Erik Abidal

Juventus, Inter dhe PSG “mbesin thatë”, Rabiot merr vendimin final

Sport Ekspres — Wed, 21 Nov 2018 14:05:47 +0000

Situata e Adrien Rabiot nuk po gjen zgjidhje prej kohësh. Mesfushorit francez i mbaron kontrata me PSG në qershor, ndërsa marrëveshja për rinovim nuk është arritur. PSG po bën të pamundurën për të bindur lojtarin të rinovojë dhe të qëndrojë në kryeqytetin francez, por ai e ka ndarë mendjen për t’u larguar.

Për shërbimet e 23-vjeçarit interesohen shumë klube, sidomos Interi dhe Juventusi, që kanë nisur një luftë në distancë për lojtarin. Por, lajmet që vijnë nga Spanja nuk janë pozitive për dy klubet italiane. Siç citon “El Mundo”, lojtari e ka vendosur të ardhmen e tij.

Mamaja e Rabiot, njëkohësisht dhe menaxherja e tij, i ka dhënë fjalën Erik Abidalit, drejtorit sportiv të Barcelonës. Katalanasit e ndjekin prej kohësh francezin dhe Abidal ka patur negociata të shumta me mamanë e lojtarit. Familja Rabiot e ka marrë vendimin final më në fund dhe mesfushori pritet të kalojë në verë në Spanjë për të nisur aventurën e tij me Barcelonën.

“Bomba” e merkatos | Takimi sekret, Pol Pogba drejt Spanjës

Sport Ekspres — Wed, 01 Aug 2018 08:37:12 +0000

Pol Pogba dhe Mançester Junajtid duken larg njëri-tjetrit. Krisjet e sezonit të fundit të mesfushorit me teknikun Zhose Murinjo kanë ndikuar te lojtari, i cili mendon për një aventurë të re. Deri më tani Juventusi është lakuar si klubi më i interesuar për kampionin e botës.

Por nuk janë të vetmit, madje që bardhezinjtë ta rikthejnë francezin duhet të shesin dy lojtarë: Sturaron dhe Pjaniç. Në mesfushë do të hapej vend për Pogba, ndërkohë që edhe në klub do të kishte të ardhura të mjaftueshme për të bërë një transferim “big”. Afrimi i Kristiano Ronaldos i bën bardhezinjtë të mendojnë edhe për të shitur.

PRAPASKENA – Në lojë është futur edhe Barcelona për të përfituar shërbimet e Pol Pogba. Është thënë edhe më parë që Mino Rajola ia ka ofruar mesfushorin katalanasve. Tanimë “Tuttosport” shkruan edhe për një takim në Los Anxheles të Erik Abidal me francezin.

Nuk bëhet fjalë vetëm për një takim midis miqsh, por diçka më tepër. Barcelona është në kërkim të një mesfushori qendror dhe Pol Pogba mund të jetë një opsion tani. Gjatë kësaj periudhe është tentuar të merret Adrien Rabiot i PSG, por ende nuk ka një marrëveshje për të, ndaj edhe katalanasit po studiojnë edhe pista të tjera.

Takimi me Pogba është bërë në një vilë private, për të shmangur ekspozimin, pasi momentalisht mesfushori është nën kontratë me Mançester Junajtid, që ka shpenzuar një shifër rekord për transferimin e tij.

Kushëriri i Abidal thyen heshtjen: Dhurova mëlçinë për të shpëtuar familjarin tim

Sport Ekspres — Fri, 27 Jul 2018 17:13:59 +0000

Gjithçka nisi pas një përgjimi të telefonit të Sandro Rosell, ish-presidentit të Barcelonës. “Kemi siguruar një mëlçi të paligjshme për Erik Abidal”, ishte thelbi i deklaratës së përgjuar. Prokuroria spanjolle ka hapur një hetim dhe dëshiron të zbulojë identitetin e dhuruesit.

Dhuruesi i vërtetë i mëlçisë së Abidal është Xherard Armand, kushëriri i parë më ish-mbrojtësin francez. Në një deklaratë për “LaDepeche”, ai ka sqaruar pozicionin e tij dhe tregon se si ka ndodhur ngjarja.

“Nuk kam marrë asnjë cent. Unë veprova në atë mënyrë për të shpëtuar jetën e një familjari. Unë shkova në Barcelonë për të kryer një sërë analizash. Mjekët më konfirmuan që profili im përkonte me atë të Erikut. Një mik i tij ishte gjithashtu gati për ta ndihmuar, por mëlçia ime shumë më e madhe. Mjekët vendosën të marrin një pjesë të organit tim.

Mbaj mend që gjithçka kam nënshkruar ka ndodhur para një gjykatësi në Barcelonë. Gjithçka e kemi kryer në transparencë. Operacionin e kam zhvilluar në prill dhe kam kaluar tri javë në spital dhe katër të tjera në qytet. Jam i gatshëm të përballem me drejtësinë dhe do iu përgjigjem të gjitha pyetjeve, mjafton që të na lënë të qetë dhe kjo histori të marrë fund”, mbylli deklaratën e tij Armand, djali i dajës së Erik Abidal.