Gvozdenovic

Gvozdenoviç zyrtarizon transferimin në Jordani

Sport Ekspres — Mon, 08 Jan 2018 22:52:55 +0000

Ish-futbollisti i famshëm serb, i cili ka qenë pjesë e stafit drejtues të Kukësit këtë sezon dhe ka punuar edhe si start në Serbi javët e fundit, tashmë ka vendosur të ndërrojë ambient, ndoshta i lodhur se pritur që të bëhej trajner i parë në Shqipëri, pasi ky ishte synimi i parë i tij.

Ivan Gvozdenoviç la Kukësin pak javë më parë për të nisur një aventurë të re në Jordani. Ish-zëvendëstrajneri i verilindorëve ka zyrtarizuar marrëveshjen me presidentin e Al Faisalin e Amani, diçka që ai e ka njoftuar përmes një fotoje në profilin e tij në “Instagram”. Theksojmë që Al Faisalin e Amanit është 5 pikë larg kreut pas 11 javëve të para në kampionatin vendas. Klubi nga Aman është kampion në fuqi dhe në janar do të luajë në Champions League të Azisë. Pjesë e kësaj skuadre është dhe ish-mesfushori i përfaqësueses së Shqipërisë, Alban Meha.

Gvozdenoviç për mediat serbe: Nuk bëj tifozllëk për Partizanin

Sport Ekspres — Wed, 18 Oct 2017 10:16:11 +0000

Një ndër emrat më të njohur në Serbi dhe që mediat serbe e kërkojnë rregullisht, kur bëhet fjalë për përballje me ekipe shqiptare, është Ivan Gvozdenoviç, futbollist me emër si në Serbi, ashtu edhe në Shqipëri, ndërsa vitet e fundit në rolin e zëvendëstrajnerit, te Tirana e tashmë te Kukësi.

Duke folur për mediat serbe, Gvozdenoviç ka komentuar sfidën mes Skënderbeut e Partizanit të Beogradit, por ka evituar deklaratat e forta dhe duke refuzuar të marrë krah.

“E vlerësoj Partizanin si një ish-rival i madh i imi. Është klub serb, ndër të tjera. E respektoj edhe Skënderbeun, kam kaluar 3 vite të mrekullueshme aty, u shpalla kampion 3 herë, kam marrëdhënie të mira me presidentin Takaj dhe kam ruajtur kontaktet me 8 ish-shokë skuadre. Fitoftë më i mirë dhe për sa më përket mua personalisht, do të shoh Crvena Zvezdën kundër Arsenalit”, tha ish-mbrojtësi i Crvena Zvezdës, i cili këmbëngul se është i painteresuar se kush do të fitojë: “Do të jem neutral, nuk më intereson kush fiton dhe nuk bëj tifozllëk”.

Gvozdenoviç flet edhe për Skënderbeun: “Skuadra është ndërtuar në mënyrë mjeshtërore, për 5 vite lojtarët luajnë së bashku. Njihen shumë mirë me njëri-tjetrin, kanë lidhje shumë të fortë. Nuk ishte thjesht fat kualifikimi ndaj Dinamos së Zagrebit, përkundrazi. Trajneri Daja ka në dispozicion dy skuadra dhe bën rotacion me sukses, duke mos humbur në cilësi. Kam punuar për një vit te Tirana me të, është trajner i zoti, punëtor dhe me mentalitet sulmues. Zakonisht luan me 4-3-3, ndërsa në Europa League përdor më shumë 4-2-1-3 dhe 4-1-4-1”.

Dobësitë e Skënderbeut? “Prapavija është paksa e ngadaltë, pa shumë vrull. Gjithsesi, kam kohë që nuk e shoh Partizanin dhe do të ishte budallallëk që të jepja ndonjë këshillë për trajnerin Xhukiç”.

Zyrtare, Kukësi i merr Gvozdenoviçin Tiranës

Sport Ekspres — Tue, 01 Aug 2017 16:15:34 +0000

Ivan Gvozdenoviç është zyrtarisht i Kukësit, duke u kthyer te klubi verilindor, ku punoi së bashku me Miodrad Radanoviç në vitin 2015, për pak javë, pa shumë fat.

Tani ish-futbollisti i njohur kthehet te Kukësi, sërish për postin e zëvendëstrajnerit.

Menaxheri i klubit kuksian, Naim Halili, ka konfirmuar lëvizjen, duke folur për Supersportin: “Ivan Gvodzenoviç do të jetë zëvendëstrajner i Milinkoviç. Ishte kërkesë e trajnerit dhe presidenti e pëlqen”.

Në këtë mënyrë, rikrijohet një dyshe serbe në krye të Kukësit, por Gvozdenoviç është praktikisht shqiptar, duke qenë se punon e jeton prej vitesh në Tiranë.