Henri Okebugu

Devolli i gëzohet rikthimeve, Kastrioti bëhet “top”

Sport Ekspres — Mon, 22 Apr 2019 16:57:31 +0000

Kastrioti mori vetëm një pikë kundër Partizanit dhe diferenca me Tiranën dhe Luftëtarin është 5 dhe 7 pikë. Këto dy skuadra përballen mes tyre të dielën në kampionat dhe skuadra e Devollit do të marrë tre pikët në tavolinë me Kamzën, ndaj edhe distanca me rivalët për mbijetesë pritet të ndryshojë.

Krutanët po mendojnë për ndeshjen e radhës, që është planifikuar të luhet ndaj Laçit në transfertë. Devolli do ta ketë grupin më të plotë për këtë ndeshje, pasi rikthehen dy prej lojtarëve që munguan ndaj Partizanit.

Edison Ndreca kompleton mbrojtjen, pasi në të majtë mungojnë alternativat. Gjithashtu edhe Henri Okebugu është i gatshëm pasi e ka shlyer pezullimin prej kartonëve. Kështu krutanët do të shkojnë në këtë transfertë me ekipin e plotë dhe synimi do të jenë tre pikët.

Kartonët penalizojnë Kastriotin, Devolli: Kemi një plan për “demat”

Sport Ekspres — Fri, 19 Apr 2019 14:16:10 +0000

Kastrioti e ka finale me Partizanin dhe çdo rezultat tjetër veç fitores do i zbehte shumë shanset e krutanëve për të qëndruar në Superiore. Edhe pas humbjes së pësuar me Skënderbeun, ende ka besim. Kështu, të gjithë futbollistët janë të motivuar maksimalisht për ta kaluar me sukses Partizanin.

Trajneri Devolli gjatë këtyre ditëve është munduar të ndërtojë një formacion konkurrues, por grupi i lojtarëve nuk do të jetë i plotë. Mbrojtësi Edison Ndreca ka lënë një “gropë” në të majtë të mbrojtjes. Mbetet për t’u parë se kush do e zëvendësojë.

Veç Ndrecës, me kartonë është edhe nigeriani Henri Okebugu. Lajm i mirë është vetëm gatishmëria e Edi Bojom, i cili së bashku me kapitenin Emiljano Çela do të pozicionohen në qendër të prapavijës. Ndeshja Kastrioti-Partizani zhvillohet nesër dhe nis prej orës 16:00.

DEKLARATAT – Trajneri Bledar devolli, para ndeshjes me Partizanin ka folur dhe tregon se kanë një plan për t’i mposhtur të kuqte. “Nuk qajmë për një ndeshje, ka ikur. Kemi punuar mirë këtë javë, Është histori e mbyllur Skënderbeu. Ka entuziazëm kemi bërë një plan për këtë ndeshje. Kemi një kundërshtar të fortë përballë, janë ekip i mirë dhe i organizuar.

Kemi bërë një plan, të jemi agresivë nga fillimi dhe të shënojmë. Më pas gjërat bëhen më të lehta. Shpresoj të jetë stadiumi plot dhe të na japin një dorë tifozët, por edhe fati”, u shpreh Devolli në RTSH Sport para ndeshjes me Partizanin.

Kastrioti më i plotë për finalen e sezonit, dy rikthime gëzojnë Devollin

Sport Ekspres — Mon, 11 Feb 2019 15:53:08 +0000

Kastrioti pësoi humbjen e parë për këtë vit përballë Partizanit, ndërsa vazhdon përgatitjet për ndeshjen e radhës. Një duel mbijetesë për krutanët, që do të udhëtoj drejt Kamzës për t’u ndeshur me ekipin e Gjokës.

Të dy ekipet mbyllin renditjen me nga 16 pikë, ndërsa Luftëtari është 5 pikë larg. Me ardhjen e Bledar Devollit në krye të stolit, Kastrioti ka siguruar dy fitore të mëdha kundër Luftëtarit dhe Skënderbeut dhe është rikthyer në garën për mbijetesë.

Ekipit i është bashkuar më në fund mesfushori Henri Okebugu. 20-vjeçari u largua në dhjetor drejt vendit të tij, ndërsa kthimi në Krujë vonoi si pasojë e problemeve me pasaportën.

Okebugu ka zgjidhur gjithçka dhe Devolli do të ketë një opsion më shumë, duke nisur nga transferta me Kamzën. Një tjetër rikthim për këtë ndeshje do të jetë Husein Lukman, mbrojtësi i djathtë nigerian. 22-vjeçari ka shlyer pezullimin dhe është gati për finalen e radhës.

Mungesa e vetme për Kastriotin do të jetë Herald Marku, i cili ka plotësuar numrin e kartonëve në ndeshjen kundër Partizanit dhe nuk mund të zbresë në fushë kundër Kamzës.