30-vjeçari shënoi vetëm dy gola me Kukësin: një në ndeshjen e Europa Ligës në humbjen 5-2 kundër Torpedo Kutaisit dhe një në Kupë në ndeshjen kundër Orikut, ndërsa u aktivizua 468 minuta në total mes kampionatit, kupës dhe ndeshjeve në Europë .

Harba është një lojtar i lirë dhe mediat çeke zbulojnë të ardhmen e tij. Sulmuesi mund të rikthehet në Republikën Çeke, aty ku më parë është aktivizuar me Hradec Kralove, Jihlavën dhe Zlin. Për ish-lojtarin e Kukësit interesohet ekipi Slovakos, që renditet në vendin e 11-të me 21 pikë në elitën e futbollit çek.

“Nëse Harba punon fort gjatë kësaj jave, ai do të vijë me në fazën përgatitore në Turqi”, konfirmon për “CTK”, Velik Sumulikosi, trajneri i ekipit të Slovakos.

Nëse i hedhim një sy lëvizjeve në merkato, deri më tani kemi 5 të larguar e si për koincidencë bëhet fjalë për pesë sulmues.

KENDESH – Vice Kendesh u nda me Laçin pa ardhur mirë mund të thuhet, pasi sulmuesi u angazhua me ekipin kurbinas vetëm në ndeshjet ndërkombëtare, por pa mund që të lërë gjurmë. Një zgjedhje deri diku e pranueshme, përderisa u largua pa nisur kampionati, duke i dhënë mundësi lojtarit që të gjejë një destinacion të ri, por edhe drejtuesit të mos shpenzonin duke e ditur se lojtari nuk do të kishte hapësira.

NIKOLIÇ – Vetëm 40 minuta e mbajti veshur fanellën e Partizanit Stefan Nikoliç. Sulmues i cili në të shkuarën ishte diskutuar edhe për një afrim te Flamurtari, ishte një zgjedhje e gabuar nga klubi i “demave”, duke i treguar derën malazezit vetëm pas 2 ndeshjesh. Një lëvizje e gabuar, pasi as 28-vjeçari nuk arriti dot që të luante qoftë dhe një minutë në kampionat me të kuqtë.

HARBA – Haris Harba erdhi me bujë te Kukësi, me drejtuesit që e “shitën” në media si një goditje të madhe, por që në fushë ishte shumë larg pritshmërive. Një gol në Gjeorgji i dha shpresë Kukësit për kualifikim, por vetëm aq. Më pas gjithnjë në hije dhe ndeshje pas ndeshje përfundoi në stol. Divorci me Kukësin erdhi para merkatos së janarit.

SUKAJ – Xhevahir Sukaj, edhe pse një lojtar me shumë eksperiencë dhe që ka bërë mirë në shumë ekipe, te Laçi pati një aventurë vetëm 44 minuta. Shkodrani u la në tribunë në ndeshjen me Kamë ndeshjen me Kamzën dhe më pas u pa e arsyeshme që rrugët e tyre të ndaheshin.

RAHIM – Aleksandros Rahim ishte greku që duhet të bënte diferencën te skuadra e Kastriotit, por nuk mundi që të përshtatej te skuadra krutane. 25-vjeçari luajti në tre ndeshje si titullar dhe në fillimin e shtatorit u largua nga ekipi i Kastriotit. Sulmuesi duket se e kishte të vështirë në Shqipëri dhe u detyrua që të ulej e të bisedonte me drejtuesit për t’u kthyer andej nga kishte ardhur. Edhe klubi kishte leverdi në këtë pikë, pasi lojtari donte një pagë të lartë, shtëpi në Tiranë dhe transport çdo ditë.

SULMUESIT – Mbetet për t’u parë se kush do të jetë i radhës nga lojtarët ofensivë që do të marrë valixhet. Kryesit lojtarët e huaj nuk është se e përligjin atë nivel që pretendohet se kanë. Pikëpyetjet janë të shumta, pasi disa lojtar si Altiparmakovski, Shpehar, Dunga, Ngo, etj, nuk kanë bërë diferencën. Edhe në skuadrat si Skënderbeu e Partizani nuk është se sulmuesit kanë shkëlqyer, ndaj nuk përjashtohet ndonjë lëvizje e papritur.

“Futboll Klub Kukësi zyrtarizon mbylljen e bashkëpunimit me Haris Harban. Sulmuesi ka ndërprerë me mirëkuptim marrëveshjen me Kukësin. Boshnjaku, i cili u bashkua me ekipin tonë gjatë merkatos së dimrit regjistroi 11 aktivizime në të gjitha kompeticionet, duke realizuar 2 gola. Klubi falënderon Haris Harban për kontributin e dhënë me fanellën tonë dhe i uron njëkohësisht suksese në karrierë”, njofton klubi verilindor.

Harba u aktivizua vetëm në 4 ndeshje në kampionat, por vetëm në 2 takime zbriti në fushë që nga minuta e parë, duke mos mundur që të shënojë asnjë gol. 30-vjeçari shënoi një gol në Kupë, ndaj Orikut në turin e parë në fitoren 4-1. I vetmi gol që do të mbahet mend nga kuksianët është realizimi në Gjeorgji, kur sulmuesi shënoi me një super goditje, duke i lënë disi pashpresa verilindorëve për kualifikim, ndonëse në ndeshjen e kthimit nuk erdhi përmbysja me Torpedo Kutaisin.