Presidenti Naim Qarri është ende në pranga dhe klubi është në kaos, ndërsa tashmë largohet edhe Drejtori i Përgjithshëm Fabio Kordela, i cili me një mesazh për mediat ka zyrtarizuar “divorcin”.

“Nuk e imagjinoja kështu dhe nuk doja që gjërat të shkonin kështu, por pas asaj që ndodhi në ndeshjen e fundit shtëpiake, deklaroj se kam dhënë dorëheqjen si Drejtor i Përgjithshëm i Kamza FC, pasi ngjarja e fundit nuk është në një linjë me vizionin tim për futbollin.

“Futbolli duhet të jetë shembull për fëmijët tanë, një vend ku ata të kenë mundësi të marrin vlerat e duhura, një vend për moral dhe integritet.

“Nuk shkohet në stadium për të bërë luftë dhe për të përhapur urrejtje, boll luftëra ka anembanë dhe nuk kemi nevojë për të tjera.

“Shpresoj që tifozët ta kuptojnë pozicionin tim dhe do doja t’i falënderoja, ashtu si falënderoj klubin për mundësinë që më ofroi. U uroj më të mirën në të ardhmen e afërt”.

Fabio Kordela ka punuar në shumë klube anembanë botës dhe para disa muajsh nisi një projekt ambicioz te Kamza, por shpejt projekti u braktis nga klubi, për shkak të krizës financiare.

“Klubi bënë të ditur akordin me Drejtorin e Përgjithshëm Fabio Kordela, i cili do të prezantohet më datën 20 Nëntor në ambientet tona. Kordela është një njëri me shumë eksperiencë në botën e futbollit ku për herë të fundit ka qenë drejtor në skuadrën e Honved të Hungarisë, duke patur sukses edhe në Kupat e Europës”, njoftonte Kamza tre javë më parë

Sikurse edhe ishte parashikuar, Kordela ka mbërritur në Shqipëri dhe pritet që të prezantohet para mediave. Në janar, së bashku me drejtorin sportiv Andi Matraxhiu dhe presidentin Naim Qarri, italiani do të punojë për përforcimin e Kamzës, në mënyrë që të shmanget rënia prej Superiores.

Kordela do të prezantohet në ambientet e klubit më datë 20 nëntor.  Gjatë viteve të fundit Kordela ndërmori një pauzë nga bota e futbollit për t’u fokusuar në biznesin e verës, ku prej vitesh është pronari i një kantine që mban emrin e tij.