“Nuk do të thoja që është presion, është diçka që e kemi kërkuar që javën e parë të kampionatit, nuk është diçka që po e kërkojmë sot. Ju keni edhe pamjet filmike, ku në ndeshjen e parë të kampionatit mes Skënderbeut dhe Partizanit ka pasur trazira. Policia nuk ishte e pranishme në stadium dhe ndërhyrja me vonesë solli ato pasoja, ku tifozët invaduan fushën dhe filluan të godasin njëri-tjetrin. Që atë ditë në një konferencë shtypi ne kemi kërkuar që Policia e Shtetit të rikthehet në stadium. Pas asaj dite ka pasur edhe disa raste të tjera të kësaj natyre, kurse rasti i fundit i vuri vulën. Nuk mendoj se po bëhet presion, por po kërkohet një e drejtë. Edhe në ligj, e thënë më shkoqur, ligji është interpretuar në mënyra të ndryshme. Juristët tanë kanë zbërthyer ligjin dhe thonë se është detyrë e Policisë së Shtetit që të garantojë rendin në aktivitet sportive, gjë të cilën policia nga ditën e parë të kampionatit e deri më sot nuk e ka bërë”.

REPLIKAT ME POLICINË DHE TAKIMI I SË HËNËS – “E thashë që ka qenë çështje interpretimi i ligjit. Neni 51.1 e thotë qartë që ruajtja e rendit dhe qetësisë në ambientet Sportive është detyrë e Policisë së Shtetit. Ka disa pika poshtë, ku ne themi që është pika e parë, Policia thotë të tjerat. Megjithatë është një çështje e shkuar, pasi të gjitha do sheshohen ditën e hënë në mbledhjen që do të zhvillohet. Do ketë përfaqësues të shtetit, duke nisur nga kryeministri, presidenti i FSHF-së, përfaqësues të klubeve dhe kështu me radhë. Aty do japim opsionet tona, ato çfarë kërkojmë ne nga qeveria dhe nga policia”.

“Nëse s’ka zgjidhje, çfarë ndodh? Mendoj se do të ketë një zgjidhje, përderisa gatishmëria e qeveriste ishte e shpejtë. Do ia lëmë ditës së hënë këtë. Mendoj se do të ketë zgjidhje”.

DËNIMET SELEKTIVE – “Nuk mendoj se është momenti për të bërë paralelizma sot, pasi jemi të gjithë koshient se nuk është rasti të bëhen paralelizma. Është koha që të dënojmë dhunën në mënyrë të fortë, pasi futbolli është sporti më i dashur dhe duhet t’i japim njerëzve kënaqësinë që të vijnë në stadium dhe të dëfrehen. Jo të kthehen fushat e sportit në arena boksi dhe ku siguria e zyrtarëve të ndeshjeve të vihet në rrezik. Kjo duhet diskutuar”.

PROPOZIMET  – “Nëse Policia e Shtetit do të rikthehet në stadium do të kërkojmë disa pika në përmirësimin e Ligjit për Sportin. Kemi bërë propozimet tona kur është bërë ligji, por në atë kohë nuk janë marrë parasysh. Mendojmë që tryeza e ditës së hënë do të sheshojë disa nga këto pika. Besoj se qeveria dhe Policia e Shtetit janë të ndërgjegjshme që duhet gjetur një zgjidhje që t’i shërbejë futbollit. Sot që flasim, të gjithë personat që kryejnë akte dhune marrin dënime administrative. Një nga pikat që do kërkojmë në përmirësimin e ligjit, është që për të gjithë personat që kryejnë akte dhunë në ambientet sportive, vepra të konsiderohet si shkelje penale. Është e vetmja pikë e fortë që do ta shtrëngojë dhe do t’i minimizojë këto fenomene. Plus kësaj ka edhe pika të tjera për përmirësimin e ligjit të Sportit dhe për sponsorizimet. Shpresojmë që qeveria të ndërhyjë dhe t’i ndihmojë klubet shqiptare për të përmirësuar anën financiare të tyre dhe rrjedhimisht do të rritet edhe niveli”, përfundoi Shulku.

 “Ne e shikojmë të pamundur vazhdimin e aktivitetit pa prezencën e policisë së shtetit. Do të kërkojmë të bëjmë takime me krerët e policisë së shtetit për të parë reagimin e tyre. Ligji e thotë qartë, neni 51, pika 1 e thotë se policia e ka detyrim institucional për të garantuar sigurinë në eventet sportive”.

“Po shkojmë drejt fundit të kampionatit dhe tensioni do të rritet, pasi do të vendoset se kush ekip do bie nga Kategoria dhe kush do të shkojë në Kupat e Europës. Pa policinë nuk mund të vazhdojmë. Në biseda që kam pasur disa me policë, më kanë thënë se i marrin nga shtëpitë dhe i mbajnë për 4 orë jashtë ambienteve të stadiumit. Shteti duhet të bëhet palë më ne, nëse dëshiron që futbolli të vazhdojë”.

DËNIMI I KAMZËS – “Për momentin askush nuk e di se çfarë dënimi do të merret. E përsëris këto raste duhet të dënohen me ashpërsi maksimale”, përfundoi Shulku.

DY STANDARDET – Ilir Shulku, Sekretari i Përgjithshëm i Federatës Shqiptare të Futbollit, ka folur në lidhje me praninë e forcave të rendit në stadiumi dhe mënyrën se si Policia e Shtetit e zbaton ligjin. Ai vë në dukje një problematikë dhe tregon se FSHF ka bërë një kërkesë që policia të jetë në brendësi të stadiumeve.

“Kemi raste kur Policia hyn brenda në stadiume, sikurse kemi raste kur Policia nuk hyn brenda në stadiume. Kjo do të thotë që interpretimi i ligjit bëhet në mënyrë selektive. Do të ishte e mira që të merrej një vendim i prerë: Policia do të futet në stadiume ose të mos futet në stadiume. Ne si Federatë e kemi bërë kërkesën tonë që Policia duhet të jetë e pranishme në stadiume, por siç edhe e thashë, nëse e kanë interpretuar ligjin në këtë formë, nuk duhet të jenë në stadiume. Jo në disa stadiume të futen dhe në disa jo.”

KOSTO E LARTË – Problem më vete është edhe kostoja që kanë klubet. Në qytete të vogla as që gjen dot forca sigurie private dhe Bashkitë detyrohen të gjejnë zgjidhje momentale dhe në kundërshtim edhe me ligjin madje.

“Po marrim rastin e një klubi të vogël që financohet nga Bashkia respektive. Ne e dimë shumë mirë se sa janë buxhetet e një Bashkie të vogël. T’i shtosh edhe koston e pagesës së Policisë private, në një ndeshje derbi të zonës ku do të duhet një numër i madh stjuartësh, është mbytëse. Nuk duhet harruar edhe fakti që ai qytet ose ajo zonë nuk i ka aq stjuartë. Abuzohet më pas me kompanitë e stjuartëve nëpër rrethe, ku marrin persona të punësuar nëpër bashki dhe i veshin jelekun e stjuartëve për të treguar që ne kemi një numër të konsiderueshëm”, tregon Shulku në intervistën e dhënë për “ABC News”.

GJENDJA E STADIUMEVE –  “Pjesa më e madhe e klubeve në Kategorinë Superiore dhe Kategorinë e Parë kanë kamera. Ndoshta Policia ka kërkuar perfekten. ‘Selman Stërmasi’, ‘Niko Dovana’, stadiumi ‘Skënderbeu’, stadiumi ‘Flamurtari’ kanë kamera, ashtu si edhe shumë stadiume të tjera. Ne e dimë se çfarë gjendje të vështirë financiare kanë klubet dhe bashkitë. Sektori i Licencimeve pranë FSHF-së i ka vendosur çdo vit kushte klubeve për ta përmirësuar infrastrukturën dhe çdo vit ka ardhur duke u përmirësuar”.

Nisur nga kontributi i tij, FSHF e ka nderuar, duke i dhënë edhe një pllakatë mirënjohjeje për kontributin e tij ndër vite. Të enjten Preçi festoi 80-vjetorin dhe Sekretari i Përgjithshëm i Federatës Shqiptare të Futbollit i akordoi çmimin dhe një dhuratë fotoreporterit të njohur.

POSTIMI I FEDERATËS – Luigj Preçi, një prej fotoreporterëve më pasionant të sportit dhe kryesisht, futbollit, për afro 60 vjet, ka ndjekur shumë veprimtari kombëtare, në nivel kampionati dhe kupe Shqipërie, si edhe përballjet ndërkombëtare. Me pasion ka pasqyruar përmes fotove një pjesë të futbollit shqiptar.

FSHF e respektoi punën dhe kontributin e tij, me rastin e 80-vjetorit të lindjes. Në emër të Federatës Shqiptare të Futbollit, Sekretari i Përgjithshëm, Ilir Shulku, i dhuroi mirënjohjen e institucionit të futbollit për kontributin e tij të gjatë. Ajo u shoqërua me bluzën e personalizuar të ekipit kombëtar, me emrin e Luigj Preçit dhe numrin 80. Në këtë aktivitet merrnin pjesë figura te sportit shqiptar, gazetarisë dhe familjarë të tij.

RISIA – SportEkspres.com, ditë më parë ka raportuar se trajneri i kombëtares tashmë do të jetojë në Shqipëri pjesën më të madhe të kohës. Në fakt ishte menduar ndryshimi i trajnerit, që do ta kishte kusht qëndrimin në Shqipëri.

Në momentin që Panucci u konfirmua, presidenti Duka në takimin që ka patur me italianin e ka vënë një kushtë të tillë, që së fundmi u konfirmua edhe nga Shulku, i cili tregoi se tanimë do të ketë mbledhje të përjavshme të stafeve teknike.

“Do të ketë mbledhje të stafit teknik dhe trajnerët. Çdo të hënë do të ketë mbledhje. Pjesë do të jetë edhe trajneri Panuçi, jo vetëm në mbledhje, por edhe në seleksionime. Ai do të jetë në mbledhjet që do të jenë e nevojshme, sikurse edhe në seleksionimet që drejtori Mustedanagiç do të vendosë. Programin e punës e bën drejtori”.