NJOFTIMI I KLUBIT

Skuadra ka nisur përgatitjet për sezonin e ardhshëm futbollistik 2019-2010. Për një përiudhë të pacaktuar, ekipi ynë do të zhvillojë seancat stërvitore në kompleksin sportiv “Football Republic” në periferi të Tiranës. Me datën 5 gusht 2019, skuadra do të zhvendoset në Mavrovë të Maqedonisë së Veriut për të nisur pjesën e dytë të fazës përgatitore për sezonin e ri futbollistik.

Gjatë sezonit të kaluar, ekipi arriti disa nga objektivat e vendosura, duke fituar Kupën e Shqipërisë si dhe duke u shpallur nënkampion.Edhe në ndeshjet kualifikuese për Europa Eleague, skuadra bëri paraqitje të mirë, sidomos në ndeshjen e dytë për Turin e Parë në “Elbasan Arena” ndaj skuadrës hungareze të Debrecenit, por nuk arriti të kalonte turin, i cili ishte kushti kryesor i vendosur nga Klubi.

Ky rezultat, ashtu sikurse ishte parashikuar në marrëveshjen mes Klubit tonë dhe trajnerit Ernest Gjoka, solli dhe përfundimin e bashkëpunimit me kryeqytetasin.  Rezultatet negative të arritura në kupat e Europës, kanë bërë që Klubi të marrë masa administrative ndaj ekipit. Konkretisht, eliminimi nga Turi i Parë kualifikues i Europa League ka sjellë vendosjen e gjobës për muajin qershor, për të gjithë futbollistët dhe stafin teknik.

Rikthimi i Gjokës në stolin e Kukësit zgjati pak më shumë se tre muaj. 49-vjeçari u emërua trajneri i verilindorëve në fillim të muajit prill, duke zëvendësuar Ramazan Ndreun. Nën drejtimin e Gjokës, Kukësi mbylli kampionatin në vendin e dytë të tabelës dhe siguroi trofeun e Kupës së Shqipërisë për herë të dytë në historinë e klubit.

Njoftim i Klubit!

Trajneri Ernest Gjoka nuk do të jetë më në krye të skuadrës së Kukësit.

Vendimi është marrë pas rezultateve zhgënjyese të ndeshjeve kualifikuese të Europa League.

Klubi ynë trajnerit Gjoka i ka dhënë gjithë mbështetjen e mundshme, sidomos pas rikthimit të tij në krye të pankinës së skuadrës nënkampione të Shqipërisë. FK Kukësi falenderon trajnerin Gjoka për punën e bërë në krye të ekipit.

Shumë shpejt, klubi do të njoftojë për emrin e trajnerit të ri, i cili objektiv kryesor do të vijojë të ketë fitimin e titullit Kampion, Kupës së Shqipërisë si dhe përfaqësim sa më dinjitoz në Kupat e Europës!!

“Është për të ardhur keq për hir të së vërtetës. Skuadra duhet përgëzuar, bëri një ndeshje të mirë. Kundërshtari ishte shumë i rrezikshëm, shumë i shpejtë. Ky është futbolli, po nuk shënove, nuk mund të fitosh.

Goli i pësuar? Këto janë diferencat. Detajet e vogla vendosin. Ne kemi nevojë për më shumë eksperiencë për të luajtur në kompeticione europiane. Ndeshjen e nisëm mirë, por nuk shënuam dot një gol të dytë. Gjithsesi, unë mendoj se skuadra ka bërë më të mirën e mundshme.

Skuadra? Iku kjo situatë, të shohim çfarë do të ndodhë me të ardhmen. Mendoj se kjo skuadër ka nevojë të mbahet e gjitha dhe të përforcohet. E ardhmja ime? Çfarë lidhje ka kjo? Stoli im në rrezik apo jo, rëndësi ka që skuadra bëri maksimumin ndaj një ekipi si Debreçeni. Kjo skuadër e ka bërë punën e vetë. Gjithsesi, ne trajnerët me çantë në dorë jemi”, tha Gjoka.

KULIFIKIMI – “Arsyet janë të shumta. Arsyeja kryesore është që nëse arrijmë të kualifikohemi, nuk i japim të mira vetëm ekipit të Kukësit, por të gjithë futbollit shqiptar. Por nuk do të jetë e lehtë, pasi përballë kemi ekipin e Debreçenit. Ne bëmë një ndeshje shumë të mirë atje në fazën sulmuese, si asnjëherë tjetër, por nuk patëm fatin me vete. Jemi përballë realitetit që duhet ta pranojmë, është 0-3. Do të duhet një sakrificë të madhe dhe pak fat që të shkojmë te goli”.

KEQARDHJE – “Keqardhja është shumë e madhe, pasi ekipi zhvilloi një ndeshje shumë të mirë. Ishte një nga ato ndeshjet në Kupat e Europës që ekipet shqiptare bëjnë paraqitje dinjitoze. Por futbollit është i pamëshirshëm. E kemi studiuar sërish kundërshtarin, do ta kërkojmë deri në fund kualifikimin. Duhet të kemi shumë kujdes, pasi kundërshtari është i rrezikshëm”.

RAMA – “E dimë kush është Valdet Rama, është një lojtar me cilësi të mëdha. I kemi ndryshuar rolin, e kemi kaluar sulmues. Nëse në Debreçen nuk pati fatin para porte, shpresojmë që ta ketë nesër. Jemi me shumë fat që e kemi në skuadër, një lojtar që i jep shumë futbollit shqiptar”.

SFIDA E KTHIMIT – “Nuk kemi çfarë kursejmë më, do të luajmë gjithçka për gjithçka. I kam kërkuar skuadrës që ta fitojë me patjetër këtë ndeshje, qoftë edhe për moral. E kam parë te skuadra dëshirën për të fituar, mendoj se do t’ia dalim nesër”.

SYNIMI – “Një nga egot e mia personale është që të shkoj drejt një grupi të Europa League, siç kanë shkuar 2 kolegë të nderuar të mitë. Kam kaluar ture, por më duket se jam i pafat. Edhe me Flamurtarin, edhe ky vit. Nga ekipet që kishim në short, na ra Debreçeni. U munduam të merrnim maksimumin në ndeshjen e parë, nuk ia dolëm. Shpresoj që fati i munguar gjatë gjithë këtyre viteve të na vijë nesër”.

PRESIDENTI – “Unë nuk jam në presion për kualifikim. Kukësi ndërtohet gjithmonë për të ecur përpara. Gjici është egoist dhe do që të arrijë gjithçka, por jo gjithmonë çfarë synon, e arrin. Nëse në futboll ecin gjërat me presion, asgjë nuk rregullohet, vetëm prishet. Presidenti do gjithçka, unë jam më i balancuar, mundohem ta mbështes skuadrën”, përfundoi Gjoka.

“Bëmë një ndeshje të mirë, sidomos në pjesën e parë. Krijuam raste, por nuk arritëm të përfitonim. Nuk mendoj se tre golat e shënuar sonte tregojnë diferencën e vërtetë midis dy skuadrave. Do ta kemi shumë të vështirë në ndeshjen e kthimit”.

Trajneri i Debrecen, Andras Herçeg, vlerësoi numrin e lartë të tifozëve në stadiumin, që ishte sa trefishi i mesatares së kampionatit: “Ishte fantastike të shikoja më shumë se 10000 veta në stadium. E filluam mirë, por më pas bëmë disa gabime. Zgjodha të ndryshoja vendosjen në mes të lojës, pasi nuk më pëlqyen disa gjëra. Në të ditën luajtëm shumë mirë. Kemi avantazhin e tri golave, por duhet të luajmë ndeshjen e dytë sikur loja të ketë përfunduar  0 – 0”.

Frashëri në portë ka përpara vetes, Cuculin dhe Teqen në qendër të mbrojtjes, ndërsa në krah janë vendosur Rrumbullaku dhe debutuesi nga Maqedonia e Veriut, Tome Kitanovksi, i cili  ka për detyre të ruajë krahun e djathtë të mbrojtjes.

Treshja e mesfushës nuk surpriza me Rrocën, Musollin dhe Limajn, ndërsa në sulm Ethemi dhe Rama mbështesin nga krahët sulmuesin e vetëm Vasil Shkurtaj.

Debrecen: Nagi, Kusnir, Satmari, Pavkovics, Ferençi, Varga, Toser, Haris, Seçi, Takaç, Trujiç. Trajner: A.Herçeg

Kukësi: Frashëri, Kitanovski, Teqja, Cuculi, Rrumbullaku, Musolli, Ethemi, Rroca, Limaj, Rama Shkurtaj. Trajner: E.Gjoka

“Ardhja jonë këtu në Debrecen është një kënaqësi e para, e njohim kush është kjo skuadër dhe është kënaqësi për ne që luajmë përballë një kundërshtari të tillë. Ne e njohim tashmë ekipin e Debrecenit, e kemi studiuar me video-analizë. Mendoj se e njohim deri diku shumë mirë këtë skuadër”.

“Jo, nuk është se kemi mungesë lojtarësh. Thjesht jemi në një moment merkatoje dhe skuadra ka nevojë për disa përforcime, por për momentin jemi gati për ta përballuar një kundërshtar të tillë. Tifozët në Shqipëri? Varet nga rezultati që do të marrim këtu. Shpresoj që të jenë sa më të shumtë”.

“Duhet që me patjetër të bëjmë një ndeshje të mirë nesër, pastaj rezultatin final do ta shikojmë pas ndeshjes në Shqipëri. E rëndësishme për ne është të bëjmë diçka speciale nesër dhe të bëjmë paraqitje të mirë”.

“Natyrisht që është një përballje shumë e rëndësishme për të gjithë ne. Tashmë dihet që kalimi i turit te Kukësi ka qenë gjithmonë obligim dhe gjatë viteve të fundit klubi ka bërë shumë mirë. Sigurisht që kemi përplasje të fortë, me një ndër skuadrat më të forta të Hungarisë, por kjo nuk do të thotë që po e mendojmë si të pakalueshme këtë sfidë”.

“Gjatë të gjithë kësaj kohe kemi analizuar me shumë kujdes ekipin e Debrecenit. Njohim deri në detaje cilësitë e lojtarëve të tyre. Ata kanë disa lojtarë cilësorë, një pjesë janë pjesë e ekipit kombëtar të Hungarisë. Janë një ekip i fizikshëm dhe shumë taktik, por kanë edhe problemet e tyre. Po të jemi të qetë dhe të disiplinuar taktikisht, mendoj që ne mund të bëjmë një paraqitje të mirë në Hungari”.

“Duhet të jemi të kujdesshëm në fazën mbrojtëse. Armët më të forta të Debrecenit janë krahët e sulmit dhe mesfusha. Do marrim masat të mos u lëmë hapësira. Edhe ne kemi lojtarë cilësorë, që kanë qenë pjesë ekipeve kombëtare, si Rama, Cuculi dhe Musolli”.

“Ne e kemi skuadrën, sigurisht ikja e Rexhinaldos ka ndikuar disi, pasi për momentin kemi vetëm Shkurtajn. Ne kemi kërkuar të bëjmë një merkato shumë të kujdesshme. Nuk kemi kërkuar sasi, unë kërkoj cilësi. Edhe me presidentin për këtë po punojmë, që të sjellim atë lojtarin e mirë cilësor që mund të bëj diferencën. Përsa i përket kampionatit, absolutisht që do vijnë 1 ose 2 lojtarë cilësorë. E kemi piketuar, tashmë është vetëm çështje negociatash”.

FORMACIONI – “Sigurisht që skuadra në përbërje ka këto lojtarë. Nga këto lojtarë që kemi, të gjithë janë në gjendje të mirë fizike. Sot luajtën ata që janë baza e ekipit dhe që do të luajnë pas 10 ditësh, por në rast se dikush që nuk luajti do të ketë përmirësime fizike dhe në cilësi, pse jo do aktivizohet. Por baza e ekipit mbetet kjo”.

MERKATO – “Në merkato jemi, na duhen lojtarë, pasi duhet të përballojmë jo vetëm Kupat e Europës, por dhe kampionatin, pasi me kaq lojtarë sa kemi, nuk mund ta përballojmë. Koha është e limituar dhe duhet të veprojmë sa më shpejt. Duhet të kemi uri të madhe për t’u përmirësuar dhe të jemi sa më të gatshëm”.

KUNDËRSHTARI – “Po e studiojmë kundërshtarin, kemi filluar dhe me video-analizë. Gradualisht, skuadra ka filluar ta njohë kundërshtarin, Debrecenin, elementet e fortë të saj, pikat e dobëta. Skuadra po përshtatet mjaft mirë në raport me kundërshtarin.

KUALIFIKIMI – “Nuk ecim me përqindje, por me shpirtin e garës, me urinë që ka skuadra. Nëse ne do i kemi këto vyrtyte dhe të japim maksimumin, jam i bindur se do e kalojmë Debrecenin”, përfundoi Gjoka.

PROBLEMET E RAMËS – “Valdeti (Rama) më tha që të vendosja një lojtar në nxehje, pasi kur mbaroi pjesa e parë filloi të ndjente dhimbje. Diçka që ndodh shpesh në futboll, është mëse normale”.

E ARDHMJA – “Në profesionin tonë ne duhet të kemi vazhdimësi. Gëzohem shumë që e mora këtë trofe. E lashë para dy vitesh me trofe dhe rikthehem tani me trofe. Tani, shpresoj të kemi fat në Kupat e Europës”.

SKUADRA DHE MERKATO – “Me zotin Gjici e kemi konfirmuar që para një muaji që boshti i skuadrës do mbetet. E kam thënë dhe më parë, kjo skuadër cilësi”.

KUPAT E EUROPËS –  “Unë ika nga Kukësi pasi nuk e arrita objektivin, që ishte kalimi i turit të parë në Champions League. Për mungesë fati e gjërash të tjera ne nuk e kaluam. Të shpresojmë që të kalojmë një ose dy ture, ëndrra ime është të shkoj në grupet e Europa League. Ne trajnerët jemi gjithë kohës me çantë, nuk është se do të bie bomba po u largova”.

“Kukësi ka bërë një kampionat me shumë probleme, por të paktën arriti një nga objektivat, që ishte ta mbyllte sezonin si nënkampion i Shqipërisë. Mendoj që Kupa tashmë është një objektiv tjetër, obligim për skuadrën. Do të jetë një ndeshje e vështirë, përballë një skuadre të një niveli shumë të mirë, me një histori shumë të madhe.

Unë si trajner i Kukësit besoj dhe shpresoj ta fitojmë Kupën, pasi kjo skuadër ka bërë gjëra shumë të mira në vitet e fundit. E kanë treguar dhe renditjet e Kukësit në kampionat ndër vite, ku pozita më e keqe ka qenë vendi i tretë. Ka marrë kampionat, kupë, superkupë, një skuadër që di të fitojë trofe”.

E ARDHMJA – “Unë jam mësuar me zërat dhe nuk më shqetësojnë. Puna e trajnerit me një ekip të elitës, është gjithmonë risk. Puna jonë vlerësohet dhe matet vetëm me rezultat. Trajneri duhet të ketë çantën afër vetes gjithmonë, dhe unë e kam afër vetes. Gjithsesi, unë nuk shqetësohem dhe nëse arrijmë objektivat dhe presidenti do që të ketë bashkëpunim edhe vitin tjetër, pse jo,”, përfundoi Gjoka.

Në 45 minutat e para Kastrioti kryesonte 1-0 dhe Kukësi shpërdoroi shumë raste, për faj të dy sulmuesve. Trajneri Ernest Gjoka e kuptoi se Rexhinaldo dhe Shkurtaj nuk bashkëpunonin në fushë me njëri-tjetrin dhe disa raste të arta u shpërdoruan thjesht për egoizëm.

Gara për Këpucën e Artë sikur ua kishte errësuar sytë dy futbollistëve të Kukësit, të cilët në dhomat e zhveshjes ishin nervozë, pasi nuk po shënon golat që kishin shpresën se do u jepte çmimin personal të sezonit. Kjo ka nervozuar trajnerin Gjoka, i cili ka ngritur zërin si rrallë ndonjëherë, duke e parë qartë se në atë mënyrë po hidhej poshtë vendi i dytë. Edhe presidenti Safet Gjici, si zakonisht, kishte zbritur në dhomat e zhveshjes, por nuk foli, edhe ai dukshëm nervoz.

Më pas gjërat sikur u qetësuan disi, dy sulmuesit në 45 minutat e dyta shënuan dhe Kukësi përmbysi Kastriotin dhe fitoi 3-1. Rexhinaldo shënoi dy herë dhe me 13 gola arriti të bënte të tijën Këpucën e Artë. Gjithsesi, ajo që ndodhi në dhomat e zhveshjes ka lënë shije të hidhur në kampin verilindor, edhe pse në futboll është mirë të kesh sulmues ambiciozë dhe deri diku egoizmi pranohet, por pa e tepruar.

E ARDHMJA – Ajo që ndodhi në Kamzë dhe zënka në dhomat e zhveshjes nuk do të kalojë lehtësisht. Presidenti Safet Gjici pritet të bëjë një mbledhje dhe sigurisht që nuk përjashtohen masat. Gjithçka është në dorë të numrit një të klubit, që nga ana tjetër do të duhet të mendojë edhe për klimën në skuadër para finales së Kupës.

Duke parë situatën, në klubin e Kukësit duhet të vendosin përfundimisht se çfarë do të bëjnë, për më tepër që Shkurtaj pas ndeshjes ka kërkuar takim me drejtuesit e klubit dhe është parë duke biseduar me drejtorin Nderim Nexhipi.

Rexhinaldo dhe Shkurtaj së bashku është e vështirë të luajnë, ndaj ndoshta do të jenë të detyruar të heqin dorë nga njëri prej tyre. Se si do të zgjidhet kjo situatë, mbetet për t’u parë. Të dy janë nën kontratë, madje për sulmuesin vlonjat është paguar një shifër e konsiderueshme për kartonin te Luftëtari, ndërsa Rexhinaldo sapo ka arritur marrëveshjen për të vijuar edhe një vit me Kukësin.

Megjithatë, paralelisht me punën në fushë, trajneri Ernest Gjoka dhe drejtori sportiv Nderim Nexhipi po punojnë edhe për merkaton, sepse emrat në tryezë janë të shumtë, si zakonisht te Kukësi.

Presidenti Safet Gjici po ashtu është shumë aktiv, duke u marrë personalisht me shumë çështje, ndër të cilat edhe e ardhmja e sulmuesit Rexhinaldo. Afrikani, autor i 11 golave në Superiore dhe 4 golave në kupë, ka qenë lojtari më pozitiv në repartin e avancuar të Kukësit dhe Gjoka e dëshiron me çdo kusht në ekip për të ardhmen.

Për këtë arsye, Gjici ka gjetur marrëveshjen për ta mbajtur shënuesin më të mirë të ekipit edhe për një vit, ndërkohë që së shpejti pritet edhe zyrtarizimi i marrëveshjes me njoftim nga klubi.

Gjoka ka kërkuar që sulmi të mos preket, të paktën për kupat e Europës, pasi nuk mund të bëhen ndryshime të shumta. Në mbrojtje do të ketë lëvizje sidomos në krahë, por në qendër pritet të konfirmohen Cuculi, Teqja e Shameti, me këtë të fundit që ishte shumë pranë largimit, por një bisedë me presidentin Gjici mund ta konfirmojë, duke ndryshuar kushtet financiare të kontratës.

Edhe në mesfushën e Kukësit priten ndryshime, sepse do të ketë largime, por për momentin nuk është kontaktuar asnjë futbollist në Superiore, me drejtuesit e Kukësit që mohojnë prerë edhe thashethemet për marrëveshje me Idriz Bathën, i cili në verë do të jetë futbollist i lirë.

NDESHJA – “Sigurisht që na vjen keq, por janë gjëra që ndodhin. Ishte një ndeshje, të cilën me pak qetësi dhe qartësi, mund ta kishim fituar, por shkoi kështu si shkoi”.

MUNGESAT – “Sigurisht që edhe lodhja ishte prezente, ndërsa edhe Shkurtaj u dëmtua, duke na detyruar të ndryshojmë skemë. Probleme pati edhe Ethemi, por e rëndësishme është që tani të shohim përpara”.

PARTIZANI – “Partizanit i urojmë suksese, pasi ka qenë një kampionat të cilin e ka merituar totalisht. Unë e di se sa vuajtje, stres dhe mundim ka për të dalë kampion. Këtë titull Partizani e meritoi dhe e mori. Urime!”, u shpreh Gjoka.

SKEMA – “Unë mendoj se nuk është e rëndësishme skema apo ndryshimet që do të bëhen. Shameti është një lojtar që mezi po e presim. Sa më shumë lojtarë të kemi, aq më mirë do të jemi. Për momentin, jemi mirë kështu dhe e merituam finalen”.

OBJEKTIVAT – “Kukësi është një ekip që kërkon trofe dhe të gjithë e dimë situatën. Edhe kalimi në finale nuk është pak, por tani të përgatitemi maksimalisht që ta mbyllim sezonin sa më mirë, si në kampionat, ashtu dhe në finalen. Kukësi do trofe!”

REXHINALDO – “Unë jam shumë i kënaqur me Rexhinaldon. Personalisht mendoj se është një vlerë e shtuar e skuadrës sonë. Çdo njeri ka disa probleme dhe mund të nxjerrim diçka në momente tensioni, por Rexhinaldo më shumë i ka për vete. Deri sot, ne kemi krijuar një harmoni në grup dhe Rexhinaldo po bën shumë mirë punën e tij, po bën gjithçka për skuadrën”, u shpreh Gjoka.

Edhe Krasniqi e ka mbyllur sezonin dhe trajneri Gjoka ka pasur vetëm dy alternativa për repartin e qendrës këto javët e fundit: Cuculin dhe Teqjan. Megjithatë, edhe ish-lojtari i Kamzës ka shfaqur probleme dhe në ndeshjet e fundit, ka luajtur duke sakrifikuar, pasi gjendja e tij fizike nuk ka qenë optimale.

Edhe në stërvitjen e sotme të verilindorëve, Teqja ka bërë stërvitje i diferencuar, në krah të Shametit. Nuk dihet nëse mbrojtësi do të jetë i gatshëm për trajnerin Gjoka, që mund të eksperimentojë me Musollin si qendërmbrojtës. Por te Kukësi nuk ka vetëm lajme negative, pasi Uilliam Kordeiro është rikthyer dhe do të jetë i gatshëm për trajnerin Gjoka.

NDESHJA – “Kupa ka specifikën e vet. Nuk duhet të kishim bërë atë gabim. Po nuk ka rëndësi, skuadra fitoi, bëri punën e vet. Gjithçka vendoset pas dy javësh, duhet të luftojmë shumë”.

RIKTHIMI – “Unë e kam thënë që ka qenë fat i madh që ardhja në këtë skuadër ishte pozitive, në sensin që skuadra më priti mirë. Duke pasur cilësi brenda dhe duke pasur futbollistë me eksperiencë, ma bënë punën shumë të lehtë. Unë dua vetëm t’i qetësoj, të ulim tensionin, të shohim përpara. Jemi në rrugë të mbarë”.

DËMTIMET – “Shpresoj që të luftojmë me kohën dhe ndonjë nga mbrojtësit të na rikthehet. Shpresojmë që Shameti të rikthehet, të rikthehet dhe Dzaria. Presim vetëm Ramën, lojtarët e tjerë e kanë mbyllur sezonin. Përderisa po luajmë dhe po fitojmë, kemi besim normale”.

GJICI SI ABRAMOVIÇ – “Gjici është një president që e ka bërë Kukësin një skuadër elitare. Ai është një nga më të suksesshmit për momentin. Është si Abramoviç apo është si Gjici? Mendoj se është si vetja”.

RROCA – “Unë i falëndëroj jo vetëm Rrocën, por dhe Ethemin. Nuk luajti asnjëri në pozicionin e tyre natyral, por bënë maksimumin për skuadrën dhe dua vetëm t’i falënderoj”, u shpreh Gjoka.

Gjoka ka disa dilema para përballjes me “Ujqërit e Dëborës” dhe sot ka bërë disa eksperimente në stërvitje. Në mungesë të Shametit dhe Krasniqit, është provuar kapiteni Musolli si qendërmbrojtës, ndërsa Teqja pritet të aktivizohet mbrojtës i djathtë.

Edhe Çyrbja është në dyshim për këtë sfidë, pasi ka një problem në gju. Në rast se numri 7 nuk ia del të jetë i gatshëm, Xhemaili është gati për të mbuluar hapësirat.

Formacioni i mundshëm i Kukësit:

Frashëri, Teqja, Musolli, Cuculi, Rrumbullaku, Rroca, Limaj, Et’hemi, Çyrbja/Xhemaili, Rexhinaldo, Shkurtaj

NDESHJA – “Mendoj që arritëm të bënim detyrat. Një nga detyrat kryesore ishte të mbyllnim sa më shumë hapësirat në prapavijë dhe të shfrytëzonim rastet tona.

RENDITJA – “Duhet të shikojmë që të sigurojmë vendin e dytë. Gjërat tjera për ne nuk kanë shumë interes.

REXHINALDO – “Ne e kërkuam lojën në krah. Shpejtësi, thellësi. Them që i realizuam. Rexhinaldo është një lojtar që vepron pafund, që nuk dorëzohet. Bëri mirë në çdo moment, edhe kur ndryshuam skemën e lojës”.

MUSOLLI – “Musolli sigurisht që nuk është ende gati 100%. Me Flamurtarin sakrifikoi shumë. Ne do t’i japim minutazhin që i duhet. Në të ardhmen, do të jetë titullar i padiskutueshëm”.

KORDEIRO – “Janë tensione momenti, u futëm në dhomat e zhveshjes u sqarua diçka. Janë momente tensioni në lojë, që është totalisht normale. Kampionatin e shoh të hapur, por ne bëjmë punën tonë. Të jemi të qetë, të mos shohim me patjetër lart. Pastaj, nëse kundërshtari na jep dhurata, pse jo”, përfundoi Gjoka.

“Më vjen shumë keq, më shumë më vjen keq për ekipin, pasi krijuam gjithçka, por nuk gjetëm golin. Gjithsesi, jam i gëzuar deri diku për atë që po prodhojmë.

Titulli i mbyllur? Sigurisht. Gjëja kryesore ishte për të kaluar me sukses Flamurtarin që t’i mbanin më larg. Na duhet me patjetër ky vendi i dytë dhe duhet t’i shohim ndeshjet me kujdes.

Sot kishim shumë probleme. Përveç mungesave si Dzaria dhe Shameti, ishin dhe Limaj e Maliqi që u dëmtua në Laç. Nuk kishim mundësi të freskonim skuadrën. I ra barra maksimale Musollit, që nuk duhej absolutisht që të luante 90 minuta. Sot kisha vetëm Çyrbjan në stol, pjesa tjetër ishin të rinj.

Kordeiro? Sigurisht që kemi humbur vlera me rikthimin e atij në mbrojtje. Ndoshta mund të ndryshonim diçka tjetër, por riskova dhe e lashë në mbrojtje. Kisha Ethemin dhe Çyrbjan. Të tre janë lojtarë që kanë luajtur dhe kanë dhënë shumë. Sot me shumë keqardhje, na mungoi fati. Gjithsesi, kështu është futbolli, i bukur dhe i paparashikueshëm.

Unë them që në këto situata, skuadrat bëhen të rrezikshme. As leku nuk të motivon aq sa të motivon fitorja dhe renditja në tabelë. Sukaj është një lojtar dinak dhe këto raste nuk i fal. Cuculi humbi kontrollin” tha Gjoka.

NDESHJA – “Sigurisht, është kënaqësi kur fiton ndeshjen. Mendoj që kjo fitore i duhej skuadrës, edhe nga ana psikologjike. Kanë pas ca kohë me probleme në rezultat, ardhja ime besoj se ka sjellë fat. Skuadra ka cilësi, është shumë ndryshe nga ajo që kisha unë. Duhet thjesht të rrisim nivelin dhe të ruajmë vazhdueshmërinë”.

TITULLI – “Objektivat e Kukësit i dinë të gjithë, duhet të vazhdojmë dhe të kërkojmë titullin deri sa matematika na e lejon”.

AMBIENTIMI – “Thjesht për këto ditë që kisha në dispozicion, fola shumë. Gjeta një skuadër me shumë eksperiencë brenda dhe kjo gjë është shumë pozitive për ne trajnerët. Sot morëm një fitore që nuk e kishim menduar, nuk e kishim kërkuar një gol të tillë, por Limaj e bëri vetë”.

TIFOZ I SKËNDERBEUT? – “Unë jam tifoz i Kukësit, por dua që Skënderbeu të fitojë kundër Partizanit, që të hapet gara dhe të bëhet kampionat i bukur”.

NDRYSHIMI – “Janë dy kohë të ndryshme. Në atë kohë, ajo skuadër ishte shumë e fortë dhe morëm një sukses të jashtëzakonshëm, jo vetëm që u shpallëm kampionë, por ishim 35 ndeshje pa humbje. Kjo skuadër është totalisht ndryshe, ka thjesht nevojë për vetëbesim, pasi ka shumë më kualitet. Thjesht duhet vetëbesim për të ecur përpara” u shpreh Gjoka për “Supersport”.

Në një intervistë për “RTSH SPORT”, trajneri kryeqytetas u shpreh se ka skuadra e tanishme ka pësuar ndryshime rrënjësore nga ekipi i mëparshëm”

“Situata është ndryshe pasi nga ai Kukës kanë mbetur vetëm 2 ose 3 lojtarë. Ajo skuadër e arriti objektivin e vjet, ndërsa kjo skuadër duhet të punojë ende. Mund të them se ekipit nuk i mungon cilësia”.

“Objektivat e Kukësit janë gjithmonë trofetë dhe kalimi i sa më shumë tureve të Kupave të Europës. Më parë nuk ia dolëm dot për shkak të disa faktorëve. Tani duhet të shikojmë përpara si. Presidenti i Kukësit kërkon gjithçka”.

Njoftimi i Kukësit

Pas zyrtarizimit të trajnerit Ernest Gjoka në krye të pankinës së skuadrës së Kukësit kanë nisur përgatitjet për Javën e  XXVIII-të të Kategorisë Superiore.

Trajneri Gjoka, pas prezantimit me futbollistët, nisi menjëherë seancën stërvitore. Me ekipin tonë është bashkuar dhe Fatjon Tafaj, i cili do të jetë trajner i dytë bashkë më zëvendës trajnerin Rrahman Hallaçi.

HUMBJA – “Sot ishte një ndeshje për t’u fituar. Nuk u fitua dhe të gjithë do të mbajmë përgjegjësitë tona. Do ta mendoj largimin nga Kamza. Do të flas me presidentin dhe do të rishikoj pozicionin tim”.

NDESHJA – “Ishin dy pjesë të ndryshme, por mos harroni që ishte një presion i madh., duhet të ishim më të kujdesshëm dhe të shtynim disi përpara, por nuk u realizua me sukses”.

PENALLTIA – “Sigurisht që do të ishte vendimtare. Këto janë ndeshje shumë të vështira dhe nëse do të shënonim një gol, ndeshja do të ishte shumë më ndryshe.

POZICIONI – “Kam vështirësi, pasi ne erdhëm që të bënim diçka ndryshe. Nuk po ia dalim dot dhe do të rishikoj pozicionin tim. Nuk po motivohemi dot dhe gjërat në futboll shkojnë të gjitha bashkë”,- u shpreh Gjoka.

NDESHJA – “Qëllimi ishte që ne sot të dilnim me të paktën një pikë. Mendoj se pjesën e interpretimit të lojës e bëmë mirë. Duke pasur parasysh se Teuta ka lojtarë të shpejtë dhe fizik, pjesën e parë bëmë një lojë të mirë dhe e vumë në vështirësi kundërshtarin”.

FINANCAT – “E kam thënë në media që na është bërë një pagesë dhe pritet që shumë shpejt të bëhet një pagesë tjetër. Shpresoj që drejtuesit e klubit të gjejnë gjuhën e përbashkët dhe t’i sigurojmë pagat lojtarëve që t’i motivojmë akoma më shumë, pasi kemi të bëjmë me futbollistë profesionistë që paguhen për punën e tyre.”

MBROJTJA ME 3 – “Unë preferoj një skemë tjetër, që e kam përdorur gjatë të gjithë sezonit. Por mungesa e Bonanit na detyroi të bënim këtë vendosje.”

KAMZA LUAN PËR PARTIZANIN? – “Absolutisht që jo. Në ndeshjen e javës së kaluar ajo skuadër që luajti dha maksimumin. Ne nuk mund të luajmë për askënd tjetër, pasi jemi në greminë. Nëse luajmë për dikë tjetër atëherë jemi të rënë nga Kategoria”.

“Sigurisht që ndeshja nesër është shumë e rëndësishme për të dyja ekipet. Ndeshja e Kupës ishte një ndeshje që të gjithë e pamë se si ishte. Është një ndeshje e fortë dhe ekipi që do të gabojë më pak do të marrë rezultatin pozitiv.

Nuk shikoj që humbja me Vllazninë ishte një humbje tragjike. E interpretuam mirë, dhe në qoftë se portieri nuk do të bënte atë gabim, që është një gabim njerëzor ndoshta ne do të merrnim atë që kërkonim. Duhet të jemi mirë psikologjikisht, pasi na duhet të interpretojmë ndeshjen, ku kemi përballë një kundërshtar me emër të madh. Ekipi më i qetë dhe që do të bëjë detyrat si duhet do ia dalë.

Sigurisht që në futboll çdo gjë është e lidhur shumë me anën psikologjike. Si ne si Tirana nga ana psikologjike nuk jemi mirë. Kjo është një luftë ku duhet të bëjmë sa më mirë punën tonë.

Mendoj që skuadra ka punuar mirë dhe futbollistët i dinë problematikat dhe se si funksionon kampionati. Shpresoj që të gjithë problemet që kemi t’i kthejmë në forcë për të bërë një start të mirë të këtyre dy fazave.

Presim Sebinon, që është një vlerë e shtuar e ekipit. Një njeri që jep frymë pozitive. Nëse kalon testin sot, nesër do të jetë në formacion.

Për momentin Izazola nuk është i qetë, kështu që ne i kemi dhënë kohë të qetësohet. Do ta shohim gjatë javës. Ka shumë probleme familjare dhe në këtë situatë kërkon të jetë afër familjes, kështu që do flasim me kujdes dhe ne si klub mund t’i japim leje të largohet, pasi ka probleme.

Po të kemi parasysh katërshen e fund tabelës nuk është se jemi larg merkatos që kanë bërë kundërshtarët tanë. Jemi skuadër modeste dhe jemi munduar me aq sa kemi mundësi, por dhe kundërshtarët tanë nuk kanë bërë ndonjë merkato kushedi. Luftëtarit i kanë ikur lojtarë të rëndësishëm, ndërsa Tirana nuk është se ka bërë ndonjë afrim. Jemi në të njëjtat ujëra. Problemi ynë kanë qenë dëmtimet e shpeshta.

Renditja nuk gënjen për Kamzën. Kemi lojtarë cilësorë, por nuk kemi rezultate të mira. Çfarë do të prodhosh atë do marrësh. Nuk kemi prodhuar, dhe nuk kemi marrë rezultate. Shpresoj që kjo do të ndryshojë.

Është një problem që nuk flas dot, sepse kam probleme të miat në punën që bëj dhe nuk jam unë ai që duhet të jap një mendim për skuadrat e tjera.

Ndeshja – “Kjo ishte një diferencë midis pjesës së parë dhe asaj të dytë. Në pjesën e dytë, u vumë në presion, goditjet standarde në krijuan shumë probleme. E diskutova dhe me skuadrën këtë pjesë dhe duhet të përmirësohemi. Goli i dytë ishte një gabim njerëzor.

Ne donim që ta bënim këtë ndeshje sa më të mirë, që të kishim sa më pak lodhje në ndeshjen e dytë por tani i bie që të punojmë më shumë për ndeshjen e dytë, ku do të synojmë me doemos kalimin e turit”.

Merkato – “Unë mendoj se tashmë ka filluar sezoni dhe nuk kemi ç’të presim më. Këtë ekip kemi dhe me këta lojtarë, do të bëjmë maksimumin deri në fund të sezonit”.

Problemet financiare – “Sigurisht që si çdo skuadër, edhe Kamza ka probleme, nuk mund të them dot të kundërtën. Presidenti Qarri i ka dhënë siguri skuadrës dhe çdo gjë do të jetë OK. Kamza nuk është vetëm e Qarrit, por edh e bashkisë, prandaj shpresoj që të arrihet gjuha e përbashkët mes dy palëve dhe skuadra të jetë sa më e qetë. Nëse skuadra nuk është e qetë, gjithçka do të vështirësohet”.

Aktivizimi i të huajve – “Sigurisht që kemi gjashtë lojtarë të huaj dhe besoj se të gjithë do të kenë mundësitë e tyre. Nuk ka problem, por në rast se mbetemi keq me lojtarët, mund të na penalizojnë. Por të gjashtë kanë cilësi dhe besoj se do të jenë të nevojshëm për skuadrën tonë”.

Rikthimi në Shkodër – “Për hir të së vërtetës, kam qenë shumë në siklet, pasi shumë miq të mi shkodranë më lajmëruan se do të ketë disa njerëz që do të kontestojnë ardhjen time këtu. Shumë mendojnë se Gjoka e kishte fajin për sezonin e Vllaznisë vjet, por ne e kemi zgjedhur këtë profesion dhe duhet të përballemi me këto gjëra”.

Pasha vjen nga skuadra Besëlidhjes, ndërkohë që në të shkuarën ka luajtur për Erzenin, Besën dhe Ilirinë. Gjoka e nisi pjesën e parë të sezonit , me Erzenin, ku u aktivizua në 13 ndeshje, ndërsa në të shkuarën 29-vjeçari është shpallur dy herë fitues i Kategorisë së Parë me Egnatian, Gramshin.

Drejtuesit e Luzit janë të vendosur që të sigurojnë për të parën herë në histori, kalimin e Luzit në Kategorinë e Parë, çka shpjegon dhe afrimet cilësore të merkato dimërore. Aktualisht ekipi i Luzit ndodhet në vendin e tretë në Grupin B, një pikë larg kryesuesve të Tërbunit.

“Mendoj se Kamza do të shpëtojë, por nëse një nga këto hallka nuk do të funksionojë, do të ketë shumë vështirësi. Do bëjmë luftën tonë. Unë mendoj se kush do të gabojë më pak, kush do të jetë më i fortë nga ana psikologjike, kush suportohet shumë nga presidenca, ai ekip do e kalojë provimin.

Unë e përsëris, nëse funksionojnë të gjitha gjërat, do ta kalojmë me sukses këtë sfidë”,- tha Gjoka duke iu referuar mbijetesës.

MBIJETESA – “Kjo është një sfidë shumë e vështirë, por unë besoj se, së bashku me presidentin Qarri dhe kryetarin  e bashkisë ne do t’ia dalim. Nëse ndonjë nga këto hallka nuk funksionon, atëherë do ta kemi shumë të vështirë”

FAZA PËRGATITORE – “Sigurisht kjo është një fazë e rëndësishme. Baza do të jetë përgatitja fizike, por edhe ajo psikologjike, duhet të punojmë nga ana e mentalitet që të ecim përpara”.

LARGIMI I FRASHËRIT – “Frashëri ka qenë një ndër lojtarët kryesorë të skuadrës dhe nuk do ta kemi të vështirë për ta zëvendësuar. Gjithsesi nuk duhet të kthejmë kokën pas. Presim afrime në merkato. Tregu është shumë i varfër, gjithsesi ne do të shikojmë deri në fund dhe shpresoj të jemi me fat”, tha trajneri Gjoka.

Luftëtari ka pasur problem, mund të jetë mundësia për t’u rikthyer te fitorja?
Në futboll ka pasur raste kur skuadrat kanë thënë se kanë probleme dhe më pas tregohen mjaft të rrezikshme. Ky për ne është mësim dhe jemi të përqendruar totalisht te ndeshja dhe te ajo që ne kërkojmë të bëjmë. Jemi të fokusuar që të arrimë suksesin me çdo kusht sepse kemi nevojë si oksigjen për ato pikë.

Sa të vështirë e shikoni garën për mbijetesë?
Gara për mbijetesë do të jetë shumë e fortë dhe shumë e gjatë. Katër skuadrat do të luftojnë për marrjen e pikëve, ndaj vështirësia do të jetë shumë e madhe.

E ka kthyer barazimi në Laç besimin në skuadër?
Skuadra kishte nevojë për atë barazim sepse kishte rënie nga ana psikologjike, nga humbjet që kishte. Skuadra tregoi se ka mundësi dhe ka forcë ndaj një skuadre si Laçi, që është një ekip shumë i mirë.

Si keni menduar që t’i zgjidhni problemet në sulm?
Nuk është vetëm sulmi që duhet të zgjidhë situatat, por skuadra duhet që ta çojë topin sa më shpesh në sulm, përmes një filozofie. Skuadra e Kamzës ka sulmues me potencial dhe jemi të fokusuar që skuadra ta çojë sa më shpesh topin në sulm ,që më pas sulmuesit të bëjnë detyrën.

Kalendar shumë i nderlikuar deri në fund të vitit, sa do të ndikojë ecuria në këto tre ndeshje të planet tuaja në merkato?
Kemi një grup me lojtarë me cilësi dhe përvojë. Në kampionatin tonë këto dy gjëra janë të rëndësishme dhe skuadra e ka një bosht, që mund ta çojnë para Kamzën. Çdo skuadër ka nevojë për të sjellë lojtarë me cilësi. Ata që duhet të vijnë duhet të kenë më shumë cilësi se grupi aktual. Mos të harrojmë që merkato e janarit është shumë e varfër dhe duhet të kesh shumë fat që të kapësh ndonjë lojtar me cilësi shumë.

Ju shqetësojnë episodet në lidhje me gjykimin?
Uroj që gjykimi mos të jetë protagonist për rezultatin. Uroj që të marrim atë çka do meritojmë në fushë sepse nëse do të kem probleme do na vënë në vështirësi dhe do na nxjerrin ndonjë fjalë që nuk duhet ta themi.

Sa i besoni krizën e Luftëtarit?
Në futbollin shqiptar gjërat nuk shkojnë gjithnjë mirë. Çdo skuadër ka krizën e vet. Ne besojmë te fitorja dhe kemi punuar gjatë gjithë kësaj kohe që ta lërë këtë handikap, për të marrë fitoret për të mbushur atë gropë të madhe që kemi lënë pas.

E ndjeni presionin e rezultateve?
Në futboll gjatë gjithë kohës ka presion, ndaj ne e kemi marrë këtë detyrë, pasi dimë që ta mbajmë presionin. Ne do të ecim para dhe sa më shumë të ecim para do tregojmë se kemi karakter dhe dinjitet si skuadër.

Ju mungojnë tifozët? Më shumë atmosferë po krijohet në protestën studentore…
Sigurisht që tifozi është boshti i një klubi futbolli, është paterica që e ndihmon një skuadër futbolli të ecë përpara. Ne kemi nevojë shumë për tanë. Sigurisht kanë njëfarë të drejte, pasi nuk motivohen të vijnë prej rezultateve tona. Por unë kam besim se do vijnë dhe të na mbështesin, por e kemi ne në dorë, duhet të dalim nga ky moment i vështirë dhe t’i kënaqi dhe mundësinë që të vijnë e të kënaqen në stadium.

Të gjithë jemi brenda kësaj vorbulle. Ne jemi pjesë e qytetarisë së kryeqyteti. Është një moment i vështirë për ne dhe kur shohim se studentët po japin një mesazh të madh se çfarë është demokracia. Kush ka veshë duhet të dëgjojë mirë dhe kush ka sy duhet t’i hapë mirë. unë solidarizohem me ta dhe kemi nevojë për këtë lloj lëvizje kaq të madhe.

A është Kamza një mision i pamundur, duke marrë parasysh pozitën ku ekipi ndodhet në klasifikim?Situata nuk është aspak e mirë, situata është e vështirë, por ne e dimë tani se puna e trajnerit është një punë që rriskon gjithnjë. Për ne trajnerët sfidat janë oksigjeni i kësaj pune. Kjo na mban në ritëm. Ardhja te Kamza në këto momente, do të jetë një shenjë pozitive për të nxjerrë Kamzën nga ky moment.

Ju duket skuadra e kompletuar apo nevojitet merkato?
Nevoja më e madhe në këto momente është që të nxjerrim skuadrën nga situata kritike që ka. Ana psikologjike është situata e parë, sepse vetë vendi ku është Kamza nuk i jep qetësi skuadrës. Ky është plani A dhe plani kryesor. Çdo skuadër ka nevojë të forcohet me cilësi.

Cila arsyeja që ju bini të pranonit ofertën e Kamzës?
Në punën tonë kur je në një moment pa skuadër mund të dalë zëri për shumë ekipe kur ka ndryshime trajnerësh. Zgjodha Kamzën për një sfidë dhe për një sfidë dhe për një punë ndryshe, zgjodha Kamzën pasi edhe presidenti Qarri këmbënguli shumë. Duke pasur parasysh dhe strategjinë e re me ardhjen e drejtorit ekzekutiv besoj se do të bëjmë diçka ndryshe.

Sa e njihni grupin e lojtarëve?
Grupi ka cilësi brenda, ka eksperiencë, por mungon vetëm qetësia. Këto po tentojmë ne si staf të ndryshojmë dhe të kthejmë një mentalitet ndryshe. Skuadrat kanë nevojë për ardhje dhe për cilësi të tjera.

Ju ka garantuar klubi qetësi nga ana financiare deri në fund të sezonit?
Nuk është momenti më i mirë i mundshëm në futbollin shqiptar sa i përket kësaj pjese. Shumë skuadra i shoh që kanë vështirësi, ndoshta ky mund të jetë një ngërç. Në bisedimin me presidentin më ka siguruar se skuadra do të jetë e qetë nga ky aspekt.

Keni folur me lojtarët si është situata dhe a kanë frikë për revolucion në janar?
Nuk është çështje revolucioni lojtarësh, por skuadra duhet të bëjë atë që bën më mirë. E kemi diskutuar me lojtarët dhe u kemi thënë se me cilësinë që kanë në skuadër nuk duhet të ishin në këto pozita ku janë. Është një sport i paparashikueshëm dhe në shumë situata mund të ngecësh dhe të gabosh. Çështja një është çështje rezultatesh. Ne në çdo moment vlerësohemi nga rezultatet e punës. Duhet të ndryshojmë mentalitetin, të sjellim një mentalitet europian të ecim para, duke pasur parasysh këtë gjë, mendoj dhe besoj se skuadra do ecë para.

Rival direkt për mbijetesën?
Gjashtë skuadra janë në garë për Europën, ndërsa katër të fundit janë në luftë për mbijetesë. Ky është pani ynë për momentin, që të dalim nga kjo situatë kritike.

Italiani tashmë është i larguar, pritet vetëm zyrtarizimi, por ndërkohë duhet menduar për të ardhmen dhe duhet bërë zgjedhja e duhur, për të dalë nga qorrsokaku.

Ndërkaq, specialistët dhe trajnerët e futbollit japin mendimet e tyre për momentin e kombëtares dhe një ndër trajnerët e Superiores, kampion një vit më parë, Ernest Gjoka, për “SportEkspres.com” ka analizuar situatën dhe ka dalë paksa kundër rrymës, duke mos u bashkuar me korin e kritikave dhe duke parë nga e ardhmja, me besimin e kombëtarja mund të rigjejë rrugën drejt sukseseve të viteve të shkuara.

– Gjoka, një koment për ndeshjen ndaj Skocisë, por në këndvështrimin e tifozit.

– Jam ndjerë keq, më ka ardhur shumë keq për humbjen e djeshme. Ajo që më ka shqetësuar dhe mërzitur më shumë nuk është thjesht humbja, sepse humbjet janë normale, ne nuk jemi Gjermania. Befasuese është se ekipi ynë po tregon që po bën hapa pas jo thjesht në rezultate, por mbi të gjitha në filozofinë e lojës. Asgjë nuk po funksionon dhe kjo më bën të ndihem vërtet keq.

– Një koment si trajner?

– Të jem i sinqertë, ne që jemi të kësaj fushe duhet të jemi të kujdesshëm me komentet dhe deklaratat. Është e lehtë të kritikosh, por duhet të jemi edhe pozitivë, për të ndihmuar sadopak ekipin kombëtaren, me dëshirën për të besuar se kjo situatë do të ndryshojë për mirë. Koment teknik nuk mund të bëj në këtë moment, sepse të gjithë e kanë parë ndeshjen, të shumtë janë ata që e kanë analizuar.

– Çfarë duhet bërë për të dalë nga kjo krizë?

– Duhet patjetër që skuadrës t’i zgjohet dëshira dhe në veçanti uria për sukses ,sepse në qoftë se nuk uri për të arritur sukses, atëherë ne humbim identitetin. Duhet të jemi të vetëdijshëm se Shqipëria mund të bëjë gjëra të mëdha vetëm duke vepruar si grup i bashkuar, nga skuadra, te federata, stafi drejtues e deri tek tifozët. Nuk kemi brumë të tillë që të fitojmë ndeshje me një shpikje të ndonjë lojtari, me 2-3 raste të krijuara.

– Të gjithë sulmojnë trajnerin, po skuadra sa mund të fajësohet dhe a ka cilësi e forcë mendore për të dalë nga ky moment?

– Unë shpresoj dhe besoj që kjo kombëtare ka potencialin për t’u kthyer në rrugën e duhur, por në këtë moment ka nevojë për shume dashuri e mbështetje. Ata futbollistë duhet të ndihen jo të masakruar nga të gjithë, është e lehtë t’i hedhësh poshtë në moment krize, por kombëtarja është e jona, ata djem janë tanët, në të mirë e në të keq. I kemi lavdëruar pa masë, janë kthyer në heronj, ndaj nuk është normale që t’i baltosim sapo gjërat nuk funksionojnë.

– A mjafton ndryshimi në drejtim?

– Siç e thashë edhe më lart, së pari vjen skuadra. Trajnerët janë kalimtarë, kanë një mision dhe e çojnë përpara përkohësisht, ndërsa lojtarët zbresin në fushë dhe janë aktorët kryesorë, ndaj ata kanë nevojë për mbështetje.

– Nuk e përmende asnjëherë Panuçin, ndërkohë…

– Unë dua të flas për kombëtaren, nuk dua të merrem me emra të veçantë dhe nuk është as etike të flas për Panuçin. Punën e tij e vlerësojnë rezultatet, që për fat të keq nuk janë të mira, po ashtu e vlerëson Federata Shqiptare, ajo e ka punësuar. Tifozët janë emocionalë, kanë të drejtën e vet edhe të ofendojnë ndonjëherë, kur nuk durojnë më, por gjithçka varet nga rezultatet në futboll, për të gjithë. Me zemër jam në mbështetje të ekipit, ndoshta në stol do duhej një trajner me shumë eksperiencë dhe ky është një mësim i rëndësishëm për të ardhmen, sepse Panuçi mund të jetë penalizuar edhe nga fakti që kishte shumë pak eksperiencë si trajner, përtej emrit të madh si lojtar. Pastaj edhe Shqipëria është ndryshe nga Italia, në çdo drejtim, ndaj nuk është e lehtë të përshtatesh me ambientin, mentalitetin.

Sot, skuadra nga periferia e kryeqytetit i ka zhvendosur përgatitjet te Kodrat e Liqenit, ku bashkë me teknikun Gjoka kanë qenë dhe ndihmësit e tij, të cilët i janë bashkuar Kamzës. Fatjon Tafaj do të mbajë rolin e zëvendëstrajnerit, ndërsa përgatitësi atletik do të jetë Vullnet Manushi. Trajneri i portierëve mbetet Blendi Vashaku.

Kamza ka vetë 8 pikë pas 13 javësh dhe ndodhet në vendin e parafundit, me vetëm 1 pikë më shumë se Kastrioti që mbyll klasifikimin. Lufta për mbijetesë pritet që të jetë e ashpër, pasi edhe Tirana e Luftëtari janë aty pranë. “Epoka” e Gjokës sapo ka nisur dhe mbetet për t’u parë nëse do e kalojë dhe këtë sfidë të re dhe të vështirë që ka marrë përsipër.

Gjoka më parë ka fituar Kupën me Flamurtarin, titullin me Kukësin, por nuk arriti që të përmbushte objektivin me Vllazninë një vit më parë. Tani, tekniku kryeqytetas ka një tjetër sfidë të vështirë, siç ai vetë për “SportEkspres.com” e pranon, teksa thekson se kjo është puna e trajnerit, për të provuar sfida të reja, sa dhe të vështira: “Kjo është puna jonë, midis sfidash! Kështu që dhe ardhja ime te Kamza është një sfidë dhe sigurisht një sfidë e vështirë”.

Fati do që Gjoka të debutojë me Kamzën ndaj skuadrës që e shpalli kampion, Kukësit, por 48-vjeçari i ka idetë e qarta, duke treguar se skuadrës së tij i duhet me çdo kusht pikët, për vetë situatën ku ndodhet: “Ndeshja e radhës është ndeshje me Kukësin, një ekip i mirë, një ekip që ka pretendimet e tij për të dalë kampion, por dhe ne kemi pretendimet tona dhe na duhen pikët se çdo kusht, kjo e bën shumë të vështirë këtë sfidë”.

Konkurrenca për mbijetesë është e fortë, diçka që dhe Gjoka është i vetëdijshëm, megjithatë në këtë pikë tekniku i ri i kamzalinjve tregon se skuadra e tij duhet të jetë e qartë me veten para se të shohë rivalët që ka për mbijetesë: “Sigurisht lufta po bëhet gjithmonë e më e egër kështu që është detyrë e jonë që të kuptojmë situatën ku ndodhemi dhe të reagojmë sa më shpejt”, përfundoi trajneri i Kamzës, Ernest Gjoka.

Kur verën e shkuar u largua nga drejtimi i Kukësit pas disa shtyllash e një penalltie të humbur që çuan tek eliminimi nga Sherifi i Tiraspolit në Champions League, me siguri Ernest Gjoka ka menduar se nuk kishte dhimbje më të madhe se të të largonin në atë mënyrë, pak centimetra dhe sekonda larg kualifikimit në turin e dytë kualifikues. E kishte gabim: në jetë ka gjithmonë më keq dhe tani e ka kuptuar, sepse në Shkodër ka përjetuar diçka që nuk e priste dhe nuk e mendonte kurrë. Vllaznisë i ndodhi gjëma e rënies nga kategoria, që për të folur troç, ishte një gjëmë që ishte në ajër prej kohësh, të paktën që vjet, kur me shumë vuajtje e fat u shmang zbritja nga kategoria. Gjoka e mori Vllazninë në një moment delikat, në fund të vitit të shkuar, kur Cungu nuk kishte duruar më dhe kishte thënë “Mjaft, nuk punohet në këtë ambient e me këto kushte!”. Edhe pse kishte folur shpesh me tone të larta, Cungu asnjëherë nuk ka folur hapur për gjithë problemet që po mbytin Vllazninë dhe Gjoka nuk e dinte çfarë e priste. Shkoi për t’u marrë me sport, por i kaloi disa muaj në Shkodër me polici nga pas, me kërcënime, sulme fizike e debate me disa prej gazetarëve. “Gabova që nuk ika që kur ndodhi agresioni fizik”, thotë Gjoka me shumë keqardhje, ashtu si merr përsipër përgjegjësinë që i takon: “Kërkoj falje, por për aq sa më takon si trajner, sepse nuk mund të pranoj që të krijohet një cirk mediatik sikur në Shkodër gjithçka erdhi për fajin tim dhe çdo gjë ishte në rregull përveç meje”. Në këtë intervistë Gjoka i thotë të gjitha, ose thuajse të gjitha, sepse si zakonisht, ruan edhe diplomaci, pa kaluar në përgjigje direkte për ata që në këto muaj çfarë nuk kanë thënë kundër tij.

– Gjoka, në tetor të vitit të shkuar more drejtimin e Vllaznisë me një lëvizje të beftë. A u mendove gjatë dhe pse more përsipër një mision që dukej shumë i ndërlikuar?
– Në momentin që Cungu u largua, një miku im, i cili ishte mik edhe me kryebashkiaken Ademi, më propozoi të merrja drejtimin e Vllaznisë. E kisha me shumë siklet, sepse e dija si funksionojnë klubet e bashkive, e kam provuar edhe më parë. Bëhet fjalë për klube pa mbështetje, pak a shumë jetimë. Megjithatë, ideja ishte që në janar deri në mars diçka do ndryshonte te Vllaznia, një person ose disa persona do e merrnin Vllazninë, duke e privatizuar. Ekzistonte një projekt ambicioz, në bazë të së cilit Vllaznia do të kthehej shumë shpejt në një klub modern, të organizuar dhe të drejtuar nga një dorë e fortë, që do të kontrollonte gjithçka. Kjo gjë ma prishi mendjen, por që kur shkova te Vllaznia e pashë që diçka nuk shkonte.
– Nuk shkonte me klubin, apo skuadrën?
– Që në prezantim gjeta mbi 30 lojtarë në ekip, ndërsa realisht rreth 14 lojtarë vlenin. Pashë që te Vllaznia kishte lojtarë që nuk vlenin këtë sezon për ekipin e parë. Fola me të gjithë, u thashë hapur: “Deri në dhjetor do të qëndroi në ekipin e parë, por më pas duhet të kërkoni sistemim”. Që aty nisën lëvizjet e njerëzve, që krijonin probleme, u krijuan situata stresuese. Në momentin e parë nuk e kuptuan që do ndryshonin gjërat me ardhjen time dhe këtu ishte problemi madhor, sepse unë u futa në një luftë që nuk ishte e imja.
– Çfarë lufte?
– Gjeta një Vllazni të ndarë në parcela, në mënyrë figurative, skuadra ishte ndarë si toka, dikush kishte një rol në mesfushë, dikush një mbrojtës krahu, dikush sulmin dhe unë pa dashje i prisha këto ekuilibra. I thosha kryetares së bashkisë që shumë lojtarë nuk ishin për Vllazninë, që në fund të vitit duhej të iknin. Që në momentin e parë pata një konflikt të vogël me 2-3 persona, të cilët më takuan dhe kërkonin llogari pse fëmijët e tyre nuk ishin pjesë e ekipit, apo e 18-shes, apo nuk përfshiheshin më shumë në ndeshje e stërvitje. Shumë njerëz u trembën se mos unë kisha shkuar për t’u hequr kontratat lojtarëve, por kjo nuk ishte fare çështje e imja. Unë thjesht doja një skuadër kompetitive, sepse skuadra ishte në një moment shumë të vështirë, si nga ana psikologjike, ashtu edhe ngjana e rezultateve. Skuadra kishte defekte në disa elemente kyçe dhe repartet nuk ishin të kompletuara, pas lojtarët që ishin aty nuk ishin cilësorë dhe shumë prej lojtarëve me zor gjenin hapësirë tek ekipi B, jo më tek A-ja.
– Megjithatë, dukeshin vogëlsira krahasuar me atë që ndodhi më vonë, me agresionin fizik.
– Gradualisht, situata u acarua duke shkuar te konflikti i parë në dhjetor, aq sa u detyrova të shkoja në polici. Kishte persona që më thoshin “fëmija jonë, vëllai jonë apo nipi jonë vlejnë, na kanë thënë trajnerë të tjerë, por nuk i do ti”. Gjërat u rënduan dhe u bënë agresive para fazës përgatitore të Vllaznisë. Fazat te Vllaznia kanë qenë gjithmonë me 30-40 lojtarë, diçka e pakonceptueshme nga ana profesionale. Në atë moment më mbështeti shumë kryetarja e bashkisë dhe për këtë e falënderoj, sepse në fazë përgatitore shkuam me 14 lojtarë, duke pritur edhe ndonjë përforcim. Këtu agresiviteti arriti kulmin, ndihesha si në qendër të një vullkani, ku herë shkoja poshtë e herë shkoja lart. Shumë debate, mesazhe, fjalë, gjëra që më transmetoheshin, të tipit “ti duhet të ikësh nga Shkodra, sepse ne kemi trajnerët tanë”.
– E mendove largimin?
– E mendova seriozisht largimin, në shumë momente, por një miku im i mirë ndikoi që të mos largohesha, të vijoja punën. Kështu ndodhi, ecëm përpara, bëmë merkato, aq sa mundëm. Nuk ishte e lehtë, dy nga ata lojtarë pranuan me vështirësi sepse nuk dëshironin të luanin në ekip bashkie. Që kur do luanim ndeshjen e parë, pashë një reagim jashtëzakonisht agresiv dhe aty u gatua çorba e helmuar, ku kishte edhe 2-3 elemente që mikrofonin apo lapsin e kishin kthyer në pushkë, duke sulmuar çdo ditë e duke nxitur qytetin kundër klubit, skuadrës dhe sidomos meje. Pikërisht në atë periudhë tensioni arriti kulmin dhe ndodhi edhe agresioni fizik.

– A është rastësi që pikërisht në atë moment që skuadra dukej në rrugën e duhur ndodhi agresioni?
– Mendoj se erdhi sepse shumë hije që qëndronin rreth Vllaznisë, që e kishin lidhur për këmbësh për disa vite me radhë për interesat e tyre personale, nuk dëshironin që të ecnim mirë.
– Emrat?
– Nuk i them emrat, sepse së pari nuk më lejohet ligjërisht dhe së dyti është një çështje më e madhe se thjesht e imja. Dua vetëm të them se në Shkodër ka pasur shumë njerëz që natën të vrasin dhe në mëngjes shkojnë me familjarët e viktimës për të vajtuar. Ashtu si do t’i falënderoj gjithmonë dhe nuk do t’i harroj ata që më kanë ndenjur pranë, ashtu nuk do t’i harroj edhe ata që janë bërë pjesë e çorbës së helmuar deri te momenti i agresionit. Të gjitha gjërat do t’i vlerësojë koha dhe do t’a nxjerrë koha në pah, kush e rrëzoi Vllazninë.
– Pse Gjoka duhej sulmuar, duhej kërcënuar? Kujt i prishte kaq shumë punë?
– Sepse Gjoka prishi ekuilibrat, hoqi parcelizimin e Vllaznisë, arriti të krijonte një marrëdhënie pozitive me ekipin B, duke marrë disa lojtarë që e meritonin në ekipin e parë. Në Shkodër nuk ishin mësuar kështu. Në Shkodër ishin mësuar që më i forti, kush ka mbështetje më të fortë farefisnore apo mediatike luan gjithnjë. Agresioni fisnik ishte kulmi i një situate që ishte e rëndë prej kohësh.
– Pse nuk u largove pas agresionit?
– E pranoj, është një ndër gabimet e mia më të mëdha që nuk u tërhoqa. Unë isha në mesin e një lufte brenda llojit, luftë për të kontrolluar dhe mbajtur peng Vllazninë, për ta shfrytëzuar, për t’i marrë të mirat materiale. Pranova të vazhdoj edhe falë këmbënguljes së Valter Fushajt, i cili ka qenë personi që ka ndikuar për të shkuar në Shkodër dhe më ka qëndruar shumë pranë në çdo moment. Megjithatë, që në atë moment qetësia nuk ekzistonte më. Nuk mundet një trajner të punojë i ruajtur nga shteti. Çfarë i bëri Gjoka Shkodrës apo hijeve që i qëndrojnë pranë Vllaznisë, që janë të ndërthurur me disa elemente, nga të cilët disa kanë kalemin, disa grushtin e disa thikën? Çfarë bëri Gjoka që nuk duhej bërë dhe duhej larguar patjetër nga Shkodra? Që atë moment duhej të largohesha, të mos merrja pjesë në një betejë që nuk më përkiste.

– Si mund të punohet, duke qenë i shoqëruar me policë?
– Nga mëngjesi deri në darkë më ruante policia. Sa dilja nga pallati më merrte në dorëzim agjenti i krimeve dhe qëndronte pas meje deri në darkë. I falënderoj për gjithçka kanë bërë, më kanë qëndruar shumë pranë, aq sa më thoshin për të më qetësuar: “Profesor, rri i qetë se nuk është më çështje shteti, sepse po ndodhi sërish duke qenë ne këtu, futen në gjak edhe me fisin tonë”. Çdo mbrëmje hynte njëherë në pallat agjenti i krimeve, pastaj kaloja unë për në shtëpi. U krijua një moment shumë stresues dhe skuadra e kuptonte këtë gjendje. Skuadra e shihte që policia ishte prezente në çdo moment dhe kështu nuk luhet futboll. Kishte momente që nuk e dija pse vazhdoja, thjesht për të çuar deri në fund atë që kisha marrë përsipër, për sedër, vazhdoja duke turfulluar me vete. Ishte si një betejë kundër të padukshmes: është si të kesh malin përballë dhe të kesh edhe oksigjenin që nuk e sheh. E shihja që mungonte oksigjeni. Edhe skuadra herë pas here shfaqte shenja stresi e trysnie të madhe, mjaftonte një rezultat negativ dhe lojtarët e humbnin shumë lehtë qetësinë, ishin të stresuar. Kishte raste që i thosha stafit të kontrollonin makinën nga poshtë, kur dilnin për në stërvitje. Ishte ambient tepër mbytës, tani e kam të qartë pse ndodhnin këto gjëra. Që nga momenti që doli dikush që kërkonte Vllazninë, për të qenë president, u trembën shumë të tjerë, që qëndrojnë si hije nga pas dhe e kanë marrë peng Vllazninë prej 6-7 vitesh dhe e kanë shfrytëzuar, duke e trajtuar Vllazninë si tortë, për të marrë një tortë. Me president të ri, me privatizim, këta njerëz largohen një herë e përgjithmonë nga Vllaznia, nuk kanë ç’ti marrin më. Këtu u gjenda në mes të një zjarri ku nuk duhej të isha, në një luftë që nuk isha e imja.
– Kur e menduat largimin realisht për shkak të rezultateve?
– Në fazën e katërt desha të largohesha së pari pas humbjes me Luftëtarin në Shkodër, por Ademi dhe lojtarët këmbëngulëm që të vazhdonim, sepse besimi ishte i madh. Edhe tani jam i bindur ëq ajo skuadër nuk ishte për të rënë nga kategoria, jam i bindur që po të kishte president dhe të mos kishte njerëz që i qëndrojnë pas dhe përdorin edhe një pjesë të medieve, me sulme gjatë gjithë javës, ajo skuadër nuk kishte për të rënë. Nuk i them të gjitha këto që unë nuk kam faj, përkundrazi, edhe unë kam faj që Vllaznia shkoi deri në këtë pikë. Kërkoj falje, por për aq sa më takon si trajner, sepse nuk mund të pranoj që të krijohet një cirk mediatik sikur në Shkodër gjithçka erdhi për fajin tim dhe çdo gjë ishte në rregull përveç meje E them përsëri: “Ku ishte ai faj aq i madh dhe çfarë lamë pa bërë për të mirën e Vllaznisë? Nuk punuam në stërvitje, nuk punuam për të ndryshuar mentalitetin, nuk i bëmë gjërat si duhet?”. Mendoj se dhamë gjithçka për t’i ndryshuar gjërat, nuk ia dolëm mbanë dhe për të këtë ka shumë arsye. Unë marrë përsipër fajin që më takon, por nuk e meritoj gjithë këtë baltë të hedhur ndaj meje, jo nga qyteti dhe shumë intelektualë e njerëz të sportit. Këtyre u kërkoj falje për ato që bëra dhe nuk bëra dot, por suksesi dhe dështimi nuk janë kurrë plotësisht të tuat.

– A sheh të ardhme pozitive për Vllazninë?
– Mendoj se Vllaznia do shpëtojë kur atje të vijë ndryshimi dhe të gjendet një president, por e shoh shumë të vështirë. Presidenti gjëja e parë që do duhet të bëjë është të marrë një plug dhe të heqë barërat e këqij dhe helmin që është derdhur në atë tokë prej vitesh. E di që ajo pjesë që më ka sulmuar në mënyrë sistematike do vazhdojë ta bëjë këtë gjë sërish, do gjenden sërish njerëz që do të shfrytëzohen për të folur keq dhe për t’i vënë kundër meje. Unë i kërkoj ndjesë gjithë pjesës që ka pasur besim tek unë dhe më kanë mbështetur edhe në situatat më të vështira, por jam ende në dilemë nëse mund të bëja dot më shumë se kaq.
– Rroga juaj, shumë është përfolur?
– Puna e rrogës ishte e tillë: nuk brëa pazar fare për rrogën. Që kur u takova me kryebashkiaken, rroga ishte e caktuar nga bordi mbikëqyrës dhe unë nuk bëra asnjë kërkesë, sepse ishte një telash më vete mbledhja dhe aprovimi i pagave. Pranova të vijoja me rrogën e paraardhësit tim, duke marrë përsipër që edhe rroga e përgatitësit atletik të mbulohej nga ne, sepse më parë ishin 3 persona në staf, ndërsa unë isha vetë i katërt. Nuk ka qenë fare çështja për të përfituar financiarisht, por thjesht që të shkoja te Vllaznia për të bërë diçka të mirë, që në mars apo në prill të vinte dikush që të mbyllte handikapin e këtyre viteve dhe të riorganizohej klubi. Çështja e rrogës është thjesht vazhdimi i hedhjes së llumit dhe vazhdimi i abuzimit që është kryer ndaj meje në mënyrë të vazhdueshme.
– A do e ribëje zgjedhjen e marrjes së Vllaznisë, nëse kthehesh në kohë?
– Kur u futa brenda situatave të qytetit, e gjeta veten brenda një vullkani dhe me shumë keqardhje e them që nuk është qyteti i Shkodrës i tillë. Futbolli i Shkodrës është kapur nga probleme madhore dhe nuk mund ta them që po të kthehesha pas, do i futesha sërish kësaj aventure. Nuk e kam hallin te sharjet e kritikat, ato janë normale në një qytet ku shahen të gjithë, duke përfshirë trajnerin Armando Cungu, për të cilin mendoj se ka qenë një ndër trajnerët më të mirë që ka nxjerrë Shkodra në dekadën e fundit, por atje është shumë e vështirë të punohet, aq sa edhe Barcelona do dështonte me atë trysni.
– Ke thënë shpesh që shihje kë kishe përpara në renditje dhe se gara për mbijetesë nuk zhvillohej me Teutën. Pse?
– E kam thënë sepse Teuta ka president, ndërsa Vllaznia është ekip bashkie, Kamza është ekip bashkie më së shumti, Lushnja është ekip bashkie. Në një kampionat kaq të fortë sa Superiorja, prania e një presidenti është një suport i jashtëzakonshëm. Ndaj edhe unë shihja gjithnjë përpara në renditje.
– Pengu më i madh?
– Ndeshja me Luftëtarin në Shkodër, ishte ndeshje vendimtare.
– Largimi pas ndeshjes kundër Partizanit?
– Nuk ika si frikacak, kisha folur gjithë javën me skuadrën dhe shpresoja, prisja një reagim krenarie, nervi. Me Partizanin u ndjeva shumë keq, kur pashë skuadrën të dorëzuar. Nëse Vllaznia do luante fort, do jepte gjithçka, do sakrifikonte, edhe nëse mundej nga një Partizan i fortë, me emër të madh, unë do të vazhdoja. Duke parë si u interpretua ndeshja, u ndjeva në pozicionin më të vështirë, duke parë një ekip të dorëzuar, pa fuqi, që nuk mbante dot ngarkesën psikologjike. Që aty nuk kishte më vlerë të vazhdoja, sepse në dy ndeshjet e fundit gjërat do shkonin ashtu si shkuan, me apo pa mua. Nuk ika si frikacak, nuk e bëra as kur duhej të kisha realisht frikë. U largova vetëm sepse e kuptova që nuk kisha më çfarë t’i jepja një skuadre të dërrmuar në çdo drejtim.
– Si u ndjeve kur pe Partizanin të luante aq fort ndaj Vllaznisë dhe në fund të mundej lehtësisht nga Kamza?
– Kjo nuk është çështja ime, nuk mund të flas për sjelljen e Partizanit apo mëritë e vjetra të Partizanit.
– Privatizimi i famshëm, pse gjithë ky kaos dhe sa ka ndikuar?
– Gjithë situata ka ardhur nga mungesa e privatizimit. Nëse Vllaznia do të shpëtojë, duhet të privatizohet. Kryetarja e Bashkisë ka marrë përsipër një risk të madh duke tentuar ta çojë deri në fund këtë proces dhe do ta ketë shumë të vështirë t’ia dalë mbanë, sepse që në Këshillin Bashkiak do ketë shumë vështirësi për t’i bërë bashkë të gjitha krahët. Nëse Vllaznia privatizohet, shpëton.
– Marrëdhënia me Valter Fushajn?
– Ai është një biznesmen që e do Vllazninë, dëshiron ta rindërtojë, ta bëjë ndryshe punën dhe do ishte mirë nëse e merr. Gjithë lufta që është brenda Shkodrës është që Vllaznia të mos privatizohet, sepse nëse kjo ndodh, ndryshojnë shumë gjëra. Personalisht e falënderoj për gjithçka, në momente të vështira më është gjendur pranë, aq sa vetëm te “Colosseu” kam qenë i realisht i qetë, sa herë dilja në Shkodër.
– Tifozët, shumë të paktë në stadium.
– Është normale, shkodranët janë të ndjeshëm ndaj rezultateve. Kur është nevojitur prania e tyre, ata kanë ardhur, si vjet me Tiranën, ashtu edhe sivjet me Kamzën.
– Miqtë që ke gjetur në Shkodër, cilët janë?
– E kam detyrim moral që të përmend disa emra që më kanë qëndruar pranë. Nuk mund t’i përmend të gjithë dhe më vjen keq. Kryetarja e bashkisë, që më ka mbështetur totalisht, Valter Fushaj, mik i mirë, profesor Beni, për të cilin kam shumë konsideratë, deputeti Romeo Gurakuqi, gjithnjë prezent në gjithë problematikat e mia, njerëzit e sportit si Grima apo Vioresin Sinani, me të cilin sa herë jemi takuar kemi biseduar gjerë e gjatë, Admir Teli, profesor Paçrami e disa të tjerë që ndoshta i harroj tani. Në veçanti kam vlerësim maksimal për shefin e krimeve, Saimirin, i cili ka qenë shumë profesional në gjithë momentet e mia të vështira.
– Në aspektin sportiv, çfarë mban mend për mirë nga periudha në Shkodër?
– Mund të ndihem mirë sidomos për talentet që u dhamë një dorë për të luajtur e për t’u rritur profesionalisht. Portieri Sherri, Çinari, apo Pusi, ishin ndër ata që patën rritje të konsiderueshme dhe u bënë edhe pjesë të Shqipërisë U-21.
– A ka ndonjë lojtar që të ka zhgënjyer?
– Jo, askush. Të gjithë u munduan të jepnin maksimumin, por kaq ishin mundësitë ndoshta. Në një situatë ndryshe, këta lojtarë mund të bënin më shumë.

Gjoka për Shtubinën: Ka gabuar adresë
“Nuk mendoj se ia vlen të përfshihem në debate që pastaj kthehen në ofendime nëpër gazeta, gjithnjë jam munduar t’i evitoj skena të tilla. Shtubinës po i them vetëm dy fjalë: historia e tij është shumë e thjeshtë, ai është një nga ata persona që po përdoren si “pushkë” për të goditur mua. Shtubina duhet ta kërkojë te klubi dhe grupi i futbollistëve, që në janar nuk ishin dakord që ai të kthehej. Shtubina ka pasur çështje me klubin, që unë i di, por nuk më takon mua t’i them. Lufta e tij ndaj meje është e gabuar, Shtubina duhet ta gjejë te vetja problemin, tek ajo çfarë ka mbjellë dhe çfarë ka korrur te Vllaznia. Nuk e gjeta te Vllaznia, që të akuzohem se e largova, ai ishte larguar me polemika pa nisur sezoni”, ka deklaruar Gjoka në lidhje me akuzat e forta të Ndriçim Shtubinës, në një intervistë lëshuar ditët e fundit për “Panorama Sport”, ku akuzon trajnerin se vendosi veton për të mos e marrë në ekip.

Gjoka për jabanxhinjtë: As Roberto Karlos nuk do bënte hajër në Shkodër
Në media ka pasur edhe sulme ndaj lojtarëve joshkodranë, duke nisur nga Mersini, i shënjestruar që në fillim, nga tifozë të caktuar dhe nga gazetarë të caktuar, ndërkohë që edhe Shtubina e sulmoi ashpër ditët e fundit. Përgjigja e Gjokës në lidhje me këto sulme: “Mendoj se edhe sikur Roberto Karlos në rininë e vet të vijë te Vllaznia, nuk ka për të bërë hajër në këto kushte. Për sa i përket grupit, i ka pranuar pa asnjë problem jabanxhinjtë, u ka ndenjur shumë afër, falënderoj edhe kapitenin e skuadrës i cili ka qenë element shumë pozitiv në këtë aspekt. Jabanxhinjtë besoj se janë munduar të bëjnë maksimumin e tyre, po të kishin bërë gjithçka mirë do e kishin realizuar misionin, por mendoj se të gjithë bashkë kemi faj, por jo vetëm jabanxhinjtë. Është e turpshme të veçohen lojtarë të caktuar, nuk është hera e parë që ndodh, edhe vjet po ashtu ka ndodhur, kjo ndarje është diçka shumë e keqe dhe nuk dua të merrem fare me këtë luftë, këtë histori që do më mbetet një kujtim i hidhur përgjithmonë. Kam punuar në disa qytete dhe askund nuk më ka ndodhur që të sulmohet kështu trajneri apo lojtarë të veçantë”.

Të kuqtë e Dalipit kanë kontrolluar takimin në çdo moment të tij, ndërkohë që kuqeblutë e Ernest Gjokës edhe pse janë munduar sidomos në pjesën e parë, duke pasur edhe raste nuk arritën t’i konkretizonin. Goli i Asanit në pjesën e parë, falë një aksioni personal dhe fantastik të shqiptarit me pasaportë maqedonase si dhe goli i Prognit, i ardhur nga gjumi i mbrojtjes kuqeblu, në gjysmën e pjesës së dytë ishin ndoshta epilogu i një sezoni të tmerrshëm të shkodranëve, të cilët pas humbjes së sotme, duhet të pranojnë fatin e tyre. Rënien në Kategorinë e Parë, edhe pse matematikisht akoma janë në lojë për të qëndruar në Kategorinë Superiore.

Golat

32?- Perlë e Asanit. Sulmuesi shqiptar merr një top në mesfushë dhe avancon drejt portës shkodrane, kalon Pjeshkën e Malotën dhe në hyrje të zonës godet diagonal dhe shënon, duke çuar në avantazh Partizanin.

64?-Progni merr një top nga mesfusha, sheh që porteri Sherri del keq dhe godet menjëherë, duke çuar në 2-0 rezultatin e takimit. Mbrojtja e shkodranëve në gjumë.

Partizani – Vllaznia 2-0

Shënues: Asani 32′, Progni 64′

Partizani: Hoxha, Ibrahimi, Gojkoviç, Belica, Kalari (Fejzullahi 59′), Mala, Telushi, Bardhi, Asani (Çulum 71′), Abdurrahimi, Progni (Trashi 66′). Trajner: Klevis Dalipi. Të gatshëm: Xhika, Atanda, Çani, Sulejmani.

Vllaznia: Sherri, Çinari (Ribaj 61′), Krymi, Mersini, Pjeshka, Gocaj, Malota, Lika, Vucaj, Sukaj, Orelesi (Tafili 70′). Trajner: Ernest Gjoka. Të gatshëm: Selimaj, Kalaja, Gurishta, Berisha, Bardulla.

Gjyqtarë: E. Jorgji, E. Ganxhi,  A. Mahmuti, F. Xhemalaj

Kartonë të verdhë: Progni 27′, Telushi 65′ / Vucaj 42′

Delegat: L. Nyrishmi; Vëzhgues: P. Pjetrushi.

“Fitorja të jep oksigjen pas dy javëve të këqija. Humbëm shumë raste dhe në pjesën e dytë, duhej të ishim shumë të kujdesshëm. Morëm një fitore pas dy javësh jo të mira që e kishin rënduar skuadrën nga ana psikologjike”, u shpreh në fillim Gjoka, që më pas deklaroi se: “Mendoj se kemi biseduar shumë dhe jemi qetësuar shumë. Ishte javë deçizive për ne, për përgjegjësinë që kemi. Djemtë dhanë gjithçka, por nëse do të ishim më të qetë, mund ta mbyllnim ndeshjen me golin e dytë. Në futboll nuk i dihet asnjëherë, pasi kundërshtari mund të shfrytëzojë një gabim tëndin, pavarësisht se sa lojtarë ka në fushë”.

Shumë raste të humbura për një ekip, që duhet të garantojë fitore, ndërkohë që Gjoka pranon se ky ishte problemi kryesor gjatë 90 minutave. “Nëse në pjesën e parë duhet të shfrytëzonim rastet që kishim. Pjesa e dytë nisi ndryshe me kundërshtarin, që kishte ndryshuar skemë. Laçi krijoi pak raste, por dominimi i ndeshjes ishte nga ne. Duhet të ruanim atë që kishim bërë, por nuk shënuam dot golin e dytë, duke humbur qetësinë. Të gjithë e panë se çfarë prodhoi sot fushë. Ne fituam një ndeshje me mund, djersë dhe sakrificë”, mbylli Gjoka.

Mes polemikave, debateve dhe stresit pa fund, trajneri Ernest Gjoka po mundohet të mbajë skuadrën larg trysnisë dhe sot nuk është paraqitur fare para medieve shkodrane, pas debatit të ashpër javën e shkuar me gazetarë të veçantë. Trajneri i skuadrës shkodrane ka folur direkt për faqen e klubit shkodran në internet, duke prekur aty gjithë temat në prag të ndeshjes jetike në Lushnjë.

MOMENTI – “Për ne është shumë e rëndësishme sfida në Lushnjë. Mund të them që ne e shikojmë si jetike për vazhdimësinë. Jemi munduar gjithë këtë javë të punojmë të gjithë për ta kapërcyer këtë situatë jopozitive ku ndodhemi. Besoj që të gjithë jemi të vetëdijshëm për këtë situatë dhe na duhet të bëjmë çdo gjë për të dalë nga ky makth”.

MUNGESAT – “Mungesa kemi dy dhe për mua janë të rëndësishme për skuadrën, si Krymi, ashtu dhe Çinari, sepse skuadra ka krijuar një fizionomi me këta lojtarë. Gjithsesi, unë mendoj që në këto momente çdo lojtar do të bëjë maksimumin duke treguar personalitet dhe dinjitet për të kaluar këtë moment delikat”.

NDRYSHIMET – “Duhet të kuptojmë përgjegjësinë dhe të tregojmë që jemi të aftë që dhe nën presion dimë t’ia dalim. Sepse unë besoj se në skuadër ka djem që kanë personalitet dhe dinë të marrin përgjegjësi në momente të rëndësishme”.

OBJEKTIVI – “Ne nuk kemi asnjë rrugë tjetër veç fitores. Duhet të shkojmë për të marrë maksimumin, edhe pse e dimë vështirësinë e ndeshjes. Por në këto momente duhet të ringrihemi për hir të vetes dhe për hir të qytetit i cili po e përjeton këtë situatë njësoj si ne. E kemi detyrë jo vetëm profesionale, por dhe qytetare të ringrihemi. Unë besoj tek skuadra se do të arrijë të bëjë më të mirën për të dalë nga ky ngërç”.

Gaspër Marku

Vllaznia e pjesës së dytë të sezonit është ndryshe. Emra të rëndësishëm të afruar dhe tani kërkohen rezultate. Pikërisht fitoret do i rrisnin më shumë shkodranët, sikurse edhe u shpreh dje në konferencë për shtyp trajneri Ernest Gjoka, i cili theksoi se skuadra ka ndryshuar me 50%. Objektivi kundër Kukësit, por edhe ndaj çdo ekipi që vjen në “Loro Boriçi”, janë tre pikët. Tekniku kryeqytetas zbërtheu para medieve ekipin dhe me ndryshimin e mentalitetit shpreson që Vllaznia të dalë nga situata e vështirë. Nuk mungoi edhe thirrja ndaj tifozëve, ndihma e të cilëve konsiderohet mjaft e rëndësishme.

 …

Profesor, një ndeshje që pritet me interes në Shkodër. Si e shikoni përballjen me Kukësin?

– Skuadra është bërë më solide. Kemi sjellë në skuadër disa lojtarë me eksperiencë dhe ato probleme që kishim në mbrojtje dhe në sulm i kemi zgjidhur. Tashmë duhet të shohim përpara. Kemi një ndeshje si ajo me Kukësin dhe na duhet me patjetër të japim gjithçka e të marrim gjithçka.

Keni bërë një paraqitje shumë të mirë në fazën e parë në Kukës dhe ishit pranë fitores. Mendoni se mund të jetë një përsëritje e asaj ndeshjeje?

-Unë Kukësin e njoh mirë, pasi kam bërë një vit të jashtëzakonshëm me ta. E njoh mirë elementin që është brenda, njoh mirë filozofinë e atyre lojtarëve, pasi kemi punuar dhe kemi dalë kampion. Kukësi është një ekip që duhet vlerësuar, që pavarësisht se si e njoh unë, sot janë ndryshe. U ka ardhur një trajner tjetër, kanë një mentalitet tjetër, por mendoj se ne duhet të vazhdojmë rrugën e fitoreve dhe të shohim përpara. Kjo është ajo që duhet të kërkojmë, pavarësisht se kemi kampionët përballë.

Vetëm fitoja e kënaq Vllazninë nesër?

-Sigurisht në lojë janë të tria rezultatet, por në fushën tonë duhen veç fitore. Sigurisht mund të jetë edhe barazimi brenda, por është shumë e rëndësishme që ne të kërkojmë dhe të japim gjithçka për të marrë gjithçka.

Bazuar te përgatitjet dhe lëvizjet në merkato, a mendoni se do të jetë një Vllazni krejt tjetër në fushën e lojës?

-Sigurisht që shpresoj, i kemi sjellë disa lojtarë me eksperiencë, siç janë Malota, Sukaj e Berisha, apo edhe Mersini. Këto na japin besim dhe garanci që do jetë një ekip krejt ndryshe, një ekip më i fortë, me Orelesin që e kemi nxjerrë përpara në pozicionin më të mirë. Mendoj se kemi bërë një ndryshim në skuadër prej 50%. Kjo nuk është pak.

A mund të quhet kjo skuadra e Gjokës?

-Mund të mendojmë edhe kështu. Sa më shumë cilësi dhe përvojë të kesh, aq më shumë rezultat ke. Kjo është ajo që unë mendoj dhe shpresoj. Kemi bërë afrime, plus lojtarët me cilësi që ka pasur ekipi brenda. Do kemi një ndryshim mentaliteti, kemi tentuar vazhdimisht për të pasur mentalitet fituesi. Këtë dua të “betonoj” te kjo skuadër.

Mendoni se do të ketë më shumë prezencë të tifozëve në stadium, ndryshe nga viti i kaluar?

-Shpresoj të na ndihmojnë, jemi në momentin që kemi nevojë për të gjithë, për ju, tifozët, për një fjalë të mirë, pasi jemi në momente të vështira. Sigurisht që tifozët e Vllaznisë janë të ndjeshëm dhe kanë shumë të drejtë, pasi nuk u kemi dhënë atë që u takon. Por mendojmë që do bëjmë gjithçka. Në këto momente kemi nevojë për ta, janë oksigjen për ne, për vazhdimësinë. Uroj të jenë në stadium me ne dhe t’i kënaqim e më pas të vazhdojnë traditën e mbushjes së stadiumit, sepse ai stadium dhe ajo skuadër ka nevojë për tifozët.

Keni thënë shpesh se skuadra ka pasur një ngërç psikologjik. A e ka kaluar Vllaznia atë situatë?

-Është e vërtetë ajo që kam thënë. Këmbëngul se një skuadër që të ecë përpara duhet të ketë mentalitet fituesi. Prandaj kam luftuar fort të sjell eksperiencën në skuadër dhe them që me pak fat arritëm. Me mbështetjen e presidentes Ademi sollëm disa lojtarë me eksperiencë të madhe. Në asnjë skuadër që do të ecë përpara nuk mund të ecet vetëm me lojtarë të rinj. Ata mund të kenë cilësi, por nuk kanë atë mendësinë e fituesit, nuk kanë garancinë për të ecur larg. Mendoj që tani skuadra ka marrë tjetër fytyrë, por na duhen fitore për të rritur mentalitetin. Mendoj se skuadra po vjen aty ku kërkohet.

Cila do të jetë arma e fortë e Vllaznisë në vijim?

-Mendoj se do ta ketë në grupin e saj, në personalitetin dhe dinjitetin e saj si skuadër. Nuk ka rëndësi individi, por ka rëndësi që grupi të mendojë pozitivisht, të besojë te fitorja, që grupi të ketë mentalitet fitues dhe ne mendojmë se filozofia dhe strategjia e re e kësaj Vllaznie është ndryshe. E kemi sqaruar edhe me lojtarët në analizë, ku kjo Vllaznia e re bazohet në tre shtylla: disiplina taktike, agresivitet dhe ana psikologjike. Më të gjithë këto po ndërtojmë një skuadër ndryshe, me mentalitet ndryshe. Të gjitha këto shkojnë bashkë me dinjitetin dhe personalitetin e skuadrës. Tashmë ka lojtarë me shumë personalitet brenda skuadrës.