Anësori i majtë është i lirë, pasi kontrata me Tiranën i ka përfunduar. Me bardheblutë nuk ka asnjë marrëveshje për të vijuar bashkëpunimin dhe normalisht ai mirëpret çdo ofertë. Nga Kosova i kanë mbërritur disa, me Gjilanin që po këmbëngul më së shumti.

Trajneri Mezani e njeh atë, pasi e ka pasur nën urdhra te Flamurtari në sezonin 2015-2016. Greca, tashmë 28 vjeç, sezonin e fundit te Tirana ka shënuar 4 gola, 10 më pak se një sezon më parë në Kategorinë e Parë.

Futbollisti 25-vjeçar njihet mjaft mirë nga Mezani, i cili e ka pasur nën urdhra kur ishte te Laçi. Qaqi sezonin e fundit e nisi te Kukësi, ku u aktivizua në 8 ndeshje (5 titullar). Për më shumë hapësira ai kaloi te Kamza dhe luajti 4 takime dhe më pas skuadra periferike e kryeqytetit u përjashtua.

Qaqi ka spikatur më së shumti kur ishte te Laçit, pasi aty ka luajtur dy sezone rregullisht. Sezonin e parë u aktivizua në 35 takime dhe mungoi vetëm në një ndeshje për shkak kartonësh. Në sezonin pasardhës luajti 29 ndeshje, por në fillim të kampionatit pati një dëmtim që e la jashtë për disa javë. Tanimë Qaqi mund të ribashkohet me Mezanin te Gjilani.

Situata në renditje ka sjellë edhe aludime të shumta në Kosovë në lidhje me të ardhmen e vetë Mezanit. Gjithsesi klubi e ka të qartë se duhet të vazhdojnë t’i besojnë ish-trajnerit të Laçit dhe Luftëtarit. Sigurisht duhet arritur objektivi fillimisht dhe më pas të ndërtohet ekipi për sezonin e ardhshëm.

REAGIMI I GJILANIT – “SC Gjilani informon publikun se pas shkrimeve të fundit që po qarkullojnë nëpër medie dhe gazetat tona, kinse në fundin e sezonit trajneri i ardhur javë më parë, Gentian Mezani, do të largohet nga klubi dhe t’ia lërë postin e kryetrajnerit dikujt tjetër. SC Gjilani ju njofton se këto informata janë të pavërteta dhe nuk qëndrojnë. Kryetrajneri i klubit, Gentian Mezani, e ka besimin dhe mbështetjen e plotë të klubit.

Kjo nënkupton se spekulimet e bëra nëpër mediumet tona janë për emra të përveçëm dhe për interesa të personave të caktuar, ndaj me anë të kësaj komunikate duam t’i hedhim poshtë informatat e publikuara sot nga disa medie”, reagon klubit gjilanas.

Deklarata e plotë e klubit të Gjilanit: “Gentjan Mezani, finalist i kupës dhe revolucionar i futbollit shqiptar

Gjilan, 20 mars – SC Gjilani ka bërë të ditur se ka arritur marrëveshje me trajnerin 43 vjeçarë nga Vlora, Gentjan Mezanin. SC Gjilani prezanton teknikun vlonjat përballë publikut dhe opinionit të gjerë në vend:

Mezani, 43 vjeçari është nga Vlora dhe karrierën e ka nisur pikërisht në vendin e tij të lindjes me moshat e Flamurtarit, për të marrë në vitin 2016 edhe zyrtarisht detyrën e shefit të shtabit teknik në ekipin e parë të kësaj skuadre dhe duke vazhduar të punojë deri në fundin e edicionit 2017.

Pasi drejtoi Flamurtarin deri në fundin e edicionit Mezani i ndau rrugët me ekipin e fëmijërisë, derisa nga viti 2017 u bë pjesë e Laçit, ekip me të cilin shkruajti historinë.

Mezani drejtoi Laçin për 31 ndeshje, me ç’rast arriti ta plasonte në finalen e Kupës së Shqipëris (1-0 humbje nga Skënderbeu) dhe arriti të siguronte pozitën e katërt njëherit siguroi edhe pjesëmarrjen ne Evropë për ekipin kurbinas.

Mezani në edicionin e fundit drejtoi ekipin e Luftëtarit të Gjirokastrës deri në janarin e vitit 2019.

Ne i urojmë mirëseardhje edhe njëherë Mezanit dhe i urojmë shumë suksese me klubin tonë.”

Për SportEkspres.com, Mezani deklaroi se objektivi i skuadrës është mbijetesa: “Kjo është përvoja ime e parë që do drejtoj një skuadër jashtë Shqipërisë dhe shpresoj të kem fat. Gjithsesi, me drejtuesit e Gjilanit u dakordësuam që të punojmë fort për mbijetesën, duke patur parasysh renditjen.

Nga vendi i 5-të e deri te vendi i 11-të janë shtatë skuadra që kërkojnë t’i largohen zonës së ftohtë për mbijetesë. Të enjten do bashkohem me skuadrën për të nisur këtë kapitull të ri në karrierën time si trajner jashtë Shqipërisë”, u shpreh shkurtimisht Mezani.

AGRON KAJA

Te skuadra që garon në Ipko Superliga e Kosovës ai pritet të bashkohet me Ansi Nikën, shkodranin të cilin e kishte nën urdhra në Superiore te Laçi. Mezani, në vendin tonë ka rënë në sy për mënyrën se si skuadrat e tij luajnë dhe në Kosovë janë të bindur se është një zgjedhje e mirë për ta.

Mbetet vetëm të vijë zyrtarizmi te Gjilani, skuadër që këtë sezon nuk ka ndonjë objektiv të rëndësishëm. Që tani po mendohet për kampionatin e ardhshëm dhe puna nis me emërimin e trajnerit.

Klubi i Luftëtarit ka dalë me një njoftim dhe në lidhje me trajnerin e ti nuk ka asnjë qëndrim. “Gentian Mezani, ish-trajneri ynë nuk është më pjesë e ekipit bluzi. Klubi FC Luftëtari e falënderon për kontributin e dhënë gjatë kësaj periudhe dhe i uron suksese të mëtejshme. Trajneri i ri do të zyrtarizohet gjatë këtyre ditëve”, thuhet në njoftimin e gjirokastritëve.

Ahmataj është në pole, por SportEkspres.com mëson se ka pasur kontakte edhe me Elvis Plorin. Shkodrani edhe në të shkuarën ka qenë në listën e Luftëtarit, por në fund janë bërë zgjedhje të tjera. Sa i takon Ahmatajt, ai ka drejtuar më parë Teutën, Besën, Burrelin, Korabin, Bylisin dhe Kamzën.

Gjithsesi kjo nuk ka zgjatur shumë. “E kam mbyllur me Luftëtarin”, thotë shkurtimisht për Sportekspres.com Gentian Mezani, i cili mori drejtimin e Luftëtarit në javën e pestë të kampionatit dhe e nisi duke mundur Teutën pas katër disfatave që bluzinjtë morën me Millosh Kostiç në krye të ekipit.

Mezani një ditë më parë e tha hapur se Luftëtari ishte i rënë me grupin që kishte në dispozicion. Largimet e shumta e dobësuan skuadrën dhe vlonjati priste përforcime me vlera. Kundër Kastriotit pati vetëm pesë lojtarë në stol, një tregues i qartë i punës së drejtuesve në merkato.

Gentian Mezani ka folur pas ndeshjes në emisionin “Gol pas Goli” në “Supersport”, duke mos e fshehur zhgënjimin e madh. Një disfatë e tillë dhemb dhe trajneri duket i dorëzuar. Ai shpreh bindjen se Luftëtari nuk do arrijë të mbijetojë me këtë kontingjent lojtarësh.

HUMBJA – “Kjo humbje nuk ka fjale. Komplimente kundërshtarit pasi e meritoi fitoren. kishte forcë dhe karakter. Ne në të kundërt nuk kishim dëshirën e duhur, nuk kemi cilësitë e duhura në fushë dhe as dëshirën. Gabimet individuale bëjnë të sajën dhe arrijmë në këtë pikë ku jemi.”

PROBLEMET – “Nuk i pashë vetëm sot. U kamë thënë drejtuesve se nuk kemi skuadër për tu ballafaquar në Superiore. Më vjen keq që fjalët e mia kanë kaluar në vesh të shurdhër. Është e vështirë që të gjesh lojtar cilësorë. Ne i kishim dhe nuk ditëm që t’i mbanim.”

MBIJETESA – “Humbja në shtëpi ndaj një rivali direkt rëndon shumë. Nuk është çështje motivimi. Më duheshin lojtarë dhe unë pres dhe shpresoj që të vijnë këto lojtarë. E shoh shumë të vështirë mbijetesën. Ne nuk është se i kemi këtu dhe po stërviten dhe nuk i futëm. Ne nuk na kanë ardhur lojtarët. Uroj që të integrohen sa më parë me grupin dhe të mos bëjmë këto rezultate.”

“Unë kam ardhur këtu jo për të rrëzuar Luftëtarin, të jenë të bindur të gjithë. Është shpejt të mendoj diçka tjetër. Duhet t’u japim mundësinë të gjithëve për t’u rritur.”

EKIPI – “Këto janë cilësitë që kemi. Keni parë lojtarë të ndryshëm dhe jo ata që kanë luajtur gjatë dy fazave të para. kanë qenë lojtarë që na kanë ndihmuar kur janë aktivizuar. Ata që kanë luajtur janë larguar. Nuk është vetëm Rroca dhe Shkurtaj, por edhe Janiçic, Radoviç që kanë luajtur në dy fazat e para. Më mungoi gjysma e skuadrës. Nuk e kemi nënvlerësuar. Kjo është forca jonë, më besoni për këtë pjesë.

Me këtë kontingjent, më vjen keq ta them, por jemi të rënë nga kategoria. E kam theksuar gjithnjë.

A do të qëndroni nëse nuk ndryshon situata? – “Unë shpresoj shumë sepse e kam marrë një “ok” nga drejtuesit se lojtarët janë tanët. I presim që të vijnë., shpresoj shumë që gjërat të përmirësohen. Do i mundohem të bëjë punën time dhe do jap më të mirën time. Ia lëmë kohës. Uroj që çdo gjë të ndryshojë pozitivisht sepse nuk mendoj se meriton Luftëtari me aq sa ka treguar në dy fazat e para që të jetë në këtë gjendje ku është. Nuk mund të jap diçka. Do të bëj më të mirën time, por është e vështirë dhe do të nxitohesha nëse do të dilja në një konkluzion.”

Trajneri Mezani e pranon se Luftëtari i tij është dobësuar dhe u duhet punë e madhe për të qenë në lartësinë e duhur. “Me largimet e tjera skuadra është dobësuar shumë, pasi janë lojtarë që kanë luajtur titullarë. Tani na duhet të konsolidohemi sërish”, tha vlonjati mes të tjerash në konferencën e sotme për shtyp.

Objektivi është i qartë dhe Mezani shton: “Mundësi e mirë për të fituar, duhet të dalim me tre pikët. Synimi është të lëmë fundin. Mungesa e Ramadanit është e rëndësishme. Do jetë ndeshje e vështirë, por unë kam besim te karakteri i grupit”.

Ndeshja me Kastriotin luhet nesër prej orës 14:00 dhe transmetohet drejtpërdrejt në Supersport. Veç Ramadanit që është i pezulluar, shqetësim për trajnerin Mezani ka qenë edhe mesfushori i avancuar, Maldin Ymeraj. 

“Terreni i vështirë dhe situata e krijuara këto ditë në qytetin e Gjirokastrës nuk na ka mundësuar kushtet që duhen për një skuadër profesioniste gjatë fazës përgatitore. Do vazhdojmë këtu punën, këtë konfirmim kemi marrë nga drejtuesit. Gjërat janë të vështira dhe nuk kemi arritur të realizojmë atë që duhet. Duhet të kishim bërë dyfishin e seancave stërvitore. Kemi punuar në palestër dhe në pallat sporti, gjë që nuk është e përshtatshme për një skuadër futbolli. E shikoj të vështirë, por shpresoj që koha të na lejojë të punojmë normalisht në Gjirokastër”, shprehet fillimisht Mezani për “RTSH Sport”.

MERKATO – Më tej trajneri i Flamurtarit ka folur edhe për lëvizjet që pret: “Skuadra pa diskutim që është dobësuar, pasi kanë ikur dy lojtarë kryesore. I vetmi afrim është Fili, i cili mendoj se do na ndihmojë. Është e nevojshme që të kemi edhe afrime të tjera, pasi sulmi ëshët dobësuar dhe normalisht që na duhet një lojtar që të na ndihmojë në pasin final. Kjo i mungoi skuadrës gjatë kohës që Rroca ishte i dëmtuar. Shpresoj që shumë shpejt ato 2-3 afrime që kam kërkuar të vijnë me grupin dhe integrohen sa më shpejt me lojën tonë”.

PAGAT E PRAPAMBETURA – Fiancat janë tema tjetër për të cilën Mezani flet: “Nuk dua të futem te pjesa e financës. Padyshim që pagesat janë të rëndësishme, kemi marrë konfirmimin nga drejtuesit që çdo gjë do të jetë në rregull. Kjo gjë nuk na tundon momentalisht, terrenet që po na kushtëzojnë janë problemi kryesor”.

DORËHEQJA E MENDUAR – Mezani ka konfirmuar se vetëm rezultatet mund ta bëjnë të ikë nga Luftëtari: “Vazhdimësia e një trajneri janë rezultate në fushën e lojës. Kemi pasur probleme rezultatesh, por jo deri në atë pikë sa të vë në diskutim të ardhmen time. Normalisht terrenet dhe mungesa e fazës do ndikojnë në fillimin e kampionatit. Do na i vështirësojë shumë punët në ndeshjet e para. Nëse rezultate nuk vijnë, atëherë vihet vetë në diskutim vazhdimësia te Luftëtari. Marrëdhëniet me drejtuesit i kam korrekte, kemi kontakte të përditshme”.

HETIMI NGA UEFA – “Nuk shqetësohemi për atë pjesë, duam dhe duhet të bëjmë punën tonë më së miri për vazhdimësinë. Nëse mendojmë për atë, do bëhet gjithçka më e vështirë. Na mjaftojnë problemet me terrenet”.

Kushtet atmosferike kanë kushtëzuar bluzinjtë, të cilët nuk kanë mundur të shkojnë dot në Greqi për fazë. Por trajneri Mezani nuk ka as mundësinë të punojë normalisht me lojtarë në qytetin e Gjirokastrës, që është pushtuar nga bora.

Puna me grupin në palestër, duke mos mundur dot t’i japë as ngarkesë lojtarëve, duket se e ka lodhur Gentian Mezanin. Sipas asaj që raporton Supersport, vlonjat po mendon dorëheqjen. Kushtet në të cilat po punon skuadra kanë vënë në dyshim të ardhmen e tij te Luftëtari. Mbetet për t’u parë se ccfarë do të ndodhë në vijim.

Për këtë situatë, Mezani deklaroi për SportEkspres.com se skuadrës i ka munguar menaxhimi i mirë që në startin e këtij kampionati. Në analizën e tij për 14 javët në stolin e Luftëtarit, tekniku i skuadrës bluzi veçon edhe cilësitë e mira të pjesës më të madhe të grupit aktual të lojtarëve, që sipas tij garantojnë një skuadër më ndryshe në dy fazat e tjera.

INTERVISTOI: AGRON KAJA

Drejtimin e Luftëtarit e morët në javën e 5-të, janë arritur pritshmëritë tuaja deri në javën e 18-të?
-Nga ndeshja e parë me Teutën në javën e 5-të dhe deri në mbylljen e fazës së dytë në barazimin 1-1 me Partizanin, mendoj se skuadra ka patur rritje në lojën e saj. Me pak kujdes, mund të kishim marrë më shumë pikë, kryesisht në disa ndeshje të fazës së dytë.

Gjetët një skuadër jo fort të stabilizuar dhe me problematika, çfarë ka ndryshuar nga ajo situatë?
-Unë nuk i quaj problematika dukuritë që shfaq një skuadër në nisjen e çdo sezoni. Luftëtari është skuadër me një grup të mirë futbollistësh dhe nga java në javë pati rritje, sepse u vunë më mirë në funksion të ekipit cilësitë individuale të çdo futbollisti.

Në 14 javë që ju drejtoni Luftëtarin, në cilët tregues të lojës skuadra ka qenë më pozitiv dhe në cilët prej tyre ka gabuar?
-Pas ardhjes së Rrocës e Aleksit në ekip, të cilët ishin të dëmtuar në ndeshjet e mëparshme, skuadra tregoi rritje në lojë e rezultate. Por gjatë këtyre ndeshjeve skuadra e ka humbur shpesh edhe përqendrimin nga minuta e parë deri tek e fundit, minuta në të cilat edhe jemi ndëshkuar.

Luftëtari renditet në zonën e mbijetesës, të tjera shkaqe për këtë situatë ju cilët mendoni?
-Si shkakun më kryesor mendoj nisjen e dobët të kampionatit. Nëse kjo nisje do të ishte më e mirë, skuadra do të ishte ndryshe në vazhdimësi. Por si faktor kryesor për këtë renditje mendoj se ka qenë menaxhimi i dobët. Duhet të ishte më i kujdesshëm që të mos ishim në këtë renditje.

Tashmë që është mbyllur gjysma e sezonit, mendoni se Luftëtarit i duhen përforcime të reja për gjysmën e dytë?
-Në radhë të parë është e rëndësishme që te Luftëtari të ruhet ky grup që mbylli dy fazat e para. Sepse në këtë periudhë dimërore të merkatos është e vështirë që të gjenden lojtarë cilësorë. Largimi i Rrocës do të ndjehet në skuadër, por brenda këtij grupi do të gjejmë më të mirën.

Pjesa e dytë e sezonit bëhet më e vështirë, ju çfarë do ti kërkoni skuadrës?
-Skuadra duhet të kuptojë se tani fillon lufta e vërtetë në kampionat. Jo vetëm nga skuadra, por nga të gjithë drejtuesit do të duhet një menaxhim më i mirë se në dy fazat e tjera, sepse me pak kujdes, Luftëtari i ka mundësitë që të jetë pjesë e mesit të tabelës së renditjes.

Ku do të përqendroheni më shumë gjatë periudhë përgatitore të muajit janar?
-Kjo është një hapësirë kohore e shkurtër që nuk të jep shumë mundësi përgatitjeje. Ne do të nisim nga puna në datën 3 janar, ndërkohë që në datën 6 janar do të zhvillojmë dy javë përgatitje në Greqi. Gjatë kësaj periudhe është menduar edhe për dy-tre përforcime të reja.

Nga faza e tretë e deri në mbyllje të kampionatit, cili do të jetë synimi final i Luftëtarit?
-Synimi afatshkurtër do të jetë largimi nga zona e ftohtë për mbijetesë, sepse skuadra ka mundësi që të reagojë më mirë se në dy fazat e para. Dhe mandej, synimi ynë do të jetë për më shumë se sa mbijetesa, një vend në mesin e tabelës së renditjes në fundin e kampionatit.

Gentian Mezani ka folur pas ndeshjes në emisionin “Gol pas Goli” në “SuperSport”, duke analizuar ndeshjen dhe barazimin kundër ekipit kryesues. Trajneri vlonjat komenton dhe merkaton e klubit, duke u ndalur te situata e sulmuesit Shkurtaj, si dhe komenton zërat e një premio nga ana e Kukësit për të ndalur ekipin e “demave”.

NDESHJA – “Pjesën e parë e falëm, ishim jashtë çdo momenti të lojës. Pjesën e dytë u mundova t’u jap karakterin tim dhe ta vënë në fushë. Nuk duhet vetëm që atë ta japim vetëm në pjesën e dytë, pasi e kishim përgatitur për të fituar. Është e disata herë që falim një pjesë loje. Lojtarët duhet të ndryshojnë mentalitetin dhe ta shohin këtë ndeshje”.

RROCA- SHKURTAJ – “Për momentin ka ikur Rroca, Shkurtaj është ende i joni. Largimi i tretë nga ekipi i vjetshëm. Drejtuesit më kanë dhënë garanci, kemi folur edhe për afrimet. Shpresojmë t’i mbyllim bisedimet që kemi me ta dhe të përforcohemi. Me largimin e Rrocës dobësohet skuadra”.

“Zërat për premio nga Kukësi? Absolutisht nuk di gjë, di që kemi premio nga presidenti. Skuadrën e motivon kjo. Na është thënë që e kemi nga presidenti. Nëse ai do të japë premio çdo ndeshje, akoma më mirë. Nuk kam informacion për palë të treta”.

EKIPI – “Është detyrë për çdo lojtar të bëjë maksimumin në çdo ndeshje. Ne paguhemi për këtë. Ka pasur vonesa dhe lojtarët do të marrin atë që kanë në kontratë. Nëse ka premio, është motivuese. Bëmë një ndeshje të mirë, nuk më pëlqen të flas për lekë. Ato i ka qejf edhe mbreti, normalisht edhe futbollistët. Jam shprehur për problematikat, i kam rezauruar”.

MBROJTËSI – “Janiçiç ka pësuar një dëmtim në shpatull. Nuk ia doli të luante, të jeni të bindur për këtë. Ka qenë me skuadrën deri në momentin e fundit. Edhe Radoviç ka munguar, nuk ia doli, pasi ka pësuar të njëjtin dëmtim. E kishim menduar për formacion. Të jeni të bindur që jam i sinqertë në këto që them”.

Trajneri i Luftëtarit flet për emisionin “Golpas Goli” në “SuperSport” dhe për problemet financiare që po shoqërojnë klubin gjirokastrit prej kohësh.

NDESHJA – “Bëmë një pjesë të parë të dobët. U zgjuam pasi pësuam gol. Nuk kishte përqendrim dhe dëshirë. Më pas pati dëshirë në pjesën e dytë për të shënuar. Gjërat vështirësohen kur je në disavantazh dhe humbet qetësia për të finalizuar para portës.”

SITUATA E VËSHTIRË – “Financat ndikojnë shumë. Këtu nuk bëhet fjalë vetëm për financat, por për një skuadër, përpos pjesës që unë mendoj se janë çuna të mrekullueshëm dhe po sakrifikojnë. Mendja qëndron dhe aty. Edhe ata shohin dhe kanë ngacmime nga ekipet e tjera e kjo e bën më të vështirë, për vetë faktin se lojtari është i predispozuar, që të shohë në këtë fund kampionati, të ardhmen e tij ose vazhdimësinë. Humbet dëshira dhe qetësia, pasi duhet të shohim para, por dhe veten e tyre, Gjërat janë të vështira dhe shfaqen edhe ne lojë, e patë në pjesën e parë. E patë edhe në Durrës edhe me Kukësin në shtëpi. Do të vijojë që të shfaqet, pasi nuk kam unë një shkop magjik. Unë punën time po e bëj dhe do të marr përgjegjësi me ta, por nuk është pjesë e imja ajo, u takon drejtuesve. Nuk dua të flas më për këtë. U ktheva si te koha kur kam qenë te financat, ku më pyesnin çdo javë për financat”.

NGËRRÇI – “Nuk është vetëm çështje motivi.Nuk diskutohet që edhe motivimi nuk është maksimal. Jemi në fund të mbylljes sëfazës së dytë dhe pa diskutim që lojtarët kanë ngacmime nga ekipet e tjera.Skuadrat e tjera kanë telefonuar lojtarët e mi para çdo ndeshje, për të shkuaratje. Janë të papërqendruar për një ndeshje. Kjo duket sepse zgjohemi nga gjumi kur kemi pësuar. Duhet të jemi të motivuar që në fillim për t’u ndeshur të barabartë me kundërshtarin. Uroj që të zgjidhet sa më parë”.

ZGJIDHJA – “Nuk besoj se pajtohen drejtuesit me situatën. Unë shpresoj që t’i japim një zgjidhje sa më parë dhe lojtarët të përqendrohen. Kur erdha morëm disa rezultate pozitive, por kur vjen një trajneri ri, ekipi është më i motivuar, por aq zgjati. Nuk është se ne e meritojmë nga loja që zhvillojmë për të qenë në këtë pozitë ku jemi ose të humbim ndeshje pas ndeshje”.

KARIKIMI – “U kam thënë lojtarëve që të japin më të mirën e tyre në çdo ndeshje. Sakrifikuan në pjesën e dytë, por kur nuk janë në 100%, atëherë bëhen shumë faktorë bashkë. Kundërshtari e shfrytëzon këtë situatë. Janë profesionistë dhe duhet të mendojnë për ndeshjen e radhës dhe të respektojnë kontratën. Ne duhet të bëjmë detyrën tonë dhe drejtuesit të bëjnë detyrën e tyre”.

PREMTIMET – “Kur erdha te Luftëtari ishte dhe dëshira ime. E dija cilësinë që kishte në skuadër. Mu premtua që çdo situatë do të rregullohej. Unë jo se nuk kisha oferta, por zgjodha një skuadër se mu dha garanci për vazhdimësinë. Kam besimin e plotë se do të zgjidhet dhe këtë shpresë kisha. Ndoshta do të jetë ndonjë ngërç dhe uroj që të zgjidhet sa më parë. Në të kundërt nuk mund të hidhesha në lumë me një gurë dhe të mbytesha dhe vetë. Unë jam një trajner i ri dhe më duhet që të shoh dhe të ardhmen time. Mu premtua se do të rregullohej situata dhe me besimin e plotë e mora drejtimin  skuadrës, më duhet të besoj kur më thonë se do të rregullohet situata, edhe pse është e vështirë”. 

GODITJET STANDARTE – “Doja një markim një kundër një me Fukuin, por mos përqendrimi bëri që lojtari të neglizhonte në atë moment. Çdo mendim më çon aty ku fola. Pjesa e parë është e pakrahasueshme me pjesën e dytë”. 

E ARDHMJA – “Mezani ka ardhur te Luftëtari jo për ta nxjerrë nga Kategoria. Nëse nuk do të zgjidhet situata dhe do ketë largime, unë do të bëj zgjedhjen time. Përderisa kam ardhur i fundit duhet të jetë ai që do ikë i fundit. Do pres deri në fund, por edhe pritja ka një kufi. Jam trajner i ri dhe nuk mund të hedh gjithçka poshtë”.

“E nisëm mirë lojë, por kërkuam të bënim lojë në pjesën e parë, jo të fitonim. Pas pësimit të golit, ndoshta prej mungesa e eksperiencës së Demos dhe shpërqendrim i disa lojtarëve, nuk reaguam si duhej. Në pjesën e dytë e kërkuam ta fitonim ndeshjen dhe ia arritëm, pasi Tirana është një skuadër e vështirë, që mund të na ndëshkonte”.

“Liçaj nuk është ende në 100 për qind dhe zgjedhja e Demos ishte mjaft e mirë. Pavarësisht momentit të golit. Nuk i ka luajtur 90 minuta dhe nuk e ka ritmin e lojës, por jam jashtëzakonisht nga prova e këtij lojtari të ri si Demo”.

“Duke parë ndeshjet e Tiranës në përgjithësi, forma që po kalonte kundërshtari na ndihmoi. Folëm shumë në dhomat e zhveshjes kur ishim në disavantazh. Por, më tepër na ndihmoi besimi që kemi te lojtarët tanë, të cilët kanë cilësitë dhe kualitetin. Po të luajmë gjithmonë kështu jemi të pathyeshëm”.

“Shkurtaj mund të shitet? Nëse do të ishte fitimprurëse për klubin dhe një kontratë të majme për Shkurtajn, përse të mos largohet. Mendoj se duhet të shohë me patjetër përpara. Nuk është çështje se ulën shpenzimet e klubit, por nëse ka përfitime me të ardhura duke shitur lojtarë, shpresoj që Shkurtaj të ndjekë rrugën e Bregut dhe Abazajt. Do të ishte mirë për të gjithë, Luftëtari do të gjente një tjetër golashënues”.

“Gjendja e Rrocës? Rroca është ende mbrapa me përgatitjen, sepse ka qëndruar katër muaj jashtë fushës. Por, me cilësitë e tij, edhe me 70 për qind të formës na ndihmon shumë dhe kjo duket. Shpresoj të jetë gati sa më shpejt, por në formë optimale besoj që do të jetë vetëm në janar, sepse ndeshjet do të jenë shumë të ngjeshura”.

“Shpresojmë të kemi vazhdimësi. Pika në Vlorë do rezultat shumë pozitiv në Gjirokastër për të pasur vlerë”, është shprehur fillimisht në “RTSH Sport” Mezani. Ai foli edhe për pjesën e sulmit: “Bëmë mirë edhe në fazën sulmuese. Shpresoj të rregullojmë diçka dhe të kemi më shumë gola dhe rezultatet më të mira”.

Mezani vlerëson maksimalisht bardheblutë: “Nuk them se Tirana është në krizë, është në një situatë me ne. Mund të ketë oshilacionet në rezultate, por janë ekip që luajnë futboll të bukur dhe dalin mirë përpara. Kanë presionin e rezultateve dhe gabojnë shumë para portës”.

Trajneri  i Luftëtarit do të kishte dashur që në krye të skuadrës të kishte marrë edhe disa rezultate pozitive më shumë. “Na mungojnë disa pikë. Kemi merituar t’i kemi 3-4 pikë më shumë. Loja ka ardhur në rritje sajë punës serioze dhe dëshirës. Gjithsesi duhet t’i kënaqemi pikëve që kemi marrë deri tani”.

Kundër Tiranës rikthehen tifozët në Gjirokastër. “Një ndeshje futbolli duhet të ketë publikun në mbështetje. Ata janë një lojtar më shumë, i japin moral skuadrës. Duke pasur një mbështetje më shumë nga publiku, ekipi motivohet dhe është më e përgjegjshëm”, tha Mezani në mbyllje.

“Kjo pikë na bën mirë, luanim ndaj një skuadre të fortë dhe në një fushë të vështirë. Duhet t’i gëzohemi pikët për moral dhe vazhdimësinë. Mungesat? Normalisht këta lojtarë kemi dhe do bëjmë të pamundurën të marrim maksimumin deri në fund të fazës. Skuadra ka cilësi, pavarësisht problematikave. Do kisha dëshirë të kisha disa lojtarë me më shumë eksperiencë. Por të gjithë mundohen të bëjnë më të mirën dhe duhet të jemi të kënaqur me kaq”.

“Humbja e topit nga Liçaj? E nisi topin shpejt, u kërkova ta qetësonin lojën. Mendoj se nxitoi, skuadra ishte në disekuilibër dhe mund të ndëshkoheshim. Liçajt nuk i falen këto gjëra. Ai është një forcë për ne, ka ardhur në rritje dhe do na ndihmojë. Është lojtarë me cilësi të mira. Tani përfundoi dhe do të shohim të rregullojmë gabimet në vazhdim”.

“Mungesa e shpejtësisë? Shkurtaj është gjithë kohën e vetëm. Këta janë lojtarët dhe mundohem të marr më të mirën prej tyre. Radoviç dhe Milosavljev na ndihmojnë shumë për mënyrën se si luajmë, jo si dua të luaj. Po bëjnë punë të mirë. Po rritemi dhe kemi marrë pikët që meritojmë. Shpresojmë të riparojmë diçka deri në fund të janarit. Do bëjmë disa ndryshime tani, të dy anësorët po bëjnë mirë, edhe pse Shkurtaj është vetëm”.

“Financat? Keni të drejtë që e bëni këtë pyetje, por na duhet të punojmë. Vështirësi ka gjithandej, por duhet secili të bëjë punët e veta. Gjithsecili do të shohë detyrat e tij për ecurinë e skuadrës dhe për të mirën e Luftëtarit”.

HUMBJA – “Mund të luash shumë mirë dhe humbet. Më duheshin pikët si mua dhe skuadrës. Do donim të luanim keq dhe të fitonim. Duhet të shohim para dhe të analizojmë mënyrën se si u ndëshkuam. Kishte një mospërqëndrim dhe duhet parë me imtësi ajo pjesë. Duhet ta pranojmë humbjen dhe të shohim para.”

EKIPI – “Unë mendoj se skuadra po merr ritmin e duhur nga ndeshja në ndeshje. Ne mund të bëjmë pak gjatë kësaj periudhe dhe avash-avash do tentojmë që të përmirësojmë si Rrocën ashtu dhe Aleksin. Laçi e njeh më mirë Luftëtarin.”

RROCA – “Mendoj se Rroca duhet që të vijë më mirë në gjendjen e tij fizike. Është një lojtar që na jepet një tjetër ritëm dhe na nxjerr pasimin final, që na ka munguar në ndeshjet e para. Sot ka bërë mirë, sepse nuk është në formën e tij më të mirë. Është një lojtar që i duhet kësaj skuadre dhe mund ta ndihmojë ekipin edhe me këtë gjendje ku është. Mund të bëjë diferencën nga momentit në moment.”

SULMI – “Shkurtaj ishte i markuar gjatë gjithë kohës dhe i kërkova që të hynte nga brenda, edhe pse humbisnim shumë forcë para. Kjo ishte arsyeja, pasi ishte shumë i markuar dhe donte më shumë hapësirë dhe pa diskutim që duke kaluar në krah, mund të kishte më shumë rrezikshmëri.”

“Laçi ka treguar se di të fitojë kudo dhe duhet vlerësuar. Nëse vazhdojmë me këtë ecuri, si dhe duke parë që luajmë në shtëpi, kemi 5% avantazh. Skuadra është në një javë të mirë. Me rikthimet e lojtarëve mendoj se diçka ka ndryshuar për mirë”, është shprehur Mezanin në “RTSH Sport”.

Më pas ai ka folur edhe për situatën e të dëmtuarve: “Xhekson është në dyshim për shkak të një problemi në gju, por shpresojmë të rikuperohet deri në momentin e ndeshjes. Jakovljeviç nuk është gati, kurse Aleksi po. Gjithsesi nuk do të luajë nga fillimi, por do të ketë minuta”.

Për Mezanin nesër do të jetë një ndeshje speciale, pasi luan kundër ish-ekipit të tij. Vjet prej javës së tretë ai zëvendësoi Stavri Nicën te Laçi dhe e mbylli kampionatin në vendin e katërt. Gjithashtu ai shkoi në finalen e Kupës së Shqipërisë me bardhezinjtë, duke siguruar pjesëmarrjen në kupat e Europës.

“Ishte një fitore e mirë, u kënaqa që i dhashë tre pikët e ekipit. Me këtë fitore ndihem mirë. Nga tani e tutje do rregullohen gjërat. Sezonin që kaloi kisha probleme. Luajtja pjesën e dytë të sezonit dhe më pas u dëmtova. Këtë sezon ndihem mirë, kam pasur raste dhe po shënoj. Do përpiqem të shënoj sa më shumë deri në fund”, është shprehur për “RTSH Sport” Shkurtaj.

Ai tregon edhe se me Gentian Mezanin në krye kanë ndryshuar, ndërkohë që i ka vendosur trajnerit edhe një notë. “Trajneri e ri kërkon gjëra të tjera. E dimë çfarë kërkon ai dhe po dalin në fushë ato që mësojmë. Nota për Mezanin? Një nëntë do ia vija trajnerit”, deklaron sulmuesi i Luftëtarit.

Për ndeshjen e radhës me Laçin gjirokastritët do të kenë në dispozicion edhe Lejdi Liçajn, i cili mungoi kundër Kastriotit për shkak kartonësh. Gjithashtu edhe Albano Aleksi është rikuperuar dhe do të jetë trajneri Mezani ai që do të vendosë nëse mesfushori do të luajë nga minuta e parë apo do të nisë nga stoli.

Trajneri ndihet keq për gabimet që çuan në humbjen e ndeshjes, por pushimi vjen në momentin e duhur dhe Luftëtari do të bëjë maksimumin për t’u larguar nga ky poizicion në renditje.

NDESHJA – “Ne kishim rastet më të pastra në pjesën e parë, pavarësisht se Skënderbeu qarkulloi topin. Në pjesën e dytë duhet të ishim treguar më të përqendruar të dy golat që pësuam. Duhet t’i evitonim ato raste, por i dhuruam fitoren Skënderbeut. Skuadra nuk kishte fuqi. Lojtarët nuk reaguan kur pësuam golin e parë dhe të dytë. Ky është një problem i madh, që duhet ta rregullojmë. Gjithçka ka të bëjë me aspektin psikologjik”

SITUATA – “Një trepikësh sot do të na jepte shpresë për vazhdimësinë, por jemi optimistë. Kemi humbur vetëm një takim, tashmë vjen pushimi dhe do të përgatitemi sa më mirë për ndeshjet e ardhshme.”

OBJEKTIVI – “Ndeshjet duhet t’i marrim një nga një dhe objektivi im është ndeshja e radhës. Klubi nuk më ka vendosur ndonjë objektiv. Ne duam të lëvizim nga ky pozicion në renditje dhe do të mundohemi të japim më të mirën tonë në vijim.”

SKUADRA – “Na mungon lojtari, i cili jep asin final. Shpresoj që Roca të rikthehet sa më shpejt dhe ta zgjidhim këtë problem. I kërkova skuadrës të dilte pak më para në pjesën e parë, por nuk e ka forcën për të bërë atë që i kërkoj. Pasi pësuam golin, nuk patëm më shpejtësi dhe u treguam të ngadaltë. Duhet të përmirësohemi dhe të largohemi nga ky pozicion në renditje. Djemtë po japin shpirtin dhe nuk duhet t’i vendosim fajin njëri tjetrit. Kemi humbur dy ndeshje e fundit si pasojë e gabimeve tona dhe jo meritës së kundërshtarëve.”

E ARDHMJA – “Unë mundohem të mbaj ambientin e qetë dhe në këto momente. Skuadra ka pësuar shumë humbje, por shpresoj që të fitojmë takimin tjetër. Në psikologjinë time nuk ka rëndësi nëse kam përpara Skënderbeun, Kukësin, Kamzën apo Flamurtarin. Barazimi në fushën tonë është si humbje, më mirë fitoj një ndeshje dhe humbas tjetrën, sesa bëj dy barazime rresht.”

Ditën e djeshme ai ka folur për mediat dhe ka zbuluar se ndryshimi ka ardhur me lëvizjen e bërë në pankinë. “Me ardhjen e profesor Mezanit çdo gjë po funksionon më ndryshe. Çdo javë ekipi po luan më mirë dhe besoj se do të vazhdojmë me këtë ritëm për të dalë nga kjo situatë që jemi tani”, u shpreh lojtari polivalent.

Të shënuarit është një emocion më vete dhe Rapo e shpreh këtë: “Kënaqësi është të shënosh gol. Sa herë kam realizuar e kam ndihmuar ekipin me golat e mi. Kjo është një kënaqësi e madhe. Dedikim për golin? Ia dedikoj vëllait tim që më ka mbështetur gjithmonë”.

“Është një ndeshje ku fitorja është detyrim, sepse Kamza është rival direkt dhe fitorja na qetëson disi. Do të bëjmë më të mirën, me synim të vetëm pikët e plota”, u shpreh Mezani para mediave, ndërkohë që nuk do ta ketë ekipin të plotë.

“Kemi mungesa të rëndësishme, duke përfshirë Ramadanin, i cili është i pezulluar.  Por jam i sigurt që lojtarët që do të luajnë do të japin gjithçka, ndoshta edhe më shumë se titullarë si Ramadani e Aleksi, Ata duan të tregojnë se e meritojnë fanellën dhe pse jo ta ruajnë vendin në formacion”, shtoi trajneri vlonjat.

Një temë e diskutuar ishte edhe gjykimi dhe Mezani nuk i druhet: “Absolutisht jo, nuk i druhem. Edhe ndaj Kukësit u ankova pas ndeshjes, por jo për gjykim të keq, më shumë sesa për të kërkuar ndoshta një arbitër me pak më shumë eksperiencë, që të mbante pak më shumë presionin.

Por nuk i druhem aspak gjykimit. Nuk kam për të folur asnjëherë për gjykimin, sepse nuk është në karakterin dhe stilin tim të punës. Mendoj se ne duhet të bëjmë gjithnjë më shumë se kundërshtari, një gol më shumë se kundërshtari, për ta fituar atë ndeshje”.

Nënkampionët e vendit janë kundërshtari i radhës për gjirokastritët. Edhe pse do të luajnë ndaj një nga skuadrave më në formë të momentin, numri një i stolit beson se ekipi i tij i ka aftësitë për të ruajtur vazhdimësinë edhe nga verilindorëve: “Uroj të mbajmë ritmin dhe të kemi vazhdimësinë dhe ndaj Kukësit. Kemi një kundërshtar me cilësi dhe ka marrë vlerësim maksimal nga ana jonë”.

Çelësi i suksesit për të marrë një rezultat pozitiv edhe në Elbasan? Mezani e di mjaft mirë se çfarë duhet të bëjë ekipi i tij: “Nëse do të bëjmë punën si javën e shkuar dhe çdo lojtarë do të kryej detyrat më së miri në fushën e lojës do të jetë më e thjeshtë dhe do të kemi mundësitë tona në këtë ndeshje”.

METODA E PUNËS – “Jam ai që mundohem t’i dëgjoj dhe t’i bind lojtarët për atë që mendoj unë se është më e mira. Cilësitë e kësaj skuadre dihen. Në katër ndeshjet e para kanë shfaqur cilësi. Është e vështirë që një lojtar i ri të integrohet menjëherë. Po ashtu dhe mungesat janë të rëndësishme. Këtu ka cilësi dhe ndaj u binda për të marrë këtë skuadër. Do të vijoj të punoj si në këto dy ditë. Kjo skuadër ka shumë nevojë për mbështetje dhe moral, sidomos nga ana psikologjike. Me mbështetjen që kemi nga drejtuesit, kam besim se do ia dalim”.

PËRMENDJA E SË SHKUARËS– “Nuk i kam këto probleme se do më përmendin sukseset e Likës. Sa për ndeshjen, ishin çunat ata që fituan me zemër. Kam punuar nga ana psikologjike, nuk kishim kohë për t’u përmirësuar shumë. Lika ka bërë një punë shumë të mirë këtu dhe pati shumë sukses. Jemi në një pozitë tjetër dhe nuk duhet të mendoj atë çka ka bërë Lika. Unë duhet të bëj më të mirën time”.

TITULLARËT – “Formacionin e bëra unë, si në çdo ekip ku kam qenë më parë. E kam parë skuadrën, por kam pyetur dhe nuk kisha shumë kohë. Kam pyetur trajnerin e portierëve dhe përgatitësin atletik. Më pas vendosa që të formuloj këtë formacion që patë sot”.

“E gjeta skuadrën e bërë, ashtu si dhe në Laç. Në një skuadër pak rëndësi ka se hyn në një moment tjetër. Kur shikon se ke këtë skuadër dhe në këtë mënyrë si hyra unë, ua thash dhe djemve, jeni skuadra ime. Ishin skuadra e Kostiç, e ka bërë ai këtë ekip, por kjo skuadër është e imja dhe sido që të dilnim sot përgjegjësitë ishin të miat. Nuk mund të them se dua kohë apo jo. Nuk kam kohë unë, as qyteti dhe as skuadra. Jemi sërish në fund dhe duhet të bindemi se nuk mund të presë askush”.

Tekniku vlonjat ka marrë menjëherë drejtimin e skuadrës. Pas konferencës së prezantimit, ish-trajneri i Flamurtarit dhe Laçit ka zbritur në fushën e stadiumit të Luftëtarit. Ndërkohë, pritet që së shpejti ekipit t’i bashkohet dhe ndihmës trajneri italian Franko Paskualeti, me të cilin Mezani ka punuar më parë te Laçi.

Fillimisht 38-vjeçari është prezantuar me të gjithë lojtarët. Më pas menjëherë kanë nisur puna për takimin me durrsakët. Kujtojmë që Luftëtari ende nuk e ka marrë pikën e parë, kur janë luajtur 4 javë të Kategorisë Superiore.

“Do doja të falënderoj presidentin dhe uroj që të shpërblej besimin. Uroj që të mos zhgënjej askënd. Do mundohemi që të bëjmë më të mirën këtë vit, për ta zgjidhur këtë situatë dhe për të arritur tek pikët dhe të jemi sa më lart në klasifikim”.

“Erdha me një dëshirë të madhe. Kam pasur dhe oferta të tjera. Më kanë folur mirë për ambientin dhe njerëzit. Do mundohem që të bëj më të mirën”.

“Më jep shpresë loja e djemve që në këto katër ndeshje kanë prodhuar futboll. Më jep besim puna ime dhe ajo që unë bëj mendoj se mund të bëj. Po ashtu dhe nga mbështetja e drejtueseve, që të jep qetësi dhe më shumë forcë për të punuar.”

“Në katër ndeshjet e para është një skuadër që ka zhvilluar futboll sulmues. I përshtatet mentaliteti tim dhe dëshirës sime. Shpresoj që ndeshjen e radhës të fitojmë, më pas do të shohim për mrekullitë. Në këtë pikë që jemi është shumë e rëndësishme që të marrim një fitore dhe të dalim nga kjo situatë ku jemi”.

Mbijetesa – “Nuk më pëlqen fjala mbijetesë,. Si te Laçi dhe Flamurtari i kam marrë skuadrat në të njëjtën situatë. Kanë kaluar vetëm 4 javë dhe kemi shumë ndeshje për të zhvilluar. Një fitore të ngjit disa vende. Skuadrat nuk kanë shumë diferenca. Duhet të bëjmë më të mirën. Objektivi im është që çdo ndeshje të marrim një rezultat pozitiv.”

Ndeshja – “Luajmë në fushën tonë. Humbja nuk do të jetë e mirëpritur. Çdo gjë duhet të jetë pozitive. Do të futemi për të fituar. Kam besim tek këta çuna. Janë siç kanë emrin: “Luftëtarë” do luftojmë për të marrë fitoren.”

Kundërshtari- “Teuta ka një skuadër shumë të mirë dhe një trajner që mendon për fazën ofensive. Në mbrojtje ka lojtarë me eksperiencë dhe ka siguri. Është një skuadër që vrapon dhe kërkon të sulmojë në çdo moment. Nuk duhet të neglizhohet. Teuta ka treguar se është një skuadër e mirë por jo që nuk mundet. Këdo skuadër që do kishim përballë do ta, mendonim si ndaj Teutës, pasi nuk duhet të neglizhojmë.”

“Ndihmësi im do të jetë i njëjti që ka qenë tek Laçi, Franko Paskualeti. Jemi në pritje të ardhjes së tij. Është një projekt afatgjatë me presidentin dhe çdo gjë do të duket në vazhdimësi.”

“Kemi një ndeshje shumë afër dhe është shumë pak për të ndryshuar. Është çështje psikologjike. Sot do ta shoh skuadrën për të parën herë dhe do punojmë në këto dy ditë nga ana psikologjike. Është e rëndësishme që të mos pësojmë gol, por rëndësi ka dhe ana ofensive, pasi skuadra që shënon fiton.”

Italiani ka një eksperiencë të gjatë në punën me të rinjtë, si dhe ka qenë ndihmëstrajner në disa ekipe, ndër të të tjera me Chennaiyin FC në Indi, si ndihmës i ish-kampionit të botës, Marko Materaci.

Paskualeti ka qenë analist i paraqitjes së futbollistëve në krah të ish-mbrojtësit të Interit dhe Italisë, ndërkohë që për disa muaj bashkëpunoi me Mezanin edhe te Laçi. Tanimë vlonjati e do italianin edhe te Luftëtari.

Me kokën lart u largua nga kurbinasit dhe tashmë është Luftëtari klubi që e ka bindur Mezanin. Palët kanë gjetur dakordësinë dhe tanimë pritet të mbërrijë në Gjirokastër për të firmosur dhe vijuar punën me skuadrën.

Edhe në të shkuarën Luftëtari ka tentuar të bashkëpunojë me Mezanin, por për arsye të ndryshme nuk u bë realitet. Vlonjati pason në pankinë sllovenin Millosh Kostiç, i cili në katër javë kampionat ka dalë i mposhtur.

Për Mezanin do të ketë goxha punë për të bërë, pasi gjendja e bluzinjve nuk është aspak e mirë pas disfatave radhazi të pësuara.

Në një intervistë të dhënë për “Sport Ekspres”, trajneri vlonjat flet për mungesën e stolit, ish-ekipin e tij, Flamurtarin e dashur për të, por edhe për nivelin e kampionatit shqiptar. Edhe pse mungojnë sulmuesit, ai beson se ekipet e elitës do vijnë në rritje nga java në javë. Në fund diçka edhe për trajnerët e rinj

Profesor, me pushime për momentin. Si ndiheni duke e parë si spektator Superioren?
Padiskutim që më mungon, pasi është pasion dhe kushdo trajner do ta kishte të vështirë ta shikonte nga tribuna dhe jo nga stoli duke e drejtuar një ndeshje futbolli.

Si po ju duket Laçi, që e keni drejtuar sezonin e shkuar?
Mendoj se Laçi ka një skuadër me disi me shumë eksperiencë se vitin e kaluar, edhe pse janë djem të rinj. Sezoni i shkuar i ka rritur goxha dhe mendoj se do të bëjë mirë dhe këtë vit.

Ju kemi parë në tribunë në ndeshje Flamurtari-Kukësi. A ju ka bindur ekipi deri më tani?
Flamurtari e ka nisur mire këtë sezon dhe mendoj se është disi skuadër me sulmuese se vitin e shkuar. Kjo më pëlqen te Flamurtari, pasi mendoj se duke bërë një gjë të tillë, jo vetëm do të dhurojë futboll të bukur, por do të marrë dhe rezultate të mira.

Superiorja, më e fortë apo është dobësuar në krahasim me sezonin e shkuar, duke parë që janë larguar edhe emra si Guri, Soue, Abazaj?
Duke parë këto dy ndeshje, por edhe përbërjen e skuadrave, ekipet kanë probleme në shënimin e golit. Pra pothuajse tek të gjitha skuadrat mungon një sulmues që mund të të zgjidhë ndeshjen në momente të vështira, gjë kjo që e bën më të vështirë spektaklin, por edhe fitoren për një skuadër. Padiskutim që largimi i tyre ka dobësuar atë që thashë pak më parë, repartin e sulmit. Por unë mendoj që nga ndeshja në ndeshje skuadrat do të rriten më shumë dhe nuk do të jetë çudi që të dalin lojtarë si Guri e Abazaj, pasi kampionati shqiptar është rritur goxha dhe çdo vit po prodhon lojtarë të cilët largohen në kampionate të tjerë jashtë Shqipërisë.

Mezani sezonin e shkuar, Shehi e Shkëmbi këtë sezon, a duket se ne Superiore po i kthejnë sytë nga trajnerët e rinj dhe shqiptarë, apo është rastësi?
Me vjen shumë mirë që shumë presidentë po u japin besim trajnerëve të rinj. Edhe pse i kam uruar, shpresoj që të bëjnë sa më mirë këtë vit si Bledi e Shehi, por dhe Devolli e Plori, pasi mendoj se kampionati shqiptar ka nevoje dhe faktet më japin të drejtë për trajnerët shqiptarë.

ELTON NIKA

“Jemi të kënaqur me rezultatin, ishte një fitore pas një ndeshje ku u ndëshkuam në fillim. Më gëzon shumë që ekipi reagon, ka forcë, ka karakter”.

Shpërdorojmë, por dhe pësojmë sërish në fillim. Kemi bërë një punë të mirë gjatë javës, sërish humbasim përqendrimin dhe nuk jemi të vëmendshëm. Duhet të punojmë akoma më shumë për fillimin e lojës. Duhet t’i gëzohemi kësaj fitoreje, pasi na largon disi nga fundi, por duhet të qëndrojmë me këmbë në tokë, sepse kampionati është i gjatë.

“Europa? Nuk mundtë flasim për Europën, jemi skuadër e re. Edhe lojtarët që hedhim në fushë janë të rinj. Ne i marrim ndeshjet një e nga një. Nëse luajmë si sot dhe në të shkuarën, edhe rezultatet do të vijnë”.

“Ndeshjet jashtë më mirë? Janë çuna të rinj dhe ndoshta presioni në fushën tonë është më i madh. Jashtë jemi më shumë në ekuilibër dhe mund të godasim në kundërsulme dhe presioni është më i ulët. Edhe në Laç ne kemi zhvilluar ndeshje të mira”.

“Eskerda një vit më parë ka bërë një operim në gju. Edhe lodhja ka bërë punën e saj, por ka marrë dhe goditje. Nuk besoj se ka asgjë serioze”.

“Mendoj se në mbrojtje gabojmë, por dhe shpërdorojmë shumë raste. Nuk mund të shpenzojmë kaq shumë raste, pasi skuadra duhet të motivohet me shënimin e golit. Nuk duhet të presim në fund. Ishte një ndeshje e barabartë. Fundi i lojës ishte mjaft i bukur, pasi të dyja skuadrat kërkuan fitoren. Ne do të punojmë dhe do të bëjmë punën tonë dhe të përmirësohemi nga java në javë”.

Vladimir Prenga

Stavri Nica e paralajmëroi largimin nga Laçi që pas humbjes në Kukës, teksa pas ndeshjes durrsaku i pankinës kurbinase u shpreh se do të rishikonte pozicionin e tij dhe gjithçka u mbyll aty, me Laçin që tashmë e ka gjetur trajnerin e ri. E hëna ishte pushim për bardhezinjtë, ndërsa dje ka ardhur edhe zyrtarizimi i Gentjan Mezanit në krye të bardhezinjve. 41-vjeçari ka punuar kryesisht te moshat e Flamurtarit, ndërkohë që në tre periudha të ndryshme ka qenë në krye të ekipit të parë, duke regjistruar lojëra dhe rezultate të mira. Tashmë për të ka ardhur momenti të provojë vetën në një eksperiencë të re në krye të skuadrës së Laçit, që e zgjodhi vlonjatin për pjesën tjetër të sezonit. Vetë Mezani e priste një ofertë dhe tashmë që i erdhi nuk e hodhi poshtë dhe do të drejtojë bardhezinjtë. Në një prononcim për “Sport Ekspres”, vlonjati deklaroi: “Kisha kohë që prisja një ofertë për të drejtuar në Superiore. Ka pasur disa pista për mua, por që për arsye të ndryshme nuk u konkretizuan. E pranova me kënaqësi kërkesën e presidentit Laska për të drejtuar Laçin dhe uroj që gjithçka të shkojë më së miri. Gjatë kësaj periudhe e kam ndjekur ekipin, i kam parë që të tria ndeshjet dhe them se e njoh deri diku skuadrën. Në seancën e parë pashë shenja të mira, por në futboll ka shumë komponentë që ndikojnë dhe do na duhet edhe pak fat. Në skuadër ka lojtarë të rinj dhe me eksperiencë, të cilët kanë ‘uri’ për të fituar, ashtu si unë si trajner. Pra motivimi nuk do të na mungojë dhe shpresojmë që të bëjmë mirë dhe të realizojmë objektivat e klubit”, u shpreh trajneri Mezani, që tashmë do të duhet të tregojë vlerat e tij në Superiore larg Vlorës. Dje ai është prezantuar përpara ekipit dhe ka drejtuar seancën e parë, ndërkohë që ka bërë të ditura kërkesat e tij përballë lojtarëve, për të vijuar më pas me programin stërvitor. Sot skuadra do të luajë ndeshjen e dytë në Kupë ndaj Sopotit, një sfidë për të kaluar radhës, pasi ndeshjen e parë kurbinasit e kanë fituar me rezultatin 12-0.

GRUPI – Në seancën e djeshme me ekipin është stërvitur edhe mbrojtësi Harallamb Qaqi, ndërkohë që ka shenja të mira edhe nga Rexhinaldo, që ka zbritur në fushë, por është përgatitur i diferencuar, duke lënë palestrën. Edhe braziliani Maikon Eskerda është gati. Mesfushori nuk luajti në ndeshjen me Kukësin, edhe pse kishte udhëtuar me skuadrën. Një shqetësim në këmbë ka bërë që të mos rrezikohet me të, ndërkohë që dje ka punuar së bashku me grupin, duke dhënë sinjalin e qartë se është gati për lojë. Një problem i vogël për Gjonin dje, që pas një përplasjeje në ajër ka çarë vetullën, por nuk shqetëson për ndeshjen e radhës në kampionat.