Katër janë emrat që gjenden në blloqet e Fabio Paratiçit. Fillojmë me Sergej Milinkoviç-Saviç. Drejtori sportiv i bardhezinjve e vlerëson 70-80 milionë euro dhe dëshiron të fusë ndonjë lojtar në tratativën me Lotiton për të ulur çmimin.

Presidenti i Lacios kërkon më shumë. Të bësh negociata me të është tmerrësisht e vështirë, por Paratiçi do tentojë deri në fund për të gjetur marrëveshjen.

Pol Pogba është kandidati i radhës. Juventus dëshiron ta rikthejë, por kampioni i botës kushton shumë. Reali e ka rritur ofertën deri në 120 milionë euro, ndërsa Mançester Junajtid kërkon 150 milionë euro.

Kalojmë te Adrien Rabiot. Kjo është tratativa më e thjeshtë, sidomos në aspektin ekonomik. Francezi është lojtar i lirë, pra nuk kushton. Ai vetë e ka pranuar se po negocion me kampionët e Italisë. Mjafton një telefonatë e Paratiçit dhe akordi arrihet menjëherë.

I fundit është Tanguj Ndombele. Rivaliteti për të është i madh. Presidenti i Lionit është shprehur se dëshiron t’ia japë Juventusit, por kjo është një lojë e tij. Aulas kërkon të hapë një ankand, që do të sillte rritjen e çmimit të kartonit të 22-vjeçarit.

Bardhezinjtë nuk e kanë problem një shumë të tillë dhe janë gati për të paguar, në mënyrë që të zyrtarizojnë trajnerin e ri. Paratiçi do të marrë informacione edhe për Emerson Palmierin e Çelsit e Kieran Tripier të Totenhemit. I pari synohet për krahun e majtë dhe mund të vijë bashkë me trajnerin, ndërsa anglezi i Spurs pëlqehet për krahun e djathtë të mbrojtjes.

Rikthehemi te Sarri. Mediat italiane janë të bindura që Abramoviç do e lirojë ish-trajnerin e Napolit që të rikthehet në Serie A. Manjati rus ka zgjedhur Frenki Lampard si trajnerin e ri dhe negociatat me ish-mesfushorin e madh kanë nisur.

Po nëse nuk arrihet akord me Sarrin? Juventusi do të kalojë te plani B. Ai quhet Zhoze Murinjo. Një opsion që kundërshtohet me forcë nga shumica e tifozërisë. Ata shpresojnë që Paratiçi të mos dalë “blof” dhe të rikthehet në Itali bashkë me Mauricio Sarrin, i cili pritet të jetë trajneri i ri i kampionëve të Italisë.

Gjatë ndeshjes së eliminatoreve të Euro 2020 të zhvilluar në Turqi midis vendasve dhe Francës, Fabio Paratiçi është takuar me kampionin e botës.

26-vjeçari i ka konfirmuar drejtorit sportiv të Juves dëshirën e tij të madhe për t’u rikthyer. Për ta realizuar një transferim të tillë duhet bërë një shitje më parë, në mënyrë që të mos ketë probleme me FPF (fair-play financiar).

Tre janë kandidatët për t’u larguar: Kanselo, Dagllas Kosta dhe Dibala. I pari mund të përfundojë te Mançester Siti për shumën e 60 milionë eurove, ndërsa braziliani kërkohet nga klubi tjeter i Mançesterit.

Edhe Dibala është pranë largimit, por ardhja e Sarrit në stol mund të ndryshojë gjithçka. Trajneri e pëlqen shumë argjentinasin dhe mund t’i kërkojë klubit që ta heqë nga merkato dhe ta mbajë në ekip.

“Ne kemi një listë trajnerësh për të vlerësuar. Duhet t’i kemi idetë e qarta dhe po punojmë për këtë. Nuk mund të zbuloj më shumë, por çdo gjë është në rregull. Sarrin e ka marrë malli për Italinë? Ka thënë një të vertetë të madhe. Këtu ushqimi është shumë i mirë. Atë nuk e duan fansat? Nuk e kam dëgjuar diçka të tillë, nuk e di. Komunikim me Kiezën? Po presim për trajnerin e ri dhe më pas do e shohim situatën e tij. Pogba? E thashë, presim trajnerin”, u shpreh Fabio Paratiçi.

Sipas fjalëve të kësaj medie Paratiçi ka pasur një takim me drejtorin sportiv të Ajaksit, Mark Overmars, i cili i ka deklaruar drejtorit të “Zonjës” se De Ligt është duke mbyllur tratativat me Barcelonën dhe është e kotë të vazhdoni të luftoni për të. Ai ka zbuluar edhe koston e operacionit. 80 milionë euro do të shpenzojnë katalanasit për të marrë holandezin.

KIEZA – “Sot nuk është një ditë për të folur për të ardhmen, kemi kohë për të folur për të. Kieza? Është lojtar i mirë dhe një objektiv, por nuk kisha nevojë ta shihje atë sot pasi i dimë cilësitë e tij.”

DIBALA – “Është një lojtar i Juventusit dhe do të mbetet i tillë.”

Menjëherë ka ardhur replika e Xhuzepe Marotës, administratorit të deleguar të klubit zikaltër, i cili i është përgjigjur juventinit në prononcimin e dhënë për “Rai Sport”.

“Këto janë deklarata jashtë logjike dhe të papërshtatshme. Nuk kemi thënë kurrë që duam ta shesim Ikardin. Mauro është një futbollist i madh, i cili ka bërë mirë me Interin dhe do vazhdojë të bëjë mirë dhe në të ardhmen. Sa i përket deklaratës së Paratiçit, i bie që të them të njëjtën gjë për Dibala: do të shohim situatën e tij te Juventusi. Ikardi është një futbollist i Interit. Në këtë periudhë na presin ndeshje të rëndësishme dhe ne duhet të mendojmë vetëm për këto përballje”, komenton drejtuesi i Interit.

Fabio Paratiçi, drejtori sportiv i klubit italian, vlerëson ekipin e Diego Simeones dhe ndalet dhe te situata e Mauro Ikardit. E ardhmja e sulmuesit është larg Milanos dhe Juventusi mund të jetë destinacioni i tij i ardhshëm. Paratiçi nuk i kursen fjalët e mira për Paulo Dibala dhe e mbyll me një koment për të ardhmen e trajnerit Alegri prononcimin e dhënë për “Radio 1”.

CHAMPIONS – “Fitimi i Champions Ligës nuk është një obsesion, por një stimul. Jemi në formë të mirë dhe kundër Atletikos do të jenë dy ndeshje impenjative dhe të vështira. Çdo vit përpiqemi të jemi konkurrues në çdo kompeticion. Për të fituar Champions-in nevojiten shumë gjëra, madje dhe pak fat, ndërsa ndeshjet vendosen nga detaje.”

ATLETIKO – “Nuk besoj se duhen pritur këto dy përballje për të kuptuar se sa vlen Juventusi në Europë. Në vitet e fundit kemi luajtur dy finale kundër Barcelonës dhe Realit të Madridit, duke treguar një futboll të nivelit të lartë. Pastaj është e qartë që çdo vit pritshmëritë rriten.”

IKARDI – “Ikardi është një futbollist i Interit, jemi në shkurt dhe kemi shumë ndeshje të rëndësishme për të përgatitur. Këto pyetje duhen bërë në verë. Ne kryem një operacion informimi për të ardhmen e Ikardit dhe nëse ne ishim një ekip i pëlqyer për të. Kjo është një gjë që bëhet gjithmonë në periudhë merkato, por nuk kishim qëllim të sillnim shqetësime. Kohët e fundit nuk kemi patur asnjë kontakt me zonjën Ikardi.”

DIBALA – “Paulo ka luajtur pothuajse gjithmonë, është një lojtar i yni dhe pavarësisht 25 viteve, ai ka treguar shumë gjëra pozitive. Ai duhet të përmirësohet për t’u bërë simboli i Juventusit dhe jam i sigurt që do t’ia dalë. I ka cilësitë morale dhe teknike për një gjë të tillë.”

ALEGRI – “Projektet janë më të rëndësishme se fitoret dhe humbjet dhe këtë gjë po e demonstrojmë prej 9 vitesh. Maks është pjesë e projektit tonë dhe jam shumë i bindur që do të vazhdojë të qëndroje me ne, pavarësisht ecurisë në Champions Ligë.”

Gjithçka i ngjan filmave me spiunë: sekrete, informacione të rezervuara dhe goditja e befasishme, duke fituar konkurrencën me rivalët. Por, ndodhin dhe gabime. Një i tillë i ka ndodhur Fabio Paratiçit, drejtorit sportiv të Juventusit.

Zyrtari bardhezi ka qenë duke drekuar në një restorant në Milano dhe kur është larguar ka harruar diçka. Një fletë plot emra dhe shifra, që në fakt kishte të shkruar objektivat e klubit torinez.

Gjithçka zbulohet nga “Il Tempo”, që ka arritur të sigurojë letrën e “shtrenjtë”. Sipas gazetës romane një tifoz i pranishëm në restorant ka njohur Paratiçin, e ka vëzhguar atë dhe ka marrë fletën e harruar, sapo juventini është larguar për t’ia dërguar më pas gazetës.

Po çfarë mbante letra? Emrat e kërkuar nga Juventusi dhe çmimet përkatëse që i vlerësonte Paratiçi.Zaniolo i Romës (i vlerësuar 40 milionë euro), Kieza i Fiorentinës (50 milionë euro), Romero i Xhenoas (20 milionë) dhe Tonali i Breshias (20 milionë euro). Në listë ka dhe disa lojtarë të rinj si Szoboszlai i Salsburgut.

Paratiçi mendon një huazim me të drejtë blerje për 10 milionë euro për fantazistin hungarez, ndërsa Zenaro i Venecias është një tjetër talent që pëlqehet.

Në fund objektivi kryesor: Sergej Milinkoviç-Saviç i Lacios. Serbi mendohet si zëvendësuesi i Pjaniç dhe sulmi për të do të nisë në fund të sezonit.

Afrimi i Kristiano Ronaldos ka rritur entuziazmin, besimin, kualitetin dhe eksperiencën e ekipit, që ka bërë një nisje fantastike të sezonit. 10-të ndeshje, të gjitha fitore. Alegri ka dhe një stol të fortë, çka i shton alternativat. Pavarësisht nisjes së mirë dhe formës fantastike, drejtuesit e Juventusit po mendojnë për përforcimin e skuadrës.

Fabio Paratiçi, drejtori sportiv i klubit, është takuar para disa ditësh me Mino Rajolën, ndërsa ka programuar një tjetër takim me të. Marrëdhëniet e juventinit me menaxherin e famshëm janë shumë të mira dhe palët do të ulen në tryezë për të zgjidhur shumë çështje. Blerja, largime dhe rinovime kontratash. Katër janë temat kryesore, duke nisur nga Pol Pogba, Moize Kin, Blaise Matuidi dhe Matijs De Ligt.

Francezi i Mançester Junajtid është ëndrra e bardhezinjve dhe lojtari do të ishte i lumtur të rikthehej në Torino. Kjo tratativë është pothuajse e pamundur të kryhet në janar dhe po punohet për afrimin e tij në verë.

Ndryshon situata sa i përket talentit 18-vjeçar. Juventus e vlerëson shumë sulmuesin, kërkon të rinovojë me të, për ta huazuar më pas. Kontrata e Kin skadon në vitin 2020, ndërsa çmimi i kartonit të tij sillet rreth shumës së 20 milionë eurove.

Një tjetër lojtar të cilit i skadon kontrata në vitin 2020 është Blaise Matuidi. Palët dëshirojnë të vazhdojnë bashkëpunimin, por nuk duan të nxitohen. Mendohet se francezi do të rinovojë në fillimin e vitit të ri, duke vazhduar të jetë një pikë e fortë në mesfushën e Alegrit.

Për ta mbyllur me talentin e mbrojtjes së Ajaksit. 19-vjeçari De Ligt është një emrat më të kërkuar, me Juventusin që e pëlqen shumë. Bardhezinjtë kërkojnë një mbrojtës, ndërsa Paratiçi po e ndjek prej kohësh holandezin. Qëllimi është arritje e një akordi me lojtarin për ta transferuar në verë në Torino. Të gjithë lojtarët e sipër përmendur menaxhohen nga Rajola dhe takimi i Paratiçit me të do të zbardhë shumë gjëra dhe do të qartësojë gjithçka.

Prezenca e zyrtarit bardhezi, i cili u kap nga kamerat e “Canal Plus”, ka bërë që tifozët të nisin e ëndërrojnë. Juventus është një nga klubet e interesuara për mesfushorin Adrien Rabiot, të cilit i skadon kontrata në verë me ekipin francez. Një tjetër emër që qarkullon është Marko Verrati, ndërsa ëndrra e ndaluar është Kilian Mbape.

Blerja e Kristiano Ronaldos bën që të mos përjashtohet asnjë lëvizje e bujshme në të ardhmen, ndërsa Juventus është gati për të përgatitur bombën e radhës në merkato.