e para, mendoni se renditja tregon vlerat reale të secilës skuadër?
-Kampionati është akoma i gjatë për të dalë në konkluzion se sa vlera ka çdo skuadër, por ka një logjikë të qartë, se për sa kohë nuk ndikojnë faktorë të tjerë siç është arbitrimi apo tolerimet, renditja është e merituar. Kjo vlen më shumë në fund të kampionatit.

Po ecurinë e garës në Kategorinë Superiore për dy fazat e tjera të kampionatit, si e mendoni?
-Këtë sezon janë disa skuadra që po tregojnë nivel dhe qëndrueshmëri, në ndryshim me sezonet e kaluara. Kjo e ka rritur sado pak cilësinë e kampionatit. Parë kështu, unë mendoj se do të jetë një garë e fortë deri në fund, si për kampion, ashtu edhe për zonën UEFA dhe rënien nga kategoria.

Mendoni se tifozët duhet që vetëm të dënohen kolektivisht e të zbrazen stadiumet, apo të gjenden forma për t’i afruar në stadium?
-Është paksa e vështirë në të dy rastet. Sepse nuk do të ishte korrekte të dënoheshin të gjithë tifozët, nëse gabimin e bëjnë 3-4 prej tyre. Por a ka mundësi që sistemet e stadiumeve të verifikojnë shkaktarët te tifozët? Kjo mbetet dilemë e madhe për kushtet që kanë stadiumet në Shqipëri, prandaj je i detyruar deri diku ta marrësh vendime kolektive.

Superiorja së shpejti kthehet në Ligë Profesioniste, mendoni se kjo strukturë do ta rritë nivelin e futbollit të elitës në Shqipëri?
-Si teori, patjetër që Liga Profesioniste është zgjidhja më e mirë për ecurinë e futbollit në Shqipëri, por sa të ndërgjegjshëm, të përgjegjshëm e seriozë do jenë njerëzit që do e udhëheqin këtë strukturë?! Këta t’ia lemë kohës.

Në cilët tregues duhet të punohet më mirë për vazhdimësinë e këtij sezoni?
-Në futbollin shqiptar më shumë mendohet për mbrojtjen, se sa për sulmin. Ndryshe në këtë sezon po shikoj lojë më sulmuese dhe nuk doja ta quaja rastësi, por duhet që të prodhohej dhe të tentohej më shumë në lojën sulmuese. Sepse tifozët i tërheq goli që ata të kthehen në stadiume.

Daniel Xhafaj prej dy vitesh e ka lënë futbollin dhe me siguri klubet e Superiores mundohen ta gjejnë një sozi të tijën, por kjo nuk është e lehtë. Tashmë ai jeton në SHBA, por një sy e ka gjithmonë te Superiorja. Në një intervistë të dhënë për “Sport Ekspres”, 40-vjeçari analizon situatën te Flamurtarin, flet për humbjen e titullit nga Skënderbeu, vendimin e Etikës dhe rënien e Tiranës nga kategoria. Në fund flet edhe kuqezinjtë e tjerë, Kombëtaren që tashmë ka mbetur pa trajner, profesion të cilin Danieli e ndjek vetë aktualisht.

 …

-Daniel, i keni dhënë fund futbollit të luajtur dhe tani jetoni në USA. Me çfarë merreni aktualisht dhe a e ndiqni kampionatin shqiptar?

– Tani po jetoj në Amerikë, ku aktualisht jam trajner i ekipit Sëlltik U15 në Florida. Gjithashtu jam pjesë edhe e stafit teknik të akademisë, ku kam rolin e drejtorit teknik për moshat 14-19 vjeç. Sa i takon Superiores, e ndjek vazhdimisht dhe përpiqem të mos distancohem nga ai kampionat.

-Flamurtari zë një vend të rëndësishëm në zemrën tuaj, pasi jeni vlonjat. Pas atij viti që i shkuat shumë pranë titullit, ekipi ka pasur rënie dhe boshti i skuadrës ndryshon shpesh. Çfarë nuk shkon në atë klub?

-Tek Flamurtari nuk mendoj se ka ndonjë gjë që nuk shkon. Atje në fakt ka shumë gabime, si në organizim, si në menaxhimin dhe krijimin e boshtit të ekipit. Vetëm një gjë shkon atje: stafi drejtues. Janë pikërisht ata që bëjnë merkaton, që bëjnë organizimin dhe janë gjithmonë aty. Duhet të pyesni ata se çfarë nuk shkon me Flamurtarin, drejtorët ekzekutiv apo çfarë emrash kanë. Por prapë me çfarë po lexoj, po bëjnë të njëjtin gabim. Nuk ma bën zemra dhe nuk kam dëshirë te dalin fjalët e mia, por prapë po bëjnë të njëjtin gabim që kanë bërë çdo vit, po largojnë lojtarët më të rëndësishëm, po largojnë boshtin e ekipit, madje disa prej tyre edhe vlonjatë, që po i ndërrojnë me lloj-lloj lojtarësh. Ky është menaxhimi i Flamurtarit dhe shembulli më korrekt dhe konkret është Dejvi Bregu. Largimi i tij si një i paaftë tregon sesa të paaftë janë ata si drejtues.

-Ju e prekët edhe vetë. Çfarë komenti keni për largimin e vlonjatëve nga ekipi, ku ka ngelur vetëm Veliu?

– Kjo tregon se Flamurtari del kampion vetëm në merkato, në numrin e lojtarëve që blen, dhe jo se del kampion në garë.

-Çfarë duhet të ndryshojë tek ky Flamurtar që të kthehet rivalizues për pozitat e larta në tabelën e klasifikimit?

– Për mendimin tim duhet të fillohet nga struktura, ajo është e para. E dyta është që duhet t’u jepet mundësia lojtarëve të akademisë, që të krijohet një ekip, një bosht për të ardhmen. Nuk mund të veprohet çdo vit në të njëjtën mënyrë, vetëm blerje, blerje, blerje! Kjo duhet ndryshuar dhe duhet t’i jepet besim akademisë, sepse ata po ecin shumë mirë dhe po dalin kampion, por nuk duhet ngatërruar një gjë, që është shumë e rëndësishme në futboll, duhet t’u japim besim, jo t’i futim në presion. Kjo është ajo që mendoj unë, por nëse presidentit nuk i  dhimbsen lekët që hedh për çdo sezon, atëherë fjalët tona janë kot. Them se ka ardhur momenti që të bëhet një organizim i mirë për të krijuar një Flamurtar për të ardhmen, jo thjesht për të krijuar një ekip ose thjesht një merkato të fuqishme.

-Besoj e keni vënë re që në kampionat mungojnë sulmuesit e “racës”, siç keni ju. A shihni një “Xhafaj” në Superiore?

– Për fatin e mirë, në Shqipëri dalin shumë sulmues të mirë dhe të talentuar, por për fatin e keq të Superiores dhe për fatin e mirë të tyre, ata luajnë jashtë Shqipërie. Kanë cilësi shumë të mira dhe janë të talentuar. Që në moshë të vogël ata ikin jashtë, një shembull është talenti i Vllaznisë Hebaj, i cili është një lojtar shumë i talentuar dhe ka mjaft cilësi për t’u bërë një golashënues.

– Keni provuar të luani në Korçë, aty ku sezonin e fundit titulli kampion nuk u ngrit më. Pse mendoni se ndodhi kjo?

– Mendoj se gabimet e fazës së parë ndikuan në mosfitimin e titullit nga Skënderbeu, por duke shikuar edhe ndeshjen e fundit, ballafaqimin direkt me Kukësin, kur të gjithë e panë çfarë ndodhi… Ajo është një “No comment” dhe shpresoj që të mos ndodhin më arbitrime që ndikojnë për skuadrën që del kampion.

-Po heqjen e titullit të Skënderbeut nga Komisioni i Etikës për sezonin 2015-2016, si e komentoni?

– Me sa mbaj mend unë, mos gabofsha sezonin e 2015-2016, Skënderbeu e ka fituar titullin në fushë, nuk e di se çfarë ka ndodhur më përpara, por atë titull e ka fituar me meritë, ndërsa për vendimin e Komisionit të Etikës, nuk e di ku u bazuan, nuk jap dot një koment.

-A mendoni se duhet ta kërkojë edhe Flamurtari titullin e humbur ndaj Skënderbeut, meqë edhe atëherë kishte kontestime të tilla?

– Për këtë duhet të pyesim drejtuesit e ekipit të Flamurtarit, nëse duhet kërkuar titulli apo jo. Por për sa i përket ekipit dhe lojtarëve, edhe opinioni sportiv dhe të gjithë e dinë se Flamurtari i atij sezoni ishte më superior se rivali i asaj kohe, që ishte Skënderbeu.

-Po rënien nga Kategoria të Tiranës, si e komentoni?

– E rëndë, e dhimbshme, nuk kam fjalë të them, për një ekip me aq shumë tituj që të zbresë në Kategorinë e Parë. Kam përshtypjen se Tirana akoma nuk e ka kuptuar se ku ka arritur, sepse po merret me këto ndeshjet në Europa League dhe mosballafaqimi asnjëherë më parë me ekipet e Ligës së Parë do t’i hapë shumë probleme. Them se ky është momenti më i keq në historinë e Tiranës dhe për të mirën e atij klubi të madh, për të mirën e tifozëve të shumtë, duhet të kthehet aty ku e ka nderin dhe lavdinë.

-Së fundmi jeni pajisur me licencën UEFA A për trajner. E mendoni kthimin në Shqipëri?

– Patjetër që po, sepse unë aty u rrita, aty u formova, por jeta më bëri që të kem një eksperiencë jashtë vendit tim. Jam tip që nuk i trembem sfidave, sepse edhe në jetë përpara kam ecur me sfida, me dinjitet dhe pastërti. Sigurisht që në çdo moment e mendoj rikthimin në Shqipëri.

-Nëse do ktheheshit, cili klub mendoni se përshtatet me idetë që ju keni për futbollin?

– Nuk dua të veçoj asnjë ekip, sepse kudo ku kam luajtur kam kaluar momente të mrekullueshme, por nuk e ndjej veten akoma gati për një ekip të madh dhe profesionist. Kam nevojë për shumë njohuri dhe eksperiencë, edhe pse në licencat e UEFA-s në Shqipëri na kanë dhënë shumë njohuri. Prapë e ndjej nevojën e eksperiencës dhe kur ta ndjej veten gati, kam në plan të marr licencën “UEFA PRO”. Atëherë do të marr një ekip të madh.

-Le të flasim pak për Kombëtaren. Si iu duk largimi i De Biazit dhe kush mendoni se duhet të jetë pasardhësi i tij?

– De Biazi la një histori të madhe, që kemi për ta kujtuar gjatë në memorien tonë, sepse na dhuroi emocione të veçanta, ndaj dhe i uroj suksese kudo që të shkojë. Mendoj se do jetë shumë e vështirë dhe do duhet shumë që të përjetojmë emocione të tilla, por me eksperiencën e duhur të Federatës, mendoj se do të zgjidhet një trajner që do të përpiqet të na i rikthejë prapë ato emocione.

-Së fundmi, a e sheh veten ndonjëherë si trajner i Kombëtares?

– Ëndrrat janë ëndrra, por parimi im është që po të jesh i suksesshëm në rrugën që ti ke, pse jo edhe të mos ëndërrosh. Si fillim duhet të kem suksesin në këtë karrierë që kam nisur dhe në bazë të këtij suksesi edhe mund të ëndërroj.