Flamurtari i Prishtines

Miqësore | Flamurtari mposht Tiranën, tre gola nga prishtinasit

Sport Ekspres — Sun, 28 Jul 2019 19:13:33 +0000

Tirana ka zhvilluar ditën e sotme një takim miqësor kundër Flamurtarit të Prishtinës. Ndeshja e zhvilluar në Ohër ka mbaruar me fitoren 3 – 1 të skuadrës prishtinase. Golat për klubin kuqezi u shënuan nga Kabashi, Maliqi dhe Krasniqi.

Golin e vetëm të Tiranës e shënoi i riu Dionis Çikani, i cili vitin e kaluar ka qenë pjesë e ekipit B të Tiranës në Kategorinë e Dytë.

Kjo është miqësorja e tretë e Tiranës në Maqedoninë e Veriut. Më parë bardheblutë barazuan 2 – 2 me Renovën dhe humbën 1 – 0 ndaj Dukagjinit të Klinës.

Flamurtari 3 – 1 Tirana
Shënues: Kabashi, Maliqi, Krasniqi / Çikani

Formacioni i Tiranës: Lika, Doka, Osmani, Goxha, Hoxhallari, Celhaka, Batha, Hasani, Cale, Torasa, Muci

Nga kampionati te përfaqësuesja, një bullgar “zbulon” Kosovën: Gafë nëse nënvlerësohet!

Sport Ekspres — Sat, 23 Mar 2019 22:27:48 +0000

Superliga e Kosovës po rritet nga viti në vit dhe lojtarë gjithnjë e më cilësorë po transferohen aty. Po ashtu, shumë lojtarë të huaj po provojnë të luajnë në kampionatin e Kosovës dhe cilësia sa vjen e rritet. Një ndër lojtarët e huaj që luajnë në Kosovë është edhe futbollisti i Flamurtarit të Prishtinës, Angel Grançov, i cili ka dhënë një intervistë për bullgaren “trud.bg”, në prag të ndeshjes midis Kosovës dhe Bullgarisë, që do të zhvillohet këtë të hënë në stadiumin “Fadil Vokrri”.

Grançov flet për cilësinë e përfaqësueses së Kosovës dhe për kushtet e futbollit në Kosovë. 26-vjeçari thekson se Kosova nuk duhet nënvlerësuar, ndërsa përsa i përket futbollit në Superligën kosovare, Grançov thekson se terrenet janë ende një problem i madh ku duhet progres, sidomos për faktin që pak stadiume kanë fusha me bar natyral.

“Kosova nuk duhet nënvlerësuar. Nëse shikon 10 ndeshjet e fundit, ata kanë marrë rezultate mjaft pozitive. Thuajse të gjithë lojtarët luajnë jashtë, vetëm portieri i tretë është i kampionatit të Kosovës. Të gjithë janë të motivuar, biletat u shitën për 2 orë. Ata kanë lojtarë të mirë dhe prandaj mund të surprizojnë çdo kundërshtar”.

“Nuk jam shumë i informuar mbi skuadrën e Kosovës, por shikoj që janë shumë të motivuar. Në Europë nuk i njohin shumë dhe kjo bën që të nënvlerësohen, por çdokush që e bën këtë gjë do ta pësojë”.

LOJTARËT QË BIEN NË SY – “Portieri Arijanet Muriç është pjesë e Mançester Sitit, është aktivizuar disa herë në ndeshjet e Kupës. Milot Rashica luan për Verder Bremen. Është i ri dhe po kalon një formë të mirë”.

Grançov (majtas)

TIFOZËT – “Stadiumi do të jetë plot. Të gjitha biletat janë shitur. Nuk është një stadium i madh, ka një kapacitet prej 14.000 vendesh. Tifozët janë të ekzaltuar dhe do ta mbështesin skuadrën në ndeshjen e parë të kualifikueseve të Europianit”.

OBJEKTIVAT E KOSOVËS – “Kam folur me shokët e skuadrës në lidhje më këtë takim. Ata duan të renditen të dytët në grup. Kanë besim dhe kualitet, ndërsa trajneri Shaland ka pasur shumë ndikim. Nuk e di a e ka arritur të fusë stilin e lojës që ai dëshiron, por lojtarët e tij sigurisht që janë cilësorë”.

INFORMACION PËR BULLGARINË? – “Nuk më kanë kontaktuar. Kombëtarja bullgare ka njerëz profesionistë, që me siguri e kanë studiuar ndeshjet e Kosovës. S’ka përse të më kontaktojnë mua, pasi nuk është se mund t’u jap ndonjë ndihmë të madhe”.

FUTBOLLI NË KOSOVË – “Këtu vrapohet shumë dhe ka duele shumë të forta fizike. Gjyqtarët shpesh lejojnë që loja të luhet edhe pas disa faulleve që në Bullgari nuk do të lejoheshin. Terrenet janë të këqija dhe ka vetëm luftë sportive. Ato pak takime që luhen në fusha me barë natyral bëhen vërtet interesante. Gjithsesi, s’dua që të keqkuptohem, sepse këtu ka talente të mirë dhe lojtarë me aftësi të mira futbollistike. Njerëzit duan të bëjnë progres dhe t’i përmirësojnë kushtet”.

INFRASTRUKTURA – “Infrastruktura në Bullgari është e një niveli më të mirë. Ne ankohemi gjithmonë për këtë, por në të vërtetë kemi terrene të mira në kategorinë e parë dhe të dytë. Këtu në Kosovë situata është shumë ndryshe. Stadiumet janë në gjendje shumë të keqe, qoftë godina, por edhe tapeti. Këtu ka dy ose tre stadiume në gjendje të mirë, por po punohet fort që të zgjidhet ky problem. Stadiumi ku do të luhet ndeshje është një impiant modern, që i ofron të gjitha kushteve lojtarëve dhe tifozëve”.

A KA MË SHENJA NGA LUFTA? – “Jo aspak. Jeta këtu është shumë e qetë, e ngjashme me jetesën në Bullgari. Ka disa probleme me pastërtinë në rrugë, ose bllokimi i tyre nga dëbora. Njerëzit janë të qetë dhe them se është një vend i mirë për të jetuar. Lufta i përket së shkuarës, njerëzit duan të ecin përpara dhe brezi i ri është shumë ambicioz”.

Triumfon Liria, Llapi i fortë për kampionët e Dritës

Sport Ekspres — Sat, 10 Nov 2018 14:37:59 +0000

Te Drita as që duhet ta çojnë nëpër mend titullin. Pas një serie të gjatë fitores, kampionët në fuqi të Kosovës janë mposhtur në takimin e dytë radhazi. Këtë herë skuadra e drejtuar nga Shpëtim Duro u thye në transfertë nga Llapi.

Një gol i shënuar në fund të pjesës së parë nga Festim Alidema vendosi fatet e këtij takimi dhe skuadra nga Podujeva përforcon pozitat e saj në vendin e tretë në klasifikim. Plot 7 pikë nga Drita është shkëputur Llapi.

Liria ka marrë tre pikë me vlera në shtëpi kundër Flamurtarit. Një gol e ka vendosur edhe këtë ndeshje. Karahoda realizoi golin e fitores për bardhezinjtë nga Prizreni, që për momentin lënë vendin e parafundit në renditje.

IPKO SUPERLIGA – Java 15

Llapi-Drita 1-0
Shënues: Alidema 41’

Liria-Flamurtari 1-0
Shënues: Karahoda 67’

Drita thyen Flamurtarin dhe marshon, Liria nuk di të fitojë

Sport Ekspres — Tue, 30 Oct 2018 14:29:52 +0000

Drita është rrugë të mbarë, teksa ka marrë fitoren e pestë radhazi në kampionat. Skuadra e drejtuar nga Shpëtim Duro arriti të fitonte 0-1 në transfertë me Flamurtarin e Prishtinës dhe mori kështu tre pikë të arta. Gjilanasit tashmë shpresojnë që rivalët të ndalen dhe ta ngushtojnë diferencën me ta.

Në ndeshjen e sotme ishte mesfushori Krasniqi ai që vendosi fituesin, pasi shënoi golin e fitoren që në minutën e 25-të të takimit. Drita e ruajti epërsinë deri në fund dhe tanimë me këto tre pikë të marra në llogarinë e tyre numëron 22 pikë të grumbulluara.

Ndryshe nga Drita, Liria e Prizrenit nuk po arrin të kthehet te fitorja. Bardhezinjtë kanë rënë në vendin e parafundit dhe në ndeshjen e sotme me Ferizajin rival direkt për mbijetesë kanë barazuar pa gola. Situatë e vështirë për Lirinë, që rrezikon rënien një ligë më poshtë.

IPKO SUPERLIGA – JAVA 13

Flamurtari-Drita 0-1
Shënues: Krasniqi 25’

Liria-Ferizaj 0-0

Drita e Duros vazhdon ngjitjen, Flamurtarin rigjen fitoren

Sport Ekspres — Fri, 26 Oct 2018 14:03:08 +0000

Kampionët në fuqi të Dritës kanë fituar ndeshjen e katërt radhazi dhe vijojnë të ngjiten në tabelën e klasifikimit. Sot gjilanasit kanë bërë detyrën në transfertë kundër KEK-ut të vendit të fundit, duke fituar 1-2. Ka qenë sulmuesi Betim Haxhimusa ai që ka vendosur fatet e ndeshjes, duke shënuar në fillim dhe në fund të takimit.

Rikthehet te fitorja edhe Flamurtari, që ka mposhtur skuadrën e Ferizajt në transfertë. Vendasit shënuan të parët me anë të Berbatovcit dhe pjesa e parë u mbyll 1-0. Krasniqi për kuqezinjtë barazoi shifrat në të 55’, ndërkohë që Zylfiu e çoi rezultatin në 1-2 për skuadrën nga Prishtina.

Tre minuta nga fundi Krasniqi shënoi edhe golin e tretë, ndërkohë që më pas Mazrekaj goli i Mazrekajt pati vetëm vlera statistikore. Gjithçka u mbyll me rezultatin 2-3 për miqtë. Ballkani ka marrë tre pikë me vlera në shtëpi me Lirinë e Prizrenit. Manevski ishte autor i golit të vetëm të këtij takimi, që u mbyll 1-0.

IPKO SUPERLIGA – Java 12

Ferizaj – Flamurtari 2-3
Shënues: Berbatovci 28’, Mazrekaj 89’ / Krasniqi 55’, 87’, Zylfiu 68’
KEK-u – Drita 1-2
Shënues: Haxhimusa 7’, 94’
Ballkani – Liria 1-0
Shënues: Manevksi 80’

Trepça ’89 çmonton Lirinë, Drenica Flamurtarin

Sport Ekspres — Tue, 16 Oct 2018 14:58:41 +0000

U luajtën dy ndeshjet e para të javës së 10-të në elitën e futbollit në Kosovë. Drenica dhe Trepça ’89 morën fitore të thella në transfertë. Këta të fundit mposhtën me rezultatin 0-4 Lirinë e Prizrenit, në një ndeshje që nuk pati asnjë gol në 45 minutat e para.

Mirçevski ishte ai që zhbllokoi ndeshjen në minutën e 47, ndërkohë që në minutat e fundit fundit skuadra e Gugash Maganit gjeti edhe tre herë të tjera rrugën e rrjetës. Muja, Hyseni dhe Manaj ishin autorët e golave.

Në Prishtinë Flamurtari u mund keq nga Drenica. Dajaku dhe Uka shënuan dy herë në pjesën e parë, duke bërë që praktikisht ndeshja të mbyllej. Mustafa shënoi me fillimin e pjesës së dytë dhe me rezultatin 0-3 Drenica iu gëzua fitores dhe tre pikëve.

IPKO SUPERLIGA – JAVA 10

Flamurtari-Drenica 0-3
Shënues: Dajaku 21’, Uka 26’, Mustafa 46’
Liria-Trepça ‘89 0-1
Shënues: Mirçevski 47’, Muja 85’, Hyseni 89’, Manaj 94’

Konfirmohen miqësoret, Tirana në fushë që nesër

Sport Ekspres — Tue, 24 Jul 2018 10:47:31 +0000

Tirana, edhe pse u mendua fillimisht që do zhvendosej jashtë vendit për të zhvilluar fazën përgatitore, po përgatitet në kryeqytet. Bardheblutë e drejtuar nga braziliani Ze Maria janë grumbulluar në periferi dhe kanë programuar edhe disa ndeshje miqësore.

Klubi bardheblu ka njoftuar edhe se kush do të jenë kundërshtarët e tyre. Nesër do të zhvillohet e para kundër Apolonisë prej orës 17:00. Më pas rivali do të jetë Flamurtari i Prishtinës dhe takimi i fundit do zhvillohet kundër Prishtinës së drejtuar nga Mirel Josa.

“Bardheblutë po qëndrojnë të grumbulluar në një nga hotelet e kryeqytetit dhe faza përgatitore po zhvillohet në kompleksin “Skënder Halili” në Tiranë. Gjatë kësaj periudhe do të zhvillohen tre takime miqësore në stadiumin “Selman Stërmasi”, dy prej tyre me skuadra nga Kosova.

Sfida e parë do të luhet përballë Apolonisë së Fieri në datën 25.07.2018 në orën 17:00. Dy përballjet e tjera do të zhvillohen ndaj Flamurtarit të Prishtinës në datën 29.07.2018 në orën 18:00 dhe e fundit në datën 05.08.2018 përballë Prishtinës, sfidë e cila do të luhet nën dritën e prozhektorëve në orën 20:00”, shkruhet në njoftimin e Tiranës.