TITULLI KAMPION – “Vuajtjet dhe sakrificat e gjithë vitit na u shpërblyen me fitoren e kampionatit në fund. Ishte një fund i lumtur, u gëzuam të gjithë”.

STËRVITJA  – “Në stërvitemi pothuajse çdo ditë. Një seancë zgjat diku te një orë o gjysmë ose dy orë. Pjesa tjetër është kohë e lirë. Po të kemi dëshirë mund të bëjmë stërvitje ekstra. Ndonjëherë trajneri vendos të na japë një ditë pushim pas një ndeshje”.

RËNDËSIA E REGJIMIT –“Nëse nuk mban regjim kjo gjë do të pasqyrohet menjëherë në paraqitjet në ndeshje ose stërvitje. Gjithçka është në dëmin tënd”.

HAPAT E PARË – “Futbollin e kam filluar shumë i vogël, diku te 8 vjeç. Babai më thoshte se do i hyja futbollit, pasi ai i kishte luajtur vetë, dhe ky sport do më bënte mirë për shëndetin. Më pas e kuptova se mund të shkoja më larg. Daja më bëri tifoz më Brazilin. Në përgjithësi më pëlqenin të gjithë brazilianët, veçanërisht Ronaldinjo. Më pas u dashurova me Ronaldon, jo me Mesin”.

A KA ZËNKA NË SKUADËR – “Të them drejtën këtë vit kemi pasur shumë harmoni në ekip. Normalisht nuk është e thënë të rrish me 25 çuna. Mund të kesh një grup djemsh që je më i afërt. Këtë vit ka pasur shumë harmoni, prandaj besoj arritëm te ky sukses. Futbolli i njeh acarimet. Janë gjëra që ndodhin në nerva e sipër, por shuhen aty menjëherë”.

E ARDHMJA – “Nuk e di të them të drejtën. Këtu te Partizani jam në huazim. Kam dhe një vit kontratë me Domzhalen në Slloveni. Tani do shoh sa të fillojë merkato. Partizani ka të drejtë të aplikojë të drejtën e blerjes së kartonit. Në rast se jo, atëherë do kthehem në Slloveni e do vazhdoj atje”.

KOMBËTARJA – “Është një ëndërr që e ka çdo shqiptar besoj, sidomos ne që jemi marrë përherë me futboll. Nuk ka arritje më të madhe se sa të luash në kombëtare”.

MIQËSIA ME LOJTARË TË KOMBËTARES – “Po Balajn e kam kushëri, ndërsa Roshin e njoh prej Bekimit. Jam shumë i afërt me ata, komunikoj shpesh. Kur kam qenë pjesë e moshave të Rijekës, ata ishin në ekip të parë dhe më kanë dhënë një ndihmë shumë të madhe. Kalonim çdo ditë bashkë. Më kanë këshilluar si të jem më i qetë dhe si të stërvitem më shumë”.

SKUADRA E ZEMRËS –  “Unë jam formuar si futbollist në Shkodër dhe normalisht kam qenë tifoz i Vllaznisë. Vitin e parë si profesionist e kam kaluar te Vllaznia. Është normale të jem tifoz me Vllazninë. Për Partizanin kam pasur gjithmonë simpati, pasi pavarësisht se ra në kategoritë më të ulëta, u ngrit prapë dhe doli kampion. Është krenari dhe nder për ne që e arritëm ta kthenim në majë të futbollit. Kështu bëjmë që moshat e reja te bëhen tifozë me Partizanin, pasi ka shumë me Tiranën”.

THUHET SE FUTBOLLISTËT JANË TIPA TË TURPSHËM? – “Varet, nuk janë të gjithë njësoj ka dhe tipa që s’i pushon goja. Unë ndoshta hyj më shumë te të turpshmit, por më mirë të them diku në mes”.

MESAZHI PËR TË RINJTË – “Do i thosha të rinjve që të besojnë në vetvete dhe me punë e përkushtim mund të arrijmë çdo gjë”.

Sulmuesi Rubin Hebaj ka bërë një postim disi të çuditshëm dje, pasi në profilin e tij në “Instagram” ai ka shkruar në anglisht: “Kam dëgjuar se jeni lojtar: Kënaqësi që ju takoj! Unë jam trajneri”. Nuk është shumë e qartë nëse është një mesazh, por fakti që ai e ka lidhur me terma sportive të bën të dyshosh.

Shkodrani nuk ka pasur shumë hapësira te “demat”, pasi vetëm 6 takime i ka nisur nga minuta e parë. Hebaj ka realizuar 2 gola, por kanë pasur një peshë të madhe, për faktin se ka gjetur rrjetën në takimin derbi me Tiranën, duke përmbysur rezultatin.

“Nuk e mendoja të shënoja dy gola në një ndeshje kaq të bukur. Ishte surprizë ky dygolësh dhe kjo ndeshje. Shpresoj të vazhdoj kështu edhe në të ardhmen. Partizani ka shumë sulmues. luftojmë të gjithë si ekip. Është treguar qartë, çdo lojtar ka shënuar. Rëndësi kanë fitoret e klubit. Klubi ka alternativat, unë shpresoj të jem pjesë e Partizanit

I pyetur në lidhje me çfarë i tha trajneri pas shënimit të golit, Hebaj thotë: “Gega më uroi për golin dhe më tha të kem kujdes, që të mos pësojmë gol”.

“Është ndeshja më e bukur e kampionatit dhe që përjetohet nga tifozët dhe të gjithë. Atmosferë e mirë, shënova dy gola”.

“Nga Vllaznia u largova për një të ardhme më të mirë. nuk kisha minuta atje dhe mendova të vij në Shqipëri. Tani shpresoj të shëno, jam ambientuar dhe shpresoj të vazhdoj kështu”.

“A do e pranosh stolin? Do pranoj, çdo futbollist e pranon. Do preferoja të qëndroja në stol dhe të shënoja, se sa ta filloj nga fillimi dhe të mos shënoj. Nuk besoj se kam neglizhuar në stërvitje, por goli më ka munguar. Kjo ka bërë të dalin të këqijat e mia në pah. Me shënimin e golave shpresoj të jem më agresiv pranë portës kundërshtare”

“U befasova nga huqi i Hoxhallarit. Ishte refleks kur godita dhe shënova. Nuk e prisja të gabonte, por futbolli i ka këto”.

Është vetëm 19 vjeç shkodrani, nuk shkoi me premtimin se do të luante gjithnjë, por është një investim i rëndësishëm i Domzhales, që po mundohet ta rritë si duhet, pa presionin e rezultatit dhe golave vendimtarë.

Këtë sezon Hebaj ka luajtur titullar vetëm në kupë, ku e ka gjetur golin, por në kampionat ka luajtur 13 herë, gjithnjë nga stoli.

Në sulm Domzhale ka lojtarë shumë cilësorë, mjafton të përmendet Agim Ibraimi, i transferuar në janar, por gjithsesi është Hebaj lojtari me më shumë rendiment te Domzhale.

Hitri kot blisk! ?? Dva protinapada, dva zadetka. ? Najprej je lepo zadel Alvir, nato je bil uspešen še Hebaj. Pri obeh zadetkih je uspešno podal Bizjak. #skupajdovrha #plts pic.twitter.com/hf35XfjXRc

— NK Domžale (@NKDomzale) May 14, 2018

Edhe dje sulmuesi i Shqipërisë U-21 u fut në pjesën e dytë në ndeshjen kundër Aluminij dhe 15 minuta pasi u fut, shënoi golin e fitores 2-1 për skuadrën e tij, që do të luajë në Europa League sezonin e ardhshëm.

Vetëm 5 lojtarë kanë shënuar më shumë se Hebaj këtë sezon te Domzhale, por shkodrani ka një rekord: 4 golat e tij i ka shënuar në pak më shumë se 300 minuta futboll, pra gol çdo 80 minuta. I vetmi që i afrohet është sulmuesi xhamajkan Nikolson, gol çdo 100 minuta pak a shumë.

Goooool! ?? Znova v vodstvu, tokrat je bil uspešen Rubin Hebaj!

Ve? ?? https://t.co/DgmdRDtdh3 #skupajdovrha #plts pic.twitter.com/UZbxzPzIpV

— NK Domžale (@NKDomzale) May 13, 2018

Është prodhimi i fundit i “minierës” shkodrane të futbollit, një sulmues modern, i aftë të luajë në disa role dhe i zoti me kokë dhe këmbë. Tani Rubin Hebaj pak nga pak po ia merr dorën futbollit slloven dhe po bëhet i rëndësishëm te Domzhale, që në fakt ka shumë besim tek ai dhe e konsideron një investim të rëndësishëm. Dje Hebaj shënoi golin e tij të tretë sezonal, në humbjen e pësuar për kupë në Mura. Shkodrani luajti nga minuta e parë dhe shënoi në minutën e 15-të, por Mura përmbysi gjithçka në 45 minutat e para, me Domzhalen që mbeti me 10 lojtarë. Përtej eliminimit nga kupa, Hebaj po tregon gjithë potencialin e vet, sepse ka shënuar 2 gola në kampionat në vetëm 117 minuta, ndërsa tashmë ka shënuar edhe në ndeshjen e parë që luan në kupë, me një mesatare impresionuese goli, një të tillë në më pak se 70 minuta. Me siguri Vllaznia e vajton talentin e vet, sepse këtë sezon nuk ka një pikë referimi në sulm dhe me një si Hebaj përpara do të shënonte me shumë lehtësi. “Sport Ekspres” ka biseduar me talentin shkodran pas ndeshjes së djeshme, duke u ndalur te karriera sllovene, por edhe te Vllaznia dhe kampionati shqiptar.

– Urime për golin, Rubin. Si po ecën aventura ne Slloveni?

– Mirë, shumë mirë, jam i kënaqur me gjithçka. Tani po stërvitem mirë, por edhe po luaj e po shënoj, çka më jep kënaqësi dyfish.

– Si ka ecur ambientimi, me jetën në Slloveni, me klubin, stafin e lojtarët?

– Jam ambientuar shpejt, edhe falë ndihmës së të gjithëve. Më kanë pritur shumë mirë dhe i falënderoj, sepse nuk është e lehtë të ndryshosh për herë të parë klub dhe njëkohësisht të ndryshosh edhe kampionat, ku duhet të mësosh gjuhën dhe mentalitetin.

– Keni shënuar 3 gola deri tani, por ende pa luajtur titullar në kampionat. Si e shpjegon, thjesht çështje kohe, apo konkurrenca është tepër e ashpër?

– Konkurrenca e madhe, kemi shumë lojtarë cilësorë në sulm. Dihet se sa më lart të shkosh në karrierë, aq më e madhe është konkurrenca, por besoj që me kalimin e kohës do kem edhe unë minutat e duhura.

– Duke u kthyer pas, a ishte zgjedhja e duhur Sllovenia dhe largimi nga Vllaznia?

– Për mendimin tim, largimi nga Vllaznia më bëri mirë, sepse këtu ka më shume gjera për të mësuar. Në momentin që te Domzhale nuk do të kem më hapësira përmirësimi dhe do të kem nevojë për sfida të reja, do tentoj te bej hapin tjetër në karrierë, por për momentin jam shume mirë dhe po punoj fort.

– A ke ndonjë peng nga koha kur luaje për Vllazninë?

I vetmi pishman janë golat sepse nuk arrita të shënoj shumë, edhe pse nuk kisha shume minuta. Përveç kësaj, këtu nuk ka aq interes sa në Shqipëri nga tifozët, pasi Domzhale është një qytet i vogël. Më mungon atmosfera e mrekullueshme e tifozëve në Shkodër.

– E ardhmja, ku e shihni veten?

– Së ardhmes nuk i dihet kurrë, ndaj nuk preferoj të bëj plane afatgjata e të thur ëndrra më kot. Së pari duhet të punoj shumë, që të kompletohet si futbollist dhe të kem një bilanc sa më pozitiv në Slloveni, pastaj të tjerat do të vijnë natyrshëm.

– Kombëtarja, tashmë po luan me U-21. A po të mungon goli i parë kuqezi?

– Një plus i madh për mua, si për çdo lojtar. Është një nder për mua të jem pjesë e ekipit U-21 dhe ndihem shumë mirë sa herë që grumbullohem. Jam në një moshë mjaft të re dhe kam edhe një edicion tjetër përpara, përveç aktualit, ndaj jam i qetë për sa u përket golave, pasi herët a vonë do të vijnë. Rëndësi ka që të luaj dhe të jap kontributin që pret trajneri prej meje, nëse arrijmë rezultate nuk ka rëndësi kush shënon.

– Përmende ëndrrat, që nuk duhen thurur më kot, por a është kombëtarja e madhe një ëndërr e së ardhmes?

– Nuk ka futbollist që nuk e ëndërron kombëtaren e madhe, kur është në moshë të re. Unë jam pjesë e kombëtares aktualisht dhe synimi i të gjithë ne që jemi tek U-21 është pikërisht arritja e kombëtares së madhe, për të punuar dhe për ta ngritur Shqipërinë sa më lart.

– Je në Slloveni, por na e merr mendja se e ndjek Superioren. Ndonjë përshtypje?

– Natyrisht, isha pjesë e kampionatit deri para pak muajsh dhe ende rrëqethem kur kujtoj ndeshjen e fundit të sezonit kundër Tiranës. Emocionet, gëzimi, tifozët në stadium, të gjitha këto nuk i harroj dot dhe kampionatin e kam ndjekur këto javë të para. I kam parë në përgjithësi rezultatet dhe komentet mbi javët e para të Superiores, nuk më duket se kanë ndryshuar shumë gjëra nga sezoni i shkuar, janë të njëjtët rivalë për titull, por uroj që Vllaznia ime të paraqitet më mirë se sezonin e fundit.

– Vllaznia e nisi mbarë, ka bërë blerje të rëndësishme, por u mund dhe mërziti gjithë Shkodrën në ndeshjen kundër Teutës.

– Më ka ardhur shumë keq për atë humbje, ndoshta më i drejtë ishte barazimi. Vllaznia ka bërë shumë ndryshime në verë dhe i duhet kohë, ndaj shpresoj që tifozët të mos shkurajohen, sepse dihet që me një humbje në shtëpi tifozët ftohen dhe largohen nga stadiumi.

Përtej eliminimit nga kupa, Hebaj po tregon gjithë potencialin e vet, sepse ka shënuar 2 gola në kampionat në vetëm 117 minuta, ndërsa tashmë ka shënuar edhe në ndeshjen e parë që luan në kupë, me një mesatare impresionuese goli, një të tillë në më pak se 70 minuta.

Me siguri Vllaznia e vajton talentin e vet, sepse këtë sezon nuk ka një pikë referimi në sulm dhe me një si Hebaj përpara do të shënonte me shumë lehtësi.

Shkodrani 19-vjeç është në procesin e ambientimit në kampionatin slloven dhe po aktivizohet gradualisht, duke rritur minutazhin nga java në javë.

Dje Domzhale luante në transfertë me Kërshkon dhe pas pjesës së parë të mbyllur në disavantazh 1-0, trajneri Simon Rozhman aktivizoi Hebajn.

Menjëherë Hebaj mori përsipër të ndryshonte fatet e takimit, sepse në minutën e 54-t dha një kros perfekt për Shirok, i cili nuk fali, duke barazuar.

Vetëm 4 minuta më vonë Hebaj shfrytëzoi një kros në zonë, duke goditur bukur me kokë dhe duke kaluar në avantazh Domzhalen, me golin e parë personal në Slloveni.

Më pas fati iu kthye kundër Domzhales, sepse u ndëshkua me karton të kuq dhe Kërshko përfitoi, duke fituar 4-2.

Gjithsesi, ndeshje e veçantë për sulmuesin e Shqipërisë U-21, që tani e tutje shpreson të ketë edhe më shumë hapësirë.

Klubi njofton se sulmuesi shkodran është një përforcim cilësor në sulm, ku nevojiteshin përforcime, siç tregon drejtori sportiv Matej Orazhem: “Në fund të sezonit të shkuar vendosëm se duhej të përforconim sulmin. Sulmuesi i kombëtares sllovene Alen Ozhbolt tashmë do të ketë në krah Rubin Hebajn, që është sulmues i të rinjve të Shqipërisë. Një sulmues si Hebaj nuk ekziston në kampionatin slloven, ndaj vendosëm të kërkojmë jashtë dhe Rubini ka një potencial të jashtëzakonshëm. Për shkak të ndeshjeve me Kombëtaren U-21 dhe detyrimeve të shkollës, ai është bashkuar paksa me vonesë me ne, por jemi të bindur se ai do të jetë shumë shpejt i gatshëm të ndihmojë skuadrën tonë”.

Vetë Hebaj shprehet entuziast për aventurën e re: “Është një hap i madh për mua. Jam i gëzsuar që do të luaj në një klub si Domzhale. Është një klub i famshëm për punën e mirë me të rinjtë. Unë jam i ri, klubi ka besim tek unë dhe do të bëj gjithçka që ta justifikoj këtë besim. Për mua kalimi në Domzhale është një hap i ri përpara në karrierë”.

“Deri tani kam luajtur me kombëtaret e moshave në Shqipëri, duke udhëtuar shpesh jashtë, ndaj nuk besoj se ambientimi do të jetë problem. Dua të arrij rezultate sa më të mira me Domzhalen, përfaqësim të mirë në Europa League dhe gjithashtu sukses në kupë”.

Shumë tifozë janë të kënaqur për hapin e madh të sulmuesit të talentuar, të tjerë akuzojnë klubin se po prish skuadrën dhe ka edhe nga ata e shohin me dyshim këtë lëvizje, duke pasur frikën se Hebaj nuk do t’ia dalë të përballojë presionin, duke qenë ende shumë i vogël.

Në faqen e rrjetit social Facebook të uebsitit “Shkodrasport.com” ka komentuar edhe “arkitekti” i kësaj lëvizjeje, Edi Martini, i cili është në rolin e agjentit të Hebajt.

I ngacmuar nga një tifoz, ish-futbollisti i famshëm shkodran ka lëshuar një batutë të hidhur kundrejt Vllaznisë, që sezonin e fundit e aktivizoi shumë rrallë në formacionin titullar Hebajn: “Ju 8 ndeshje e keni futur, nuk keni pasur nevojë për të”.

Gaspër Marku

Nuk ka më asnjë dilemë: Rubin Hebaj është zyrtarisht pjesë e skuadrës sllovene, Domzhale. Sulmuesi i talentuar shkodran ka firmosur një kontratë 3-vjeçare me klubin në fjalë dhe prej së hënës do të jetë në dispozicion të skuadrës së re për të vijuar përgatitjet e pjesëmarrjes për në Kupat e Europës. Nga sa bëhet e ditur për “Sport Ekspres”, kontrata e Hebajt me klubin slloven është firmosur, që me datë 15 qershor me drejtorin sportiv të Domzhales, Matej Orazhem, që është edhe djali i presidentit të klubit. I pranishëm në këtë ceremoni firmosje ka qenë edhe menaxheri i Hebajt, ish-futbollisti dhe ish-trajnerit shkodran, Edi Martini.

Në këtë mënyrë, 19-vjeçari Rubin Hebaj, djali i ish-futbollistit të Vllaznisë, Ritvan Hebaj konsiderohet zyrtarisht pjesë e skuadrës sllovene. Burimet në fjalë bëjnë të ditur se skuadra sllovene, si fituese e kupës së Sllovenisë, prej datës 11 qershor kanë nisur fazën përgatitore në një nga kampingjet turistike të Sllovenisë. Që prej kësaj date, me skuadrën duhej të ishte edhe Hebaj, por nisur nga angazhimet me ekipin kombëtar Shpresa U-21 dhe angazhimet në provimet e maturës, ai është lënë pushim deri këtë fundjavë.

Megjithatë, tashmë si pjesë zyrtare e klubit slloven, Domzhales, stafi teknik e ka angazhuar futbollistin shkodran me një plan individual për ta zbatuar gjatë qëndrimit të ditëve në Shkodër. Në verifikimet e bëra pranë Drejtorisë Rajonale Arsimore të Shkodrës, Rubin Hebaj figuron të jetë ndër nxënësit më të dalluar të qarkut, ku në tre provimet e para është vlerësuar me notat 9 dhe 10-të. Për të përfunduar angazhimet e maturës shtetërore, Hebajt i ka mbetur edhe një provim për të konsumuar, ai lëndës me zgjedhje, i cili është i planifikuar të zhvillohet paraditen e së premtes së 23 qershorit.

Burimet pranë menaxherit Edi Martini, por edhe familjes “Hebaj”, bëjnë me dije se me mbylljen e provimeve të së premtes, mëngjesi i së shtunës do ta gjejë futbollistin shkodran në udhëtim e sipër drejt Sllovenisë i shoqëruar si gjithnjë nga menaxheri Martini dhe babai i tij, Ritvan Hebaj. Përkundër ndonjë opinioni të shprehur në media se Hebaj firmos të shtunën me sllovenët e të Domzhales, një gjë e tillë nuk ka pse të ndodhë, sepse firmat e kontratës me drejtorin e klubit Matej Orazhem, Rubin Hebaj i ka hedhur që me datë 15 qershor 2017.

Vetë Hebaj, por edhe menaxheri i tij Martini, bëjnë të ditur për “Sport Ekspres” se udhëtimi të shtunën ka të bëjë vetëm me regjimin e futbollistit, i cili pasi të pushojë edhe të dielën, të hënën do të jetë i gatshëm t’i bashkohet skuadrës së re në seancën e parë stërvitore, duke nisur kështu një mision të ri, që për shkodranin duket se është në kohën e duhur dhe vendin e duhur për të bërë më të mirën në karrierën e tij sportive.

Supersport raporton se marrëveshja është mbyllur dhe të shtunën Hebaj pritet në Slloveni, ku do të firmosë kontratën e re.

Natyrisht, Vllaznia nuk e lëshon lehtë produktin e vet, ndaj do të marrë në këmbim një shumë parash, por ndoshta edhe një pjesë të kartonit në rast rishitjeje.

Në Shkodër futbollin e kanë në gjak, e kanë si oksigjenin, mjafton të kujtosh skenat drithëruese të Vllaznia-Tirana dhe të kujtosh emrat e mëdhenj që i ka dhënë Shkodra futbollit shqiptar, pa harruar që Vioresin Sinani e Hamdi Salihi, për shembull,m kanë vendosur rekorde golash në rang kombëtar. Nuk po zgjatemi me nostalgjinë, ndalemi tek e tashmja dhe e ardhmja: kundër Tiranës  Vllaznia ishte “bio”, me djem thuajse të gjithë Under-23. Natyrisht, nuk mund të mungonin në stadium vëzhgues që nuk e kishin mendjen se kush binte nga kategoria, por si do të paraqiteshin talentet e rinj, në të dy krahët. Vllaznia nuk mund të mos habiste dhe disa lojtarë të saj që tani janë drejt transferimit në kampionate më cilësorë, që do t’u hapnin rrugën për në Europën e vërtetë, atë të futbollit profesionist dhe jetës që e ëndërrojmë. Tani “Sport Ekspres” mëson të rejat e fundit nga Shkodra dhe ndërsa të gjithë presin kthimin e ndonjë shkodrani në shtëpi, të tjerë rriten e bëhen gati të nisin fluturimin, duke nisur nga Rubin Hebaj e Eraldo Çinari. Të dy kanë shkëlqyer këtë sezon, të dy janë “fëmijë”, nga ata që po të rriten si duhet, bëhen “flori” për vete e për klubet që i marrin.

HEBAJ – Nuk ka mbushur ende 19 vjeç, por Hebaj është që tani një xhevahir, nga ata që mund të quhen e ardhmja e futbollit shkodran. Për të mirën e tij, por edhe të Vllaznisë, e ardhmja duhet të jetë jashtë Shqipërisë dhe tashmë ka ardhur oferta e parë vërtet serioze. Klubi slloven Domzhale e kërkon që tani sulmuesin dhe jo sa për numër. Sllovenët janë të zgjuar, shumë më përpara se ne: Hebaj është 18 vjeç dhe ka shënuar 4 gola këtë kampionat, edhe pse në vetëm 8 ndeshje nga minuta e parë, vlera e tij në treg është shumë e ulët në krahasim me atë që mund të shkojnë për 2-3 vjet. Vllaznia e di mirë këtë gjë, por nuk ka shumë në dorë: në Shkodër Hebaj rrezikon të digjet, jo për faktin se nuk do të punohej mirë me të, por gjendja e Vllaznisë dhe mungesa e vitrinës evropiane do ta dëmtonin shumë talentin e Shqipërisë U-21, i cili shkëlqeu edhe para dy ditësh ndaj Estonisë. Domzhale e mbylli sezonin e fundit në vendin e katërt në Slloveni dhe fitoi edhe kupën, ndaj do të marrë pjesë në Europa League, si zakonisht në dekadën e fundit. Bisedimet kanë nisur me kohë dhe Hebaj është gati, mjafton që Vllaznia të japë “OK”. Natyrisht, klubi shkodran do pagesën e vet, ose një pjesë të kartonit, por përshtypja është se 90% e punës është kryer tashmë.

ÇINARI – Një ndër emrat e fundit që ka shpërthyer në Shkodër është ai i mesfushorit Erald Çinari. Ai ka 3 vite me ekipin e parë, edhe pse është vetëm 20 vjeç. Është kthyer në titullar fiks te Vllaznia dhe në dy sezonet e fundit ka luajtur në Superiore mbi 3500 minuta. Paraqitja e tij e mirë me kuqeblutë ka bërë që futbollisti të zgjojë interesin e ekipeve edhe jashtë vendit. Largimi i tij nga Shkodra është shumë afër dhe pista më e mundshme është Kroacia. Interesimi për mesfushorin e avancuar është konkret. Burime pranë lojtarit bëjnë të ditur për “Sport Ekspres” se bisedimet me klubin me të cilin do të bashkohet, janë në fazën përfundimtare. Emri i klubit nuk bëhet ende i ditur, por e rëndësishme për të është se sezoni i ri do ta gjejë, me shumë mundësi, me një skuadër të re. Shpesh për futbollistët e rinj shkodranë janë bërë pengesë kontratat afatgjata dhe shumat e larta të kartonit. Këtë radhë duket se diçka e tillë nuk do të jetë problem, pasi Çinari ka folur me drejtuesit e klubit kuqeblu dhe në ditët në vijim pritët një takim mes tij, drejtuesve të Vllaznisë dhe atyre kroatë. Këta të fundit do të vijnë në Shkodër për të mbyllur transferimin e Çinarit. Duke qenë produkt i Vllaznisë, lojtari nuk mund të largohet pa u derdhur një shumë e caktuar në arkën e klubit kuqeblu, ndaj duhet bërë gjithçka me marrëveshje. Nuk do të ishte etike, që Çinari të largohej me polemika. Gjithçka do të bëhet qetësisht dhe do të finalizohet,  nëse mbeten të gjithë të kënaqur. Çinari ka debutuar në moshën 17-vjeçare dhe deri tani ka luajtur 74 ndeshje me fanellën kuqeblu, duke shënuar 10 gola. Herë mesfushor dhe herë sulmues, sipas nevojës, Çinari është një lojtar shumë i vlefshëm në aspektin taktik për çdo trajner, ndaj edhe menaxherët e huaj e kanë piketuar.