KUPA – “Objektivi ynë ky është, të vazhdojmë më tej. Ka një specifikë të veçantë Kupa, pasi ka 180 minuta dhe jo 90. Llogaritë bëhen pas ndeshjes së nesërme, ku duhet të luajmë me kujdes dhe të mos kalojmë në aventurë. Sepse kemi dhe ndeshjen e dytë, që të jep një mundësi korrigjimi. Duke qenë se luajmë ndeshjen e parë në shtëpi, duhet të jemi të kujdesshëm që mos t’i japim avantazh ekipit kundërshtar.”

LAÇI – “Laçi ka qenë dhe do të mbetet gjithmonë një ekip i vështirë për këdo. Është një ekip që ka disa vite që ka stabilitet si në lojë si në kontigjent brenda lojtarëve. I marrin maksimumin ekipit që kanë, dhe janë shumë të rrezikshëm. Kanë një luftë sportive të mirë dhe kanë një organizim brenda klubi që unë e njoh mirë, duke qenë se kam punuar një vit atje. Duhet ta marrim shumë në konsideratë, prandaj edhe them që nesër nuk duhet të kalojmë në aventurë.”

AGRESIVITETI I LAÇIT – “I druhemi. Do të përgjigjemi edhe ne me agresivitet. Duke qenë se në agresivitetin sportiv ata janë shumë të mirë edhe ekipi ynë duhet të jetë i përgatitur për një luftë sportive, duke qenë se ekipi përballë bën një anë të fortë markimi dhe tranzicion shumë të mirë.”

PROBLEMI I FINALIZIMIT – “Shpresojmë që mos ta vuajmë këtë pjesë dhe të jemi më konkret te pjesa e golit. Se sa do ta vuajmë do ta tregojë fusha dhe ndeshjet nuk janë në bazë parashikimesh që ta parashikojmë se do të na funskionojë faza e sulmit. Kemi pasur probleme dhe i kemi korrigjuar gjatë rrugës, shpresoj të ndodhi e njëjta gjë dhe me golin.”

NDESHJA PA TIFOZË – “Normal që ndikon. Çdo skuadër kënaqësinë e ka kur i jep kënaqësi dhe tifozit. Për më tepër kur tifozët ishin në rritje në ndeshjet e fundit dhe kanë qenë një plus dhe favor në mbështetje. Gjithsesi, këtë herë duhet të jemi më të përqendruar se çdo ndeshje tjetër, pasi pa tifozë ndeshja të vë si në gjumë. Kështu që, duhet të jemi më të përqendruar se çdo ndeshje.”

KRAHASIMI MES LAÇIT DHE FLAMURTARIT – “Nuk ka asnjë ndeshje të lehtë dhe ky kampionat po e tregon. Është një kampionat që nuk ka parashike. Aty ku po bëhen parashikime ndeshjet po dalin ndryshe. Nuk mund të them kush është ekip më i fortë dhe më i dobët. Ndeshja me Flamurtarin ishte një sukses, ndeshja me Laçin është një tjetër luftë dhe vështirësi tjetër. Nuk mund të bëj krahasime.”

FRYMA POZITIVE NË EKIP – “Është baza e sportit në përgjithësi. Morali i lartë, bashkëpunimi dhe harmonia që kanë me njëri-tjetrin, kjo gjë e jep rezultatin. Duhet të jemi shumë të kujdesshëm që të vazhdojmë me këto rezultate dhe të mos e humbim këtë harmoni që kemi.”

MUNGESAT – “Kontigjenti është i plotë, me vetëm një mungesë, Grent Halili, i cili mungon për shkak kartonash.”

RËNDËSIA E TRE NDESHJEVE E RADHËS – “Çdo ndeshje ne kemi presion, pasi jemi nisur shumë poshtë. Duhet të jemi të kujdesshëm që këtë presion mos ta kthejmë në ankth, por ta shfrytëzojmë në anë pozitive. Nuk është se sezoni i Tiranës varet te këto tre ndeshje e radhës. Besoj se kemi ndeshje goxha, pasi kampionati është ende i gjatë. Duhet të marrim më të mirën ndeshje për ndeshje edhe pastaj do të bëjmë llogaritë.”

GJENDJA E NGO – “Ngo është mirë. Nuk ka ndonjë problem, thjesht lodhja ngaqë kanë qenë ndeshje të ngjeshura. Besoj se edhe pushimi na dha një disfavor, pasi patëm një ritëm të mirë dhe nuk donim të krijonim pushim. Gjithsesi, nuk ishte ndonjë pushim i gjatë dhe na dha edhe një pushim për disa lojtarë që mund të kenë pasur mbingarkesë.”

“Kupa kë një specifikë tjetër nga kampionati, ku 90 minuta vendosin. Këtu duhet të luajmë edhe me llogaritë e ndeshjes së dytë, që do të thotë që nuk mund të kalojmë në aventurë që në ndeshjen e parë. Duhet të jemi shumë të kujdesshëm, sepse na jep mundësinë edhe ndeshje e kthimit të kemi kohë për rikuperim e takimit”, u shpreh fillimisht Xhafa, i cili më tej foli edhe për çështje të tjera në kampin bardheblu.

KRIZA E FLAMURTARIT – “Ne nuk shohim në shtëpinë e tjetrit, shohim problemet tona. Flamurtari mund të ketë probleme nga më të ndryshmet, ama kontingjenti, stafi, trajneri janë ata që mbyllën kampionatin. Nuk mendoj se një lojtar kur futet në fushë mendon problemet që ka. Ai futet dhe jep më të mirën për të marrë atë rezultat që kërkon”.

“Pritshmëritë në ndeshjen e nesërme? Nuk presim diçka ndryshe, por të jemi po ata dhe të mos i jetë ulur përqendrimi lojtarëve. Ndeshjen e fundit pati entuziazëm dhe luftë nga ekipi ynë. Presim të njëjtën gjë nga futbollistët tanë. Po nuk na u përgjigj ekipi ynë, nuk presim nga kundërshtari. Ata bëjnë lojën e tyre dhe bëjnë llogaritë e tyre. Duhet të jemi të kujdesshëm te kjo pjesë”.

KONTIGJENTI – “Trajneri është shprehur normalisht. Besoj se edhe ekipet e vendeve të para, po t’i pyesësh, besoj se kanë nevojë për 2-3 përforcime. Gjithmonë është mirë që të kesh sa më shumë. Ne besoj jemi të kënaqur me atë kontingjent që kemi, do punojmë me atë kontingjent dhe shpresojmë t’u marrim më të mirën. E kemi të mundur t’i përballojmë të dyja kompeticionet”.

“A ka nevojë skuadra për afrime? E thashë edhe më parë, çdo skuadër ka nevojë. Merkato e janarit ka një problem, që nuk të ofron shumë mundësi. Ndonjëherë mendon se po bën përforcime, por merr lojtarë që nuk janë të nevojshëm. Për këtë nuk kemi nevojë. Kemi një kontingjent që them se i përballojmë të dy kompeticionet. Nëse do ishte mundësia për ndonjë lojtarë që do të bënte me të vërtetë diferencën dhe do na bënte punë, do ishim të kënaqur. Përndryshe do ishim mirë”.

SENTAMU – “Është një nga sulmuesit titullarë, ishte në një formë të mirë para se të merrnim pushimet. Ky është një problem i klubit më shumë. Ata merren me të, ne merremi me ata që kemi në dispozicion. Për këtë çështje është klubi që po interesohet”.

PUNA SPECIFIKE NË STËRVITJE – “Duke qenë se kam qenë mbrojtës, Mema ma ka dhënë mua mundësinë të merrem me atë repart, me lëvizjet, me harmonizimin e mbrojtjes. Kur ka gjëra specifike për mbrojtjen trajneri ma lë mua dhe merret me pjesën lart të ekipit. Kjo pasi është diçka e imja natyrale”.

OBJEKTIVAT DHE DONATORI I RI – “Nuk mund të flas për objektiva afatgjatë. Tirana luan për të marrë më të mirën në çdo ndeshje. Pas çdo ndeshje bëjmë llogaritë. Më pas mund të flasim për llogari”.

“A kanë ndikuar te lojtarët lajmet se do të ketë donator të ri në klub? Nuk e besoj, Tirana e ka një president. Vjen apo nuk vjen donator, kjo është një pjesë më shumë e drejtuesve se sa e lojtarëve  dhe e stafit. Jemi të përqendruar te puna jonë, me këtë pjesë ka kush merret. Lojtarët kanë kontrata me një president dhe ai përgjigjet”.

“Miqësorja me Skënderbeun ishte konceptuar nga ana jonë më shumë si një seancë stërvitore dhe rezultati 1-2 nuk ka rëndësi për ne. Ishte një seancë stërvitore e mirë, ku mbi gjithçka, skuadra mori ngarkesën që ne kishim menduar. Sepse për ne kjo periudhë stërvitore më tepër ka intensitet, se sa ngarkesa”, kështu theksoi fillimisht Erjon Xhafa në deklarimin e tij për SportEkspres.com.

Në këtë periudhë dimërore me mot të ftohtë e me reshje shiu e bore, Tirana nuk është ndikuar prej tyre. Zëvendëstrajneri bardheblu tregon se programi vazhdon të zbatohet me seriozitet nga të gjithë. “Në këtë periudhë ne nuk jemi trembur nga kushtet e rënduara të motit. Ekipi ka reaguar mirë, duke arritur një gjendje të kënaqshme në të gjithë treguesit. Gradualisht do të ulen ngarkesat fizike në këto 20 ditë deri në rifillimin e kampionatit”.

Për merkaton ende nuk ka ndonjë emër konkret te Tirana, por Xhafa deklaron se nga ana e drejtuesve ka biseda me futbollistë të Superiores. Ndërsa rinisja e gjysmës së dytë të sezonit me ndeshjet e Kupës së Shqipërisë ai deklaron se nuk është shumë eksperimentale për skuadrën.

“Drejtuesit e Tiranës janë në biseda me disa lojtarë të Superiores, por qëllim është që të afrohen lojtarë cilësorë. Ndërsa Kupa është një nga objektivat e Tiranës në këtë sezon dhe nuk do të jetë eksperimentale përballja me Flamurtarin”, u shpreh Xhafa.

AGRON KAJA