“Faleminderit për mundësinë”, një mesfushor ikën nga Laçi

Sport Ekspres — Sat, 13 Jul 2019 09:36:20 +0000

Laçi ka humbur një nga titullarët e dy sezoneve të fundit. Mesfushori Fjoart Jonuzi ka bërë publik largimin e tij nga kurbinasit dhe pritet ta vazhdojë karrierën në tjetër ekip. Futbollisti i formuar te Kukësi iu bashkua bardhezinjve janarin e vitit 2016 dhe dha kontributin e tij në shpëtimin prej rënies nga Superiorja.

Jonuzi numëron rreth 90 ndeshje me Laçin, katër prej të cilave në kualifikueset e Europa League një vit më parë. Mesfushori ikën me falënderime. Me bardhezinjtë ai gjeti hapësirat që deshi dhe pati mundësinë të tregojë vlerat e tij në fushën e blertë.

“Nga sot nuk jam më pjesë e ekipit të K.F Laçit. Ishte kënaqësi që isha pjesë e juaja, falënderoj presidentin dhe stafin teknik për mundësinë e dhënë. Falënderoj të gjithë bashkëlojtarët dhe tifozët për mbështetjen e tyre. Ju uroj suksese në Europa League dhe në vazhdimësi”, njofton Jonuzi përmes rrjeteve sociale.

Sekretet e Laçit, Jonuzi: Ja porositë e profesorit, ishim pa fat

Sport Ekspres — Wed, 03 Apr 2019 14:43:20 +0000

Fjoart Jonuzi u shpall lojtari i ndeshjes në takimin Laçi-Tirana. Mesfushori asistoi te goli i dytë i Ccokajt, ndërkohë që në emisionin “Gol pas Goli” në Supersport deklaroi: “Kemi bërë një ndeshje shumë të mirë. Na ka rritur harmoninë në ekip. E kemi përjetuar mirë. Po të ecim më këtë ritëm, po të bëjmë këtë ndeshje, jemi në rrugë të mbarë për kampionatin .

“Starova do lojë ofensive, por edhe mbrojtje të mirë. Jemi më të kujdesshëm. I përgatit mirë ndeshjet e vështira, ka eksperiencë. Edhe fryma e grupit që krijon është pozitive”, shtoi mesfushori kuksian.

“Eliminimi? Normal që na vjen keq, pasi të shkosh 2-0 dhe të humbësh raste, por edhe penalltia e Domgjonit. Bëmë edhe shtyllë dhe nuk na ndihmoi fati. Ia kemi bërë hyzmetin, por ky është futbolli”.

“Detyrat për mesfushën? Sulmuesit duhet të kapnin topin e parë, ne topin e dytë. Besoj e bënë mirë. Nuk ke kohë për qarkullim topi. Duhet lojë e shpejtë dhe topa të gjatë. Pika jonë e fortë ishte që ne morëm topat e dytë”.