Në Grupin A bie në sy sfida midis Monakos dhe Atletikos së Madridit, ndërsa gjermanët e Dortmundit do përballen në transfertë me belgët e Bryzhit.

Përballje shumë e fortë do të jetë dhe ajo mes Interit dhe Totenhemit. Ndeshja e Grupit B zhvillohet në “San Siro” dhe të dy ekipet do të tentojnë fitoren dhe tre pikët e para në grup, ndërsa Barcelona e nis në shtëpi me PSV.

Grupi C e nis me një super ndeshje. Liverpul-PSG është tëra për t’u ndjekur, ndërsa të dy trajnerët: Jurgen Klop dhe Tomas Tuhel kanë drejtuar Dortmundin më parë dhe do të kenë një tip “derbi” midis tyre. Nga ana tjetër, Napoli i Ançelotit do të udhëtojë drejt Beogradit për të marrë tre pikët e para përballë Cërvena Zvezdës.

Ndeshje të forta dhe të ekuilibruara dhe në Grupin D. Shalke pret Porton, ndërsa në Stamboll pritet një duel i zjarrtë turko-rus. Gallatasarai kërkon ta nisë me fitore, por nuk do e ketë aspak të thjeshtë përballë Lokomotivës së Moskës.

Ndeshje të bukura dhe interesante do të na ofrojë dhe dita e mërkurë. Bajerni e nis Grupin E në transfertën portugeze përballë Benfikës, ndërsa Ajaksi pret AEK-un e Athinës në Holandë.Mançester Siti është pjesë e Grupit F dhe djemtë e Guardiolës do e nisin rrugëtimin e tyre në Champions përballë Lionit në stadiumin e tyre. Ndeshja nuk është e lehtë, por Siti tenton vetëm fitoren. Përballje e fortë në Ukrainë, ku Shaktjori vendas do të presë debutuesit gjerman të Hofenhajmit, të cilët luajnë për herë të parë në fazën e grupeve.

Grupi G e nis direkt me një ndeshje të madhe. Reali i Madridit pret Romën në “Santiago Bernabeu”. Lopetegiu dëshiron ta nisë me fitore, ndërsa ekipi i Di Françeskos do të kërkojë të bëjë të pamundurën për të ndaluar Kampionët e Europës në fuqi, ndërsa në sfidën tjetër, Viktoria Pilzën pret CSKA e Moskës në një ndeshje të ekuilibruar dhe të fortë.

Ndeshje të forta dhe në Grupin H. Ronaldo rikthehet në Spanjë, ndërsa Juventus e nis nga fusha e Valencias rrugëtimin e saj drejt fitimi të Champions. Ndeshje aspak e lehtë, sepse Valencia është rikthyer në fazën e grupeve mbas një mungese të gjatë dhe ka një ekip shumë të fortë. Murinjo dhe Mançesteri i tij do të udhëtojnë drejt Zvicrës, aty ku do të përballen me debutuesit e Jang Bojs.

E MARTË, 18 SHTATOR

GRUPI A

Klub Bruzh-Borusia Dortmund 21:00

Monako-Atletiko-Madrid 21:00

GRUPI B

Barcelona-PSV 18:55

Inter-Totenhem 18:55

GRUPI C

Cërvena Zvezda-Napoli  21:00

Liverpul-PSG 21:00

GRUPI D

Shalke 04-Porto  21:00

Gallatasarai-Lokomotiva e Moskës  21:00

E MËRKURË, 19 SHTATOR

GRUPI E

Ajaks-AEK Athinë 18:55

Benfika-Bajern Mynih 21:00

GRUPI F

Shaktjor Donjetsk-Hofenhejm 18:55

Mançester Siti-Lion 21:00

GRUPI G

Real Madrid-Roma 21:00

Viktoria Pilzën-CSKA Moskë 21:00

GRUPI H

Valencia-Juventus 21:00

Jang Bojs-Mançester Junajtid 21:00