Huan Mata

Junajtid në tokë: Mata nuk ka fjalë, Jang shumë i zhgënjyer

Sport Ekspres — Mon, 06 May 2019 15:40:18 +0000

Mançester Junajtid që nga ikja e Aleks Ferguson vazhdon të kapitullojë. “Djajtë e kuq” barazuan sfidën e djeshme me Hadërsfilldin dhe humbën matematikisht luftën për një vend në katërshen e më të mirave, njëkohësisht mundësinë për një vend në Champions Ligën e sezonit të ardhshëm. Të gjithë ishin të zhgënjyer e mes tyre edhe spanjolli Mata dhe Eshli Jang.

Huan Matës i mungonin fjalët pas këij dështimi. Mesfushori i drejtohet tifozëve dhe zhgënjimin e tij të madh e shpreh në vetëm pak fjalë. “Ju meritoni më shumë. Nuk ka nevojë për fjalë”, shkruan spanjolli.

Eshli Jang i bie më gjatë. Ai mundohet të gjejë fajtorët dhe thotë se duhet të largohen disa kohë nga futbolli për t’u kthyer më të fortë.

“Kjo nuk ndodhi nga mungesa e përpjekjes dhe përqëndrimit. Nuk jam i sigurt se cili është shkaku. Mund të jenë shumë gjëra bashkë, por nuk është çasti për t’u marrë me këtë. Është një zhgënjim i madh. Të pushojmë pak kohë dhe të pregatitemi për t’u kthyer më të fortë. Një klub si ne nuk duhet të luftojë për një vend në Champions, por të fitojë trofe”, u shpreh 33-vjeçari.

Solskjaer “nxjerr fshesën”, pesë lojtarë konsiderohen të ikur

Sport Ekspres — Wed, 03 Apr 2019 21:03:24 +0000

Mançester Junajtid po përgatitet për një merkato të fuqishme. Krahas afrimeve që këtë vit do të jenë të shumta, te “djajtë e kuq” do të ketë dhe shumë largime.

Pesë lojtarëve të skuadrës angleze u mbaron kontrata në fund të këtij sezoni dhe situata duket shumë shanset për rinovim janë thuajse 0. Të pestë lojtarët e mëposhtëm do t’i shohim në klube të tjera sezonin e ardhshëm.

ANTONIO VALENCIA – Mosha 33 vjeç

Kapiteni i Junajtid do të largohet pas një dekade te skuadra e nga veriu i Anglisë. E ardhmja e ekuadorianit do të jetë përsëri në Angli, ku ofertat nga ekipe të mesit të tabelës nuk do t’i mungojnë.

Mateo Darmian – Mosha 29 vjeç

Pesë sezonet e Darmian te Mançester Junajtid kanë qenë të shoqëruara me shumë ulje dhe ngritje. Italiani kurrë nuk arriti të jetë një lojtar stabël në formacionin e “djajve të kuq” dhe rinovimi i kontratës nuk ka sens për asnjë nga palët.

HUAN MATA – Mosha 30 vjeç

Spanjolli është një nga lojtarët më të preferuar të akademisë, por është e qartë për të gjithë që Mata nuk është më i dikurshmi. Lojtari po shqyrton oferta nga vendlindja, por edhe ato nga kampionati kinez.

XHEJMS UILSON – Mosha 23 vjeç

Disa prej jush mund ta mbajnë mend sulmuesin Xhejms Uilson. Mëngjarashi ishte një ndër talentet më premtues të akademisë së Junajtid, por vitet e fundit ka qenë shumë i pafatë, duke pësuar dy dëmtime tepër të rënda në gju. Në Championship ka mjaft ekipe të interesuara për 23 vjeçarin, i cili në katër sezonet e fundit ka kaluar disa huazime në këtë kampionat.

ANDER HERRERA – Mosha 29 vjeç

Herrera bën përjashtim nga të gjithë personat e tjerë të listuar. Mesfushori spanjoll është në planet e klubit, por agjenti i tij po negocion një transferim me kosto 0 te PSG-ja. Ekipi francez i ka ofruar spanjollit një kontratë shumë herë më të mirë krahasuar me propozimet e Junajtid.

Rinovime dhe merkato, Junajtid kërkon mbrojtësin kampion bote

Sport Ekspres — Fri, 12 Oct 2018 14:45:28 +0000

Drejtuesit e Mançester Junajtid po vazhdojnë punën për të përforcuar ekipin në merkaton e janarit. Siç citon “Marca”, klubi anglez është i interesuar për mbrojtësin francez të Atletiko Madrid, Lukas Hernandez dhe ka bërë ofertën e parë për të.

22-vjeçari i krahut të majtë u shpall Kampion Bote me Francën në Rusi, ndërsa vazhdon të dhurojë paraqitje pozitive me ekipin e Simeones. Hernandez ka një klauzolë prej 80 milionë eurosh në kontratën e tij. Junajtid ka bërë një ofertë “ofenduese” sipas gazetës spanjolle, ndërsa lojtari është një nga të preferuarit e Zhoze Murinjos për krahun e majtë të mbrojtjes.

Lukas Hernandez me Kilian Mbape gjatë festimeve të Kupës së Botës

Nga ana tjetër klubi anglez po mendon për rinovimet në ekip. Huan Matës i skadon kontrata në verë, por drejtuesit e klubit janë gati për t’i ofruar rinovimin mesfushorit 30-vjeçar siç citon “The Sun”.

Lojtari shënoi golin e parë në fitoren me përmbysje kundër Njukasëllit. Klubi nuk dëshiron ta humbasë lojtarin me parametra zero në verë, ndërsa është gati për të zgjatur marrëveshjen me futbollistin spanjoll.