Gentian Begeja

Erzeni nuk vonon, zgjidhet pasuesi i trajnerit Stojku

Sport Ekspres — Mon, 18 Feb 2019 18:41:33 +0000

Gentian Stojku do të jetë trajneri më i ri i Kamzës dhe largimi i tij drejt Superiores, ka lënë vendin bosh në kreun e pankinës së Erzenit. Megjithatë, klubi shijakas nuk ka vonuar për të gjetur pasuesin e tij.

Numri një i pankinës së Erzenit do të jetë Gentian Begeja, një trajner i njohur i futbollit shqiptar. Begeja drejtoi këtë sezon skuadrën e Besës deri në muajin dhjetor të vitit të shkuar dhe tashmë do të nisë një aventurë të re në krye të Erzenit.

Objektivat e skuadrës shijakase dihen, ngjitja me patjetër në Superiore, por Vllaznia duket larg dhe Begeja do të ketë dëtyrën e vështirë të ngushtojë diferencën prej 10 pikësh me skuadrën shkodrane, që vazhdon të udhëheqë e vetme renditjen në Grupin A.

Besa në 14 javë, Begeja beson te vendi i parë: Jemi brenda parashikimeve

Sport Ekspres — Tue, 25 Dec 2018 09:44:44 +0000

Kategoria e Parë e sezonit 2018-2019 e ka mbyllur gjysmën e parë me 14 ndeshje të luajtura dhe Besa në Grupin B nuk shkoi më shumë se vendi i dytë në renditje, 4 pikë larg Bylisit që renditet në vendin e parë. Me 7 fitore, 5 barazime dhe 2 humbje, skuadra kavajase mbetet ende në synimin për vendin e parë në këtë grup, i cili të ngjit direkt në Kategorinë Superiore për sezonin e ardhshëm.

Por trajneri Gentian Begeja deklaron për SportEkspres.com se pritshmëritë janë përmbushur për këtë pjesë të parë të sezonit. “Edhe pse duhet të kishim 3 apo 4 pikë më shumë, Besa i ka arritur pritshmëritë e kësaj pjese të parë të këtij sezoni. Them se jemi brenda synimit tonë, pasi kemi një skuadër me moshë të re dhe pa eksperiencën e duhur”, kështu theksoi në këtë deklarim tekniku Begeja.

Dhe për durrsakun e bankinës kavajase, kjo ka qenë e vetmja mangësi në 14 javët e luajtura të këtij kampionati, duke shtuar edhe detaje të tjera që janë shfaqur gjatë garës. “Kjo ishte mangësia që skuadra e besës kishte në 14 javët e luajtura në kampionat, të cilën mendojmë ta riparojmë sa të mundemi në pjesën e dytë të sezonit, pasi Bashkia e presidenti Bizhdili kanë menduar që të bëjnë 3-4 ndërhyrje cilësore gjatë muajit janar 2019”.

Begeja: Me Pogradecin duhet të fitonim, nuk ka justifikim terreni

Sport Ekspres — Wed, 28 Nov 2018 16:45:16 +0000

Në javën e 10-të të Kategorisë së Parë, Besa kryesuese e Grupit B ngeci në fushën e saj në përballjen me Pogradecin. E luajtur në një terren të rënduar nga reshjet e shiut dhe balta, sfida u mbyll në barazim 1-1, Por trajneri i kavajasve, Gentian Begeja, këtë nuk e shikon si justifikim.

“Edhe pse u luajt në një terren të rënduar, unë nuk mendoj se skuadra duhet të justifikohet për barazimin me Pogradecin. Në tërësi, ekipi nuk funksionoi si në ndeshjet e shkuara, ndoshta kjo edhe nga mungesat e disa titullarëve, të dëmtuar dhe të skualifikuar. Gjithsesi, ishte një ndeshje që duhej fituar”, kështu theksoi në deklarimin e tij për “SportEkspres.com” Begeja i Besës, i cili nuk e quan të mbyllur luftën për të mbajtur kreun e grupit, edhe këtë javë që luan në transfertë në Fier.

“Edhe me Apoloninë është ndeshje e fortë, jo vetëm se do të luhet në Fier. Ne do shkojmë aty me vlerësim maksimal, vetëm për tri pikët. Grupi B është shumë I fortë, dhe ne këtë e kemi parasysh në çdo ndeshje”, përfundoi trajneri durrsak.

Begeja si Iniesta, një foto në “rrethim”

Sport Ekspres — Fri, 10 Aug 2018 17:02:29 +0000

Andres Iniesta është një magjistar me topin. Edhe tani që është transferuar në Japoni po e tregon klasin e tij. Me Barcelonën dhe Spanjën ka fituar gjithçka, ndërkohë që kanë qenë të shumta rastet kur rrethohej nga disa lojtarë kundërshtarë, që tentonin t’i merrnin topin. Për të ka qenë një situatë e zakonshme.

Por teksa “lundron” në rrjetet sociale sheh momente të ngjashme edhe në kampionatin shqiptar. Fotografi Ferdinand Hazisllari ka hapur arkivën e tij dhe na sjell një foto nga e shkuara, ku shikohet ish-sulmuesi Gentian Begeja (Shkumbini), i cili ndodhet në mes të disa lojtarëve të Partizanit.

Ia kanë marrë apo jo topin, duhet të pyesim. Allmuça dhe Pinari duhet ta mbajnë mend këtë episod…

Gentian Begeja i rrethuar nga lojtarët e Partizanit | Foto: Ferdinand Hazisllari