Hoakim Lëv

Lëv zbulon pasuesin, dy kandidatë për stolin e Gjermanisë

Sport Ekspres — Mon, 01 Jul 2019 16:01:17 +0000

Në historinë e kombëtares gjermane do të mbajmë mend një epokë, atë të Hoakim Lëv. Megjithatë, vetë fjala epokë nënkupton një fillim dhe një fund. Kështu, edhe koha e Lëv në krye të Gjermanisë po merr fund. Këtë fakt e pranon edhe vetë trajneri në një intervistë për mediet e vendit të tij. Në vitin 2022 kontrata e tij do të skadojë dhe pas kësaj, stoli i përfaqësueses do të jetë vakant.
Trajneri mundohet të zbardhë se çfarë do të ndodhë pas largimit. Ai shprehet se tekniku i Gjermanisë U21 dhe zëvendëstrajneri i kombëtares së madhe janë dy kanditatët kryesorë për të marrë drejtimin e kombëtares pas ikjes së Lëv. Kujtojmë se e njëjta situatë ishte edhe pas largimit të Jurgen Klinsman, kur drejtimin e mori Lëv, i cili ishte zëvendëstrajneri i kombëtares.

“Ne kemi dy trajnerë në federatën tonë. Ata kanë padyshim aftësitë e duhura për të qenë trajnerë të kombëtares. Janë Markus Sorg (zëvendëstrajner i kombëtares) dhe Stefan Kuntz (trajneri i Gjermanisë U21). E kanë treguar për një kohë të gjatë dhe e ndiejnë punën që po bëjnë. Kjo është shumë e rëndësishme për lojtarët e rinj. Të dy e bëjnë punën e tyre shumë mirë. Gjithsesi, nuk e marr unë vendimin në fund. E vetmja gjë që mund të them është se ata e zotërojnë aftësinë për të qenë trajnerë të Gjermanisë”, deklaroi Lëv.
Stefan Kuntz

BERLIN, GERMANY – OCTOBER 10: Assistenz coach Marcus Sorg of Germany talks to the media during a press conference of the German national team at Mercedes-Benz am Salzufer on October 10, 2018 in Berlin, Germany. (Photo by Boris Streubel/Bongarts/Getty Images)

Markus Sorg

Lëv i shkel syrin Realit: Po mbaron koha ime me Gjermaninë!

Sport Ekspres — Sun, 09 Dec 2018 14:00:27 +0000

Hoakim Lëv drejton Gjermaninë që nga viti 2006, kombëtare të cilën e dërgoi në majën e botës në vitin 2014. 58-vjeçari përfundoi në ciklonin e kritikave pas eliminimit të Gjermanisë në fazën e grupeve në Botërorin e Rusisë, për faktin e mos menaxhimit të mirë të lojtarëve, gabimeve në lojtarët e ftuar dhe lidhjen e fortë me disa lojtarë, të cilët nuk ishin në formën më të mirë.

Lëv ka folur për “ZDF”, duke lëshuar sinjalet e para të largimit nga kombëtarja. Dëshira e gjermanit është të drejtojë një klub jashtë Gjermanisë dhe emri i parë që të vjen në mendje është Reali i Madridit.

Lëv ishte pranë stolit madrilien pas largimit të Zidan, ndërsa Perez mund t’i rikthehet përsëri kësaj piste pas deklaratave të vetë trajnerit.

“Ka kaluar pjesa më e madhe e kohës time si trajner i Gjermanisë. Vjen një moment kur duhet të mendosh se çfarë do të bësh më vonë. Unë vazhdoj të jem i interesuar për të drejtuar një klub dhe mendoj se mund ta bëj një gjë të tillë jashtë Gjermanisë. Reali i Madridit? Është një klub interesant për çdo trajner...”, përfundon trajneri i kombëtares gjermane.

Lëv kundër Klopit, Nations League “molla e sherrit”

Sport Ekspres — Wed, 10 Oct 2018 13:08:27 +0000

Jurgen Klop kritikoi Nations League si “kompeticioni më i pakuptimtë në botë”. Trajneri i Liverpulit theksoi se “duhet të fillojmë të mendojmë më shumë për lojtarët”, ndërsa replika ka ardhur nga Hoakim Lëv. Trajneri i kombëtares gjermane është vënë në mbrojtje të Nations League, një kompeticion që ka zëvendësuar ndeshjet miqësore dhe ekipet janë ndarë në grupe sipas nivelit pothuajse të njëjtë të skuadrave.

Lëv preferon të përballet me kombëtare të forta, diçka që ia lejon Nations League. Trajneri gjerman e kupton shqetësimin e trajnerëve të klubeve, por ai mbron kompeticionin e ri gjatë konferencës për shtyp para ndeshjeve kundër Holandës dhe Francës.

“Për ne dhe për mua si trajner, Nations League është një shpikje e mirë, sepse luajmë kundër kombëtareve të mëdha. Ky është një kompeticion që vlen për diçka dhe për mua është më e rëndësishme të përballemi me më të mirët, sesa kundër kombëtareve të shteteve të vogla. Trajnerët e klubeve ndonjëherë nuk i pëlqejnë pushimet e ndeshjeve ndërkombëtare, sepse shumë lojtarë të Liverpulit, Bajernit të Mynihut, ose Mançester Sitit largohen. Kjo gjë nuk iu jep mundësinë trajnerëve të stërvitin normalisht skuadrat e tyre“, përfundon Hoakim Lëv.

Hoakim Lëv: Ja çfarë nuk ia fal dot Ozilit!

Sport Ekspres — Fri, 07 Sep 2018 12:42:38 +0000

Fakti që Mesut Ozil nuk e lajmëroi Hoakim Lëv për vendimin e marrë për t’u tërhequr nga kombëtarja gjermane, i ka lënë një shije të hidhur trajnerit të Gjermanisë.

29-vjeçari i Arsenalit vendosi të tërhiqej nga kombëtarja, duke akuzuar për racizëm dhe mos respektim të tij, për shkak të origjinës turke. Trajneri është zhgënjyer në planin human dhe nuk ia fal lojtarit diçka të tillë.

“Prisja të më telefononte personalisht dhe të ma tregonte vendimin që kishte marrë. Për këtë shkak jam i zhgënjyer me Ozil në aspektin human, sepse kemi qenë bashkë prej shumë vitesh”, u shpreh Lëv për “ZDF”, mbas ndeshjes miqësore me Francën. Megjithatë, trajneri nuk dëshiron t’ia mbyllë derën përfundimisht mesfushorit.

“Do të marr përsëri iniciativën për ta telefonuar”, shprehet Hoakim Lëv. Çështjes në fjalë i është rikthyer dhe mbrojtësi i Bajernit të Mynihut, Mats Humels, i cili nuk e besoi se foto e bërë nga Ozil dhe Gundogan me presidentin e Turqisë, Rexhep Taip Erdogan, do të krijonte aq shumë polemika.

“E diskutuam brenda ekipit, por nuk ma mori mendja që do të kishte ndikim aq të madh në performancat tona, sa ndikoi në të vërtetë. Mendoj që kjo ishte gjëja e gabuar”, përfundon Mats Humels.

Lëv: Ozil më ka zhgënjyer, ia mbylli dyert vetes

Sport Ekspres — Wed, 05 Sep 2018 15:14:25 +0000

Hoakim Lëv ka folur mbi mundësinë e një rikthimi të Mesut Ozil në kombëtaren gjermane. Ai u tërhoq nga përfaqësuesja dhe hodhi akuza për racizëm dhe mos respektim të tij, për shkak të origjinës turke. Trajneri i Gjermanisë ka folur për këtë çështje në një prononcim për “Bild”, duke i mbyllur derën përfundimisht mesfushorit të Arsenalit.

“Mesut ka bërë një zgjedhje të qartë, duke i mbyllur derën vetes. Deri më sot nuk më ka telefonuar akoma. Kam kërkuar të kontaktoj me të gjatë javëve të fundit, nëpërmjet telefonit dhe mesazheve, por ai vendosi të marrë këtë rrugë dhe unë duhet ta respektoj.

Ozil ka qenë lojtari im për nëntë vite, kemi kaluar bashkë shumë momente të bukura, fituam Botërorin në 2014, diçka që nuk do të harrohet kurrë. I qëndroj idesë që ai mbetet një nga lojtarët më të mirë që kemi pasur në Gjermani gjatë 20-30 viteve të fundit. Një ditë do të ulemi dhe do të flasim dhe sqarohemi, edhe pse do të dëshiroja që të më lajmëronte personalisht për vendimin e marrë, gjë nga e cila u zhgënjeva shumë në fillim”, përfundon trajneri i kombëtares gjermane, Hoakim Lëv.

Hoakim Lëv: Nënvlerësuam çështjen e Ozil, por ai e teproi

Sport Ekspres — Wed, 29 Aug 2018 13:22:33 +0000

Mbasi ka shpallur listën e lojtarëve të grumbulluar për miqësoret me Francën dhe Perunë, Hoakim Lëv është ndalur te mesfushori Mesut Ozil, i cili vendosi të tërhiqej nga kombëtarja gjermane mbas kritikave të shumta.

“Mesut nuk më ka telefonuar deri më tani. Vendimin e tij duhet ta pranoj, por ai e teproi pak me akuzat për racizëm. E nënvlerësuam impaktin që do të kishte çështja e tij me mediat, sepse ishim të impenjuar me përgatitjet për Botëror.

Ju siguroj që nuk ka patur kurrë sulme ose deklarata racistë në skuadrën tonë. Kjo gjë na dhemb ne të gjithëve, por edhe Ozilit”, përfundon trajneri i Gjermanisë.