Në analizën e bërë nga biznesmeni i njohur u diskutua mbi paketën e reformës që po përgatitet të implementohet në futbollin shqiptar. Ndër të tjera Kokëdhima nuk la pa “thumbuar” edhe kryebashkiakun e Tiranës, Erion Veliaj.

REFORMA – “Shqetësimi që kam unë është se qeveria nuk ka një vizion të drejtë për reformën në futboll. Ekonomia botërore e futbollit është një ndër më të mëdhatë dhe është një ndër ekonomitë me rritje të shpejtë, ndërsa futbolli në Shqipëri është i varfër, mjerat, i prapambetur, informal në të zezë dhe pa infrastrukturë. Përpjekjet e FSHF-së janë shumë më mbresëlënëse se sa pala e qeverisë. Qeveria duhet të reflektojë në përgjegjësitë e saj, të gjitha qeveritë e kanë braktisur këtë sferë të rëndësishme të shoqërisë”.

“Klubet profesioniste të Shqipërisë duhet të jetë në të shoqëri të së drejtës tregtare. Licencimi duhet të vendosë këtë standard të ri. S’duhet të kemi gjëra të s’kanë sens si te Flamurtari ku presidenti aktual ka në përdorim stemën dhe asetet, por pronësia është e bashkisë që s’do t’ia dijë për asgjë”.

APOLONIA –  “Është një shoqëri aksionere. Klub me kapitale e me vlera të njohura sipas ligjit. Nuk ka asgjë gjë të zezë, çdo gjë deklarohet. Marrëdhëniet bazohen në kontrata dhe fatura të rregullta. Apolonia është një model përsa i përket raportit dhe marrëdhënies se si duhet ndërtuar një shoqëri sportive në Shqipëri”.

PRIVATIZIMI DHE ASETET E KLUBEVE – “Shteti jonë ka shitur pasuri të pafundme strategjike për një euro. Kompani, banka, territore dhe kur vjen puna qeveria nuk u jep klubeve me 1 dollar terrene sportive, këto terrene nuk mund të ndryshohen e të bëhen pallate. Këto asete klubet do t’i zhvillojnë”

AMNISTIA – “Paratë që hidhen në futbollin shqiptar nuk merren mbrapsht. Çfarë futbolli është ky. Duhen incentiva për investime në sport, amnisti për kamat vonesat tatimore, por jo për sigurimet e prapambetura. Nuk jam i idesë që sportet elitare të përjashtohen nga taksat, nuk jam për taksa 0. Futbolli në veçanti duhet të ketë taksën 6% të sheshtë, aq sa bujqësia. Kjo gjë do të ndihmojë formalizimin. Po të modelojmë një treg me rregulla dhe barazimi mund të krijojë një ekonomi që mund të lulëzojë. Reforma duhet që t’i vendosë të gjitha klubet në kushte të barabarta. Ka nevojë për një fillim të lirë”.

“Futbolli duhet të bëhet treg fitimprurës. Klubet që nuk janë të pasura nuk zhvillojnë dot futbollistë të mirë, nuk marrin dot para nga tregu botëror i futbollit. Po flasim për një pasuri të madhe kombëtare. Tani po hedhim para në një vrimë të zezë, nuk mund të vazhdohet kështu”.

KANDIDATURA  PËR BASHKINË E TIRANËS – “Kryetari aktual pas katër vitesh nuk ka kuptuar asnjë përveç se të hedhë në shitje disa aksione të pavlera të Tiranës, gjë që e deklaroi pak ditë më parë. Për çdo impiant sportiv të ri që duhej bërë nga privati, qeveria duhet të jepte 30% të investimit donacion. Po të bëhem unë kryetar i Bashkisë së Tiranës nuk mund të ndodhi që të mos bëhen 100 impiante për Tiranën në katër vite, si mund të mbajë Tirana me kaq fusha 350 mijë fëmijë. Çdo investim në impiant sportive do të ketë 30% vlerës donacion nga buxheti i Bashkisë. Ai ka mendjen vetëm për t’u pasuruar vetë. Fola më parë për një impiant stërvitor me vlerë 3 milionë euro të një çifti në Tiranë (Football Republic), Bashkia s’ka pasur lidhje fare me atë investim, e ka braktisur”.

Por Tirana nuk financohet vetëm nga presidenti aktual. Bashkia e Tiranës ka 36% të aksioneve, që prej kohësh është thënë se do të dalin në shitje. Që të ndodhë diçka e tillë duhet bëër një vlerësim i tyre dhe një procedurë e tillë nuk dihet të ketë nisur.

Erjon Veliaj, kryebashkiaku i Tiranës, është nga ata që i pëlqen të flasë. Prej kohësh ka thënë se jo vetëm Tirana meriton të marrë të ardhura nga bashkia, por asnjë lëvizje konkrete për të dhënë qoftë edhe një qindarkë për klubet e tjera. Gjithsesi të mbetemi te shitja e aksioneve, për të cilat Veliaj është rikthyer të flasë.

“Na është kërkuar edhe nga aksioneri i shumicës, por edhe nga tifozët që klubi të jetë i lirë, të marrë vendimet e veta. Ne do t’i ofrojmë për shitje ato aksione. Besoj se me atë kënaqen të gjithë. Nuk ka asnjë alibi për vendimmarrje. Për sa kohë që kanë 100 % të vendimmarrjes së tyre, t’i marrin dhe aksionet e Bashkisë, nuk kam asnjë problem”, është shprehur për ABC News kryebashkiaku Veliaj. Se kur do të shiten aksionet, nuk ka asnjë afat. Politika, si zakonisht nuk vendos dot…