Dy skuadrat janë të pozicionuara në kahe të kundërta në tabelën e renditjes, por për ish-futbollistin e Partizanit, Ilir Lame, statistikat dhe e shkuara nuk kanë ndonjë rëndësi kur ekipet zbresin në fushën e blerte. Në një intervistë për SportEkspres.com ai flet për derbin tani dhe në të shkuarën, rivalitetin mes ekipeve, por edhe për mungesën e Fanatics.

INTERVISTOI: AGRON KAJA

Ilir, jemi në prag të derbit. Si i shikoni përballjet mes Partizanit e Tiranës sot dhe sa ndryshojnë me kohën kur ju luanit vetë në fushë?
-Ndeshjet derbi në çdo kohë e ruajnë bukurinë dhe interesin e tyre. Çdo periudhë kur luhet i ka të veçantat e saj. Në kohën kur unë luaja me fanellën e Partizanit (1977-1989), më dukej derbi më i bukur. Kjo pasi isha pjesë e tij. Por edhe tani është i bukur.

Do të ndikojë në këtë sfidë renditja aktuale e të dyja skuadrave në Kategorinë Superiore?
-Nuk e besoj. Kjo për faktin se në të tilla ndeshje, si Partizani, ashtu edhe Tirana, nuk kanë patur ndikim nga renditjet që kanë patur. Në çdo ndeshje derbi të dyja skuadrat hyjnë si të barabarta dhe veç aktualitetit të tyre, historia e bilancet kanë ndikim vetëm para e pas ndeshjes.

Partizani nuk e ka fituar titullin kampion që nga sezoni 1992-1993. Pas shumë vitesh konkurrencë me Tiranën, a do jetë kjo përballje si një “hakmarrje” e kuqe?
-Partizani thuajse është kampion dhe nuk mendoj se ky derbi do të ketë këto ngjyra, në kuptimin sportiv. Do ishte shumë bukur që Partizani ta mbyllte titullin kampion pikërisht në këtë ndeshje derbi, ndaj pritet me shumë interes.

Tirana do jetë e braktisur nga tifozët e saj ultras, sa vlen një ndeshje e tillë pa ata?
-Bojkoti i tifozëve nuk i bën mirë Tiranës, pavarësisht rrethanave që ata e kanë marrë këtë vendim. Do jetë një minus për Tiranën, edhe pse Partizani mund të mos jetë shumë i karikuar. Kjo nisur nga pozicioni që ka në renditje. Ndeshje të tilla derbi janë të veçanta dhe nuk duhet të braktisen.

Në këtë sezon, Partizani ka fituar dy takime, 1-0 dhe 2-1, kurse një takim ka dalë barazim 0-0. A do ndikojnë këto statistika të dielën?
-Sikundër edhe renditja aktuale, edhe statistikat e këtij sezoni, që janë në favor të Partizanit, nuk do të kenë ndikim në rezultatin e ndeshjes. Tirana ka pesë sezone që nuk fiton me Partizanin, por edhe kjo statistikë unë nuk  mendoj se do të ndikojë në rezultatin e këtij derbi.

Cila skuadër mendon se do të shënojë gol e para: Partizani apo Tirana? Cila skuadër fiton?
-Për mua mirë është që të shënojë Partizani dhe duke parë kualitetet që kanë të dyja skuadrat. Do të doja që në këtë sfidë, çdo statistikë të fliste për Partizanin, përveç rezultatit final. Të tria rezultatet janë në lojë dhe në të tilla ndeshje është e vështirë të parashikosh një rezultat fiks. Unë do mendoja një barazim, sepse kështu do të ishte më mirë për të dyja skuadrat.

Në lidhje me këtë takim ka folur edhe ish-mesfushori Ilir Lame, i cili e konsideron si përballjen e titullit ndeshjen e së premtes. “Nisur nga diferenca e pikëve që kanë të dyja skuadrat, unë mendoj se kjo është ndeshja që vendos shumë për titullin kampion. Një barazim i Partizanit e bën më të sigurt rrugën drejt titullit kampion. Ndërsa nëse humbet, gara do të vazhdojë mes tyre, por nuk e rrezikon Partizanin në kreun e renditjes”, theksoi ish-protagonisti i Partizanit në periudhën 1980-1990, gjatë së cilës ka fituar tre herë titullin kampion.

Lame nuk e shmang edhe presionin e madh që kanë ndeshje të tilla. “Kur unë luaja futboll, sfida të tilla ishin vetëm ‘derbi’ me Tiranën e Dinamon, më pak me Vllazninë. Duke qenë se Gega e ka provuar titullin kampion si futbollist, në këtë këndvështrim ka më pak emocione nga homologu i tij i Kukësit, Ndreu. Ky është një element i rëndësishëm në menaxhimin e lojës. Këtu mendoj se Partizani do ta ketë më të lehtë”, përfundon Lame.

AGRON KAJA

Lart nga e majta – ILIR LAME , ARJAN HAMETAJ , PERLAT MUSTA,ARBEN MUÇA, ASTRIT RAMADANI, SKËNDER GEGA; Ulur ne mes – YLLI SHEHU, BESNIK BILALI, Prof. NEPTUN BAJKO, ILJAZ DINGU, GENC TOMORI; Poshtë nga e majta ulur – EDMOND KAÇAÇI, LEFTER MILLO, LEDIO PANO, NIKO FRASHERI, ROLAND AGALLIU.

Si një sulmues i mirëfilltë, Ilir Lame luajti në 12 sezone me Partizanin në periudhën 1978-1990, ndërkohë që ka qenë edhe pjesë e Kombëtares në 14 ndeshje. Aktualisht një specialist futbolli, Lame nuk i ndahet Partizanit në çdo ndeshje, dhe në këtë bisedë për SportEkspres.com ai sjell argumentet e tij, duke thënë se “agjerimi” 25 vjeçar për titullin kampion është mbyllur.

INTERVISTOI: AGRON KAJA

Pas 16 javëve kampionat, Partizani kryeson renditjen, për ju ishte e pritshme kjo situatë?
-Fillimisht unë nuk isha besimplotë, nisur nga gjendja në skuadër, e cila sipas meje nuk ishte e konsoliduar si duhej në të gjithë repartet. Por gradualisht, trajneri Skënder Gega e mblodhi mirë skuadrën, dhe ky kryesim në këto 16 javë, pse jo, është edhe pjesë e kësaj pune.

Partizani ka shënuar 18 gola, sa ngjashmëri ka sulmi aktual i Partizanit me sulmin kur ju luanit në këtë skuadër?
-Në periudhën kur unë luajta me fanelën e Partizanit kishte sulmuesa të mëdhenj, si Agim Murati, Mustafa Fagu, Bujar Hado, për ta kaluar te brezi tjetër që unë pata fatin të luaj me Sokol Kushtën dhe Ylli Shehun. I përmenda këto emra, për të thënë se sulmuesit e sotëm janë shumë larg tyre.

Ju keni luajtur te Partizani edhe me Skënder Gegën, si e vlerësoni nga futbollist në trajner?
-Në këndvështrimin tim, Gega futbollist e trajner është i zgjuar për lojën. Edhe si futbollist ai këtë temperament kishte, ndërkohë që sot si trajner te Partizani, veç punës së mirë që ka bërë, duhet të ulë euforinë te skuadra, sepse për vazhdimësinë është “armiku” më i keq që e dëmton.

Pse tekniku i Partizanit u beson shumë të rinjve, është politikë e së ardhmes, apo janë talente që duan minuta lojë?
-Mendoj se brenda politikës për të ardhmen, Gega po i aktivizon rregullisht tre-katër talente që ka aktualisht në skuadër. Është filozofia e tij në punën me të rinjtë, por realisht këta të rinj janë të alternuar mirë edhe me pjesën tjetër të skuadrës, të cilët kanë më shumë përvojë në Superiore.

Edhe pse Partizani kryeson, ka ndonjë defekt te skuadra deri në këtë periudhë?
-Defekte te Partizani ka patur në sezonet e kaluara, ndërkohë që këtë sezon shoh që ka më  shumë përmirësim, por pa përjashtuar edhe momente që eliminohen gradualisht e paralelisht me garën. Pas 25 viteve pritje, Partizanit i ka ardhur koha që të fitojë titullin kampion.

Po deklarata e trajnerit Gega, se ende nuk e mendon titullin, ju si i gjykoni?
-Besoj se kjo është një deklaratë që i shërben psikologjisë në skuadër, për të ulur euforinë. Kështu ai tregohet trajner i pjekur, si kundër ka qenë edhe futbollist, serioz dhe me kulturë. Ato vlera po i shfaq edhe tani në bankinë, dhe frytet janë pozitive në gjysmën e parë të sezonit.

E keni ndonjë sugjerim për skuadrën në tërësi, dhe për trajnerin Gega në veçanti?
-Unë nuk kam asgjë më shumë se sa ka bërë deri tani skuadra, së bashku me trajnerin Gega. Me këtë performancë në 16 javë e mendoj shumë pranë titullit, por duhet që në gjysmën e dytë të sezonit, duke shfrytëzuar edhe merkaton, të punojë më shumë për finalizimin në portën kundërshtare.

Të premten luhet ndeshja Partizani-Kukësi, është kjo supersfida e vitit për kryesimin?
-Natyrisht që po. Edhe pse aktualisht Partizani është i shkëputur 5 pikë nga vendi i dytë, dhe në ndeshjen me Kukësin e ka si detyrim fitoren. Por, edhe duke i parë realisht të dyja skuadrat, pa qenë i njëanshëm, them se Partizani ka më shumë kualitete që ta fitojë këtë sfidë.