Në pritje të ofertave: Ja formacioni i lojtarëve pa kontratë

Sport Ekspres — Sat, 20 Jul 2019 14:42:41 +0000

Jemi në periudhë merkatosh. Futbollistë, agjentë, drejtorë e presidentë klubesh i janë drejtuar tavolinave të negociatave teksa përgatiten për sezonin e ri. Në krahasim me vitet e shkuara kemi një numër më të vogël lojtarësh pa kontratë. Megjithatë, vetëm me futbollistët e lirë mund të ndërtosh një formacion pretendent.

Një “gardian” si Enea Koliçi jep garanci absoluten në portë. Veliu dhe Turtulli janë një dyshe interesante për qendrën e mbrojtjes, ndërsa Gocaj dhe Kotobelli në krah janë lojtarë të sprovuar prej vitesh në ato role.

Mesfusha treshe me Jonuzin, Hilën dhe Behar Ramadanin është një trinom i kompletuar. Në krahë të sulmit Ngo dhe Fili garantojnë asiste të shumtë për shkodranin Sukaj, i cili tregoi te Flamurtari se në Superiore është i aftë të bëjë diferencën.

Lajm i keq për Vllazninë, Gocaj do të mungojë gjatë

Sport Ekspres — Fri, 29 Dec 2017 10:23:49 +0000

Mbrojtësi i Vllaznisë Olsi Gocaj do të mungojë për shumë javë, sepse do të duhet të operohet. 29-vjeçari, një ndër pikat më të forta të Vllaznisë, pësoi një dëmtim në ndeshjen kundër Partizanit dhe u zëvendësua në minutën e 85-të, por ai që fillimisht u duk dëmtim i lehtë, ka rezultuar shumë më serioz nga sa mendohej, pasi bëhet fjalë për një çarje menisku. Për pasojë, pas disa ditësh Gocaj do të duhet të operohet dhe do të mungojë gjatë, duke llogaritur që pas operacionit duhen rreth 4 javë pushim dhe më pas procesi i riaftësimit do disa javë të tjera. Nëse gjithçka shkon mbarë, Gocaj do të rikthehet në fushë në fund të muajit shkurt. Dëmtimi i tij është një arsye më shumë pse te Vllaznia kërkojnë me urgjencë përforcime në mbrojtje.