Harry Kane

Kejn: Finalen s’do e shoh kurrë në video, do rikthehemi sërish

Sport Ekspres — Fri, 19 Jul 2019 14:55:39 +0000

Totenhemi arriti për herë të parë në historinë 136-vjeçare të klubit të luante një finale Champions Lige. Ekipi i drejtuar nga Mauricio Poçetino zhvilloi një sezon fantastik në Europë dhe u ndal vetëm nga Liverpuli i Klopit.

Zhgënjim dhe dhimbje e madhe për Spurs, por kapiteni beson se ata mund të rikthehen sërish aty. Herri Kejn nuk ishte në formën e tij më të mirë, shtrëngoi dhëmbët dhe luftoi fort, por nuk arriti që të ndihmonte ekipin e tij.

Sulmuesi i Totenhemit i është rikthyer edhe njëherë finales së Madridit në një prononcim për The Sun. Kejn nuk e ka parë akoma në video ndeshjen dhe vështirë që diçka e tillë do të ndodhë në të ardhmen.

“Për ne futbollistët, finalja e Champions Ligës është, me shumë mundësi, një nga ndeshjet më të rëndësishme të karrierës. Është shumë e vështirë ta lësh pas krahëve atë humbje. Kur arrin në një ndeshje kaq të rëndësishme dhe nuk jep gjithë potencialin që ke, bëhet akoma dhe më tepër e rëndë.

Gjithsesi, jemi të vetëdijshëm se mund t’i përjetojmë përsëri ato emocione. Jemi në gjendje të rikthehemi sërish dhe të bëjmë gjëra të mëdha. Humbja e finales është e rëndë, por të jep stimuj për të tentuar ta rilash përsëri. Nuk e kam parë ndeshjen në video dhe besoj se nuk do ta shoh kurrë”, përfundon Herri Kejn.

“Jam gati”, Totenhemi me një yll më shumë në finale

Sport Ekspres — Mon, 27 May 2019 17:27:07 +0000

Totenhemit që nga 9 prilli i është dashur të privohet nga shërbimet e sulmuesit kryesor. Herri Kejn pësoi atë dëmtim në ligamente dhe gjatë gjithë kësa periudhe i është dashur të punojë fort për t’u kthyer në urdhrat e trajnerit Poçetino.

Sulmuesi shprehet se është gati të luajë në finalen e Madridit më 1 qershor nda Liverpulit. Kejn është stërvitur prej javës së shkuar me pjesën tjetër të ekipit dhe siç deklaron, nuk ka pasur shqetësime. Ai ndihet gati, megjithatë e lë çdo gjë në dorën e trajnerit.

“Ndihem mirë. Trajneri do vlerësojë dhe vendosi nëse do të luaj. Unë jam gati. Kam bërë një punë të madhe veçmas për t’u kthyer me skuadrën. Nuk kam pasur asnjë shqetësim. Jam gati të luaj çdo lloj ndeshje. Jam i sigurt se çdo lojtar, ashtu si unë dëshiron të jetë në fushë”, u shpreh sulmuesi 25-vjeçar.

Grizman kalon i dyti, Mesi do te Barça yllin anglez

Sport Ekspres — Fri, 17 May 2019 19:23:29 +0000

Barcelona është pranë nënshkrimit me Antuan Grizman. Francezi lajmëroi largimin nga Atletiko e Madridit dhe katalanasit janë favoriti kryesor për ta marrë. Klauzola e blerjes së tij është 120 milionë euro. Ai pranon edhe një ulje të pagës me rreth katër milionë euro vetëm që të jetë përkrah Mesit në sulmin blaugran.

Është pikërisht “pleshti” argjentinas, që sipas “Fox Sports”, anullon operacionin e blerjes së kampionit të botës. Leo dëshiron diçka tjetër, një golashënues të madh. Ai do yllin e Totenhemit, Herri Kejn. Mësohet se Leo i ka kërkuar drejtuesve të orientohen në blerjen e anglezit.
Gjithashtu i është shprehur Valverdes të organizojë një skemë të re 4-3-1-2. Mesi do të qëndronte para dyshes Kejn-Suarez për t’i dhuruar sa më shumnë topa atyre. Kështu Barça do të kishte dy “vrasës” para portës.

VIDEO | Harrojini çmimet “Oscar”, në internet plas ironia!

Sport Ekspres — Mon, 25 Feb 2019 18:57:09 +0000

Në futboll, lojtarët që simulojnë janë të shumtë dhe shumë futbollistë “kryqëzohen” në rrjetet sociale për veprimet e tyre. Më i kritikuari, është Nejmar, por dhe emra si Heri Kejn dhe Mohamed Salah nuk mbeten pas.

Një video e postuar nga “90min” në faqen e tyre zyrtare në “Facebook”, ka plasur ironia pas çmimeve “Oscar”, duke thënë se aktorët e vërtetë janë disa futbollistë. Video e publikuar ka ironizuar jo pak me disa futbollistë: Për simulimet e tyre në fushën e lojës dhe për veshjet qesharake që zgjedhin në evenimente gala.

Tronditet Totenhemi, dëmtohet lojtari kryesor

Sport Ekspres — Tue, 15 Jan 2019 17:41:59 +0000

Herri Kejn trembi jo pak stafin e Totenhemit në momentin që u dëmtua në ndeshjen e fundit ndaj Mançester Junajtid, por në fillim u pa si diçka jo serioze. Gjithsesi, tashmë që janë kryer të gjitha analizat dhe kanë dalë përgjigjet, ambienti i “gjelave” të Londrës është tronditur, pasi kapiteni i tyre do të mungojë deri në muajin mars.

Kështu, ekipi i Poçetinos humbet kapitenin dhe lojtarin kryesor të saj për gati dy muaj, pas dëmtimit në ligamentin e kyçit të majtë. Mungesë e rëndësishme, sidomos për sfidat ndaj Borusias së Dortmundit në Champions, të cilat vështirë se do ta shohin në fushë 25-vjeçarin.
Këtë sezon, Kejn ka luajtur 22 takime me Totenhem, duke gjetur rrugën e rrjetës plot 14 herë. Tashmë, pas dëmtimit të sulmuesit kryesor, nga drejtuesit londinez nuk përjashtohet dhe një ndërhyrje në merkato, pasi i vetmi lojtar ofensiv në rolin e Kejn është Fernando Lorente.

Following preliminary assessments, we can confirm that @HKane has damaged ligaments in his left ankle, sustained during Sunday's match.

He will continue to be monitored by our medical staff as he commences rehabilitation and is expected to return to training in early March. pic.twitter.com/Ot3doPa4K6

— Tottenham Hotspur (@SpursOfficial) January 15, 2019

Plani i Real Madridit për rinovim, pazar te Totenhami

Sport Ekspres — Sat, 12 Jan 2019 09:30:44 +0000

Skuadra e Realit të Madridit kapi majat e futbollit në pesë sezonet e fundit, por me moshën mesatare që po rritet, presidenti Perez ka menduar për rinovim të skuadrës.

Largimi i Ronaldos mendohet të ishte vetëm hapi i parë i këtij projekti dhe priten edhe largime të tjera, ku vetëm kapiteni Ramos shihet si i paprekshëm. E për të zëvendësuar këta lojtarë, Reali i Madridit synon të bëjë pazar te skuadra londineze e Totenham.

“Gjelat” kanë një nga skuadrat më të mira në Evropë dhe më të re në moshë, çka vë në pah punën e jashtëzakonshme të trajnerin Poçetino. Shumë lojtarë të Totenhamit janë në radarin e Realit, me mesfushorin Eriksen dhe sulmuesin Kejn që kryesojnë listën.

Po përveç dy fenomeneve të Totenhamit, “Los Blancos” synojnë edhe talentin Dele Ali dhe koreanin Son-Heun, i cili ka qenë lojtari më i mirë për “Gjelat” këtë sezon. Një buxhet prej më shumë se 200 milionë eurosh do të vihet në dispozicion për trajnerin Skolari, i cili duhet të vendosë nëse do të ndërhyjë në janar apo do të presë merkaton e verës për të rinovuar skuadrën.

Shifrat e frikshme, Herri Kejn është një “makineri” goli

Sport Ekspres — Thu, 10 Jan 2019 15:19:17 +0000

Totenhemit i mjaftoi një gol i Herri Kejn për të fituar përballë Çelsit në “FA Cup”. Kapiteni shndërroi një gol një penallti në minutën e 27-të dhe “Spurs” fituan gjysmëfinalen e parë, ndërsa ndeshja e kthimit do të luhet me datë 22 janar.

Me golin e shënuar, sulmuesi 25-vjeçar është ngjitur në kuotën e 20 golave në këtë sezon: 14 në kampionat, 1 në kupë, 4 në Champions Ligë dhe 1 me kombëtaren. Ky është viti i pestë rresht që bomberi i Totenhemit kalon shifrën e 20 golave.

Mos të harrojmë që jemi akoma në janar dhe Kejn mund të përmirësojë shifrat e tij, duke qenë se Totenhemi lufton në të gjitha kompeticionet. Sezoni i fundit ishte më i miri për sulmuesin, i cili shënoi 41 gola në total.

Pesë sezonet e fundit të Herri Kejn

Sezoni 2014/2015: 31 gola
Sezoni 2015/2016: 28 gola
Sezoni 2016/2017: 35 gola
Sezoni 2017/2018: 41 gola
Sezoni 2018-2019: 20 gola…

Perez i pakënaqur me sulmin, gati 200 milionë sterlina që në janar

Sport Ekspres — Tue, 09 Oct 2018 14:40:24 +0000

Ambjenti te Reali i Madridit ditët e fundit sa vjen edhe bëhet akoma më i zymtë. Prej 33 vitesh nuk ndodhte që ekipi madrilen të mos shënonte asnjë gol në 4 sfida radhazi. Forma e dobët që po kalojnë galaktikët i faturohet më së shumti trajnerit të ri, por dhe një pjesë e fajit i takon lojtarëve.

Pikërisht kritikat më të mëdha i ka marrë sulmi, ku Karim Benzema dhe Mariano Diaz nuk duken aspak në formë, për të mbajtur peshën e sulmit të Reali të Madridit. Siç raportohet nga mediat angleze, Reali i Madridit po mendon për një lëvizje të bujshme që në muajin janar. Bëhet fjalë për Herri Kejn, për të cilin skuadra e Totenhem ka deklaruar më parë se nuk do e shiste për asnjë çmim.

Florentino Perez duket se do ta provojë transferimin e sulmuesit anglez me çdo kush në Madrid, madje mund të ofrojë deri në 200 milionë sterlina. Një shifër jashtëzakonisht e lartë dhe që ndoshta mund të tundojë “gjelat” e Londrës. Kejn u përfol edhe në merkaton verore si një shenjestër për Realin, por asgjë nuk u konkretizua.