Imami

Tirana “lidh internetin”, zyrtarizime në seri

Sport Ekspres — Wed, 10 Jul 2019 19:07:33 +0000

Tirana ka pasur sot një ditë shumë të ngarkuar. Klubi kryeqytetas ka afruar tre futbollistë dhe ka rinovuar me dy të tjerë. I pari që rinovoi, ishte portieri Lika, ndërsa tani ka radhën mbrojtësi Imami. Mëngjarashi u transferua nga skuadra e Kukësit dhe bëri një sezon shumë të mirë te bardheblutë, çka i ka siguruar rinovimin edhe për një vit tjetër.

Po ashtu, janë prezantuar sot dhe dy futbollistët Agustin Torasa dhe Elton Kale. Të dy futbollistët kanë eksperiencë në kampionatin shqiptar të futbollit dhe janë dy përforcime shumë cilësore për Tiranën.

Mungesa dhe rikthime, Tirana gati për Skënderbeun

Sport Ekspres — Wed, 01 May 2019 17:03:09 +0000

Tirana pret të shtunën Skënderbeun në një përballje që do të vendosë shumë për garën për mbijetesë. Skuadra korçare vjen në kryeqytet me dy mungesa të rëndësishme si Radas dhe Dita, të dy lojtarët janë të pezulluar për shkak kartonësh.

Në kampin bardheblu i gëzohen rikthimit të Eni Imamit, i cili është stërvitur ditën e sotme me pjesën tjetër të grupit, ndërsa Dorian Kërçiku vazhdon rikuperimin nga dëmtimi në gju duke u stërvitur i diferencuar.

Ajo çka shqetëson trajnerin më së shumti trajnerin Mema është gjendja e mesfushorit Karabeci, i cili pësoi një dëmtim në gju në takimin e fundjavës ndaj Luftëtarit. Gjasat që kapiteni i Tiranës të jetë gati për ndeshjen e së shtunës janë të pakta.

FOTO | Halili “shlyen” kartonin e kuq, Imami me reagim epik

Sport Ekspres — Thu, 07 Feb 2019 19:26:06 +0000

Ndeshja e Kupës së Shqipërisë mes Flamurtarit dhe Tiranës zgjati vetëm 17 minuta për sulmuesin e bardhebluve, Grent Halilin, i cili u ndëshkua me karton të kuq. Dalja e tij nga fusha e lojës ia vështirësoi tepër kualifikimin skuadrës së tij.

Megjithatë, Tirana ia doli të kualifikohet në çerekfinalet e Kupës dhe Halili ka “shlyer” kartonin e kuq të marrë, duke i nxjerrë darkë shokëve të skuadrës. Disa lojtarë të Tiranës postuan foto në rrjetet e tyre sociale, por foton më epike e shpërndau mbrojtësi Imami.

Ky i fundit postoi një foto në krah të Halilit, me mbishkrimin: “Sa më shumë kartonë të kuq dhe gola Grent Halili!” Një foto me nuanca humori nga mbrojtësi i bardhebluve, që tregon dhe njëherë tjetër se është një nga futbollistët më gazmorë në kampionatin shqiptar.

Foto e postuar nga Eni Imami

Imami ngacmon Bathën: E provoi deri javën e parafundit…

Sport Ekspres — Sat, 22 Dec 2018 14:55:36 +0000

Eni Imami la Kukësin në verë për të kaluar te ekipi i Tiranës. Mbrojtësi, i cili luan në disa pozicione edhe te bardheblutë është spostuar disa herë si nga trajneri Ze Maria ashtu dhe tekniku Mema. Në ndeshjen me Flamurtarin, Imami luajti si një mbrojtës qendre dhe bëri një paraqitje të kënaqshme.

Atmosfera duket e mirë në kampion e 24-herë kampionëve të vendit, dhe kjo fitore ka bërë që lojtarët të shkojnë të qetë me pushime. Gjithsesi, Imami ka menduar që të lëshojë një batutë në profilin e tij në “Instagram”, duke vënë në lojë mesfushorin e Flamurtarit, Idriz Bathën.

Në një foto ku veç Imamit e Bathës janë edhe Koliçi e Alla, lojtari kryeqytetas shkruan: “Tre kampionë dhe njëri që e tentoi deri në javën e parafundit”. Normalisht një ngacmim mes shokësh, pasi kujtojmë që dy edicione më parë Alla, Imami dhe Koliçi dolën kampion me Kukësin, ndërsa Partizani ishte kandidat deri një javë para fundit të kampionatit.