Ervis Kraja

Vllaznia B e “blinduar” ndaj Tërbunit, Kraja: Të fitojë më i miri!

Sport Ekspres — Sat, 11 May 2019 12:55:20 +0000

Vllaznia B luan një transfertë të vështirë në Pukë nesër. Tërbuni thuajse e ka siguruar ngjitjen në Kategorinë e Parë, pasi i duhet vetëm një pikë për t’i mbyllur llogaritë. Ervis Kraja, trajneri i Vllaznisë B, duket se po e “shqetëson” skuadrën pukjane. Për këtë transfertë ai ka marrë 5 përforcime nga skuadra e parë e Vllaznisë.

“Ne e kemi vlerësuar shumë transfertën tonë në Pukë dhe ndaj Tërbunit të dielën do të kemi 5 përforcime nga skuadra e parë e Vllaznisë: Kruja, Pusi, Gurishta, Krymi dhe Hajdari. Pa harruar edhe pjesën tjetër që ka Vllaznia B, me Borshin, Ruçin e disa të tjerë lojtarë titullarë të këtij sezoni. Uroj që kjo ndeshje të ketë vëmendjen e duhur në të gjitha drejtimet”, shprehet Kraja.

Mër tej ish-qendërmbrojtësi shton: “Ky vlerësim i yni nuk do të thotë se jemi armiq me Tërbunin. Do të shkojmë për të luajtur një derbi të pastërt e të bukur dhe në fund të fitojë më i miri. Skuadra pukjane është një hap drejt ngjitjes në Kategorinë e Parë, por ne nuk e mbivlerësojmë. Shpresoj që të ketë shumë tifozë pukjanë në këtë sfidë dhe pres një ndeshje shumë të bukur”.

AGRON KAJA

Kraja sfidon Tërbunin: Ndeshje e veçantë, duam maksimumin

Sport Ekspres — Tue, 07 May 2019 11:53:49 +0000

Vllaznia B mposhti në Shkodër Gramshin rival të Tërbunit, ndërsa këtë javë përballet me pukjanët që kryesojnë me gjashtë pikë më shumë se Luzi. Trajneri kuqebluve, Ervis Kraja, deklaron se shkodranët kanë synim që në këtë sfidë të fitojnë.

“Ne shikojmë punën tonë dhe në Pukë do shkojmë të zhvillojmë një lojë të bukur që të marrim maksimumin, në respekt edhe të kampionatit. Kjo do jetë një ndeshje e veçantë, sepse Tërbuni e kryeson Grupin A dhe thuajse është në Kategorinë e Parë. Atyre edhe barazimi u shërben për të konfirmuar zyrtarisht ngjitjen, ndaj besoj se do jetë sfidë e bukur dhe e vështirë për të dyja skuadrat”, u shpreh Kraja për SportEkspres.com.

Shkodranët presin përforcime edhe nga Vllaznia A, që këtë javë e ka pushim në Kategorinë e Parë. “Do marrim edhe disa futbollistë nga Vllaznia A, por emrat do i mësojmë në fundjavë. Kjo tregon edhe seriozitetin tonë për këtë përballje, njëherësh edhe vlerësimin e garës. Ne u penalizuam vetëm pas humbjes me Luzi 2008, sepse do të ishim rivalë për kreun”.

AGRON KAJA

Vllaznia B e “blinduar” ndaj Luzit, përforcime nga ekipi i parë

Sport Ekspres — Sat, 23 Mar 2019 17:18:48 +0000

Vlerësimi i shkodranëve të Vllaznisë B për ndeshjen e javës së 17-të me Luzi 2008, duket i madh. Drejtuesit e klubit të futbollit shkodran kanë menduar që për këtë sfidë ta përforcojnë skuadrën e tyre me lojtarë nga skuadra e parë, Vllaznia, që këtë javë është pushim.

Për SportEkspres.com këtë e konfirmon vetë trajneri i Vllaznisë B, Ervis Kraja, i cili thekson se pretendimet e tyre janë për t’u ngjitur në tabelën e klasifikimit. Një triumf i shkodranëve do të ishte një asist edhe për Tërbunin, ekip që synon ngjitjen në Kategorinë e Parë.

“Ne kemi pretendimet tona deri në mbylljen e këtij sezoni dhe çdo ndeshje e kemi vlerësuar maksimalisht. Edhe ndeshjen e ditës së diel me Luzin kështu e kemi vlerësuar. Madje do t’u thoja se do të kemi përforcime edhe nga Vllaznia A, që e ka pushim këtë javë. Synimi ynë është vetëm fitorja në këtë ndeshje, pas së cilës Vllaznia B do të hyjë realisht në grupin e skuadrave pretendente për kreun”, u shpreh trajneri i Vllaznisë B, Ervis Kraja.

AGRON KAJA

Projektohen drejtuesit e rinj të Vllaznisë

Sport Ekspres — Tue, 17 Jul 2018 16:27:53 +0000

Kuqeblutë kanë gati drejtuesit e rinj. Pas një periudhe të gjatë pauze, pritet të jenë bëhen lëvizjet e para. Që prej ndeshjes së fundit me Skënderbeun, futbollistët janë tërësisht pushim, por më e keqja është se asnjëri prej tyre nuk ka as më të voglin njoftim për të ardhmen e Vllaznisë. Një gjë e tillë vjen nga fakti se për momentin asnjë prej strukturave drejtuese të klubit Vllaznia nuk funksionon.

Kuqeblutë janë pa administrator, pa drejtor sportiv dhe pa trajner. Ndërkohë edhe Bordi Mbikëqyrës i Vllaznisë, nisur edhe nga dorëheqja e ndonjërit prej tyre, nuk funksionon. Një gjendje e tillë nuk do të zgjasë shumë. Sinjalet pozitive u dhanë që në mbledhjen e kaluar të Asamblesë së Klubit të Futbollit Vllaznia, ku krahas miratimit të aktivitetit financiar, u fol edhe për të ardhmen.

Tashmë pritet mbledhja e ardhshme e Këshillit Bashkiak, ajo e datë 19 korrik, që pritet të miratojë edhe vendet bosh në Bord. Më pas do të nisin edhe emërimet e reja të drejtuesve të klubit Vllaznia. Nga sa bëhet e ditur, brenda strukturave të Bashkisë Shkodër, në konsultim të plotë edhe me kryebashkiaken Voltana Ademi, emrat për plotësimin e vendeve bosh tashmë janë projektuar.

Gjithnjë nga burime të brendshme në bashkinë Shkodër, mësohet se emri që pritet të zëvendësojë administratorin e dorëhequr Astrit Gjyrezi, është ish-futbollisti shkodran Suad Lici. Sipas rregullores, emërimi përcillet nga ana e Bordit Mbikëqyrës Vllaznia. Në vijim, gjithnjë sipas rregullores, administratori i ri Lici pritet të emërojë në cilësinë e drejtorit sportiv Alban Nezirin. Ky post më herët është mbajtur nga Eugent Zeka.

Në lidhje me postin e trajnerit të Vllaznisë, emri i propozuar thuhet se është ai i Ervis Krajës, trajner ky që ka drejtuar Vllazninë B sezonin e kaluar, por që e mori edhe drejtimin e kuqebluve në dy javët e fundit të kampionatit pas dorëheqjes së ish-trajnerit Ernest Gjoka. Lëvizjet e mundshme në fjalë pritet t’i hapin rrugë edhe ndërtimit të skuadrës së re që do të përfaqësojë Vllazninë në kampionatin e ardhshëm në Kategorinë e Parë. GASPËR MARKU