Ilkai Gyndogan

Interesimi i Interit, Gyndogan zbulon prioritetin e tij

Sport Ekspres — Mon, 13 May 2019 11:37:52 +0000

Ilkai Gyndogan është një nga objektivat e Interit për repartin e mesit të fushës. Gjermanit i përfundon kontrata me Mançester Sitin në verën e vitit të ardhshëm, ndërsa rinovimi nuk ka ardhur ende.

Rreth kësaj çështje ka folur vetë lojtari. Gjatë festimeve të titullit ditën e djeshme, 28-vjeçari ka folur në lidhje me interesimin e zikaltërve. Gyndogan mohon bisedimet me klubin italian dhe tregon prioritetin e tij, që është fitimi i FA Cup kundër Uotfordit, finale që do të zhvillohet me datë 18 maj.

“Nuk di gjë për interesimin e Interit, sinqerisht ju them që nuk kam biseduar me askënd në Itali. Jam i përqendruar vetëm te përfundimi i sezonit dhe mendoj vetëm që të fitoj edhe një trofe me ekipin tim”, thekson mesfushori gjerman.

Gyndogan: Mançester Siti nuk është akoma ekip i madh

Sport Ekspres — Wed, 10 Apr 2019 13:48:08 +0000

Mançester Siti dështoi të fitojë mbrëmë në “Tottenham Stadium” ndaj vendasve, që arritën të shënonin me koreanin Son dhe ta mbyllnin ndeshjen 1-0. Ekipi i Guardiolës humbi një penallti me Agueron, i cili u eklipsua nga pritja e Hugo Loris. Me këtë hap Totenhemi shkon më i sigurt në “Etihad Stadium” për sfidën e dytë.

Mesfushori i “qytetarëve”, Ilkaj Gyndogan, ndihet i zhgënjyer me humbjen dhe pas kësaj disfate nuk e sheh akoma Sitin si një skuadër të madhe. 28-vjeçari është i mendimit se nëse penalltia nuk do shpërdorohej, ata do e mundnin Totenhemin. Turku shprehet se u mungoi guximi dhe bënë shumë gabime. Ai mendon se këto gjëra nuk ndodhin në një ekip të madh.

“Nuk ishim mjaftueshëm të guximshëm dhe kemi bërë gabime elementare. Jemi shumë nervozë në takimet e Champions League. Në ndeshje të tilla gjithmonë duhet të bësh diçka speciale, sepse jemi në një kompeticion shumë prestigjioz. Nëse do e shënonim penalltinë, atëherë do ta vendosnim poshtë vetes kundërshtarin. Këto gjëra nuk ndodhin në një ekip të madh, kështu që ne nuk jemi akoma i tillë”, deklaroi mesfushori për “Sport Bild”.

VIDEO | “Made in Guardiola”: Goli i Gyndogan, një perlë “44-karat”

Sport Ekspres — Fri, 16 Nov 2018 15:03:08 +0000

Shumëkush mund ta kritikojë se ka trajnuar dhe fituar me Barcelonën më të fortë të historisë, me një ekip që fitonte dhe pa trajner. E njëjta gjë dhe te Bajerni i Mynihut, pavarësisht se eksperienca gjermane nuk ishte dhe aq pozitive. Fitimi i Bundesligës nuk hyn te detyrat e vështira për Bajernin, ndërsa te Mançester Siti po i shkon gjithçka perfekt.

Flasim për Pep Guardiolën një nga trajnerët më të mirë në botë. Revolucionar dhe i fiksuar pas lojës sulmuese. Stili i tij “tiki-taka” është tmerrësisht i vështirë për t’u përballuar nga ekipet dhe tifozët kundërshtarë, ndonjëherë dhe i mërzitshëm, por spanjolli është origjinal dhe vazhdon të insistojë në futbollin e stilit të tij: ofensiv dhe dominues.

Pasi fitoi Premier Ligën në sezonin e kaluar, duke dërguar Mançester Sitin në kuotën e 100 pikëve, djemtë e Guardiolës po bëjnë të njëjtën gjë dhe sivjet, pavarësisht se Liverpuli dhe Çelsi e ndjekin nga afër.

Në ndeshjen e fundit “qytetarët” mposhtën Mançester Junajtid me rezultatin 3-1, duke fituar derbin dhe bërë krenarë tifozët e tyre. Goli që vulosi fitoren u shënua nga Ilkai Gyndogan katër minuta përpara fundit.

Një aksion model dhe gati i pabesueshëm. 44 pasime të lojtarëve të Guardiolës për të mbërritur te rrjeta e mesfushorit. Për më shumë shihni pamjet dhe shijojeni dhe njëherë perlën e Mançester Sitit.