Mëziu: Korabit i duhen përforcime, ju tregoj planin!

Sport Ekspres — Thu, 06 Jun 2019 15:23:01 +0000

Skuadra e Korabit jo vetëm që arriti të mbijetojë në Kategorinë Superiore, duke qenë pjesë e zonës Play-off në Grupin A të Kategorisë së Parë, por gjatë fazës së tretë aktivizoi shumë elementë të rinj dibranë. Sipas Presidentit të kësaj skuadre, Femi Mëziu, kjo ka qenë strategjia në tre-katër sezonet e fundit, dhe për SportEkspres.com ai deklaron se kështu do vazhdohet edhe gjatë merkatos për sezonin e ri.

LOJTARËT – “Korabi e ka grupin e lojtarëve dhe stafin teknik që mbyllën sezonin e kaluar, pasi ata janë nën kontratë edhe për një sezon dhe janë të konfirmuar. Duke përjashtuar mesfushorin Gresild Lika, që i ka përfunduar kontrata, të gjithë të tjerët do jenë pjesë e Korabit edhe këtë sezon të ri. Skuadra do jetë pushim deri në datën 9 korrik, sepse më 10 korrik ne kemi menduar që të rinisim përgatitjet për sezonin e ri”.

SEZONI I RI – “Skuadra jonë i ka të nevojshme përforcimet për sezonin e ri, sepse kemi 3-4 lojtarë që nuk na kanë bindur në sezonin e kaluar. Për t’i zëvendësuar këta, ne kemi menduar një strategji ndryshe, pasi po kërkojmë elementë të rinj dibranë, për t’i dhënë Korabit më shumë bazë nga akademia”.

AGRON KAJA

Ndryshohet stadiumi, Mëziu: Ja pse me Dinamon nuk luajmë në Peshkopi

Sport Ekspres — Thu, 02 May 2019 13:53:13 +0000

Ndeshja e javës së 26-të mes Korabit e Dinamos në zonën Play-off të Grupit A, e planifikuar që të luhej në Dibër, ka ndërruar stadium. Drejtuesit e të dy skuadrave janë dakordësuar që kjo ndeshje të luhet në stadiumin e Kamzës, ditën e shtunë në orën 17:00.

Në një postim të klubit kryeqytetas në rrjetet sociale, shkruhej se shkak është bërë stadiumi i Korabit që nuk është në një gjendje të mirë. Presidenti i klubit dibran, Fehmi Mëziu, deklaron për SportEkspres.com se kjo ishte kërkesa e tyre në FSHF.

“Duke qenë se fusha jonë ka patur shumë ngarkesë këtë stinë dimri që kaluam, njëherësh edhe nga ndeshjet e shumta, tapeti i fushës është dobësuar shumë. Ky stadium është ndërtuar në vitin 1973 dhe që atëhere askush nuk ka vënë dorë në ambientet e tij dhe në fushën e lojës. Kjo është arsyeja pse ne vendosëm që me Dinamon të luajmë në një fushë tjetër. Kamza ishte alternativa më e mirë”, thekson presidenti i skuadrës dibrane, Fehmi Mëziu.

Ndërsa për ndeshjen me Dinamon, ai deklaroi se synimi i tyre është i dyfishtë: aktivizimi e disa futbollistëve të rinj dhe arritja e fitores. “Tashmë ne e kemi mbyllur synimin e këtij sezoni e kryesisht në fazën e tretë kemi aktivizuar disa futbollistë të rinj, të cilët do na shërbejnë për sezonin tjetër. Por, synimi ynë ndaj Dinamos është fitorja dhe për këtë unë jam i bindur se do ta arrijmë”.

AGRON KAJA