Hellas Verona

VIDEO | Verona zbavitet me ekipin amator, shënon dhe talenti shqiptar

Sport Ekspres — Sun, 14 Jul 2019 21:26:43 +0000

Futbollisti shqiptar Marash Kumbulla ka qenë një ndër autorët e golave në fitoren 12 – 0 të Hellas Veronës ndaj amatorëve të US Primieros. Qendërmbrojtësi 19-vjeçar tundi rrjetën pas një harkimi në nga një goditje këndi.

Kumbulla është një ndër talentet më të vlerësuar nga stafi i Veronës dhe pritet që të vazhdojë të jetë pjesë e skuadrës gjatë sezonit të ardhshëm, ku Verona ka për objektiv të sigurojë mbijetesën në Serie A.

Rrahmani zbarkon në Itali, dardani duket gati për Serie A

Sport Ekspres — Tue, 25 Jun 2019 17:03:43 +0000

Armir Rrahmani është transferuar te skuadra e Hellas Veronës dhe do të jetë një tjetër shqiptar që do të luajë në Serie A. Mbrojtësi kërkohej edhe nga Sëlltiku dhe Standard Liezhi, por zgjodhi të transferohej në Itali.

Sot, mbrojtësi i përfaqësueses së Kosovës ka zbarkuar në Itali dhe këtë gjë e ndau dhe me ndjekësit e tij në Istagram. “Bella Italia”, shkroi 25-vjeçari krahas fotos, ku shihet mbrojtësi dardan dhe Adrian Aliaj, agjenti i tij.

Rrahmani luajti për 3 sezone me skuadrën e Dinamo Zagrebit, ku shënoi 4 gola në kampionatin kroat. Në Shqipëri, Rrahmani ka mbajtur veshur fanellën e Partizanit për dy sezone (2013/14 dhe 2014/15).

Shtohet numri i shqiptarëve në Serie B, debuton 18-vjeçari i shpresave

Sport Ekspres — Fri, 28 Dec 2018 18:47:52 +0000

Një tjetër talent shqiptar ka debutuar në Serie B. Bëhet fjalë për Marash Kumbullën, i cili u aktivizua për skuadrën e Veronës në fitoren e djeshme 4 – 0 ndaj vizitorëve të Çitadelës. Lojtari i kombëtares shpresa të Shqipërisë u fut në lojë si zëvendësues në minutën e 74-të, kur rezultati i ndeshjes ishte 2 – 0 për ekipin vendas.

Mbrojtësit 18-vjeçar i është dashur të tregojë shumë durim, pasi ndeshja e djeshme ishte 17-ta, që e shikonte nga stoli i rezervave, por në ndryshim nga herët e tjera, trajneri Fabio Groso, vendosi t’i jepte debutimin e shumëpritur në një ndeshje kampionati.

Në një postim në llogarinë e tij në Instagram, Kumbulla u shpreh mjaft i gëzuar për debutimin, duke shkruar: I gëzuar për debutimin tim në Serie B, por akoma më i kënaqur për fitoren e skuadrës.

Debutimi i Kumbullës çon në gjashtë numrin e lojtarëve shqiptarë në Serie B, pasi në këtë kampionat luajnë Ledian Memushaj (Peskara), Elhan Kastrati (Peskara), Emauele Ndoj (Breshia), Kastriot Dermaku (Kozenca) dhe Xhakomo Vrioni (Venecia).

Fusha me probleme, Verona fiton në tavolinë

Sport Ekspres — Fri, 14 Sep 2018 10:56:41 +0000

Në Itali nuk falin dhe ka qenë Kozenca që e ka pësuar. Më 1 shtator duhet të luante me Hellas Veronën, por ndeshja nuk u luajt për shkak të gjendjes së fushës. Tashmë janë mbledhur organet disiplinore dhe kanë vendosur.

Gjykatësi sportiv, Emilio Batalia, i ka ngarkuar përgjegjësinë klubit të Kozencës për dështimin e luajtjes së ndeshjes, ndaj edhe ndeshjen në tavolinë e ka fituar Verona. Veç kësaj ka edhe një gjobë prej 3 mijë eurosh për klubin kalabrez.

Fusha në stadiumin “San Vito-Marula” mund të sillte dëmtimin e lojtarëve, pasi gjendja e saj në zona të caktuara nuk ishte e mirë. Klubi vendas e dinte diçka të tillë dhe nuk kishte marrë masat e duhura për ta zgjidhur problemin, ndaj edhe e ka pësuar. Justifikimi se insektet kishin dëmtuar fushën nuk është pranuar.