Erisildo Smaci

Apolonia “pazar” te Laçi, transferon një mesfushor

Sport Ekspres — Fri, 19 Jul 2019 13:23:16 +0000

Artan Mergjyshi po ideon Apoloninë e sezonit të ri dhe njohjet e vjetra janë pjesë e projektit të tij. Së fundmi ai u ka kërkuar drejtuesve të bindin mesfushorin Erisildo Smaçi dhe i riu ka nënshkruar dhe do të jetë pjesë e fierakëve sezonin e shkuar.

Mergjyshi e ka pasur futbollistin në fjalë nën urdhrat e tij kur ishte pjesë e Laçit sezonin e shkuar. Smaçi, i cili ka qenë pjesë e moshave të Partizanit dhe Brians, sezonin e fundit ka qenë i pafat. Ai vjen nga një dëmtim që e la jashtë për një kohë të gjatë, pasi iu desh të bënte një ndërhyrje në ligament.

Me kurbinasit Smaçi luajti vjet 11 ndeshje si zëvendësues, ndërkohë që më parë ka qenë i huazuar te skuadra e Shënkollit. Aty ai u aktivizua rregullisht në 14 takime dhe shënoi një gol në gjysmën e dytë të sezonit 2017-18. Në Fier 21-vjeçari pret të ketë hapësira dhe të kthehet në një lojtar të rëndësishëm.

Dëmtimi në gju, operohet mesfushori i Laçit

Sport Ekspres — Mon, 21 Jan 2019 20:47:45 +0000

Janë disa lojtarët më probleme te Laçi. I pari që pritet të rikthehet gati është mesfushori Bojan Najdenov, i cili javën e ardhshme me shumë mundësi do të lërë seancat veçmas skuadrës dhe do vihet nën urdhrat e trajner Besnik Prenga.

Ivan Galiç ndërkohë vijon me fazën e rikuperimit dhe shpresohet që në muajin mars të jetë gati. I dëmtuari i fundit ka qenë mesfushori Erisildo Smaçi. Një dëmtim në gju e ka penalizuar të riun, i cili ka kryer një ndërhyrje.

Kështu Smaçi do të qëndrojë disa muaj jashtë fushave të blerta. Operimin e ka kaluar me sukses dhe klubi kurbinas i ka uruar rikthim sa më të shpejtë. Mesfushori do të jetë nën mbikëqyrjen e stafit mjekësor deri në rikuperimin e plotë.

Rikthehet Bojan Najdenov, një nga të rinjtë me probleme

Sport Ekspres — Sun, 13 Jan 2019 13:13:29 +0000

Laçi zhvilloi ditën e djeshme miqësoren e dytë me Tiranën, që e fitoi me rezultatin e pastër 2-0. Kjo përballje u zhvillua në Kamzë, ndërkohë që si spektator ishte mesfushori maqedonas Bojan Najdenov. Numri 10 i kurbinase e ndoqi nga shkallët këtë përballje dhe pret rikuperimin e plotë për të qenë gati për trajnerin Besnik Prenga.

Najdenov u dëmtua në ndeshjen me Kastriotin dhe iu desh të bënte një ndërhyrje në një nga gishtat e këmbës, çka bëri që javët e fundit të fazës së dytë të mos ishte në dispozicion të stafit teknik. Tashmë ai është rikthyer në Shqipëri dhe ka nisur përgatitjet i diferencuar.

Do të duhen rreth dy javë që të përfshihet me grupin dhe më pas do të jetë stafi teknik që do të vendosë se kur do të aktivizohet. Së fundmi ka pasur probleme për një nga të rinjtë e Laçit, konkretisht për mesfushorin Erisildo Smaçi.

I riu ka pësuar një dëmtim në gju dhe në ditët në vijim do të mësohet saktësisht se sa kohë do të qëndrojë jashtë fushave të blerta. Minimalisht dy muaj ai nuk do të jetë i gatshëm, pasi ka probleme me meniskun dhe me shumë mundësi do të operohet.