Kalabrezi ka marrë 48 orë kohë për t’u menduar dhe ju ka kthyer përgjigje negative drejtuesve francezë. Gatuzo e ka parë të arsyeshme për të refuzuar këtë ofertë.

Nantes nuk ka humbur kohë dhe ka nisur tratativat me një tjetër trajner italian. I përzgjedhuri i radhës është Valter Zenga, i cili mund të provojë emocionet e kampionatit francez.

U përfol për një interesim të Njukasëllit dhe arabëve të Al Hilal, por asgjë konkrete. Sportitalia raporton se një klub kinez e pëlqen shumë Gatuzon. Shanghai Shenhua, që sapo siguroi shërbimet e Stefan El Sharauit pak ditë më parë, po përgatit një ofertë për 41-vjeçarin.

Kjo nuk do të ishte eksperienca e parë jashtë Italisë në rolin e trajnerit për Xhenaro Gatuzon. Ai ka stërvitur më parë zviceranët e Sionit dhe grekët e Ofi Kretës, aventura që nuk zgjatën shumë dhe nuk shkuan siç pritej.

Emrat janë intrigues, edhe pse negociatat nuk kanë nisur ende. Murinjo, Gatuzo, por edhe Arteta, ndihmësi i Pep Guardiolës, qarkullojnë si kandidatë për stolin e Njukasëllit.

Klubi i njohur anglez pritet të ndërrojë pronar dhe të përfundojë në duart e sheikut Khaled bin Zajed Al Nehajan, i cili është kushëri i presidentit të Mançester Sitit.

Preferenca e Al Nehajan është Zhoze Murinjo. Paga e mirë dhe projekti ambicioz mund ta bindin trajnerin luzitan të pranojë ofertën, ndërsa risia mund të jetë ndihmësi i tij. Flitet për Marko Materacin, lojtar me të cilin krijoi një lidhje speciale gjatë periudhës që drejtonte Interin.

Nuk mbetet pas as Xhenaro Gatuzo. Kalabrezi pëlqehet shumë nga presidenca aktuale dhe shanset e tij bëhen konkrete vetëm nëse klubi nuk ndryshon pronësi.

Flasim për Hakan Çalhanoglu. Turku nuk zhvilloi një sezon për t’u mbajtur mend, por Gatuzo e mbrojti deri në fund ne fanatizëm. Trajneri i vlerësonte shumë cilësitë e lojtarit ofensiv, pavarësisht se edhe ai kërkonte më shumë.

Vetë lojtari ka reaguar në rrjetet sociale, duke mos e harruar trajnerin e tij. Besimin që iu dha nuk do e harrojë kurrë dhe do i jetë mirënjohës përjetë për diçka të tillë.

“Faleminderit mister. Faleminderit për gjithçka që ke bërë për skuadrën dhe të gjithë ne. Kemi patur ulje-ngritjet tona, por do të jem gjithmonë mirënjohës për besimin dhe faktin që më ke mbështetur në çdo moment. Të uroj fat për të ardhmen”, përfundon turku i kuqezinjve.

Drejtuesit nuk kanë humbur kohë dhe po merren me gjetjen e pasardhësit të tij. Tre janë alternativat kryesore sipas mediave afër klubit të “djallit”: Leonardo Zhardim, Simone Inzagi dhe Marko Xhampaolo.

Portugezi është lakuar edhe herë të tjera afër stolit të Milanit. Zhardim u rikthye për të shpëtuar Monakon nga rënia një kategori më poshtë dhe ia doli. Pikat e tij më të forta janë puna e mirë me të rinjtë dhe përmirësimi i madh i lojtarëve.

Simone Inzagi ishte shumë pranë Juventusit, ndërsa tani garës për të i është bashkuar edhe Milani. Laciali është një nga trajnerët e rinj më të mirë dhe pika e tij e fortë është loja ofensive dhe menaxhimi i mirë i grupit të lojtarëve.

Nuk mbetet pas as surpriza Xhampaolo. Futbolli i tij është i këndshëm, ka kualitet si trajner dhe është gati të marrë një ekip të madh. Milani do të ishte perfekt për trajnerin, që ka formuar një skuadër shumë të mirë te Sampdoria.

Kundër Spalit nevojitet fitorja, ndërsa veshët do të jenë në gatishmëri për të dëgjuar ndonjë surprizë befasuese nga Empoli dhe Sasuolo. Trajneri ka four në konferencën për shtyp, gjatë si gjithmonë. Ai flet për situatën e krijuar, ëndrrën e të qënurit trajner i ekipit të zemrës dhe faktin se si është përjetuar kjo javë në Milanelo.

Më pas Champions. Mungesa e kualifikimit është dështim i madh, por Gatuzo zbulon dhe bisedat e bëra me drejtuesit në lidhje me objektivin e madh. Në fund Abate dhe Zapata. Të dy mbrojtësit do të largohen dhe trajneri ka vetëm fjalë pozitive për ta.

SITUATA – “Në fund të ndeshje do t’i përqafoj të gjithë, pasi jam shumë i lidhur me këtë grup. Djemtë meritojnë respekt dhe kam vetëm fjalë pozitive. Gjatë kësaj jave nuk kam parë valixhe gati apo dollapë bosh. Kam parë shumë profesionalizëm dhe të gjithë në vendin e vet. E njëjta gjë edhe me drejtuesit, të cilëve nuk ju ka munguar buzëqeshja.”

ËNDRRA – “Të stërvitësh Milanin është një ëndërr, ka qenë e vështirë dhe shpresoj që të vazhdoj. Nder i madh për mua dhe shpresoj të vazhdoj sa më gjatë. Konfirmimi im? Më vjen të qesh. Deri nesër në orën 22:30 duhet të mendojmë për Spalin. Do ketë kohë për mua.”

OBJEKTIVI – “Vendi i pestë nuk mund të quhet dështim. Kemi mbledhur më shumë pikë se në sezonet e fundit. Kemi lënë mbrapa skuadra më të forta në letër. Kemi humbur disa mundësi, por nuk mund të hidhet poshtë puna e skuadrës. E përsëris që askush në klub nuk më ka kërkuar detyrimisht kualifikimin në Champions. Më kanë thënë që ta provoj. Jemi në garë, është java e fundit, por jemi në garë.”

ABATE-ZAPATA – “Largimi i tyre është një zgjedhje e klubit. Unë kam shprehur mendimin tim, por respektoj vendimin e klubit. Mund të them vetëm fjalë pozitive për sjelljen dhe profesionalizmit e Ignacios dhe Kristianit. Dua t’i falënderoj për përkushtimin deri në momentin e fundit.”

SURPRIZAT – “Nuk dua të flas për lojtarë të veçantë. Abate më befasoi me mënyrën se si luajti qendërmbrojtës. Mezor i mbushëm mendjen dhe ishte surprizë e bukur. E interpretoi rolin për mrekulli, por shumë mirë kanë bërë edhe lojtarë të tjerë. Sa i përket anës tjetër zgjedh Çalhanoglunë. Acarohem kur shoh se sa pak gola ka shënuar. Duhet të kishte shënuar të paktën 8 gola, duke llogaritur kualitetin që zotëron.

GATUZO – “Unë nuk kam ndryshuar aspak që prej ditës së parë si trajner i Milanit. Shihem në pasqyrë dhe thjeshtë shoh një person më të plakur. Nuk më duket sikur ka kaluar një vit, ndërsa nga turneu në Amerikë dhe deri në fillim të sezonit më dukeshin 10 vite. Kam qenë më i zemëruar në fillim, por jam përmirësuar shumë në raportin me lojtarët. Janë treguar të aftë, pasi më kanë ndihmuar që të qetësohem.”

Nëse nuk sigurohet Championsi, Milani mund të pësojë një revolucion. Më saktë një largim të gjithë pjesës historike: Gatuzo, Leonardo dhe Maldini. Trajneri nuk e ka të sigurt qëndrimin, madje mediet italiane janë të bindura që kalabrezi po kalon ditët e fundit në Milanelo.

Të njëjtën rrugë mund të zgjedhë edhe dyshja drejtuese. Leonardo ia ka bërë të qartë presidentit Skaroni faktin që është ai përgjegjës për merkaton. Nëse çdo vendim i tij duhet konfirmuar nga Gazidis, braziliani do të ishte gati të largohet.

Në dyshim është edhe e ardhmja e ish-kapitenit legjendar. Largimi i Leonardos mund të ndikojë keq te Maldini, ndërsa është rritur shumë pushteti i Gazidis në klub. Afrikano-jugori është njeriu i besuar i fondit Elliot, ndërsa emra si Okampos dhe Monçi lakohen pranë Milanit.

“Kanë mbetur dhe dy ndeshje deri në fund, jemi ende në luftë për objektivat tanë. Alegri? Trofetë që ai ka fituar flasin vetë. Kam pasur një marrëdhënie të veçantë me të, shumë përqafime, shumë zënka dhe shumë të qeshura. Është ndër më të mirët. Të nesërmen meriton lojtarët dhe tifozët do t’i tregojnë mirënjohje. Gjithsesi, tani duhet të mendojmë vetëm për veten. Juventusi e ka treguar në fushë se çfarë janë të aftë të bëjnë dhe çfarë mentaliteti kanë”.

E ARDHMJA – “Klubi dhe unë i kemi lënë mënjanë bisedimet për të ardhmen, tani jemi të përqendruar te arritja e objektivit tonë. Më pas do të kemi kohë për të diskutuar mbi të ardhmen”.

SUSO – “Është një lojtari i rëndësishëm për ne. Ju gazetarët keni shkruar se unë e kam lënë jashtë dhe ai kishte humbur krejtësisht besimin. Është normale që të ketë ulje dhe ngritje. Milani nuk pasur një lojtar që ka regjistruar mbi 10 asiste në kampionat në 10 vitet e fundit”.

LARGIM I ABATES – “Abate ka qenë pjesë e këtij klubi që fëmijë. E kam rritur me shpulla (qesh). Ndjej keqardhje për të, na ka thënë shumë. Ka pasur një prani të rëndësishme në dhomat e zhveshjes”.

“Vendi i pestë nuk do të ishte aspak një dështim. Nuk e them për këtë për t’i thënë vlera vetes. Po Lacio e Roma ç‘duhet të thonë. Normalisht që në mendjet tona kemi pendesë pasi në dy muajt e fundit e kishin në duart tona fatin. Gjithsesi nuk mund të quhet dështim. Tani do bëjmë të pamundurën për të fituar dy ndeshjet e fundit, më pas të shohim”.

Xhenaro Gatuzo tenton si gjithmonë të motivojë ekipin përpara kësaj transfertë të komplikuar dhe prek disa tema gjatë prononcimit të tij. Besimi tek ekipi është maksimal dhe djemtë duhet të sigurojnë fitoren e radhës.

TË DËMTUARIT – “Bilja është grumbulluar, por nuk është gati për të luajtur. Paketa është stërvitur mirë, pavarësisht se është i skualifikuar. Çalhanoglu është rikuperuar dhe është gati. Forca jonë më e madhe kanë qenë shpesh lojtarët që janë aktivizuar pak. Kjo do të thotë forcë grupi.”

FIORENTINA – “Nuk fitojmë në Firence që prej vitit 2014. E kam studiuar Fiorentinën dhe janë një skuadër që të krijon rreziqe të mëdha. Kanë lojtarë të mëdhenj në sulm dhe duhet të bëjmë një ndeshje të madhe në aspektin fizik, teknik dhe mental.”

PIATEK – “Nuk ekziston asnjë problem. Kristof duhet të qëndrojë i qetë dhe të vihet në dispozicion të skuadrës. Kësaj gjëje duhet t’i japë prioritet.”

MONTELA – “Unë duhet të mendoj vetëm për ndeshjen dhe si ta fitoj atë. Kam respekt të madh për punën e tij, nuk kam çfarë të shtoj tjetër.”

EKIPI – “Djemtë kanë dhënë gjithmonë më të mirën për Milanin. Vë dorën në zjarr për diçka të tillë. Kjo skuadër ka reaguar edhe në momente shumë të vështira. Më vjen keq që fitorja me Bolonjën kaloi në plan të dytë dhe u fol më shumë për Bakajokon. Shoh një skuadër që është stërvitur shumë mirë dhe që po bën atë që kërkoj. Nesër duhet t’i bëjmë gjërat mirë dhe ta vendosim Fioren në vështirësi.”

ABATE-ZAPATA – “E ardhmja e tyre është një problem i klubit, unë kam për detyrë vetëm që të stërvis lojtarët. Abate dhe Zapata janë këtu prej vitesh dhe kanë dhënë kontributin e tyre. Kam vetëm fjalë pozitive për to, por vendimin e merr klubi.”

SKARONI – “Duhet t’i transmetojmë besim të gjithë lojtarëve. Unë nuk kam nevoje për përkëdhelje, nuk më pëlqejnë. Mua më pëlqen të jem aty ku ndonjëherë mbretëron kaosi, nuk ndihem i huaj kur atmosfera është e rëndë.”

Siç raporton “Gazzetta dello Sport”, zgjedhja e parë e kuqezinjve është Eusebio Di Françesko, ndërsa alternativa mbetet Gasperini i Atalantës. Ish-trajneri i Romës është i preferuari i Leonardos, por braziliani rrezikon vetë postin nëse Milani nuk arrin objektivin kryesor.

Për Di Françeskon interesohet edhe Sevija, por ai dëshiron Milanin, që ka gati një rrogë prej 3 milionë eurosh në sezon për të. Tashmë pritet vetëm të nisin negociatat, por gjithçka pritet të marrë zgjidhje përfundimtare pas mbylljes së kampionatit.

Drejtuesit e “djallit” kanë patur një takim kokë më kokë me Gatuzon dhe Bakajokon. Trajneri dhe mesfushori kanë sqaruar gjithçka mes tyre dhe francezi i është bashkuar stërvitjes.

Ai mund të zbresë në fushë të shtunën kundër Fiorentinës, duke llogaritur dhe mungesat e mëdha në këtë repart. Lukas Paketa u ndëshkua me të kuqe, ndërsa Bilja dhe Çalhanoglu janë të dëmtuar. Aktivizimi i Bakajokos do të varet edhe nga rendimenti i tij gjatë javës.

E ardhmja e tij pritet të jetë larg Milanelos. Kuqezinjtë nuk kanë ndërmend të paguajnë 30 milionë euro për kartonin e tij dhe 24-vjeçari do të rikthehet te Çelsi. Një lajm i mirë për trajnerin Sarri. Anglezëve ju është bllokuar merkato dhe trajneri italian do të kishte një opsion më shumë për mesin e fushës.

Megjithatë, rëndësi ka që të mposhtet Bolonja nesër në “San Siro”. Xhenaro Gatuzo ka dalë në konferencën e zakonshme për shtyp. Trajneri i “djallit kuqezi” shpjegon se pse u detyrua të grumbullonte ekipin për 5 ditë, pavarësisht se është kundër grumbullimeve të gjata.

Një urim për Kaldarën e pafat, thirrje për kujdes ndaj ekipit të Mihajloviçit dhe e ardhmja. Gatuzo as që ka ndërmend të japë dorëheqje, pasi në karakterin e tij nuk ekziston dorëzimi. Në fund Romanjoli dhe Bakajoko. Të dy kanë gabuar, kanë kërkuar ndjesë dhe kaq mjafton.

BOLONJA – “Është një skuadër që ndodhet në formë dhe tenton të luajë me shpejtësi që pas ardhjes së Mihajloviçit. Duhet të bëjmë një ndeshje të madhe për të treguar që jemi akoma gjallë.”

GRUMBULLIMI – “Jam kundër grumbullimeve, por ekzistojnë rregulla që duhen respektuar në një grup. Lojtarët nuk ishin mirë nga mendtë e kokës, ndërsa tani janë më të përqendruar. Tani shoh një skuadër të zemëruar dhe dua që ta shoh këtë zemërim edhe në fushën e lojës. Unë vendosa për grumbullimin dhe klubi më mbështeti. Në fillim isha në dyshim, por më pas u binda. Nuk më intereson jeta private e lojtarëve, por kur vihet në Milanelo punohet në një mënyrë të caktuar.”

CHAMPIONS – “Duhet të jemi ambiciozë. Po kalojmë një periudhë të keqe. Kur futesh në tunel duhet të analizosh gjithçka për të kuptuar se çfarë nuk funksionon. Kush luan me Milanin duhet të ketë ambicie.”

E ARDHMJA – “Unë nuk dorëhiqem. Objektivi im është kualifikimi në Champions dhe kam dy vite të tjera kontratë. Pjesa tjetër nuk ka asnjë vlerë. Klubi nuk më ka folur për largim, këto gjëra i shkruani dhe i shpikni ju gazetarët. Ekziston një raport shumë i mirë midis meje, Leonardos dhe Maldinit. Nuk jam i dorëzuar, jam vetëm i trishtuar nga rezultatet negative.”

KALDARA – “Dua t’i dërgoj urimet më të bukura për ditëlindje. I uroj një shërim të shpejtë dhe e presim me padurim, sepse është një djalë që meriton shumë. Kjo periudhë ka qenë e pafat për të.”

ROMANJOLI – “Kemi biseduar dhe kapiteni i ka kërkuar falje shokëve për kartonin e kuq. Alesio është përmirësuar shumë, por i duhet të rritet akoma në këtë aspekt.”

BAKAJOKO – “Ai gaboi, i kërkoi falje të gjithëve dhe kjo çështje është lënë pas krahëve.”

Rino tregon se çfarë e bëri Milanin ekip aq të madh, ndërsa sot është ndryshe. Respekti mungon dhe të gjithë janë më të llastuar. Një emër si Paolo Maldini merrte aulinë çdo ditë për të përballuar stërvitjen, lojtari më i fortë me të cilin Rino ka luajtur ndonjëherë.

Trajneri i kuqezinjve kujton dhe ditën e parë të stërvitjes në Milanelo, aty ku i erdhën dy goditje rrufe nga Kostakurta. Sot mezi presin që të bësh ndonjë gabim dhe të gjithë ia plasin së qeshurës.

RESPEKTI – “Mendoj se ajo që ka shpëtuar Milanin ndër vite ka qenë respektimi i rregullave. Pak herë i është dashur të ndërhyjë Galianit, madje ishim ne që i shkonim në zyrë dhe e detyronim të ndërhynte. E respektonim historinë e klubit, sot është më e vështirë. Mentaliteti i lojtarëve ka ndryshuar. Sot duhet të tregohesh i kujdesshëm, më parë duhet të mbyllje gojën.”

DITA E PARË – “Ditën e parë në Milanelo u rruajta dhe lashë nja dy qime në lavaman. Mora dy goditje kokës nga Kostakurta dhe e kuptova menjëherë se çfarë mentaliteti ekzistonte te Milani. Galiani tentoi të më bindte për të qëndruar akoma kur u largova si futbollist, por nuk ndihesha më rehat, nuk flisja më gjuhën time. Shumë personave nuk iu pëlqente më ajo çfarë thonim unë, Ambrozini dhe Abiati. Sot jetojmë në një epokë tjetër.”

TRAJNERI – “Gjërat kanë ndryshuar. Një trajner ka nevojë për futbollistë të gatshëm për sakrifica, për t’u përmirësuar dhe për të dhënë diçka më shumë. Sot duhet të tregohesh i kujdesshëm kur i thua diçka djemve. Fillojnë menjëherë të ankohen dhe të krijojnë alibi. Kanë ndryshuar gjërat e vogla në dhomat e zhveshjes. Dikur mund të dëgjoje vetëm muzikë italiane. Tani qeshin nëse e dëgjojnë diçka të tillë. Ka vetëm gjëra të huaja, hip hop, të gjithë me kufje dhe ndoshta shikojnë edhe ndeshjet angleze dhe spanjolle që luhen në orare të ndryshme.”

DHOMAT E ZHVESHJES – “Sot çdokush mendon për vete, por ka një problematikë që e kanë të gjithë në Serie A. Në vitin 1999 nuk dëgjohej muzikë në dhomat e zhveshjes dhe të gjithë ishin të përqendruar. Si trajner kam provuar ta heq. Më bezdis shumë, por çfarë t’i bëj faktit që të gjithë e duan. Më parë qëndronim grup dhe kalonim për mrekulli. Sot zhduken një nga një sapo mbarojnë së ngrëni.”

MALDINI – “Së pari çdokush duhet të jetë i qëndrueshëm, edhe jashtë fushave. Talenti nuk mjafton kurrë. Kampion bëhet dikush që nuk humbet asnjë stërvitje, që është i qëndrueshëm, që arrin gjithmonë në orar, që bën punën e tij në 360 gradë dhe që respekton çdo rregull. Prandaj e përsëris gjithmonë që Maldini ka qenë më i forti në botë, sepse bëhej gjithmonë copash. Ai merrte 1-2 aulina në ditë për të mos humbur asnjë stërvitje. Mund të kishte jetuar për mrekulli nga të ardhurat që fitonte, por nuk hoqi dorë kurrë nga asgjë. Paolo është lojtari më i fortë më të cilin kam luajtur ndonjëherë. Ky ishte sekreti i atij grupi historik. Një rregull respektohej dhe pikë.”

BOTËRORI 2006 – “Mbaj mend që nuk festova fare te goli i Grosos në gjysmëfinalen kundër Gjermanisë. Isha i fundit në mesfushë dhe nëse ata niseshin në sulm, më duhej t’i thyeja. Gjithmonë kam dashur në jetë që të bëhem më i forti i rolit tim, të rikuperoj topa pafund dhe kam dashur të përmirësohem. Nuk është e vërtetë që nuk kisha cilësi. Thjeshtë i dija limitet e mia dhe vihesha në dispozicion të grupit.”

2007 – “Në vitin 2007 klubi na dërgoi në Maltë për fazën përgatitore të janarit. Ishte një erë e ftohtë dhe të gjithë ishim të acaruar me Galianin. Sapo u kthyem në Milano filluam të bënim mirë. Qëndronim rreth 10-14 futbollistë deri në 5 të mëngjesit duke pirë verë. Këto gjëra na forconin me njëri-tjetrin. Në fund fituam Champions Ligën.”

Zllatan Ibrahimoviç ishte pjesë e Milanit. Të bëjë sherr me të ishte e pamundur, aq më tepër të dilje fitues. Megjithatë, një amerikan me emrin Oguçi Onjevu, trupmadh që luante në rolin e mbrojtësit, nuk e njihte fjalën frikë.

Mes dy “gjigantëve” nis një sherr i madh në stërvitje.  Gjysmë ore betejë, ndërsa vetëm Gatuzo guxon për t’i ndarë. Trajneri nuk e harron kurrë atë episod dhe e risjell përsëri në këtë formë.

“Kishim lëvizur në një fushë tjetër nga ajo ku stërviteshim zakonisht. Kishte shumë njerëz dhe Ibra me Onjevun filluan të ziheshin. Peshonte nga 100 kg secili. Unë si hero tentova t’i ndaj dhe i godita me shkelm, ndërsa Ambrozini nuk u afrua fare. Mora një dy shpulla të mira, e pashë situatën keq dhe ika duke ulëritur: ‘vrisni veten’. Qëndruan gjysmë ore duke u zënë me njëri-tjetrin. Ibrës i binin nervat më vonë, nuk mbante kurrë inat. Ku t’i gjesh lojtarë si ai…”, thekson Rino Gatuzo.

Drejtuesit e “djallit” kanë zgjedhur të vazhdojnë me trajnerin kalabrez edhe këto katër ndeshje që kanë mbetur. Pamundësia për të gjetur një zëvendësues e ka shtyrë treshen Leonardo-Maldini-Gazidis që t’i besojnë Gatuzos.

Ky i fundit duhet të bëjë maksimumin që të kualifikojë Milanin në Champions, por edhe nëse ndodh një gjë e tillë, ai do ta mbyllë në verë me ekipin me të cilin është tifoz. Drejtuesit po i besojnë vetëm prej faktit që nuk kanë zgjidhje për momentin.

Pas humbjes me Torinon ata kanë patur një takim kokë me kokë me trajnerin, aty ku i kanë bërë të qartë situatën dhe të ardhmen.

Disa emra lidhen me stolin e kuqezinjve për sezonin e ardhshëm dhe në avantazh është Mauricio Sarri. Ish-trajneri i Napolit pritet ta mbyllë me Çelsin në fund të sezonit dhe do të rikthehet në Itali te kuqezinjtë e Milanit.

TORINO – “Nesër do të luajmë për fanellë, karrierën e lojtarëve dhe gjithë universin e Milanit. Vijmë nga një periudhë e keqe dhe kritikat janë të drejta. Nesër do të përballemi me një skuadër, që na kujton Atalantën. Kanë karakteristika të ngjashme. Kemi nevojë për forcë fizike dhe qartësi. Mbi të gjithë kemi nevojë për diçka që e kemi pasur gjithmonë, por që sot na mungon. Duhet të japim shpirtin në fushën e blertë.”

KARIKIMI– “Nuk i gjuaj askujt me grushte, thjesht duhet të kuptojmë që duhet të jemi të bashkuar dhe të japim edhe më shumë. Le të logjikojmë të gjithë njësoj. Dëgjoj shumë fjalë për të ardhmen time dhe të lojtarëve, por boll. Le të mendojmë vetëm për të ardhmen e Milanit. Në këtë moment jemi shuar të gjithë. Nevojiten fakte dhe rezultate. Diferencën do e bëjë dëshira për të sakrifikuar.”

KRITIKAT – “Po vuajmë në rikuperimin e topit. Nuk po luajmë si skuadër. Nuk jemi të rrezikshëm në sulm dhe as të kujdesshëm në mbrojtje. Po i bëjmë gjerat përgjysmë. Unë i marr përsipër përgjegjësitë e mia. Futbollisti ndryshon nga trajneri. Nuk e them kot që jam përgjegjësi i parë për këtë situatë. Disa lojtarë nuk gjenden në formë të mirë, ndërsa të tjerë harxhojnë kohë duke menduar. Po e paguajmë diçka të tillë, por duhet të tregohemi të afte për t’i marrë maksimumin skuadrës. Dëgjoj fjalë kafenesh sikur lojtarët nuk e ndjejnë fanellën e Milanit, apo sikur nuk e vrasim mendjen fare për objektivat tonë. Është e vërtetë që kemik probleme dhe defekte, por duhet treguar respekt për këta djem.”

PAKETA – “Nuk mund të zgjidhë gjithçka i vetëm ka nevojë për ndihmën e skuadrës. Lukas na ka dhënë një dorë të madhe, por ka nevojë për të gjithë kolektivin.”

ZHGËNJIMI – “Unë jam i zhgënjyer nga vetja ime. Nuk po arrij t’i ndryshoj gjërat dhe të futem në kokat e lojtarëve. Jam i zhgënjyer sepse një trajner duhet t’i transmetojë gjithçka ekipit të tij. Mund të gabojmë teknikisht, por është problem i madh kur mungon dëshira për të vuajtur. Jam më shumë i zhgënjyer nga vetja sesa nga lojtarët. Një jetë rresht më kemi thënë që nuk bëj për Milanin si lojtar, por lidershipi nuk mund të blihet me para. Nuk mund të shkosh në supermarket dhe t’i thuash shitësit: ‘Të lutem, dua 10 euro lidership’.”

BAKAJOKO – ‘Timuenë e kam parë mirë. Ajo që ndodhi në Kupë është e dokumentuar me foto dhe video. Po e dëgjoj nga ju gazetarët që lojtari dëshiron të largohet. Ai ka bërë një sezon të rëndësishëm dhe ndihet mirë në Itali. Jam dakord me Reinën, jemi akoma në vitet 1800, por jo të gjithë tifozët e pranishëm në stadium logjikojnë njësoj.”

Në mes është kualifikimi në Champions Ligë, por Gatuzo mund të largohet edhe nëse ia del të rikthejë kuqezinjtë në futbollin elitar. Sipas raportimeve të mediave italiane, trajneri kalabrez ka darkuar para dy javësh me Horge Mendez. Gatuzo ka një raport respekti të dyanshëm me agjentin e famshëm portugez.

Ky i fundit po punon për të gjetur një ekip jashtë Italisë për Gatuzon. Në skenë ka dalë Premier Liga, më saktë Njukasëlli. “Qymyrxhinjtë” nuk po arrijnë që të gjejnë gjuhën e përbashkët me Rafa Benitez për të rinovuar kontratën dhe trajneri i Milanit do të ishte zgjidhja ideale për ekipin anglez.

Trajneri kalabrez ka besimin e drejtuesve, por ai e di mirë që e ardhmja varet nga rezultatet. Në verë priten shumë lëvizje trajnerësh dhe po qarkullon një skenar në lidhje me Milanin.

Sipas mediave italiane, klubi i “Djallit” po mendon për Mauricio Sarrin. Ish-trajneri i Napolit mund ta mbyllë me Çelsin në fund të sezonit. Ai është gati për t’u rikthyer në Serie A dhe Milani do të ishte një mundësi shumë e mirë. Nëse kualifikohen në Champions kthehet në një mundësi perfekte. Opsion shumë i mirë edhe për kuqezinjtë, të cilët do riktheheshin te futbolli i bukur me Sarrin në krye.

Po Gatuzo? Rino mund të marrë drejtimin e Romës. Emri i tij lidhet prej kohësh me stolin verdhekuq. Toti është tifozi i tij i parë dhe presidenti Palota mund t’i dhurojë besimin e duhur. Megjithatë, në fillim duhet të presim fundin e sezonit për t’u qartësuar më shumë në lidhje me mundësinë e kësaj lëvizje të dyfishtë.

Kur kanë mbetur edhe pesë ndeshje para fundit, Milani ka pësuar një rënie të dukshme në lojë, por për trajnerin e “djallit”, kjo nuk është një çështje fizike.

“Pash shumë pak shpirt luftarak. Në pjesën e parë vuajtëm. Ishim me fat që gjetëm të parët avantazhin, më pas u treguam shumë naiv. Prisja shumë më shumë nga pjesa e parë”.

“Kishim qasjen  e gabuar. Kur luan futboll do të ndodhin dhe ditë si këto. Duhet t’i japim merita dhe Parmës që na vuri në shumë vështirësi.

CHAMPIONS DREJT DËSHTIMIT ? – “Po filloj të shqetësohem, por nuk është nevoja për të qenë i dëshpëruar

“Nuk është një problem fizik. Pashë në fushë një skuadër bosh. U dukëm të befasuar. Nuk po flasim për një tragjedi, do të analizojmë se çfarë shkoi keq”.

“Rino dhe Paskuale Mota (biznesmen i konsideruar si figura qendrore e hetimit) nuk kanë qenë miq. Ky i fundit ka përfituar nga një besim i bazuar në një njohje të kohëve të fundit. Në atë kompani, Gatuzo nuk ka mbajtur kurrë një rol operacional. Historia e tij është një copëz e vogël e një hetimi të madh”, kanë theksuar dy avokatët e tij.

Trajneri i ”Djallit” i ka shpjeguar Gjykatësit se e ka njohur Motën në vitin 2011, në kohën që biznesmeni frekuentonte restorantin e peshkut të Gatuzos. Atë periudhë, Rino bleu 35% të aksioneve të “Cascina Tre Olmi”, e specializuar në prodhimin e salsiçeve të derrit. Ai vendosi të largohej dy vjet më vonë, pasi mori vesh se furnizuesit nuk ishin paguar.

“Ishte paraqitja më e mirë që kemi bërë gjatë 2019-ës. E humbëm në 18 minutat e fundit. Kjo jo përse Juventusi luajti mirë, por për shkak të gabimeve tona. Këto gjëra mund të ndodhin kur praktikon stilin e lojës që bëjmë ne. Ndaj Juventusit nuk mund të qëndronim mbrapa, por duhet të dilnim përpara e të tregoheshim agresiv”.

Kritikat? S’më plas fare se çfarë thonë njerëzit. Ndoshta problemi është se kam fituar shumë dhe kam qëndruar gjatë në klub si lojtar, dhe tani njerëzit presin diçka ndryshe prej meje. Dua të gjykohem vetëm për atë që kam bërë si trajner”.

“Fansat shikojnë vetëm Gatuzon që është gjithë grinte e pasion, vetëm këtë kujtojnë. Nuk dua dashurinë e tyre, thjesht dua të gjykohem për atë që jam dhe se çfarë po bëj në këtë rol”.

“Ndoshta sekreti se përse jam kaq i qetësuar është sepse unë nuk lexoj gazeta, prej kësaj gjëje nuk ia kam idenë se kush po më lavdëron e kush më kritikon”.

Trajneri i Milanit analizon momentin e vështirë, tenton të mbajë moralin lart dhe beson te paraqitja e mirë dhe marrja e pikëve kundër bardhezinjve. Gatuzo ndalet dhe te gjendja e të dëmtuarve, ndërsa komenton rivalitetin e madh për një vend në Champions.

JUVENTUSI – “Duhet të kuptojmë pse nuk fitojmë pas derbit. Ky është problemi im kryesor tani. Ndeshja kundër Juventusit mund të na japë një shtytje në aspektin mental. Kemi nevojë të bëjmë një paraqitje të mirë me Juventusin dhe të bëjmë një kapërcim. Kemi ende edhe tetë ndeshje dhe gjithçka për të luajtur në këtë periudhë. Kemi provuar disa opsione për ndeshjen e nesërme, duhet të hedhim në fushë një skuadër që në jep garanci. Ka ende nervozizëm, por kjo mund të jetë edhe një aspekt pozitiv.”

FORMA – “Historia ka treguar se Milani gjithmonë ngrihet në momentet e vështira. Derbi ishte i rëndësishëm, por i përket së shkuarës tani. Duhet të fokusohemi te ndeshjet në vazhdim dhe të bëjmë paraqitjet që kemi bërë muajt e fundit.”

KARIKIMI – “Besoj se ndeshja me Juventusin mund të në japë energjinë e nevojshme për të përfunduar mirë sezonin. Duhet ta rindezim sërish atë shkëndijën brenda nesh. Nëse bëjmë një paraqitje të mirë në Torino dhe marrim një rezultat pozitiv, kjo mund të jetë një pikë kthese për ne. Jam dakord që disa njerëz thonë se jemi në një lloj stacioni për sa i përket performancës sonë dhe shpresoj të vërtetoj të kundërtën. Sigurisht luajmë kundër një ekipi që pothuajse e ka fituar titullin kampion. Luajmë ndaj një ekipi të frikshëm nesër.”

INFERMIERIA – “Kesi është stërvitur me grupin. Romanjoli ka pasur temperaturë, por ishte me ekipin gjatë seancës së fundit. Konti do të kthehet javën e ardhshme. Paketës i duhet pak kohë të rikuperohet, ndërsa Donaruma do të rikthehet brenda një jave apo për pak më shumë kohë.”

VENDI I KATËRT – “Nuk jemi ekipi i vetëm që po vuajmë, përveç Atalantës që ka vazhdimësi në rezultatet e saj. Vendi i katërt është ende i yni. Fati ka qenë në krahun tonë në disa momente dhe do të luftojmë për të.”

PAKETA – “Ai ka nevojë për më shumë ose më pak se 20 ditë. Varet nga lojtari gjithashtu, nga niveli i dhimbjeve dhe se si kavilja e tij do të përgjigjet gjatë trajtimit.”

Xhenaro Gatuzo rrezikon postin e tij. Trajnerit i duhet të arrijë objektivin e madh, përndryshe e ardhmja e tij do të jetë larg Milanelos. Rino ka edhe dy vite kontratë me Milanin dhe shkarkimi i tij do i sillte klubit një faturë prej 10 milionë eurosh.

Siç raporton “Corriere dello Sport”, në rast të një shkarkimi të mundshme të Gatuzos (preferohet shumë nga Roma, me Totin sponsorin e tij të madh), do të jetë Ivan Gazidis ai që do zgjedhë trajnerin e ri.

Shefi ekzekutiv i “Djallit” preferon një emër të njohur nga Premier Liga. Ai është Mauricio Poçetino, trajneri i Totenhemit. Një nga pikat më të forta të argjentinasit është puna e mirë me lojtarët e rinj dhe rritja e tyre.

47-vjeçari përfiton një rrogë prej 7 milionë eurosh në sezon. Ai dëshiron të provojë një eksperiencë të re në fund të sezonit dhe Milani mund të ishte një opsion fantastik për të.

Atalanta dhe Lacio janë afruar dhe të rrezikshme mbeten e Roma me Sampdorian. Dy pikë më shumë është dhe Interi i vendit të tretë, por trajneri përqendrohet vetëm tek ekipi i tij. Gatuzo po e përgatit me qetësi ndeshjen kundër Udinezes.

Trajneri i “Djallit” analizon çfarë nuk ka shkuar në dy ndeshjet e fundit dhe ndalet te lojtarë të caktuar. Rino mohon problemet me Leonardon dhe nuk i kursen batutat si gjithmonë.

UDINEZE – “Vijmë nga dy rezultate negative, por skuadra është e gjallë. Momenti është negativ, por do të japim gjithçka. Nuk kemi vdekur akoma. Kaldara po stërvitet me ne, ndërsa nuk kemi vendosur akoma për modulin e ndeshjes. Gjithsesi, kam në kokë një ide ndryshe. Kjo është një ndeshje e rëndësishme, të cilën jemi të detyruar ta fitojmë. Duhet të futemi në fushë me dëshirë dhe qetësi.”

GJYKIMI – “Nuk duhet të krijojmë alibi. Duhen kuptuar edhe arbitrat. Orsato fishkëllen pak, ndonjëherë duhet të dimë të komunikojmë me ta. Duhet të rritemi në këtë aspekt. Na ndodhën dy episode kundër në ndeshjen me Sampdorian, por duhet t’i pranojmë dhe të besojmë tek ata.”

DREJTUESIT – “Gjithmonë jemi rreshtuar të gjithë në të njëjtën anë. Nesër është ndeshje e rëndësishme. Jam i qetë, por jo prej faktit që kam biseduar me Leonardon dhe Maldinin. Askush nuk mund ta vërë në dyshim bashkimin që ekziston mes nesh në këto momente. Shtypi shkruan, por unë e di se çfarë flasim dhe respektin që kemi për njëri-tjetrin. Problemi i vetëm që kam në këto momente është rikthimi i Milanit në Champions.”

PIATEK – “Mendoj se ka luajtur mirë në pjesët e dyta kundër Interit dhe Sampdorias. Nuk është Piatek problemi, por mënyra se i futemi në ndeshje. Nuk duhet të fokusoheni vetëm një lojtar i vetëm. Të gjithë duhet të japin diçka më shumë, jo vetëm ai. Nëse e furnizojmë me topa, ai e dëmton kundërshtarin.”

BAKAJOKO – “Vuajti në pjesën e parë kundër Sampdorias, njësoj si gjithë skuadra. Pjesën e dyte bëri mirë, madje dhe si ‘mezzala’. Ky lojtar na jep cilësi dhe sasi, si dhe i bën mirë të dyja rolet. Na mungon qetësia dhe në këtë moment duhet të kuptojmë se si kemi dëshirë që të luajmë.”

DONARUMA – “Kritikat pranohen. E kam parë mirë Xhixhion, nuk është fshehur dhe ka marrë përgjegjësitë e tij. Një gabim i tillë mund të ndodhë. Më pëlqen shumë mënyra se si e menaxhoi ndeshjen dhe i vlerësoj shumë fjalët e Kontit. Kjo tregon se grupi është solid dhe i pastër.”

RIKTHIMI – “Për të kaluar këtë moment të vështirë, duhet të fitojmë. Unë jam i qetë, dikush mund të më marrë për të çmendur, por kështu ndihem. Duhet t’i nisim më mirë ndeshjet. Edhe kur kemi fituar pesë ndeshje rresht, nuk kemi luajtur gjithmonë mirë. Megjithatë, jam i qetë për atmosferën që ekziston në dhomat e zhveshjes.”

OBJEKTIVI – “Po luajmë për diçka shumë të rëndësishme. Rikthimi në Champions është si fitimi i titullit për ne. Dy ndeshjet e fundit kemi shkuar shumë shpejt në dizavantazh dhe kjo gjë na ka penalizuar. Gjithsesi, kam parë një ekip të gjallë dhe të gatshëm për të reaguar. Duhet të analizojmë aspektet negative, por kam besim të ky grup. Duhet të ruajmë qetësinë dhe t’i marrim ndeshjet një nga një.”

KESI – “U habitët që Bilja u ul afër Kesisë pasi u zëvendësua? Frenk e përqafoi Lukasin (Bilja) përpara të gjithëve, pasi u kthye nga kombëtarja. Patën një debat, gabuan që e bënë përpara të gjithëve, por tashmë nuk ekziston asnjë problem.”

PAKETA – “Deri para dy javësh të gjithë më akuzonin se lojtari ishte i lodhur, ndërsa tani ka dalë sikur jam zënë me Leonardon për mos aktivizimin e tij kundër Sampdorias. Vërtetë e mendoni se niveli i drejtuesve tonë është kaq i ulët? Më duket sikur jam në ëndërr.”

Një skenë e shëmtuar, por nervat e lojës bëjnë të veten. Lojtarët kërkuan falje, ndërsa Milani gjobiti Kesin me 40 mijë euro gjobë. Trajneri është një person që ka bërë shumë sherre të tilla kur ishte lojtar. Ai nuk i mban mëri mesfushorit dhe e cilëson çështjen të mbyllur.

“Nuk jam i zemëruar me Kesin. Episodi është mbyllur dhe nuk ka asnjë problem. Ajo që ka rëndësi në një skuadër është respekti që çdokush duhet të ketë për të tjerët, për të gjithë. Tani është e kotë të vazhdojmë të flasim për këtë temë. Të dy lojtarët nuk bënë bisht. Ky është një sinjal pozitiv, do të thotë që mund t’i arrijmë objektivat tanë”, thekson Gatuzo.

Rino i rikthehet edhe njëherë episodit në ndeshjen e Champions Ligës kundër Totenhemit në vitin 2011. Miqtë fituan me një gol të Krauç, ndërsa në fund shpërtheu një sherr i madh. Protagonisti? E kush tjetër, përveçse “luftëtarit” të mesfushës.

Gatuzo kapi prej fyti Xho Xhordan, trajnerin e dytë të “Spurs”, i cili kishte luajtur me Milanin në vitet ’80. U desh ndërhyrja e lojtarëve të tjerë që të qetësohej sadopak një “bishë” si Xhenaro Gatuzo, atë periudhë kapiten i kuqezinjve.

“Kam gabuar edhe unë në karrierë si futbollist, si në rastin me Xhordan (në ndeshjen me Totenhemin). Kam vënë fytyrën time përpara dhe kam paguar shtrenjtë gabimet. Gjithmonë kam marrë përgjegjësitë e mia dhe klubi masat e veta. Pas ndeshjes Milan-Totenhem, luanim në Verona kundër Kievos. Unë isha kapiten atë periudhë dhe Galiani donte të më hiqte shiritin. Dëshironte të jepte një sinjal, por skuadra e kundërshtoi”, përfundon trajneri i “Djallit”.

Në një prononcim për “Gazzetta dello Sport”, ish-bomberi i “Djallit” vlerëson shumë dy sulmuesit e ekipit aktual, Piatek-Kutrone. Ai shpreson që kjo dyshe të arrijë të bëjë gjëra që kanë bërë më parë një dyshe e paharrueshme si ajo Inzagi-Shevçenko.

Inzagi ka një këshillë për Kutronen, ndërsa vlerëson dhe trajnerin Gatuzo. Shoku i qindrave betejave dhe fitoreve po bën një punë të mirë, ndërsa rikthimi i dyshes Leonardo-Maldini do të rikthejë Milanin në vendin ku i takon.

KRAHASIMI – “Shpresoj që Piatek dhe Kutrone mund të realizojnë me Milanin atë që kemi realizuar unë dhe Shevçenko. Jam i sigurt që do të jenë e ardhmja e klubit dhe skuadrës që po ndërton Gatuzo. Nevojitet kohë, por shkëndijat dallohen. Kam një këshillë për Kutronen: qëndro te Milani. Nuk ka asgjë më të mirë se kuqezinjtë.

GATUZO – “Rino ka grintë dhe kompetencë. Besoj se ai mund të realizojë te Milani, atë që bëri Konte me Juventusin. Sinjalet janë të dukshme. Leonardo dhe Maldini i kanë idetë e qarta. Tashmë ekziston gjithçka që nevojitet për rilindjen e Milanit.”

Gjithsesi, gara për një vend në Champions është e fortë. Nesër në mbrëmje do të luhet derbi dhe trajneri analizon sfidën me zikaltrit. Gatuzo i ka gati batutat për Piatek dhe gabimet e tij e lojtarëve. Stadiumi do të jetë plot me dominancë zemrash kuqezi dhe trajneri beson fort se tifozët do t’i japin një dorë ekipit për të fituar ndeshjen e qytetit.

PIATEK – “Nuk flas shumë me të dhe tani shoh disa buzëqeshje më shumë. Më pëlqen kjo gjë, pasi mendoja se ishte i zemëruar me mua në fillim. I pëlqen të stërvitet, maksimumi merr një ditë pushim dhe më pas kthehet në stërvitet.”

“Milan favorit? Është një ndeshje që nuk ka favorit. Derbi fitohet nga ai që kontrollon emocionet para nisjes së ndeshjes dhe futet i qetë në fushën e lojës”.

DERBI – “Çdo derbi ka historinë e vet dhe kjo do të jetë një ndeshje ndryshe nga ajo e katër muajve më parë. Dëgjoj të flitet se ne jemi favoritë dhe se Interi ka vdekur, por nuk është e vërtetë. Nesër ‘San Siro’ do të thyejë një rekord fitimish dhe duhet të jetë lojtari ynë i 12-të, por duhet ta respektojmë Interin.”

LARGIMI I MUNDSHËM – “Gatuzo kishte një moment që rrezikonte dhe u përfol shumë për Konten si trajner të ri të Milanit, por drejtuesit i besuan atij dhe deri më tani ka rezultuar vendimi i duhur. “Asnjëherë nuk e kam menduar largimin, kam menduar vetëm të punoj. Kurrë nuk kam menduar të largohem”, u shpreh tekniku i kuqezinjve.”

FORMA – “Periudhën negative e kemi kaluar më parë, kur u eliminuam nga Europa League.  Nuk biem në grackën që ne jemi mirë tani dhe ata janë keq. Duhet ta respektojmë një skuadër të fortë si Interi, që mund të të dëmtojë në çdo moment.”

BATUTA – “Gabimet? Nuk jam një rrobaqepës që ka mësuar si t’i qepë si duhet rrobat. Gaboj ende në disa gjëra, jemi aty për t’u përmirësuar, por nuk jam ende rrobaqepës 100%”.

BERLUSKONI – “Presidenti kërkon Suson pas dy sulmuesve? Atë që thotë Berluskoni e respektoj, por unë i bëj zgjedhjet dhe i marr vendimet.”

Gjykata Sportive ka vendosur të gjobisë me 15 mijë euro trajnerin gjaknxhetë të “Djallit” për shkak të episodit të ndodhur në fundin e pjesës së parë kundër Kievos.

Gatuzo është gjobitur pasi në minutën e 35-të të ndeshjes së zhvilluar në Verona, ka dalë jashtë zonës ku i lejohet të qëndrojë dhe ka patur një debat të nxehtë me Mexhiorinin e Kievos. Trajneri u ndëshkua me të kuqe nga arbitri, ndërsa Gjykata Sportive ka vendosur ta falë për ndeshjen derbi.

Tashmë gjithçka mori fund dhe trajneri është gati të drejtojë nga stoli djemtë e tij, me shpresën dhe besimin për t’iu dhuruar emocione të paharrueshme tifozëve kuqezinj të qytetit të Milanos.

“Ishte një hap mbrapa përsa i përket nivelit të lojës që kemi shfaqur gjatë ndeshjeve të fundit. Kishim kundër një skuadër shumë fizike, por mbrojtjta jonë bëri shumë mirë.  Fatkeqësisht në fazën sulmuese lamë për të dëshiruar, nuk i dhamë asnjë top Piatekut”.

“Mund të kishim bërë mirë, por duhet të merren parasysh karakteristikat e lojtarëve. Për shembull Laksalt nuk është aq i mirë me topin sa Rodrigez, ai preferon të bëjë sprinte në sulm. Borini nuk është Çalhanoglu, por ata duhet të pushojnë ndonjëherë dhe gjëja e duhur ishte të provonim diçka ndryshe”.

“Gjithë merita u takon djemve të mi. Kam qenë shumë me fat që besojnë tek idetë e mia. Tani jam i fokusuar që ti marr maksimumin atyre”, përfundoi Gatuzo.

Milanin e mban akoma në zemër, ndërsa Xhenaro Gatuzo ka qenë dhe vazhdon të jetë një nga miqtë e tij më të ngushtë. 40-vjeçari ishte i pranishëm të premten e kaluar në “San Siro” për të ndjekur ndeshjen kundër Empolit.

Ai përfitoi të takohej me trajnerin, por dhe Maldinin dhe Leonardon. Kuqezinjtë i ndjek gjithmonë dhe janë një ekip që i pëlqen. Kaladze analizon Milanin e ri në prononcimin e dhënë për “Gazzetta dello Sport”, ndërsa vlerëson dhe punën e Rinos.

Më pas dyshja Leonardo-Maldini dhe sulmuesi Piatek. Polaku i ka bërë të gjithë për vete dhe Kaladze beson se ai do të bëhet një lojtar i madh. Në fund detyra e tij si qytetar i parë i kryeqytetit gjeorgjian dhe objektivat dhe dëshirat e Kaladzes për t’i dhuruar një jetë më cilësore dhe më të lumtur bashkëqytetarëve të tij.

MILANI – “Isha në stadium kundër Empolit dhe u zbavita shumë. Ekipi zhvilloi një ndeshje shumë të mirë. I kam ndjekur të gjitha ndeshjet e Milanit në televizor, por kjo ishte e para që pashë në stadium këtë sezon. Ekipi po rritet nga ndeshja në ndeshje dhe përmirësimi dallohet qartë. Më ka befasuar qëndrueshmëria, lojtarët mbrojnë mirë, janë cinikë përpara dhe tani arrijnë të shënojnë menjëherë.”

GATUZO – “Xhenaro ka formuar këtë grup që funksionon në dhomat e zhveshjes dhe i ka dhënë një mënyrë loje ekipit. Ky është një aspekt deçiziv, sepse lojtarët po ndihmojnë njëri-tjetrin, sulmi po mbështet mesfushën dhe mesfusha po ndihmon mbrojtjen. Nuk e mendoja se Gatuzo do të kishte sukses si trajner, sepse diskutonim pak si shokë për këtë aspekt. Ai ka zgjedhur rrugën e tij dhe po bën mirë në një nga klubet më të rëndësishëm të Europës. Jam i lumtur për të, sepse kujdeset shumë dhe vuan. Rino mund ta rikthejë Milanin në Champions, edhe si vend i tretë në renditje. Pastaj është dhe Kupa e Italisë, aty ku kuqezinjtë mund të arrijnë deri në fund. Bisedoj shpesh me Rinon dhe shkëmbejmë mesazhe. Do të kthehem në Milano kur të kem mundësi, por puna si kryetar bashkie në Tbilisi më merr shumë kohë dhe impenjim.”

DREJTUESIT – “Leonardo dhe Maldini i kanë dhënë stabilitetin që mungonte prej kohësh klubit dhe ekipit. Ata janë të parët që ndihmojnë Gatuzon. Kam marrë vesh që Elliot dëshiron të investojë dhe të sjellë te Milani futbollistë shumë të rëndësishëm për të kthyer shpejt ekipin në majë.”

PIATEK – “Ai është një lojtar shumë i mirë dhe godet menjëherë. E kam ndjekur te Xhenoa dhe tani te Milani. Është rritur shumë dhe mund të rritet akoma. Ata që vijnë nga jashtë e kanë të vështirë të ambientohen në Serie A, madje për një sulmues është edhe më e vështirë, sidomos për një sulmues të Milanit. Të duhet të shënosh me patjetër, por Piatek ka qëndrimin e duhur. Ai shënon, lëviz mirë në fushë, ndihmon ekipin dhe mbron. Kristof është i ri, por mund të arrijë në nivele të larta. Unë kam luajtur kundër kampionëve, të cilët kanë shkruar historinë si sulmues. Nuk do të bëhet si Ronaldo Fenomeni, por mund të bëhet një lojtar i madh.”

PROJEKTET – “Sot kam përgjegjësinë e 1.5 milionë njerëzve. Ka shumë probleme që po tentojmë t’i zgjidhim me projekte të reja. Duam të kemi një popull të lumtur. Po punojmë në shumë drejtime si në ndërtimin e rrugëve të reja, porteve dhe infrastrukturës. Duam të propozojmë një transport të ri publik. Këto iniciativa ndikojnë në të gjithë Gjeorgjinë dhe duam të tërheqim vëmendjen e Europës për një hyrje të ardhshme në BE. Në lidhje me këtë aspekt po aplikojmë dhe ligjin e kanabisit. Më parë konsumimi dënohej me burgim, ndërsa sot e kemi legalizuar dhe konsumi është personal.”

74-vjeçari ka thurur elozhe për punën e Leonardos dhe ka bindjen që asnjë ekip nuk është përforcuar më shumë se kuqezinjtë në merkaton e janarit. Piatek dhe Paketa kanë sjellë entuziazmin e një kohe te tifozët dhe tashmë është një Milan ndryshe.

Në prononcimin e dhënë për “Radio Deejay”, Galiani tregon se është befasuar dhe e mbyll me Monzën, ekipin e tij të zemrës. Berluskoni dhe ai kanë marrë drejtimin e klubit, që garon në divizionin e tretë të futbollit italian. Shumë lëvizje në janar me objektivin kryesor kalimin në Serie B.

LEONARDO-GATUZO – “Milani është skuadra që është përforcuar më shumë në Europë. Me Piatek dhe Paketën, Leonardo u ka ndryshuar fytyrën kuqezinjve. Flasim shpesh së bashku, sepse Leo është miku im, por nuk ka nevojë për këshillat e mia. Gatuzo? Nuk e prisja, pasi besoja se karakteri i tij i fortë do ta kishte penguar të niste karrierën e trajnerit.”

MONZA – “Kemi bërë një merkato të madhe në janar, e para që kur Berluskoni bleu klubin. Afruam 16 futbollistë dhe larguam 14. Unë kam lindur dhe jam rritur në Monza. Jam tifoz i këtij ekipi, që kur mamaja më merrte në stadium kur isha i vogël. Kam refuzuar mijëra skuadra, Monza është një zgjedhje zemre dhe një operacion romantik i Berluskonit, i cili jeton 2 km larg stadiumit. Kam një dashuri të pafundme për Monzën. Nuk është punë, është pasion dhe nuk fitoj asnjë euro nga Monza.”

Gara për një vend në Champions është e ashpër dhe Milani do të luajë nesër kundër Romës në “Olimpico”. Verdhekuqtë ndodhen në një moment shumë të vështirë, por Xhenaro Gatuzo nuk i zë besë ekipit të Di Françeskos. Ata mbeten të rrezikshëm dhe kuqezinjtë duhen të zhvillojnë një ndeshje të madhe.

Trajneri i Milanit kërkoi një mesfushor krahu në merkato, megjithatë ai është i lumtur për afrimet e bëra. Gatuzo vlerëson dyshen Paketa-Piatek, ndërsa mesfushorin Bakajoko e cilëson thelbësor për ekipin e tij.

KUNDËRSHTARI – “Roma nuk po kalon një formë të mirë, por ata mbeten një ekip shumë i fortë. Ata janë të frikshëm në sulm dhe shënojnë shumë gola nga goditjet standarde, kështu që duhet të tregohemi të kujdesshëm. Do të jetë një ndeshje shumë e vështirë. Ata kanë lojtarë të talentuar dhe një trajner që po bën mirë prej vitesh. Duhet të jemi shumë, shumë të kujdesshëm për këtë përballje. Çdo ndeshje është e rëndësishme për ne. Roma ka lojtarë të mëdhenj në letër dhe ne nuk duhet ta harrojmë këtë fakt. Duhet të jemi gati, sepse nuk është asnjëherë e lehtë të luash kundër Romës, pavarësisht se ata po vuajnë në këto momente.”

ZANIOLO – “E kam stërvitur për disa muaj dhe është një lojtar me shumë cilësi. Për momentin, ai është një nga talentët më premtues të futbollit italian, por është e rëndësishme të ecë në rrugën e duhur.”

MILANI – “Para ndeshjes me Frozinonen thashë që në pranverë duhet të jemi në garë për një vend në Champions, sepse diçka e tillë nuk ndodh që prej 7-8 vitesh. Duhet të vazhdojmë me këtë përulësi dhe të mendojmë për të mirën e ekipit. Nëse dikush është trishtuar për faktin që nuk po luan, ai duhet të mendojë në fillim për ekipin dhe pastaj për veten e tij.”

KRITIKAT – “E di mirë që mjafton ndonjë rezultat negativ dhe njerëzit do të fillojnë të më quajnë përsëri të paaftë. Imagjinoni që njerëzit janë gati të “shqyejnë” dhe një emër si Karlo Ançeloti… Nuk kam nevojë për komplimentet e tyre, unë thjeshtë fokusohem te puna ime me ekipin. Për momentin ndodhemi në një moment të mirë fizik, kemi shumë entuziazëm dhe duam të vazhdojmë në këtë mënyrë.”

MERKATO – “Jemi përforcuar në merkato, por mos të harrojmë dhe Biljan e Kaldarën, të cilët janë gati për t’u rikthyer.”

PIATEK – “Ekziston një organizim i veçantë kur je pjesë e një ekipi. Megjithatë, disa sulmues duhet t’i lejosh të ndjekin instinktet e tyre. Organizimi është i rëndësishëm kur bëhet fjalë për të bërë presing dhe për të mbrojtur, por ne mund t’i japim më liri lojtarëve të caktuar. Piatek nuk është një surprizë, pasi ka luajtur 5 muaj me Xhenoan, aty ku ka shënuar në pothuajse çdo goditje në portë.”

PAKETA – “Paketa është një surprizë për shkak se ai është gati të hyjë në futbollin europian. E thith informacionin si sfungjer, është shumë kurioz për taktikat dhe dëshiron të jetë i informuar për gjithçka. Ai nuk është një lojtar tipik brazilian.”

PIATEK DHE KUTRONE SË BASHKU NË SULM – “Duhet të shikoni karakteristikat e lojtarëve. Mendoj se mund të luajnë së bashku, por më pas duhet të vendosim nëse duam tre mesfushë në qendër dhe sa punë do duhet për të mbuluar boshllëqet nëse luajmë me dy. Nuk është se nuk më pëlqen të luaj me dy sulmues së bashku. Momentalisht duhet të marr në konsideratë se çfarë është më funksionale për skuadrën. Jam i mërzitur ta lë Kutronen në stol për disa ndeshje, por më duhet të mendoj si të marr më të mirën nga skuadra tani.”

BAKAJOKO – “Në këtë moment nuk mund të bëjmë pa Bakajokon. Nëse kemi mundësi ta mbajmë, absolutisht duhet ta bëjmë diçka të tillë. Gjithsesi nuk varet nga unë. Gjithçka unë di është se ai mund të bëhet një lojtar themelor në të ardhmen e Milanit.”

Xhenaro Gatuzo ka nga një koment për të gjithë. Trajneri i kuqezinjve ndalet në shumë çështje në konferencën për shtyp. Piatek, racizmi, Higuain, Paketa dhe Karlo Ançeloti. Kundërshtari është i frikshëm, pavarësisht se mungon Alan, ndërsa në fund Gatuzo tregon ndryshimin dhe pjekjen e Patrik Kutrones.

EKIPI – “Po bëjmë ende gabime në aspektin e eksperiencës. Zhvilluam një pjesë të parë të dobët me Xhenoan, por shkëlqyem në pjesën e dytë. Ndeshjet si kjo kundër Napolit na ndihmojnë të përmirësohemi.”

RACIZMI – “Tifozët tanë i kanë duartrokitur gjithmonë kampionët e mëdhenj. Dua të shoh 65 mijë njerëz duke duartrokitur lojtarët, por ka akoma disa idiotë që merren me kore raciste.”

KARLETO – “Nuk e kopjon dot Ançelotin. Ka 20 vite që drejton dhe nuk kam dëgjuar ndonjë lojtar të ankohet për të. I detyrohem shumë. Më ka bërë të luaj me shumë entuziazëm.”

PIATEK – “Piatek është një person që flet pak. Ai ka shumë entuziazëm dhe mbeti i befasuar nga mikpritja që i bënë shokët e rinj të skuadrës dhe stafi teknik. Do të debutojë kundër Napolit? Do e merrni vesh nesër… Higuain? Nuk dua të flas për të. Gonzalo bëri zgjedhjen e vet dhe tani është pjesë e së kaluarës. Kemi humbur një sulmues të madh, por kemi nënshkruar me një lojtar tepër të vendosur. Piatek do të na ndihmojë, ai është i fortë fizikisht dhe ka një nuhatje goli.”

PAKETA – “Lukas mund të përmirësohet shumë në aspektin tekniko-taktik. Ai nuk është një futbollist tipik brazilian.”

NAPOLI – “Alan nuk do të luajë, por Ançeloti ka një kontingjent të madh lojtarësh. Ata janë realisht një ekip shumë i fortë, ndërsa ne duhet të bëjmë një ndeshje të madhe për të siguruar pikë.”

MERKATO – “Çalhanoglu nuk ka qenë kurrë në listën e largimeve, ose shitjeve. Sa i përket Zapatës, ai është një lojtar i rëndësishëm për ne. Atij nuk i është ofruar rinovimi i kontratës, por shpresoj dhe dëshirojmë që të qëndrojë me ne.”

KUTRONE – “Patrik ka ndryshuar qëndrim në 2-3 javët e fundit. E kam përgëzuar për një gjë të tillë dhe për faktin që qëndron pozitiv dhe kur nuk e nis si titullar.”

Xhenaro Gatuzo ka prekur disa tema në konferencën për shtyp, duke e nisur me kundërshtarin e nesërm dhe largimin e Pipitës. Trajneri kërkon të njëjtin shpirt gare si në finalen e Superkupës ndaj Juventusit. Ai tregohet i sinqertë për veprimin e bërë dhe pranon dënimin. Gatuzo nuk do të jetë në stol, ashtu siç Higuain nuk është grumbulluar për këtë ndeshje.

XHENOA – “Pashë një shpirt të madhe të skuadrës në Superkupë, por nuk arritëm të shënonim. Juventusi ka patur gjithmonë diçka më shumë se ne në aspektin e agonizmit. E bukura vjen tani, dua të shoh të njëjtin shpirt dhe të mos kthehemi më mbrapa. Dua që nesër të luajtëm të njëjtën ndeshje kundër një skuadre, që mund të na vërë në vështirësi në aspektin fizik. Kemi katër mungesa, por mua më shqetëson mungesa e entuziazmit. Duhet të shohim renditjen dhe të kuptojmë rëndësinë e ndeshjes me Xhenoan. Ata vrapojnë shumë, duhet të luajmë me kualitet dhe të mos ‘zhdukemi’ në gabimin e parë që bëjmë.”

HIGUAIN – “Në këtë moment skuadra, dhe dua të jem i sinqertë në këtë që po them, ka patur një nga stërvitjet më të këqija. Djemtë janë të shqetësuar. Kam folur në zyrën time me Higuainin dhe nuk ka akoma diçka zyrtare për të. Për çështjen e tij do të flasë Leonardo. Unë dua njerëz gati dhe është e qartë që Higuain nuk është gati psikologjikisht. Nuk jam i zhgënjyer nga ai, pasi është sjellë gjithmonë mirë me mua. Respekti mbetet, ashtu si për Bonuçin. Gonzalo mund të bënte diçka më shumë me ne dhe të njëjtën gjë mund të bënim dhe ne për ta bërë të shprehej më mirë.”

PIATEK – “Ai ka karakteristika të veçanta, por e kam mendjen te ndeshja e nesërme. Nëse Higuain do të largohet, do të humbisnim një lojtar të rëndësishëm, i cili ka hasur vështirësi. Gonzalo nuk ishte një barrë, ndërsa tani duhet të rikthehemi të punojmë me qetësi.”

ACARIMI – “U errësova pas finales dhe u solla si një diletant. E meritova përjashtimin, por insistova për të thënë mendimin tim: ‘Nëse është VAR-i, përdoreni’.”

BILJA-SUSO-KONTI – “Lukas ka nisur të vrapojë. Mendoj se brenda dy javësh do të bashkohet me grupin. Suso nuk është në 100%, ndjen akoma dhimbje, por të shohim nesër. Konti nuk i ka akoma 90 minuta në këmbë, por është i rëndësishëm për ne.”

MERKATO – “Nuk pres dhurata nga gruaja kur kam ditëlindjen, kështu që nuk pres asgjë. Kemi marrë një lojtar të rëndësishëm si Paketa, por të shohim se çfarë mund të ndodhë, sepse kemi disa parametra për të respektuar. Flas shpesh me drejtuesit dhe nuk është e vërtetë se ka ‘luftë’ midis nesh.”

DËSHIRA – “Do të isha gati të hidhja një firmë të madhe sa kjo sallë për t’u kthyer në lojërat e ndeshjeve të para, ku luanim një futboll nga më të bukurit në Itali dhe i vendosnim të gjithë në vështirësi. Dua ta rishoh përsëri atë Milan. Ka shumë skuadra të forta, Atalanta është e frikshme, Roma po rritet, për të mos harruar Lacion.”

DALLIMI TRAJNER-LOJTAR – “E ndjeja më shumë tensionin si lojtar se sa si trajner. Është komplet ndryshe. Luajmë kundër një ekipi që ka dominuar në Itali dhe Evropë për tetë vite. Ata dinë të fitojnë trofe, por është e rëndësishme për ne që jemi këtu dhe të kalojmë këtë eksperiencë”.

FOKUSI I GATUZOS – “Jam një njeri që i ndjek shumë instinktet dhe në pesë vitet e fundit në këtë profesion, fokusi im ka qenë, që të jem sa më i besueshëm dhe në dispozicion të lojtarëve të mi. E them me sinqeritet të plotë, nuk po mendoj për veten time, por se çfarë kjo lojë paraqet për lojtarët e mi”.

“Dua ti ndihmoj ata që të kuptojnë që mund t’ia dalin dhe mund të kalojmë përtej limiteve. Nuk dua që të jemi në panik dhe të biem poshtë që në gabimin e parë që do të bëjmë. Nuk dua të shoh një përsëritje të Olimpiakosit, një ndeshje që e hodhëm tej. Në gabimin e parë, ne humbim besimin. Ka ndodhur për një kohë të gjatë te Milani, edhe përpara se të vija unë, dhe unë dua që ta shoh këtë skuadër të rikthejë krenarinë e saj”.
“Dua të shoh të njëjtën performancë që pashë ndaj Juventusit në Torino sezonin e shkuar. Bëmë gjithçka që t’i shkaktonim probleme. E mbaj mend që e nisëm fort ndeshjen dhe në Kupën e Italisë, por më pas pësuam një gol naiv dhe ndodhi ajo që ndodhi. Dua të shoh shpirtin që e kam parë shpesh, dhe jo të shoh atë momentin që nisin të mendojnë se kanë faj dhe më pas të bëjnë gabime të tjera. Duhet të vazhdojnë ndeshjen, të përqendrohen për 90 minuta dhe jo të mendojnë për fajet, apo për forcën që ka kundërshtari”.

PAKETA – “Lukas është në formë të mirë. Është i gatshëm dhe në Kupën e Italisë bëri disa gjëra të mira. Ai mund të përmirësohet shumë dhe do të shohim për nesër në rast se do të luajë si titullar apo jo”.

KUTRONE – “Patrik ka zjarr brenda dhe nuk ka nevojë për fjalë dhe motivim për të. Është një lojtar që e ngre peshë skuadrën kur vjen nga stoli. Mërzitet shumë kur nuk niset si titullar, si çdokush. Duhet të shpenzojmë kohë edhe për t’i shpjeguar disa gjëra, por e rëndësishme është që po përmirësohet”.
NDALIMI I RONALDOS – “Me shumë organizim. Në 6-7 vitet e fundit Ronaldo është bërë një lojtar i pabesueshëm. Në kohën që luaja kundër tij, ai përqendrohej të dhuronte spektakël, ndërsa tani nuk e bën një gjë të tillë. Bën gjithçka për të vrarë kundërshtarin dhe është efektiv. Sa më i vjetër bëhet, aq më mirë luan”.

NDESHJA NË ARABI – “Për futbollin italian, duhet të jetë një krenari që priten kaq ngrohtë. Kemi dëgjuar vitet e fundit që futbolli italian ka rënë dhe është bërë si i dorës së dytë, por ne jemi krenar që jemi këtu. Jemi të nderuar që do të shohim femra nesër në stadium dhe jemi trajtuar në mënyrë të shkëlqyer”.

Gatuzo ka arritur t’i rikthejë grintën dhe dëshirën për të bërë mirë ekipit, që ka lundruar në ujëra të turbullta në vitet e fundit. Milani po lufton fort për një vend në Champions dhe Lacio e vendit të katërt është vetëm një pikë larg.

Një studim i “Opta” tregon se Gatuzo është më i suksesshmi nga pesë trajnerët e fundit të Milanit. Ai ka një mesatare prej 1.74 pikësh për ndeshje, pasuar nga Montela me 1.6 pikë për ndeshje dhe Sinisa Mihajloviç me 1.53 pikë për ndeshje. Pas tyre renditen Filipo Inzagi dhe Kristian Broki.

Milani i dha fund një serie negative prej katër ndeshjesh pa fitore, teksa mundi në “San Siro”, SPAL-in me rezultatin 2 – 1. Trajneri Xhenaro Gatuzo vlerësoi paraqitjen e skuadrës dhe u shpreh shumë i gëzuar për golin e argjentinasit Gonzalo Higuain, i cili u rikthye të shënojë pas më shumë se dy muajsh.

NDESHJA – “Më pëlqeu paraqitja e skuadrës si nga ana teknike, por edhe taktike. Mund ta kishim mbyllur lojën më shpejt. Por, më pëlqeu mentaliteti i skuadrës, që edhe pse vuajti, arriti të mposhte kundërshtarin”.

HIGUAIN – “Ai jeton me golin. Si sulmuesi i skuadrës sonë, kjo ka qenë një periudhë shumë e vështirë për të. Humbja ndaj Juventusit, penalltia e humbur dhe kartoni i kuq, të gjitha këto së bashku e lënduan shumë”.

“I duhet të rikthehet si më parë. Duhet të mos ketë më luhatje para porte, pasi kjo është pika e tij e fortë. Shpresoj që me golin e sotëm, ai të ketë lënë pas atë gjendje të renduar psikologjike. Na kanë munguar shumë golat e tij”

“Fanella e rëndë e Milanit dhe historia e këtij klubi bën që njerëzit të presin më shumë prej nesh dhe kjo është normale, këtu përfshihen dhe drejtuesit si Leonardo, Maldini, por dhe pronarët. Skuadra mund të bëjë më shumë se kaq”, përfundoi Gatuzo.

Trajneri i kuqezinjve ka dalë në konferencën për shtyp përpara ndeshjes së fundit për vitin 2018, duke e nisur nga çështja e racizmit. Ai tregon veprimin që duhet bërë kur “debilët” nisin koret raciste, ndërsa tenton t’i japë moral Kulibalisë, mbrojtësit të Napolit.

Gatuzo flet për ndeshjen e fundit me Frozinonen, vlerëson Donarumën, kërkon fitoren kundër Spalit, pavarësisht mënyrës së lojës dhe ka shumë besim te Higuain dhe Çalhanoglu. Mbrojtja është përmirësuar, ndërsa tashmë është radha e sulmit për të rikthyer qetësinë në ekipin e “Djallit”.

RACIZMI – “Është e drejtë të ndalet loja, por duhet të kujtojmë se një sjellje e tillë u përket vetëm katër personave dhe jo gjithë stadiumit. Ne duhet t’i respektojmë të gjithë, qofshin të bardhë, apo të zi. Kam parë të hidhen banane në fushë në shtete të tjera. Ne duhet të provojmë të duartrokasim kur këta debilë të këndojnë koret e tyre. Kulibali është si një tank, ai është një lojtar i fortë dhe ata kanë frikë nga ai”.

NDESHJA ME FROZINONEN – “Falë Donarumës ne nuk humbëm kundër Frozinones. Ai është lojtar themelor për ne dhe e vlerësoj shumë. Jemi të zhgënjyer, kemi pasur shanset tona për të fituar ndeshjen, por edhe rrezikuam të humbnim. Mbrojtja jona ka bërë progres. Nuk e kemi mbyllur vitin me 31 pikë prej 7-8 vitesh, por mbetet një dhjetor katastrofë për ne”.

E ARDHMJA – “Unë dua të vazhdoj punën time me stafin. E di që puna jonë varet nga rezultatet. Tani për tani nuk po mendoj për të ardhmen time. Jam i ri dhe mund të jem vetëm mirënjohës për këtë mundësi që më është dhënë. Unë i di rrënjët e mia, askush nuk ma ka hapur rrugën dhe dua që të mbaj shumë përgjegjësi. Por, ky jam unë. Ekipi ka bërë progres në aspektin e karakterit dhe unë do vazhdoj punën për të përmirësuar veten”.

HIGUAIN DHE KONTI – “Unë dua ta shoh Higuainin që pashë pjesën e dytë në ndeshjen me Frozinonen. Nuk dua të flas për gjë tjetër. Ai ka karizëm ta madhe dhe na nevojiten golat e tij. Flas me Higuain çdo ditë dhe besoj se do të kthehet ai normali kur të arrijë të gjejë rrugën e rrjetës. Vazhdoj të dëgjoj thashetheme për një transferim të mundshëm, por jam i sigurt që ai do të mbetet pjesë e Milanit. Konti? Ai ende nuk i ka 90 minuta dhe na duhet ta çojmë në kondicionin e duhur për të luajtur nga fillimi. Për momentin ai nuk është ende plotësisht gati”.

NDESHJA ME SPAL – “Dua të shoh 23 lojtarë të vendosur nesër. Se si fitojmë nuk ka rëndësi për mia, ajo që ka rëndësi është rezultati final. Dua të shoh një ekip të vendosur për të mos lëshuar një cm në fushë. Na duhet të largojmë frikën dhe të jemi të bindur për forcën tonë. Na mungon qetësia e nevojshme, duket sikurse asgjë nuk ishte në rregull edhe kur ishim në vend të katërt. Dikush ka gjithmonë diçka për të thënë, kur jemi në fushë na duhet qetësi, sidomos në sulm”.

ÇALHANOGLU DHE GODITJET E DËNIMIT – “Jam shumë i vetëdijshëm për përformancën e tij kohët e fundit. Ai do të mbetet në ekip për sa kohë do të jem unë në krye të MIlanit. Ai është i rëndësishëm për stilin tim të lojës. Duhet të kemi besim te lojtarët tanë përgjatë momenteve të vështira. Nuk po i përdorim mirë goditjet tona të lira. Po punojmë mbi to, por nuk po marrim rezultate të mira. Me cilësitë që ka Çalhanoglu, besoj fuqimisht se do të gjejë shënjestrën. Po provojmë edhe zgjidhje të reja me Rodrigez”.

Siç raporton “QS”, Paolo Maldini insiston në vazhdimin e punës me Gatuzon dhe po e mbron ish-shokun e skuadrës, ndërsa Leonardo është gati për ta shkarkuar menjëherë pas ndeshjes, gjithmonë nëse nuk arrihet fitorja. Dy drejtuesit e “Djallit” kanë mendime të ndryshme sa i përket trajnerit, por mbetet për t’u parë fundi i ndeshjes kundër Spalit, me shpresën që Milani do të reagojë dhe shpëtojë trajnerin e tij.

Duke lënë mënjanë trajnerin, Milani vazhdon punën për përforcimin e ekipit në merkato. “La Stampa” zbulon objektivin e ri të kuqezinjve dhe ai është Simone Zaza. 27-vjeçari u rikthye në Itali tek ekipi i Torinos pas një sezoni shumë të mirë me Valencian, ndërsa Milani është gati ta ofrojë në ekip.

Xhenaro Gatuzo ka folur për “Milan TV”, duke treguar dhe atmosferën që ekziston në ekip. Objektivi Champions nuk është larg (Lacio është 3 pikë larg), por duhet arritur medoemos. Trajneri i Milanit tregon problemet e ekipit, ndalet te Higuain, si dhe jep mendimin e tij për ngjarjet raciste të ndodhura në Itali.

MOMENTI I VËSHTIRË – “Ajo çfarë perceptoj është fakti që jashtë Milanelos ka shumë pesimizëm për rreth ekipit. Është e vërtetë që nuk e kemi hedhur hapin cilësor që duhet të bënim, por kur ishim në vendin e katërt u duk sikur duhet të bënim më shumë. Duket sikur e gjitha që po bëjmë në këto momente është negative dhe kjo gjë perceptohet dhe nga futbollistët.”

MILANI – “Kemi luajtur pa frikë dhe pa patur asgjë për të humbur në momentet e vështira. Kundër Bolonjës dhe Torinos kemi patur rastet tona, por nuk kemi përfituar. Kundër Frozinones u zhgënjeva në pjesën e parë, ndërsa në të dytën patëm rastet tona për gol. Jemi një skuadër që ka dëshirë për t’i bërë gjërat mirë, por që i bën gjërat përgjysmë. Kemi rregulluar mbrojtjen, por po vuajmë të shënojmë gol.”

HIGUAIN – “Ka gabuar një penallti të rëndësishme, mori karton të kuq dhe e gjitha bota foli për të. Dua të shoh Higuainin e pjesës së dytë kundër Frozinones, i cili të vjen përballë, kërkon kombinimet me shokët e skuadrës dhe krijon raste për të shënuar. Ai nuk kishte as fat, sepse luanim kundër një skuadre që mbrohej me 10 vetë.”

CHAMPIONS – “Duhet të qëndrojmë afër vendit të katërt. Duhet të tregohemi të aftë për të qëndruar në garë deri në pranverë. Milani ka fituar shumë gjatë historisë së tij, por duhet të mendojmë për të tashmen. Titulli ynë është kualifikimi në Champions dhe të gjithë duhet të japim edhe më shumë. Fakti që nuk kemi shfrytëzuar mundësitë për të forcuar pozitat në vendin e katërt na ka futur në depresion, por jemi akoma aty duke rivalizuar. Kemi bërë shumë dhurata dhe kundër Spalit nuk kemi alternativa përveç fitores.”

RACIZMI – “Jam dakord me atë që ka thënë Ançeloti. Sigurisht që nuk jemi shteti i vetëm në të cilin ndodhin këto episode. Mendoj se ka ardhur momenti që futbolli të ndalet dhe ndeshjet të ndërpriten. Jemi në prag të vitit 2019 dhe duhet të përmirësohemi. Nuk mendoj se Italia është një vend racist, sepse këtu ka shumë emigrantë, por janë shpeshherë 4 debilë që nisin këto kore.”