Huan Matës i mungonin fjalët pas këij dështimi. Mesfushori i drejtohet tifozëve dhe zhgënjimin e tij të madh e shpreh në vetëm pak fjalë. “Ju meritoni më shumë. Nuk ka nevojë për fjalë”, shkruan spanjolli.

Eshli Jang i bie më gjatë. Ai mundohet të gjejë fajtorët dhe thotë se duhet të largohen disa kohë nga futbolli për t’u kthyer më të fortë.

“Kjo nuk ndodhi nga mungesa e përpjekjes dhe përqëndrimit. Nuk jam i sigurt se cili është shkaku. Mund të jenë shumë gjëra bashkë, por nuk është çasti për t’u marrë me këtë. Është një zhgënjim i madh. Të pushojmë pak kohë dhe të pregatitemi për t’u kthyer më të fortë. Një klub si ne nuk duhet të luftojë për një vend në Champions, por të fitojë trofe”, u shpreh 33-vjeçari.

Zhoze Murinjo nuk është më trajner i ekipit dhe Eshli Jang kërkon të shohë përpara, duke nisur që nga ndeshja e sotme. Ekipi duhet të ngrihet në këmbë dhe të fillojë të fitojë.

“Kemi kaluar një javë të vështirë, por duhet të shohim përpara. Duhet të përqendrohemi te ndeshja me Kardifin, sepse kemi nevojë të rikthehemi te fitorja. Duhet të zbresim në fushë, të përpiqemi të fitojmë, të nderojmë bluzën që mbajmë veshur dhe këtë klub fantastik, më të mirin në botë. Ka ardhur momenti të ringrihemi në këmbë dhe duam të grumbullojmë sa më shumë pikë në këtë periudhë intensive ndeshjesh”, përfundon Eshli Jang