Ilion Lika

Zyrtare | Tirana ruan eksperiencën, rinovon gardiani i portës

Sport Ekspres — Wed, 10 Jul 2019 16:52:45 +0000

Shumë lëvizje te Tirana ditën e sotme. Pas zyrtarizimit të katër prurjeve, vjen lajmi se Ilion Lika ka rinovuar me klubin bardheblu. 39-vjeçari do të mbrojë ngjyrat e Tiranës edhe për një vit tjetër. Lajmi është bërë i ditur nga klubi në faqen zyrtare të “Facebook”.

Lika është një nga lojtarët më me eksperiencë në “Selman Stermasi”. Kryeqytetasi ka kaluar një pjesë të madhe të karrierës me këtë klub dhe duket se do të jetë po ai “streha” e fundit para se të mbyllë karrierën. Viti i ardhshëm do të jetë i shtati me 24-herë kampionët e vendit.

Sezonin e shkuar, pjesën më të madhe të kohës e kaloi në stol. Megjithatë, pasiguria e Abibit bëri që ai të rikthehej titullar. Ilioni rezultoi një pikë kyç në luftën për të mbajtur Tiranën në elitën e futbollit shqiptar. Edhe sezonin e ri, me shumë mundësi do e nisë në formacionin e parë të Memës.

Shumë pikëpyetje te Tirana, lista e lojtarëve nën urdhrat e Memës

Sport Ekspres — Fri, 04 Jan 2019 15:54:32 +0000

Tirana ka nisur përgatitjet dhe në seancën e sotme stërvitore grupi i lojtarëve ishte i reduktuar. Nga sa kuptohet, tre janë largimet e sigurta. Portieri Shpëtim Moçka, mbrojtësi Sedat Berisha dhe sulmuesi Dejan Blazhevski nuk ishin nën urdhrat e trajneri Ardian Mema. Të tre këta futbollistë me shumë mundësi do ta vazhdojnë karrierën në të tjera ekipe.

ILION LIKA – Portieri nuk është aktivizuar në ndeshjet e fundit, ndërkohë që sot nuk ka dalë në stërvitje. Nuk dihet arsyeja, por nuk përjashtohet mundësia që edhe ta mbyllë me Tiranën. Gjithsesi duhet pritur qëndrimi i klubit për të mësuar më shumë mbi arsyen e mungesës së “gardianit”.

TË HUAJT – Asnjë prej lojtarëve të huaj nuk ishte i pranishëm në seancën e sotme stërvitore. Lojtarët afrikanë ndodhen në vendlindjet e tyre dhe trajneri Mema i pret sa më shpejt në stërvitje, pasi edhe kampionati nis shpejt. Mbetet për t’u parë nëse do të ketë ndonjë “firo” rrugës, por më parë drejtuesit duhet të bëjnë ndonjë afrim para se të heqin lojtarë. Dëmtimet këtë sezon i kanë penalizuar bardheblutë, ndaj edhe duhet një grup sa më i plotë me lojtarë.

LOJTARËT QË DOLËN SOT NË STËRVITJE
Alesio Abibi, Dorian Kërçiku, Albi Doka, Erjon Hoxhallari, Eni Imami, Marsel Ismailgeci, Klisman Cake, Marvin Turtulli, Gentian Muça, Edon Hasani, Asion Daja, Erando Karabeci, Jurgen Çelhaka, Ernest Muçi, Grent Halili, Andri Stafa, Roi Dingu

FLORIAN ALLA

Lika qetëson Ze Marian, por halli është tjetër

Sport Ekspres — Wed, 22 Aug 2018 16:49:46 +0000

Tirana duhet të bëjë autokritikë ndaj Teutës. Bardheblutë janë të dënuar për të fituar kundër durrsakëve, por kjo nuk do të jetë e lehtë, duke parë edhe atë që tregoi në fushën e blertë skuadra e Bledi Shkëmbit kundër Flamurtarit.

Për trajnerin Ze Maria rikthehet portieri Ilion Lika. “Gardiani”, i cili pati probleme me shpinën para ndeshjes me Kamzën, është i gatshëm dhe ditët e fundit është përgatitur normalisht me skuadrën. Katërkëndëshi është siguruar.

Gjithsesi problemi me sulmin nuk është zgjidhur. Sentamu nuk mund të bëjë dot “9”-shin dhe deri në momentin kur Ngo të kthehet, pritet që Tiranë të vuajë disi. Gjatë kësaj vere janë afruar vetëm sulmues anësor, edhe pse braziliani kërkoi një lojtar për të udhëhequr skuadrën përpara.

Ze Maria me “dhimbje koke”, duhet të vendosë

Sport Ekspres — Wed, 15 Aug 2018 11:45:43 +0000

Tirana po përgatitet ta nisë mbarë rikthimin në Superiore. Është me shumë rëndësi të merret një fitore bindëse kundër Kamzës të shtunën prej orës 19:45. Duhet një mesazh për tifozët, të cilët presin një Tiranë pretendente dhe sigurisht fitimin e derbit.

Por para ndeshjes me Kamzën ka një problem për bardheblutë. Portieri Ilion Lika me shumë mundësi nuk do të jetë i gatshëm për shkak të një dëmtimi. Në takimin miqësor me Prishtinën luajti nga minuta e parë Alesio Abibi dhe trajneri Ze Maria pas ndeshjes ishte i qartë: “Dua edhe një portier”.

Shpëtim Moçka u zyrtarizua një ditë më parë dhe ka nisur stërvitjen. Vlonjati është një opsion për ndeshjen me Kamzën, pasi Lika zor se do të jetë i gatshëm. Problemet me shpinën e pengojnë dhe braziliani duhet të vendosë se kush do të mbrojë katërkëndëshin.