Zbulohet takimi sekret, Napoli përgatit operacionin gjigant

Sport Ekspres — Thu, 06 Jun 2019 12:06:46 +0000

Aurelio De Laurentis ka vendosur të shpenzojë në këtë merkato. Synimi është përforcimi i ekipit dhe ngushtimi i diferencave me Juventusin. Presidenti po bën maksimumin për t’i dhuruar Karlo Ançelotit një ekip që konkurron në të gjitha frontet.

Lajmi i fundit ndez shpresat e tifozëve. Sipas mediave italiane, kreu i Napolit është takuar javën e kaluar në Romë me Luis Filipe Vieiran, homologun e Benfikës. Në takim kanë marrë pjesë edhe drejtori sportiv Xhuntoli, ai teknik Kiaveli dhe Horge Mendez, agjenti i famshëm që zotëron të drejtat e Zhoao Feliks.

Grimaldo (m) dhe Zhoao Feliks (d)

19-vjeçari i talentuar është ëndrra e madhe e Napolit dhe palët kanë nisur negociatat. Spanjolli Grimaldo është një tjetër emër që i pëlqen Ançelotit. 23-vjeçari bën mirë të gjitha rolet e krahut të majtë dhe Napoli synon një ndërrim kokë me kokë me Mario Ruin.

Pavarësisht se gjithçka mbetet në kuadër të bisedimeve, Napoli dhe Benfika mund të realizojnë një operacion gjigant. Zhoao Feliks dhe Grimaldo mund të përfundojnë në Serie A, ndërsa Mario Rui dhe shumë para do të transferoheshin te “Shqiponjat e Lisbonës”.

Në Portugali janë të sigurt, Juventusi akord me lojtarin e Benfikës

Sport Ekspres — Sat, 17 Nov 2018 12:51:30 +0000

Një lajm i mirë për tifozët e Juventusit vjen nga Portugalia. Siç citon “A Bola”, bardhezinjtë kanë arritur akordin për të transferuar në Torino, Grimaldon, mbrojtësin e majtë të Benfikës. Drejtues të Juves kanë ndjekur nga afër paraqitjet e lojtarit dhe janë bindur për cilësitë e tij.

23-vjeçari spanjoll është një lojtar i talentuar, ka si menaxher Horge Mendez, menaxherin e Kristiano Ronaldos dhe Kanselos, është një produkt i Barcelonës dhe ka zhvilluar rreth 80 ndeshje me Benfikën.

Grimaldo ka patur shumë oferta, me shumë klube angleze të interesuara për të, por ai ka zgjedhur Juventusin. Ai shihet si një alternativë e Aleks Sandros dhe do të mbërrijë në verë në ekipin torinez. Në Portugali janë të sigurt që Grimaldo i ka dhënë fjalën Fabio Paratiçit, drejtorit sportiv të Juventusit, dhe ai e ardhmja e mbrojtësit të Benfikës është Juventusi.